Ekongelo ka lo nkumbo ka wekelo wa lo nkumbo
1 Woshasha woleki woke wakokanyu nyu ambutshi wa Akristo mbisha ananyu ele mbakɔkɔmiya ngandji ka Jehowa kele lanyu. Etena kɛmɔtshi k’ohomba efula kakoka dikambo sɔ salema ele “lam’udjashi[nyu] lu luudu la[nyu]” dia sala wekelo wa Bible wa lo nkumbo wa lomingu la lomingu. (Euh. 6:5-7) Oyadi wɛ ekɔ la olonganyi wele ombetawudi, ekɔ lo nsɛna lo nkumbo katɔnyi lo akambo wendana la ɔtɛmwɛlɔ, kana wɛ ekɔ ombutshi wodia anande ndamɛ, wɛ kokaka kimanyiya anayɛ dia vɔ ndjasukanya la yɛ ndo la Jehowa lo salaka wekelo wa lo nkumbo wa mbala la mbala.
2 Nyotate wekelo: Nna dia ntondo ele monga la mbekelo ka mbekaka lo nkumbo. Naka wɛ atashikikɛ wonya wahombama wekelo salemaka, lande na kahanyakɛtshanya dikambo sɔ lo nkumbo? (Tuk. 15:22) Naka wɛ ekɔ la ana weke akɛnda efula, kete wɛ mbeyaka mɛna ɔlɔlɔ mbekaka lawɔ tenyi tenyi lo lomingu. Shikikɛ ekongelo kɔtɔnganɛ la ehomba wa nkumbo kayɛ. Shikikɛ etena shikaa kayosalemaka wekelo lo ekongelo kayɛ ka nkumbo, ndo ɔsa yɛdikɔ ya kiyelaka.
3 Kakɔna kahombanyu mbeka? Amɔtshi nɔngɔsɔlaka wekelo wayowɔsɛdingola lo Wekelo wa dibuku wayaye wa l’etshumanelo kana Wekelo wa Tshoto y’Etangelo. Akina nangaka sɛdingola awui wendana efula la ɛlɔngɔlɔngɔ la esekaseka. Papa kɛmɔtshi kele la ɔna ɔtɔi la pami ndo la womoto akate ate: “Ɛngɔ kɛmɔtshi ketɛ wekelo aso wa lo nkumbo dikambo dialeka ana nanga efula dia lo lomingu ele woho wasɔnaso ɛkɔndɔ oma lo Buku di’ɛkɔndɔ wa lo Bible, ko mbakɛnyaka oko kɛnyɔ. Ɛkɔndɔ ɛsɔ mbangɛnyangɛnyaka efula ndo mbakimanyiyaka dia vɔ ndeka shihodia akambo, woho ɔnɛ wele vɔ hawoyodjaka yimba lo lofulo l’edingɔ lekaso.”
4 Nyekake lomingu tshɛ: Wekelo wa lo nkumbo pombaka salemaka mbala la mbala ndo anto tshɛ wa lo nkumbo pombaka nongamɛka wekelo akɔ la ɔngɛnɔngɛnɔ. Mbala mɔtshi, mbeyaka monga ohomba tshikitanya lushi kana wonya wa wekelo dia kandola ekakatanu wahanyalongamɛ. Lo waaso amɔtshi mbeyaka monga ohomba tshikitanya okanda wekanyu. Koko otshikitanu tshɛ wasalanyu watonyoshimbake dia nyu ndjokalola lo ekongelo ka wekelo wa lo nkumbo kakashikikɛma. Lo nkumbo kɛmɔtshi ɔna womoto ɔmɔtshi akate ate: “Naka wonya aso wa wekelo pombaka tshikitanyema, Papa akahanɛka nshi tshɛ ekongelo kekina lo lokuke la frigo dia onto tshɛ mbeya wonya wa wekelo.” Mbidja welo dia mongaka la wekelo wa lo nkumbo mbala la mbala ekɔ dikambo diandɔma efula! Lama watayôdia anayɛ “lu elembe la lu wetshelu wa Khumadiondjo,” wɛ mɛnyaka ngandji kayɛ otsha le wɔ ndo otsha le Shɛso lele l’olongo.—Ef. 6:4.