Kɛnɛ kakasale Jehowa dia toshimbɛ oma lo pɛkato la nyɔi

1-2. a) Pɛkato kɛdikɛdi na, ndo ngande wakokaso ntondoya dia ndɔshana la tɔ? (Enda ndo “Elembetshielo wa tɔtɛkɛta.”) b) Kakɔna kayotɛna lo sawo nɛ ndo l’asawo akina wa lo Tshoto y’Etangelo nyɛ? (Enda ndo “Diewoyelo le ambadi” lo numɛlɔ kɛnɛ.)

ONDE wɛ nangaka mbeya polo lo yɛdikɔ yakooka Jehowa Nzambi ngandji? Yoho ya dimɛna ya ntana okadimwelo wa dimbola sɔ yɔ nyɛ: Eka dia mbeya kɛnɛ kakandasale dia koshimbɛ oma lo pɛkato la nyɔi. Pɛkatoa ekɔ otunyi wa kɔlɔ efula wahayakoke nɛndja la wolo ayɛ hita. Sho tshɛ salaka pɛkato lushi la lushi ndo oko weso atshi wa pɛkato, sho mvɔka. (Rɔmɔ 5:12) Koko lokumu lɔmɔtshi l’ɔlɔlɔ lekɔ. Diɛsɛ l’ekimanyielo ka Jehowa, sho koka nɛndja pɛkato. Ndooko onyake, tayodja pɛkato otshumba!

² Aya ɛnɔnyi oko 6000 wakimanyiya Jehowa Nzambi anto dia ndɔshana la pɛkato. Lande na? Nɛ dia Jehowa tookaka ngandji. Jehowa akoke anto ngandji oma ko etena kakandaatonge ndo l’ɔtɛ w’efula ka ngandji kawaokande, nde ambosala awui efula dia mbakimanyiya dia ndɔshana la pɛkato. Nzambi mbeyaka dia pɛkato konyaka lo nyɔi ndo nde halange sho mvɔ. Nde nangaka dia sho sɛnaka pondjo pondjo. (Rɔmɔ 6:23) Kɛsɔ mbalangande lo dikambo diayɛ. Lo sawo nɛ, tayokondja ekadimwelo lo ambola asato anɛ: 1) Elongamelo kakɔna kakasha Jehowa atshi wa pɛkato? 2) Kakɔna kakasale atshi wa pɛkato wa lo nshi yakafundamaka Bible dia mbetawɔma le Jehowa? 3) Kakɔna kakasale Yeso dia nshimbɛ atshi wa pɛkato oma lo pɛkato?

ELONGAMELO KAKƆNA KAKASHA JEHOWA ATSHI WA PƐKATO?

3. Ngande wakayokoma ambutshi aso wa ntondo atshi wa pɛkato?

³ Etena kakatonge Jehowa pami la womoto la ntondo, nde akalange dia vɔ monga l’ɔngɛnɔngɛnɔ. Nde akawasha dihole dia dimɛna dia mbidjasɛ, woshasha wa diwala ndo ɔkɛndɛ wa dimɛna efula. Vɔ wakahombe ndodia nkɛtɛ la tokanula tawɔ dia mbetɛ okama wa nkɛtɛ w’otondo paradiso, oko waki ekambɔ k’Ɛdɛna. Nde akawasha ɔlɛmbɛ ɔtɔi oto. Ndo nde akaahɛmɔla dia naka vɔ mpindola ɔlɛmbɛ ɔsɔ lo mbɔtɔmbɔkwɛ, kete pɛkato kawɔ kayowakonya lo nyɔi. Sho mbeyaka kɛnɛ kakete. Etongami kɛmɔtshi kahɛnama, ɔnɛ laki kombaokaka oyadi vɔ kana Nzambi ngandji, akahembe Adama l’Eva dia vɔ tɔmbɔkwɛ Nzambi. Adama l’Eva wakasale kɛnɛ kakalange ondjelo wakatɔmbɔkɔ ɔsɔ dia vɔ nsala. Oko wakiwɔ kondjaɛkɛ le Shɛwɔ ka ngandji, vɔ wakasale pɛkato. Oko wadieyaso, kɛnɛ kakate Jehowa kakakotshama. Ntatɛ lushi lɔsɔ, vɔ wakadiɛnɛ l’etombelo wa kɔlɔ wele oko: Vɔ wakatatɛ ntshunda ndo l’ekomelo vɔ wakayovɔka.—Eta. 1:​28, 29; 2:​8, 9, 16-18; 3:​1-6, 17-19, 24; 5:5.

4. Lande na kahetsha Jehowa pɛkato ndo katokimanyiyande dia ndɔshana la tɔ? (Rɔmɔ 8:​20, 21)

⁴ Jehowa aketawɔ di’ɔkɔndɔ ɔsɔ fundama lo Bible dia sho nshihodia dui dimɔtshi di’ohomba. Vɔ tokimanyiyaka dia sho nshihodia polo lo yɛdikɔ yahetshande pɛkato. Pɛkato tokakitolaka la Shɛso ndo tɔ konyaka lo nyɔi. (Isa. 59:2) Diakɔ diele etongami kɛmɔtshi ka lo nyuma kakatɔmbɔkɔ, mbuta ate Satana lakafukutanya awui tshɛ, nangaka pɛkato ndo nde tshutshuyaka anto dia nsala pɛkato. Nde koka mfɔnya dia nde akadje otshumba wa woke l’Ɛdɛna. Koko nde koshihodia woho wele ngandji ka Jehowa. Nzambi kotshikitanya sangwelo diande diendana la tokanula t’Adama l’Eva. Nde mbokaka anto ngandji, diakɔ diele mbala kakɔ ɔtɔi, nde akasha anto tshɛ elongamelo. (Adia Rɔmɔ 8:​20, 21.) Jehowa akeyaka di’anto amɔtshi wayowoka ngandji ndo wayoyanga ekimanyielo oma le nde dia ndɔshana la pɛkato. Ndo oko wende Shɛwɔ ndo Otungi, Jehowa akasale dui diayokimanyiya anto asɔ dia ntshungɔ oma lo pɛkato ndo ndjasukanya la nde. Jehowa akandahombe nsala dia dui sɔ salema?

5. Etena kakɔna kakasha Jehowa atshi wa pɛkato elongamelo ka ntondo? Lembetshiya. (Etatelo 3:15)

⁵ Adia Etatelo 3:15. Jehowa akasha anto elongamelo ka ntondo lam’akandate kɛnɛ kayokomɛ Satana. Nzambi akate dia “kanula” mɔtshi yayoshimbɛ anto. Kanula shɔ yayolanya Satana lo yoho mɔtshi ndo yayɔlɔngɔsɔla kɛnɛ tshɛ kakandalanya l’Ɛdɛna. (1 Jni. 3:8) Koko ntondo, Satana akahombe ‘numata’ kanula shɔ, mbuta ate mbodiaka. Dui sɔ diakahombe nyangiya Jehowa efula. Koko Jehowa aketawɔ dia ndjasha paa kɛsɔ ndo dia “kanula” shɔ nsowa dia nshimbɛ anto!

NGANDE WAKAKOKE ATSHI WA PƐKATO WA LO NSHI YAKAFUNDAMAKA BIBLE MBETAWƆMA LE JEHOWA?

6. Kakɔna kakasale apami waki la mbetawɔ wele oko Aabɛlɛ la Nɔa dia ndjasukanya la Jehowa?

⁶ L’edja k’ɛnɔnyi nkama wakayele, Jehowa akayalekaka mɛnya yema yema woho wakoka atshi wa pɛkato ndjasukanya la nde. Aabɛlɛ, ɔna Adama l’Eva la hende mbaki onto la ntondo la mɛnya mbetawɔ l’ɔkɔngɔ w’ɔtɔmbɔkwɛlɔ wa l’Ɛdɛna. Lam’ele Aabɛlɛ akokaka Jehowa ngandji ndo akalangaka nsukana la Nde, nde akoolambola olambo. Aabɛlɛ aki olami w’ɛkɔkɔ, ɔnkɔnɛ nde akɔshi ɛsɔngɔ w’ɛkɔkɔ ɛmɔtshi, akaadiake ndo akalambola Jehowa olambo. Kakɔna kakasale Jehowa? Nde “aketawɔ Aabɛlɛ la olambo ande.” (Eta. 4:4) Jehowa akɛnya woho wakandetawɔ elambo wa woho akɔ waamɛ wakoolambola anto wawoka ngandji ndo wayaɛkɛ le nde, ɛnyɛlɔ oko Nɔa. (Eta. 8:​20, 21) Lo mbetawɔ elambo wa ngasɔ, Jehowa akɛnya di’atshi wa pɛkato koka mbetawɔma le nde ndo ndjasukanya la nde.b

7. Wetshelo akɔna wakondjaso lo woho waketawɔ Abrahama dia nambola ɔnande?

⁷ Jehowa akalɔmbɛ Abrahama, pami kaki la mbetawɔ k’efula dia nsala dui dimɔtshi dia wolo efula, mbuta ate mbolambola Isaka y’ɔnande. Dui sɔ diakasha Abrahama lɔkɔnyɔ woho w’anyanya. Koko, nde aketawɔ nkitanyiya Jehowa. Koko lam’aki Abrahama suke la ndjaka ɔnande, Jehowa akooshimbe. Ndo dui sɔ tetshaka kɛnɛ kakahombe Jehowa ndjosala. Jehowa aketawɔ dia nkimɔ Ɔnande la ngandji oko olambo. Jehowa mbokaka anto ngandji k’efula.—Eta. 22:​1-18.

8. Wetshelo akɔna wakondjaso l’elambo wakalambɔmaka lo ndjela Ɛlɛmbɛ? (Akambo w’ase Lɛwi 4:​27-29; 17:11)

⁸ Ɛnɔnyi nkama l’ɔkɔngɔ, Ɛlɛmbɛ wakayosha Jehowa ase Isariyɛlɛ wakalɔmbaka di’anto nambola elambo wa nyama dia pɛkato yawɔ dimanyiyama. (Adia Akambo w’ase Lɛwi 4:​27-29; 17:11.) Elambo ɛsɔ wakɛnyaka dia Jehowa ayokimɔ olambo woleki tshɛ wayotshungola anto tshɛ lo tshɛ oma lo pɛkato. Amvutshi wa Nzambi wakasokoyama la nyuma dia mfunda dia kanula yakalakema, mbuta ate Ɔna Nzambi la laande ayosoyama ndo ndjakema. Nde ayodiakema woho wakadiakemaka ɔkɔkɔ wakawalambolaka olambo. (Isa. 53:​1-12) Ohokanyiya yema: Jehowa akalɔngɔsɔla dia nambola Ɔnande oko olambo dia nshimbɛ anto oma lo pɛkato la nyɔi, mbidja ndo wɛ!

KAKƆNA KAKASALE YESO DIA NSHIMBƐ ATSHI WA PƐKATO?

9. Kakɔna kakate Joani Obatizanyi lo dikambo dia Yeso? (Hɛbɛru 9:22; 10:​1-4, 12)

⁹ Lo ntambe ka ntondo T.D., okambi wa Nzambi Joani Obatizanyi akɛnyi Yeso y’ose Nazarɛtɛ ndo akate ate: “Enda Ɔna Ɔkɔkɔ wa Nzambi ɔnɛ lanya pɛkato ya l’andja!” (Jni. 1:29) Ɛtɛkɛta wakasambiyama ɛsɔ mɛnyaka dia Yeso mbele kanula yakalakema deko aha nɛ. Yeso akahombe nambola lɔsɛnɔ lande. L’ekomelo a shimu, kanula ya Jehowa yakalakema akaye dia ndjotshungola anto tshɛ lo tshɛ oma lo pɛkato.—Adia Hɛbɛru 9:22; 10:​1-4, 12.

10. Ngande wakɛnya Yeso dia nde ‘akaye ndjoyanga’ atshi wa pɛkato?

¹⁰ Yeso akaleke ndjasha ntondo dia nkimanyiya anto wakayaokaka kɔlɔ l’ɔtɛ wakiwɔ atshi wa pɛkato ndo akawaelɛ dia vɔ nkoma ambeki ande. Nde akeyaka di’ɔkɔkɔ wa mɛtɛ wasowa anto ele l’ɔtɛ wa pɛkato. Diakɔ diakandakimanyiya lo yoho ya laande apami ndo wamato wakeyamaka oko atshi wa pɛkato. Lo nkamba la wɛɛla ɔmɔtshi, nde akate ate: “Anto wele alemba ki hawotoyangaka onganga, paka anto wele la hemɔ.” Nde akakotsha ate: “Dimi lakaye ndjoyanga, aha anto w’ɛlɔlɔ, koko atshi wa pɛkato.” (Mat. 9:​12, 13) Ndo kɛsɔ mɛtɛ mbakasale Yeso. La ngandji tshɛ, nde akadimanyiya womoto lakoosole ekolo l’asɔyi. (Luka 7:​37-50) Nde aketsha womoto l’ose Samariya akambo wa mɛtɛ w’ohomba efula l’ɛtɛkɔ, kaanga mbakandeyaka dia nde mbidjasɛ la pami kele bu omɛnde. (Jni. 4:​7, 17-19, 25, 26) Nzambi akasha Yeso wolo wa nshidiya etombelo woleki tshɛ kɔlɔ w’oma lo pɛkato, mbuta ate nyɔi. Lo ngande? Yeso akoolola anto, apami, wamato, ana ndo epalanga.—Mat. 11:5.

11. Lande na kakayaokaka atshi wa pɛkato dimɛna lale Yeso?

¹¹ Mbokɛmaka lande na kele kaanga anto wakadinde tshavu lo pɛkato wakakotɔmaka oya le Yeso. Nde akawaokaka kandji ndo kɛtshi. Vɔ wakayaokaka dimɛna lalende. (Luka 15:​1, 2) Yeso akaandola anto asɔ ndo akaafute lo woho wakiwɔ la mbetawɔ le nde. (Luka 19:​1-10) Yeso akakɛnɛmɔla woho wa kɛtshi kele la She. (Jni. 14:9) Oma l’ɛtɛkɛta ndo l’etsha, nde akɛnya dia She kokana kandji ndo kɛtshi mbokaka anto ngandji ndo nangaka mbakimanyiya dia vɔ ndɔshana la pɛkato. Yeso akakimanyiya atshi wa pɛkato dia vɔ nsala etshikitanu ndo mboyela.—Luka 5:​27, 28.

12. Kakɔna kaketsha Yeso lo dikambo dia nyɔi kande?

¹² Yeso akeyaka kɛnɛ kakookongɛka. Nde akatɛ ambeki ande mbala efula dia nde ayofungama ndo ayodiakema l’otamba. (Mat. 17:22; 20:​18, 19) Nde akeyaka di’olambo ande wayonya pɛkato oma l’andja ɔnɛ oko wakewoya Joani ndo oko wakatatshi amvutshi. Yeso aketsha nto dia l’ɔkɔngɔ wa nkimɔ lɔsɛnɔ lande oko olambo, nde ayohomba ‘nkotola weho w’anto tshɛ’ oya le nde. (Jni. 12:32) Atshi wa pɛkato koka ngɛnyangɛnya Jehowa lo mbetawɔ Yeso oko Nkumɛwɔ ndo ndjela wanya ande. Naka vɔ nsala ngasɔ, kete ‘wayotshungɔ oma lo pɛkato.’ (Rɔmɔ 6:​14, 18, 22; Jni. 8:32) Ɔnkɔnɛ Yeso aketawɔ la lolango lande dia ntokomɛ nyɔi ka kɔlɔ efula la dihonga tshɛ.—Jni. 10:​17, 18.

13. Ngande wakavu Yeso ndo kakɔna katetsha nyɔi kande lo dikambo dia Jehowa Nzambi? (Enda ndo osato.)

¹³ Yeso akafungama, akandama, wakɔɔtɛngɛ, wakoomamatanyiyɛ akambo wa kashi, wakɔɔsɛkɛɛ nyɔi ndo wakɔɔsɔkisha. Asɔlayi wakatshu la Yeso lo dihole diakandahombe ndjakema ndo wakɔɔkɔkɔla nsɛti l’otamba. Etena kakandakikɛka la kɔlamelo tshɛ paa kɛsɔ, ekɔ onto ɔmɔtshi lakaleke tshɛ monga la lɔkɔnyɔ. Onto ɔsɔ aki Jehowa Nzambi. Nde aki la wolo ndo la dikoka dia mbekɛ lonya diaha ɔnande nsowa ngasɔ koko nde kosala dui sɔ. Lande na? Kakɔna kakahombe nkonya Ombutshi wele la ngandji dia nsala ngasɔ? Lo tshena pe, ekɔ ngandji. Yeso akate ate: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”—Jni. 3:16.

14. Olambo wa Yeso akɛɛnyawɔ?

¹⁴ Olambo wa Yeso mbele djembetelo yoleki tshɛ ya ngandji kooka Jehowa tokanula t’Adama l’Eva. Vɔ mɛnyaka dia Jehowa kookaka ngandji efula. Nde akakome polo lo mbetawɔ ndjasha paa k’efula dia koshimbɛ oma lo pɛkato la nyɔi. (1 Jni. 4:​9, 10) Eelo, nde nangaka tokimanyiya dia sho ndɔshana la pɛkato ndo mbidja otshumba!

15. Ahombaso nsala dia nkondja wahɔ oma lo woshasha w’olambo w’oshinga w’etshungwelo wa Yeso Kristo wakatosha Nzambi?

¹⁵ Woshasha wakatosha Nzambi, mbuta ate olambo w’oshinga w’etshungwelo w’Ɔnande ɛtɔi lakandote, konyaka dia pɛkato yaso dimanyiyama. Koko dia sho dimanyiyama, sho pombaka nsala dui dimɔtshi. Dui diakɔna? Joani Obatizanyi ndo oma laasɔ Yeso Kristo ndamɛ akakadimola lo dimbola sɔ ɔnɛ: “Nyoyatshumoya, nɛ dia Diolelo dia l’olongo diaya suke.” (Mat. 3:​1, 2; 4:17) Laasɔ, ndjatshumoya ekɔ dui di’ohomba efula naka talanga ndɔshana la pɛkato ndo ndjasukanya la Shɛso ka ngandji. Ko kakɔna kalɔmbama dia ndjatshumoya, ndo ngande watokimanyiya ndjatshumoya dia ndɔshana la woho weso atshi wa pɛkato? Sawo dia wekelo diayela diayokadimola lo ambola asɔ.