Ta di’Aramangɛdɔna kɛdikɛdi na?

Okadimwelo washa Bible

Ta di’Aramangɛdɔna ekɔ ta di’ekomelo diayonga lam’asa Nzambi la mandji y’ana w’anto. Mandji shɔ ndo wanɛ wayiasukɛ ndɔshanaka la Nzambi ndo lo nshi nyɛ lo woho wahawetawɔ lowandji lande. (Osambo 2:2) Ta di’Aramangɛdɔna diayokomiya waolelo w’ana w’anto.​—Danyɛlɛ 2:​44.

Tshɛkɛta “Aramangɛdɔna” tanemaka dihole ɔtɔi lo Bible, lo Ɛnyɛlɔ 16:16. Prɔfɛsiya ka l’Ɛnyɛlɔ mɛnyaka dia lo “dihole dielamɛ lo Hɛbɛru ɔnɛ Aramangɛdɔna,” “nkumi ya dikanga ya lo nkɛtɛ k’otondo” wayosanganyema kaamɛ lo “ta dia lushi la woke la Nzambi Kanga-Wolo-Tshɛ.”​—Ɛnyɛlɔ 16:14.

Wana wayɔlɔ ta di’Aramangɛdɔna? Yeso Kristo mbayɔlɔmbɔla alembe wa l’olongo dia mbidja atunyi wa Nzambi otshumba. (Ɛnyɛlɔ 19:11-​16, 19-​21) Atunyi akɔ ele wanɛ walɔshana la lowandji la Nzambi ndo wanɛ wele la bu la dilɛmiɛlɔ le nde.​—Ɛzɛkiyɛlɛ 39:7.

Onde ta di’Aramangɛdɔna diayɔlɔma lo yoho ya mɛtɛ mɛtɛ lo Moyen-Orient? Ndooko. Otshikitanyi l’ata walɔma dihole ɔtɔi, ta di’Aramangɛdɔna diayɔlɔma lo nkɛtɛ k’otondo.​—Jɛrɛmiya 25:32-​34; Ɛzɛkiyɛlɛ 39:17-​20.

Aramangɛdɔna mbelamɛka nto ɔnɛ “Har–​Magedon” (lo Hɛbɛru Har Meghiddohnʹ), kitshimudi ate: “Dikona dia Mengido.” Mengido aki osomba ɔmɔtshi wa l’ɛtshi ka nkɛtɛ k’Isariyɛlɛ w’edjedja. Ɛkɔndɔ mɛnyaka di’ata wa weke wakalɔmaka l’ɛtshi kɛsɔ ka nkɛtɛ ndo ata amɔtshi l’atei awɔ kɔndwama lo Bible. (Embadi 5:​19, 20; 2 Nkumi ya dikanga 9:​27; 23:29) Koko, Aramangɛdɔna hendana la dihole dia mɛtɛ mɛtɛ diaki suke la Mengido k’edjedja. Ndooko dikona diele lɛkɔ diayokoka atunyi tshɛ wayɔlɔshana la Nzambi ndo kaanga okidi w’ebamubamu wa Jɛzɛrɛlɛ howakoka. Aramangɛdɔna ekɔ dui diayendana l’andja w’otondo diele wedja wayotshumana mbala k’ekomelo dia ndɔshana la lowandji la Nzambi.

Ngande wayeta akambo lo ta di’Aramangɛdɔna? Hateye woho wayokamba Nzambi la wolo ande, ondo nde ayokamba la diangɔ diakakambe lande lo nshi y’edjedja​—ave, didimu dia nkɛtɛ, elola, nvula ka mbɔkɔ ya dja, angadimu, kana hemɔ. (Jɔbɔ 38:22, 23; Ɛzɛkiyɛlɛ 38:19, 22; Habakuka 3:​10, 11; Zɛkariya 14:12) Atunyi waki Nzambi amɔtshi wayodiakana vɔamɛ nɛ dia lofunge layɔtɔ lam’asawɔ, koko l’ekomelo vɔ wayeya dia Nzambi mbalɔshana la wɔ.​—Ɛzɛkiyɛlɛ 38:21, 23; Zɛkariya 14:13.

Onde Aramangɛdɔna ayonga ekomelo k’andja? Nkɛtɛ nyɛ hayolanyema nɛ dia lɔkɔ mbayodjasɛka anto pondjo pondjo. (Osambo 37:29; 96:10; Ondaki 1:4) Aramangɛdɔna holanya andja ɔnɛ, koko vɔ wayowoshimbɛ nɛ dia “olui a woke” w’ekambi wa Nzambi wayoshimbamɛ.​—Ɛnyɛlɔ 7:​9, 14; Osambo 37:34.

Lo Bible, tshɛkɛta “andja” hayolembetshiya tsho nkɛtɛ, mbala mɔtshi yɔ nembetshiyaka anto wa kɔlɔ walɔshana la Nzambi. (1 Joani 2:​15-​17) Lo woho ɔsɔ mbele Aramangɛdɔna ayela “nkomeelo k’anja.”​—Mateo 24:3, Dyookaneelo dy’Oyooyo.

Etana kakɔna kakoya Aramangɛdɔna? Etena kakandatɛkɛtaka dikambo dia “mfɔnu ka woke” kayokoma lo nkondoko yatɔ lo ta dia Aramangɛdɔna, Yeso akate ate: “Lo kɛnɛ kendana la lushi kana la wonya akɔ, ndooko onto leya, kaanga andjelo wa l’olongo, kaanga ɔna, paka Papa ndamɛ.” (Mateo 24:21, 36) Koko, Bible mɛnyaka dia Aramangɛdɔna wayoya l’etena ka woongelo wa Yeso wakatatɛ lo 1914.​—Mateo 24:37-​39.