Kondja wahɔ oma lo rɛfɛransɛ wa l’emamu

Rɛfɛransɛ wa l’emamu wa lo Bible—Ekadimwelo k’andja w’oyoyo mɛnyaka woho wele avɛsa efula wa lo Bible mbɔtɔnɛka l’avɛsa akina lo nshila avɛsa watɛkɛta dia dui diakɔ diaamɛ dia mbisha elembetshielo ekina lo dikambo diakɔ. Dia ntana rɛfɛransɛ wa l’emamu, enda dɛta dia tshitshɛ diofundami suke la tshɛkɛta. Lo Bible ya l’akatshi, enda dɛta diɔtɔnɛ diatanema l’atei kana l’omamu wa dikatshi dia ntana avɛsa watɛkɛta dia dikambo diakɔ. Lo jw.org kana lo aplikasiɔ wa JW Library, klikɛ lo dɛta diakɔ dia mɛna avɛsa woshilami.

Rɛfɛransɛ wa l’emamu koka kotoma lo awui wayela anɛ ndo lo awui akina efula:

Ɔkɔndɔ wafɔna: Rɛfɛransɛ mɛnyaka dihole dikina diatanema ɔkɔndɔ akɔ waamɛ. Ɛnyɛlɔ, enda 2 Samuɛlɛ 24:1 ndo 1 Ɛkɔndɔ 21:1.

Oma lɛnɛ ɔsami ɛtɛkɛta: Rɛfɛransɛ mɛnyaka oma lɛnɛ ɔsami tshɛkɛta kana etelo kɛmɔtshi. Ɛnyɛlɔ, enda Mateo 4:4 ndo Eohwelo k’Ɛlɛmbɛ 8:3.

Prɔfɛsiya yambokotshama: Rɛfɛransɛ tɔlaka lo prɔfɛsiya la okotshamelo atɔ. Ɛnyɛlɔ, enda Mateo 21:5 ndo Zɛkariya 9:9.