Okoya woho w’ekanelo ka yimba ka Jehowa la ka Yeso

1-2. Kakɔna kalɔmbama dia nanga Jehowa, ndo ngande wakɛnya Yeso mɛtɛ ka dui sɔ?

“LANGA Jehowa Nzambi kayɛ la otema ayɛ tshɛ, la anima ayɛ tshɛ, la wolo ayɛ tshɛ ndo la yimba yayɛ tshɛ.” (Luka 10:27) Yeso akeyaka hwe dia ɔsɔ mbaki ɔlɛmbɛ wakaleke ohomba l’Ɛlɛmbɛ wa Mɔsɛ. Tolembete dia ngandji kokaso Jehowa mendanaka l’otema aso, mbidja ndo nsaki, tokanyi ndo woho wayaokaso. Tɔ mendanaka nto la anima aso tshɛ ndo la wolo aso tshɛ. Koko, nanga Jehowa mendanaka nto la yimba yaso, mbuta ate woho wakanyiyaso la ntondo k’akambo amɔtshi. Lo mɛtɛ, hatokokaki pondjo nshihodia tshɛ lo tshɛ woho wele ekanelo ka yimba ka Jehowa. Koko sho koka nshihodia dimɛna dimɛna ekanelo ka yimba ka Nzambi lo mbeka “yimba ya Kristo” nɛ dia Yeso akakɛnɛmɔla woho w’ekanelo ka yimba ka She lo yoho ya kokele.—1 Kɔr. 2:16.

² Yeso akalangaka Jehowa la yimba yande tshɛ. Nde akeyaka lolango laki Nzambi lo dikambo diande ndo akayashikikɛ dia nsala akambo lo yoho yɔtɔnɛ la lɔ, kaanga mbele nsala dui sɔ akakoke mbokonya dia nde nsowa. Lam’ele Yeso akayasha dia nsala lolango la She, nde kombetawɔ dia kaanga dui ɔtɔi mbofukutanya dia nkotsha oyango ɔsɔ.

3. Wetshelo akɔna wakakondja Petero oma le Yeso, ndo kakɔna kakandakeketsha asekande Akristo dia nsala? (1 Petero 4:1)

³ Petero la asekande apɔstɔlɔ waki la diɛsɛ dia mbetsha wenya kaamɛ la Yeso ndo dia mbeka woho w’ekanelo ka yimba kande. Etena kakafunde Petero mukanda ande wa ntondo wakasambiyama, nde akakeketsha Akristo dia monga la woho w’ekanelo ka yimba kele oko kaki la Kristo. (Adia 1 Petero 4:1.) Lo ndjela ɔtɛkɛta wakafundama Bible, etena kakafunde Petero ate: “Nyu lawɔ nyonge,” nde akakambe la etelo kɛnya asɔlayi wele la ekoma wayalɔngɔsɔla dia ndɔ ta. Laasɔ naka Akristo mbokoya woho w’ekanelo ka yimba ka Yeso, kete vɔ wayonga l’okoma wa wolo wele lawɔ ohomba dia ndɔshana la nsaki ka nsala pɛkato ndo l’andja walɔmbɔla Satana.—2 Kɔr. 10:​3-5; Ɛf. 6:12.

4. Ngande wakoka sawo nɛ tokimanyiya dia ndjela dako dia Pɔɔlɔ?

⁴ Tayanga nsɛdingola woho w’ekanelo ka yimba kaki la Yeso ndo woho wakokaso kiokoya. Tayɛna woho wakokaso 1) mbokoya woho w’ekanelo ka yimba ka Jehowa, kayotokimanyiya sho tshɛ dia mbɔtɔnɛ lam’asaso, 2) monga l’okitshakitsha ndo 3) monga la yimba y’ɔlɔlɔ lo ndjaɛkɛ le Jehowa lo dɔmbɛlɔ.

OKOYA EKANELO KA YIMBA KA JEHOWA

5. Ngande wakɛnya Petero lo diaaso dimɔtshi dia nde komonga l’ekanelo ka yimba ka Jehowa?

⁵ Tɔsɛdingole diaaso dimɔtshi diaki Petero kɔkɛnɛmɔla ekanelo ka yimba ka Jehowa lo awui amɔtshi. Yeso akatɛ apɔstɔlɔ ande dia nde akahombe ntshɔ la Jɛrusalɛma lɛnɛ akahombe ewandji w’ɛtɛmwɛlɔ towonda, mbosoya ndo mbodiaka. (Mat. 16:21) Petero akeyaka dia Yeso aki Mɛsiya wakalakema ndo nde mbakahombe nshimbɛ ekambi wa Nzambi, laasɔ akakoke monga wolo le nde dia nshihodia dia Jehowa akahombe mbetawɔ dia Yeso ndjakema. (Mat. 16:16) Ko Petero akatshu la Yeso l’omamu ndo akawotɛ ate: “Nkumadiɔndjɔ, yaoka kandji, dikambo dia ngasɔ hadiotokokomɛ.” (Mat. 16:22) Lam’ele Petero komonga l’ekanelo ka yimba ka Jehowa lo dikambo sɔ, nde komonga l’ekanelo ka yimba kaamɛ la Yeso.

6. Lo yoho yakɔna yakɛnya Yeso dia ekanelo kande ka yimba kakɔtɔnɛka la ka Jehowa?

⁶ Ekanelo ka yimba ka Yeso kakɔtɔnɛka la kaki She lele l’olongo. Yeso akatɛ Petero ate: “Satana, tshimba l’ɔkɔngɔ ami! Wɛ ekɔ otamba wa ntakanya le mi, nɛ dia wɛ ekɔ la tokanyi t’anto, koko aha taki Nzambi.” (Mat. 16:23) Yeso akeyaka ɔnɛ dia nde nsala lolango la Jehowa, nde akahombe soyama ndo ndjakema. Diakɔ diakandatone dako diaki Petero kaanga mbakandɛnamaka oko Petero ekɔ lo nsala la wolo dia mbokimanyiya. Oma lo dikambo sɔ, Petero akeke dia nde pombaka monga l’ekanelo ka yimba kele oko kaki Nzambi. Ɔsɔ mbele wetshelo w’ohomba wakokaso nkondja sho lawɔ.

7. Ngande wakayɛnyaka Petero l’ɔkɔngɔ dia nde akalange nsala etshikitanu dia mbɔtɔnganyiya ekanelo kande ka yimba la ka Jehowa? (Enda osato.)

⁷ L’ekomelo, Petero akayɛnyaka dia nde akalangaka monga l’ekanelo ka yimba kele oko ka Jehowa. Etena kakakoke k’ase Wedja waki kominyɛma mpota nkoma ekambi wa Nzambi. Petero akalongola ɔkɛndɛ wa tosambisha Kɔnɛliyo laki ose Wodja, lakahombe ndjonga l’atei w’olui wa ntondo w’oyoyo w’atɛmɔdi. Ase Juda kɔmbɔtɔnɛka l’ase Wedja, laasɔ Petero akahombe nsala etshikitanu lo ekanelo kande ka yimba dia nsambisha ase Wedja. Etena kakashihodia Petero lolango laki Nzambi lo dikambo sɔ, nde akatshikitanya kanyi yande. Etombelo waki la dui sɔ ele, etena kakandatomama, nde akatshu “aha la monga la taamu.” (Ets. 10:​28, 29) Nde akasambisha Kɔnɛliyo l’ase luudu lande, ko vɔ wakabatizama.—Ets. 10:​21-23, 34, 35, 44-48.

8. Ngande wakokaso mɛnya dia ekanelo kaso ka yimba mbɔtɔnɛka la kaki Jehowa? (1 Petero 3:8)

⁸ Ɛnɔnyi efula l’ɔkɔngɔ, Petero akayokeketsha asekande Akristo dia ‘monga kaamɛ lo tokanyi.’ (Adia 1 Petero 3:8.) Oko weso ekambi wa Jehowa, sho koka monga kaamɛ lo tokanyi lo nkɛnɛmɔla ekanelo ka yimba ka Jehowa oko wɛnyamidiɔ l’Ɔtɛkɛta ande. Ɛnyɛlɔ, Yeso akakeketsha ambeki ande dia mbetɛ Diolelo lo dihole dia ntondo lo lɔsɛnɔ lawɔ. (Mat. 6:33) La kanyi shɔ lo yimba, opandjudi ɔmɔtshi wa l’etshumanelo kanyu koka mbɔsa yɛdikɔ ya nkamba woho ɔmɔtshi w’olimu wa lo tena tshɛ. Lo dihole dia mbotɛ dia nde pombaka nsɔna yoho mɔtshi ya lɔsɛnɔ ya wɔdu, sho pombaka mbotɛ ɛtɛkɛta w’amɛna lo kɛnɛ kendana l’eyango ande ndo mbosha ekimanyielo kende la tɔ ohomba dia nde mbakotsha.

ONGA L’OKITSHAKITSHA

9-10. Ngande wakɛnya Yeso okitshakitsha ande lo yoho ya diambo?

⁹ L’otsho wa la ntondo ka nyɔi kande, Yeso aketsha Petero ndo apɔstɔlɔ akina wetshelo w’ohomba efula w’okitshakitsha. La pindju ka pɛɛ, Yeso akatome Petero la Joani dia tɔlɔngɔsɔla diangɔ dikambo dia dambo di’ekomelo diakahombe Yeso ndɛ kaamɛ la wɔ oko onto lanɛ la nkɛtɛ. Ɛlɔngɔswɛlɔ ɛsɔ wakendanaka ondo la ndjaashikikɛ dia dɔnga di’ashi ndo ɛsiyamɛ wakikɔ dia angɛndangɛnda nsola ekolo ndo nkitola ashi la ntondo ka vɔ ndɛ. Ko, onto akɔna mɛtɛ akakoke monga l’okitshakitsha dia nsola ekolo w’anto akina?

¹⁰ Aha la mengenga, Yeso akɛnya okitshakitsha ande lo yoho ya diambo. Apɔstɔlɔ ande wakaambe lo yɛdikɔ y’efula nɛ dia Yeso akasale olimu wele paka ose olimu mbakoka mbosala. Yeso akakolola ahɔndɔ ande wa laadiko, akadinge ɛsiyamɛ lo lokende, akadje ashi lo dɔnga ndo akatatɛ nsola ekolo awɔ. (Jni. 13:​4, 5) Akahombe mbɔsa yema y’etena dia nsola ekolo w’apɔstɔlɔ ande 12 tshɛ ndo wa Judasɛ, ɔnɛ lakayowofunga. Lo mɛtɛ, Yeso akakotsha ɔkɛndɛ ɔsɔ l’okitshakitsha tshɛ. La solo dia lotutsha tshɛ, Yeso akalembetshiya ate: “Onde nyamboshihodia kɛnɛ konyosalemi? Nyu mbelɛkami ɔnɛ: ‘Ombetsha’ ndo ‘Nkumadiɔndjɔ,’ mɛtɛ katanyu nɛ dia ngasɔ mbemi. Ko naka dimi Nkumadiɔndjɔ ndo Ombetsha, nyosolaka ekolo, kete nyu lawɔ pombaka solana ekolo lam’asanyu.”—Jni. 13:​12-14.

11. Ngande wakɛnya Petero dia nde akeke ohomba wa monga l’okitshakitsha? (1 Petero 5:5) (Enda ndo osato.)

¹¹ Petero akakondja wetshelo oma l’okitshakitsha wa Yeso. L’ɔkɔngɔ wa Yeso nkalola l’olongo, Petero akasale dihindo lo nkɔnɔla pami kakotɔ ekuse. (Ets. 1:​8, 9; 3:​2, 6-8) Lo mɛtɛ, dihindo sɔ diakakotola yambalo y’anto efula oya le Petero. (Ets. 3:11) Onde Petero aketawɔ nongola lotombo l’ɔtɛ wa dui sɔ nɛ dia nde aki lo dihole diele anto efula wakayashaka dia nongola lotombo? Ndooko. Koko l’okitshakitsha tshɛ, Petero akasha Jehowa la Yeso lotombo lo mbuta ate: “Lo lokombo [la Yeso] ndo oma lo mbetawɔ kaso lo lokombo lande kambokeketala pami kɛnɛ kɛnanyu ndo keyanyu.” (Ets. 3:​12-16) Ɛtɛkɛta wakakambe la Petero lo mukanda wakandafundɛ Akristo lo kɛnɛ kendana l’ohomba wa monga l’okitshakitsha koka tohola etena kakadinge Yeso ɛsiyamɛ lo lokende ndo kakandasole ekolo w’apɔstɔlɔ ande.—Adia 1 Petero 5:5.

12. Oko Petero, ngande wakokaso ntetemala monga l’okitshakitsha?

¹² Sho koka mbokoya ɛnyɛlɔ ka Petero lo monga l’okitshakitsha. Tolembete dia okitshakitsha wa mɛtɛ mendanaka la akambo efula koko aha tsho tondjanɛ ɛtɛkɛta w’amɛna. Etelo kakakambe la Petero lo dikambo di’okitshakitsha mendanaka la tokanyi taso ta l’etei k’otema, mbuta ate “yimba y’okitshakitsha.” Sho salɛka anto akina ɔlɔlɔ nɛ dia sho mbokaka Jehowa ndo anto ngandji, koko aha l’ɔtɛ w’anto totombola. Sho mɛnyaka dia tekɔ l’okitshakitsha wa mɛtɛ naka sho kambɛ Jehowa ndo anangɛso l’akadiyɛso l’ɔngɛnɔngɛnɔ tshɛ kaanga etena kele anto akina hawodje yimba lo kɛnɛ kasalaso.—Mat. 6:​1-4.

ONGA LA “YIMBA Y’ƆLƆLƆ”

13. Lembetshiya kɛnɛ kalɔmbama dia monga la “yimba y’ɔlɔlɔ.”

¹³ Kakɔna kalɔmbama dia monga la “yimba y’ɔlɔlɔ”? (1 Pe. 4:7) Okristo wele la yimba y’ɔlɔlɔ salaka kɛnɛ tshɛ kakokande nsala dia mbɔsa tɛdikɔ tɔtɔnɛ l’ekanelo ka yimba ka Jehowa. Okristo wa ngasɔ mbeyaka dia ndooko kɛnɛ koleki ohomba lo lɔsɛnɔ oleki diɔtɔnganelo diasande la Jehowa. Nde mongaka la wɛdimo ndo hɛnya dia nde mbeyaka oseka dikambo tshɛ. Ndo nde mɛnyaka omamemelo ande le Nzambi lo ndjasukanya la Jehowa lo dɔmbɛlɔ dia nyanga ɛlɔmbwɛlɔ.a

14. Ngande wakɛnya Petero lo diaaso dimɔtshi dia nde kondjaɛkɛ le Jehowa?

¹⁴ L’otsho w’ekomelo wa la ntondo ka nyɔi kande, Yeso akahɛmɔla ambeki ande ate: “Nyu tshɛ nyayotakana lo dikambo diami l’otsho ɔnɛ.” Petero akakadimola l’eshikikelo tshɛ ate: “Oyadi kaanga anto akina tshɛ wayotakana lo dikambo diayɛ, dimi hatakanaki pondjo!” L’otsho ɔsɔ, Yeso akalake ambeki ande amɔtshi ate: “Nyosungukale ndo nyotetemale nɔmba.” (Mat. 26:​31, 33, 41) Otondongaka Petero akayele dako sɔ, tshike nde otoyala la dihonga diaki la nde ohomba dia mbuta dia nde aki ombeki wa Yeso. Koko lo dihole dia nsala ngasɔ, Petero akayonyangaka efula lo woho wakandanguna Owandji ande.—Mat. 26:​69-75.

15. Ngande wakalame Yeso yimba y’ɔlɔlɔ l’otsho w’ekomelo wa lɔsɛnɔ lande la lanɛ la nkɛtɛ oko onto?

¹⁵ Yeso akayaɛkɛka tshɛ le Jehowa. Kaanga mbaki Yeso kokele, nde akalɔmbaka mbala la mbala. Kɛsɔ mbakookimanyiya dia monga la dihonga dia nsala akambo wɔtɔnɛ la lolango la Jehowa lo dikambo diande. (Mat. 26:​39, 42, 44; Jni. 18:​4, 5) Lo mɛtɛ, Petero kombohɛ pondjo dia Yeso akalɔmbɛ mbala efula l’otsho w’ekomelo wa lɔsɛnɔ lande la nkɛtɛ.

16. Ngande wakɛnya Petero dia nde akakɛnɛmɔla yimba y’ɔlɔlɔ? (1 Petero 4:7)

¹⁶ L’etena kɛmɔtshi, Petero akayoyaɛkɛ efula le Jehowa lo dɔmbɛlɔ. Yeso lakolwama akashikikɛ Petero la apɔstɔlɔ akina dia vɔ wayolongola nyuma k’ekila dia vɔ nkotsha ɔkɛndɛ awɔ wa nsambisha. Koko, Yeso akaalɔmbɛ dia vɔ nkonga la Jɛrusalɛma polo etena kakahombe dikambo sɔ salema. (Luka 24:49; Ets. 1:​4, 5) Kakɔna kakasale Petero etena kakawakongaka? Petero la asekande Akristo “wakatetemalaka nɔmba.” (Ets. 1:​13, 14) L’ɔkɔngɔ diko, lo mukanda ande wa ntondo, Petero akakeketsha asekande Akristo dia monga la yimba y’ɔlɔlɔ ndo dia ndjaɛkɛ le Jehowa lo dɔmbɛlɔ. (Adia 1 Petero 4:7.) Petero akeke woho wa ndjaɛkɛ le Jehowa ndo akakome ekundji k’etshumanelo.—Ngal. 2:9.

17. Oyadi akoka akɔna wele la so, kakɔna kahombaso ntetemala nsala? (Enda ndo osato.)

¹⁷ Dia monga la yimba y’ɔlɔlɔ, sho pombaka ndjasukanyaka la Jehowa lo dɔmbɛlɔ. Sho shihodiaka dia sho pombaka ntetemala nɔmba Jehowa oyadi akoka akɔna wele la so. Ndo nto, djekoleko etena kalangaso mbɔsa tɛdikɔ t’ohomba, sho pombaka nɔmba Jehowa ɛlɔmbwɛlɔ tele l’eshikikelo dia nde mbeyaka kɛnɛ koleki dimɛna le so.

18. Ngande wakokaso ndeka mbɔtɔnganyiya ekanelo kaso ka yimba la ka Jehowa?

¹⁸ Tekɔ la lowando l’efula lo woho wakatotonge Jehowa l’akoka wa mbokoya waonga ande. (Eta. 1:26) Lo mɛtɛ, hatokoke mbokoya Jehowa lo yoho ya kokele. (Isa. 55:9) Koko oko Petero, sho koka nyomoleka mbɔtɔnganyiya ekanelo kaso ka yimba la ka Jehowa. Sho koka ntetemala nsala ngasɔ lo mbokoyaka yoho y’ekanelo ka yimba ka Nzambi, monga l’okitshakitsha ndo la yimba y’ɔlɔlɔ.