Lande na katetemala ata?

PƐKATO

Nzambi akatonge ambutshi aso wa ntondo, Adama la Eva l’efanelo kande. (Etatelo 1:27) Dui sɔ nembetshiyaka dia vɔ wakakoke nkɛnɛmɔla waonga waki Nzambi, mbidja ndo wɔladi la ngandji. (1 Kɔrɛtɔ 14:33; 1 Joani 4:8) Koko, Adama la Eva kokitanyiya Nzambi ndo wakasale pɛkato. Etombelo wele la dui sɔ ele, sho tshɛ takahowɔ pɛkato la nyɔi. (Rɔmɔ 5:12) Lam’ele takahowɔ pɛkato, mbala efula sho koka monga la tokanyi ta kɔlɔ ndo etombelo wele la dui sɔ ele anto efula salaka awui wa kɔlɔ.—Etatelo 6:5; Makɔ 7:​21, 22.

MANDJI Y’ANA W’ANTO

Nzambi kototonga dia sho ndjalɔmbɔlaka shoamɛ. Bible mbutaka ɔnɛ: “Lam’akɛndakɛnda onto, nde bu la lotshungɔ la nɔmbɔla kaanga ekolo ande.” (Jɛrɛmiya 10:23) Diakɔ diele, mandji y’ana w’anto hayokoke nkomiya ata tshɛ lo tshɛ.

SATANA L’ƐDIƐNGƐ ANDE

Bible mbutaka ɔnɛ: “Andja w’otondo wekɔ lo nɔmbɔma oma le kanga kɔlɔ.” (1 Joani 5:19) “Kanga kɔlɔ” ɔsɔ mbelamɛka Satana Diabolo ndo nde ekɔ ondjakanyi. (Joani 8:44) Nde l’ɛdiɛngɛ ande sɛngiyaka anto dia ndɔ ata.—Ɛnyɛlɔ 12:​9, 12.