Onto akɔna akokayɛ mbɛkɛ otema?​—Kakɔna kata Bible lo dikambo sɔ?

Anto efula nyangaka etena kawaokiya wanɛ wakokawɔ ndjaɛkɛ le wɔ nsɔnyi. Amɔtshi hawoyoyaɛkɛ . . .

• le ewandji wa pɔlitikɛ wetsha ehomba awɔ la ntondo k’ehomba w’anto akina.

• lo tita nsango tahewoya awui lo yoho ya mɛtɛ.

• le ambeyi wa siansɛ wahasale akambo lo wahɔ w’anto akina.

• le ewandji w’ɛtɛmwɛlɔ wayatambiya l’awui wa pɔlitikɛ lo dihole dia monga enyipala wa Nzambi.

Anto mɛtɛ wekɔ la shadiya lo woho wewɔ la yewo lo kɛnɛ kendana l’onto lahombawɔ ndjaɛkɛ le nde. Bible tɔhɛmɔlaka ɔnɛ:

• “Tanyekamaki ana wa khumi ya dikanga, kuyanga le untu laheyi nyushimbela.”​—Osambo 146:3, Bible k’Ekila.

Onto ɔmɔtshi lakokayɛ ndjaɛkɛ le nde

 Bible tosholɛka onto ɔmɔtshi lakokaso ndjaɛkɛ le nde mbuta ate Yeso Kristo. Nde komonga tsho onto ɔlɔlɔ lakasɛnɛ la nkɛtɛ ambeta ɛnɔnyi nkama. Nzambi akasɔnɛ Yeso oko “Nkumekanga . . . ndo Diolelo diande hadiotonga l’ekomelo.” (Luka 1:32, 33) Yeso Kristo ekɔ owandji wa Diolelo diaki Nzambi mbuta ate lowandji lolɛ oma l’olongo.​—Mateo 6:10.

• Dia mbeya lande na kahombayɛ ndjaɛkɛ le Yeso, adia asawo wayela anɛ: “Ele Nkumekanga ka Diolelo diaki Nzambi?” ndo “Kakɔna kayosala Diolelo diaki Nzambi?”