Ngande wayokomiyama ata?

NZAMBI AYONYA MANDJI Y’ANA W’ANTO

Nzambi ayokomiya mandji y’ana w’anto lo tshimbo ya ta dielamɛ ɔnɛ Aramangɛdɔna.a (Ɛnyɛlɔ 16:16) L’etena kɛsɔ, “nkumi ya dikanga ya lo nkɛtɛ” yayosangana kaamɛ dia “ta dia lushi la woke la Nzambi Kanga-Wolo-Tshɛ.” (Ɛnyɛlɔ 16:14) Aramangɛdɔna ekɔ ta dia Nzambi diayokomiya ata tshɛ.

Nzambi ayɔhɛnya mandji y’ana w’anto la Diolelo diande, kana lowandji layolɛ oma l’olongo ndo lahalanyemaki pondjo. (Danyɛlɛ 2:44) Nzambi akasɔnɛ Ɔnande Yeso Kristo dia monga Nkumekanga ka Diolelo sɔ. (Isaya 9:​6, 7; Mateo 28:18) Diolelo sɔ mbaketshab Yeso ambeki ande dia vɔ nɔmbaka dikambo dia diɔ. (Mateo 6:​9, 10) Anto wa lo nkɛtɛ k’otondo wayonga kaamɛ l’ɛlɔmbwɛlɔ ka lowandji lele Yeso Nkumekanga.

Otshikitanyi l’ɛnɔmbɔdi w’ana w’anto, Yeso hatokamba la lowandji lande lo wahɔ ande hita. Lam’ele nde ekɔ la losembwe ndo bu la shɔnɔdi, ndooko onto layoyakiyanya dia nde ayonyɛma yimba l’ɔtɛ wa lokoho lande la demba, wodja kana mbekelo yande. (Isaya 11:​3, 4) Anto hawotɔlɔsha dia vɔ mbasalɛ awui la losembwe. Lande na? Yeso ayosala tshɛ dia oseka onto tshɛ monga dimɛna. “Nde ayotsha ose wola layanga ekimanyielo, ndo mbolambola la ɔnɛ tshɛ laha l’okimanyedi. . . . Nde ayowatsha oma lo dihɛnyɔki ndo oma l’awui wa ngala.”—Osambo 72:​12-14.

Diolelo dia Nzambi diayonya dihomɔ dia ta diadaka anto oma la nkɛtɛ. (Mika 4:3) Diɔ diayolanya anto wa kɔlɔ tshɛ watona dia ntshika awui w’ata ndo wasalɛ anto akina kɔlɔ. (Osambo 37:​9, 10) Apami, wamato ndo ana wayoyaoka lo wɔladi lo dihole tshɛ diayowonga la nkɛtɛ.—Ɛzɛkiyɛlɛ 34:28.

Anto wayonga la lɔsɛnɔ la dimɛna l’ɛlɔmbwɛlɔ ka lowandji la Nzambi. Lɔ layonya ekakatanu wakonya anto dia ndɔshana, ɛnyɛlɔ wola, ndjala ndo ohombelo w’ahole wa mbidjasɛ. Onto tshɛ ayonga la mbo ya ndɛ tshavutshavu ndo ayonga la dihole dia dimɛna dia mbidjasɛ.—Osambo 72:16; Isaya 65:​21-23.

Diolelo dia Nzambi diayonya etombelo tshɛ wa kɔlɔ w’oma lo ata. Dui sɔ hendana tsho la paa ya lo demba koko ndo ya lo yimba la ya lo tokanyi yonga la anto l’ɔtɛ w’awui wa kɔlɔ wasalema etena kalɔma ata. Kaanga wanɛ wakavu wayolwama dia ndjɔsɛna la nkɛtɛ. (Isaya 25:8; 26:19; 35:​5, 6) Nkumbo yayonga kaamɛ ndo anto hawotohɔ akambo wa kɔlɔ wakasalema l’etena k’ata nɛ dia vɔ wayonga l’atei wa ‘akambo wa ntondo wayoshila.’—Ɛnyɛlɔ 21:4.

NZAMBI AYONYA PƐKATO

Diolelo dia Nzambi diayokimanyiya anto dia monga kaamɛ l’ɔtɛmwɛlɔ wa Jehowac Nzambi ɔtɔi ka mɛtɛ, “Nzambi ka ngandji ndo ka wɔladi.” (2 Kɔrɛtɔ 13:11) Anto wayeka woho wa mbidjasɛka kaamɛ lo wɔladi. (Isaya 2:​3, 4; 11:9) Wanɛ tshɛ wakamba la kɛnɛ kekawɔ wayotshungɔ oma lo etombelo wa pɛkato.—Rɔmɔ 8:​20, 21.

NZAMBI AYOLANYA SATANA NDO ƐDIƐNGƐ ANDE

Diolelo dia Nzambi diayolanya wanɛ wasɛngiya anto dia ndɔ ata mbuta ate Satana la ɛdiɛngɛ ande. (Ɛnyɛlɔ 20:​1-3, 10) “Wɔladi wayofulanɛ” etena kayomɔ anto oma lo shɛngiya ya kɔlɔ ya Satana la ɛdiɛngɛ ande.—Osambo 72:7.

Wɛ koka monga l’eshikikelo dia Nzambi ayokotsha daka diande dia nkomiya ata. Nde ekɔ l’akoka ndo la nsaki ka minya ata.

• Nzambi ekɔ la lomba ndo la wolo wahombama dia nkomiya ata ndo awui wa ngala. (Jɔbɔ 9:4) Ndooko dikambo diahandakoke nsala.—Jɔbɔ 42:2.

• Nzambi petshaka mɛna anto wasowa. (Isaya 63:9) Ndo nto, nde “petshaka onto tshɛ lalanga awui wa ngala.”—Osambo 11:5.

• Nzambi kotshaka ɛtɛkɛta ande nshi tshɛ; nde hakoke mbuta kashi.—Isaya 55:​10, 11; Tito 1:2.