Ɔlɔlɔ la kɔlɔ: Ɔsɔnwɛlɔ wahombayɛ nsala
Atɔndɔ wendana la lɔkɛwɔ wasɔnaso dia ndjela wayonga la shɛngiya ya wolo lo woho wayonga lɔsɛnɔ laso. Jehowa Nzambi mbeyaka dui sɔ. Diakɔ dialangande dia sho nsɛna lo ndjela ɛlɛmbɛ ande.
Jehowa nangaka dia sho monga la lɔsɛnɔ la wɔladi ndo l’ɔngɛnɔngɛnɔ.
“Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, Ɔnɛ lakɔlɔmbɔla lo mboka kahombayɛ nkɛndakɛnda. Otoyodja yimba lo ɛlɛmbɛ ami lee! Tshike wɔladi ayɛ wotonga oko ɔkɛdi w’ashi ndo losembwe layɛ oko asuku wa ndjale.”—Isaya 48:17, 18.
Oko wende Otungi aso, Nzambi mbeyaka yoho yoleki dimɛna yahombaso nsɛna. Nde tɔlɔmbaka dia sho ndjela ɛlɔmbwɛlɔ kande nɛ dia dui sɔ diekɔ lo wahɔ aso. Etena kakitanyiyaso ɛlɛmbɛ wa Nzambi, sho hatotonga la taamu dia kana ɔsɔnwɛlɔ aso wayonga l’etombelo w’ɛlɔlɔ. Tayosalaka nshi tshɛ ɛsɔnwɛlɔ w’amɛna wakonya lo wɔladi ndo l’ɔngɛnɔngɛnɔ.
Jehowa hatɔlɔmbɛ dia nsala kɛnɛ kahatakoke nsala.
“Ɛlɛmbɛ ɛnɛ wamomonyodjangɛ ɛlɔ bu wolo le nyu ndo hawanganyi etale la nyu.”—Eohwelo k’Ɛlɛmbɛ 30:11.
Nsɛna lo ndjela atɔndɔ wa Nzambi wendana la lɔkɛwɔ koka nɔmba dia ntshikitanya yoho yaso ya nkanyiya ndo ya nsala akambo. Koko, Jehowa hatɔlɔmbɛ awui efula amboleka. Laadiko dia laasɔ, oko wende Otungi aso, nde mbeyaka kɛnɛ keso l’akoka wa nsala. Ndo etena keyaso Jehowa, tayɛna dia “ɛlɛmbɛ ande bu wotsho.”—1 Joani 5:3.
Jehowa ndakaka dia nkimanyiya wanɛ wasɔna dia nsɛna lo ndjela ɛlɛmbɛ ande.
“Dimi Jehowa Nzambi kayɛ kokimɛka lo lonya layɛ l’omi, dimi kotɛka nte: ‘Tokake wɔma. Dimi layokokimanyiya.’”—Isaya 41:13.
Sho koka nsɛna lo ndjela atɔndɔ waki Nzambi wendana la lɔkɛwɔ nɛ dia nde ayotokimanyiya. Nde koka tokimanyiya lo tshimbo y’Ɔtɛkɛta ande, Bible, katokeketsha ndo katosha elongamelo.
Miliyɔ y’anto wa l’andja w’otondo wakashihodia dia nsɛna lo ndjela atɔndɔ wa lo Bible, wakalowanya nsɛnɔ yawɔ. Lande na kahateke awui akina efula wendana l’alako w’amɛna washa Bible asɔ? Wɛ koka ntatɛ nsɛdingola biukubuku yalembetshiya Bible yele l’ɔtɛ a dui ɔnɛ: Ngɛnangɛnaka la lɔsɛnɔ pondjo pondjo! aha la mfuta falanga, yatanema lo jw.org. Yɔ yekɔ la wekelo ɛnɛ:
Ngande wakoka Bible kokimanyiya?
Bible mbishaka elongamelo
Onde wɛ mbetawɔka dia kɛnɛ kata Bible kekɔ mɛtɛ?
Etena kasalayɛ eyangelo l’Ɔtɛkɛta wa Nzambi, Bible, wɛ ayoshola dia tɔ katete loowe; “Tena tshɛ [tɔ] sunganaka mbɛkɛ otema, kakianɛ ndo pondjo pondjo.” (Osambo 111:8) Ndjela atɔndɔ wendana la lɔkɛwɔ watanema lo Bible mbele yoho yoleki dimɛna le so dia nsɛna. Koko, Nzambi hototshutshuya dia nsala dui sɔ. (Eohwelo k’Ɛlɛmbɛ 30:19, 20; Jashua 24:15) Ɔsɔ ekɔ ɔsɔnwɛlɔ wahomba onto tshɛ la l’atei aso nsala.