Aramangɛdɔna—Kɛnɛ kata anto amɔtshi

“Wakâsanganya lu dihuli dietawo l’oteketa w’asi Heberu vati: Aramangedona.”—ENYELO 16:16.

KAKƆNA kakoyɛ lo yimba etena kokayɛ tshɛkɛta “Aramangedona”? Ondo wɛ mbeyaka mfɔnya ɔnɛ ɔsɔ ayonga mpokoso ka woke efula. Kânga mbele tshɛkɛta shɔ tanemaka paka mbala ɔtɔi keto lo Bible, tojurnalistɛ ndo ewandji w’ɛtɛmwɛlɔ kambaka layɔ mbala efula.

Onde kɛnɛ kata anto lo dikambo di’Aramangɛdɔna mbɔtɔnɛka la kɛnɛ ketsha Bible? Ekɔ ohomba efula sho mbeya okadimwelo wa dimbola sɔ. Lande na? Nɛ dia mbeya mɛtɛ lo dikambo di’Aramangɛdɔna koka kotshungola oma lo wɔma wa kɔlɔ, kokimanyiya dia wɛ monga l’eokelo ka dimɛna kendana la nshi yayaye ndo ntshikitanya kɛnɛ kakanyiyayɛ lo dikambo dia Nzambi.

Ɛsɔ tɔsɛdingole ambola asato wayela anɛ, kele tɛdike kɛnɛ kata anto efula lo dikambo di’Aramangɛdɔna la kɛnɛ mɛtɛ ketsha Bible.

1. ONDE ARAMANGƐDƆNA EKƆ TA DIAYELA ANTO?

Tojurnalistɛ ndo anyangiyangi efula kambaka mbala efula la tshɛkɛta “Aramangedona” dia nembetshiya mpokoso yela anto. Ɛnyɛlɔ, etena kakalɔma Ta dia ntondo ndo dia hende di’andja w’otondo, anto efula wakate ɔnɛ Aramangɛdɔna mbamboya. L’ɔkɔngɔ w’ata asɔ, anto wakoke wɔma ɔnɛ États-Unis la Union soviétique wayokanda bɔmbɛ atɔmikɛ yayodiaka anto efula wa l’andja w’otondo ndo tojurnalistɛ efula wakate ɔnɛ etena kayokandema bɔmbɛ shɔ, kete “Aramangedona” mbamboya. Ɛlɔ kɛnɛ, anyangiyangi mbokaka wɔma ɔnɛ diangɔ dia mindo mbeyaka ndjela etshikitanu wa wolo efula la nkɛtɛ, vɔ mbutaka ɔnɛ “Aramangɛdɔna waya k’emembe.”

Kɛnɛ kata anto: Anto efula mbokaka nshi yayaye wɔma ndo ndjambolaka woho wayonga lɔsɛnɔ l’anto lanɛ la nkɛtɛ. Vɔ mbutaka ɔnɛ naka emboledi hawotondoyisha dia mbekɛ lonya, kete anto wa l’andja w’otondo wayodiɛnɛ l’asui.

Kɛnɛ ketsha Bible: Nzambi hatetawɔ dia anto ndanya nkɛtɛ. Bible toshikikɛka dia Jehowaa ‘kotonga nkɛtɛ otongatonga.’ Koko, nde akayitonge dia “antu mbidjase loko.” (Isaya 45:18) Lo dihole dia nde mbetawɔ di’anto ndanya nkɛtɛ tshɛ, Nzambi ayolanya “wane watulanyaka kete.”—Enyelo 11:18.

2. ONDE ARAMANGƐDƆNA EKƆ MPOKOSO K’OMA LO DIANGƆ DIAKATONGAMA?

Tena dimɔtshi, tojurnalistɛ kambaka la tshɛkɛta “Aramangedona” oko mpokoso k’oma lo diangɔ diakatongama. Ɛnyɛlɔ, lo 2010, jurnalɛ mɔtshi yakatɛkɛta lo dikambo dia didimu dia nkɛtɛ diakasalema la Haïti ɔnɛ “Aramangɛdɔna mbamboya,” nɛ dia anto wakasowe, wakashisha diangɔ ndo wakavu efula. Tojurnalistɛ ndo amundji w’esato wakatshu lɛkɔ wakate ɔnɛ diayaye ndeka nɛ. Ɛnyɛlɔ, vɔ kambaka nto la tshɛkɛta “Aramangedona” dia nembetshiya etombelo wa kɔlɔ wakoka monga la esase wa wonya wa wolo la nkɛtɛ.

Kɛnɛ kata anto: Anto efula mbutaka ɔnɛ Aramangɛdɔna ekɔ elanyelo kayoshila anto oshiki oyadi wanɛ wele bu l’onongo. Ekɔ wolo di’onto ndjakokɛ lo ta sɔ.

Kɛnɛ ketsha Bible: Aramangɛdɔna bu elanyelo ka shashimoya kayolanya anto wele bu l’onongo. Koko lam’ayoya Aramangɛdɔna, paka anto wa kɔlɔ ato mbayodiakema. Bible ndakaka ɔnɛ kema edja nto “untu a kolo hatanema ntu. Kuyanga ayushishima lu dihuli diandi, ndi henama ntu.”—Osambu 37:10.

3. ONDE NZAMBI AYOLANYA NKƐTƐ LO ARAMANGƐDƆNA?

Ase ɛtɛmwɛlɔ efula mbetawɔka ɔnɛ ayonga ta dia wolo lam’asa anto w’ɛlɔlɔ l’anto wa kɔlɔ ndo etombelo wayonga la dui sɔ ele, nkɛtɛ kɛnɛ kayolanyema. Ɛnyɛlɔ, presida ka tshunda di’eyangelo dia lo kalasa y’adidi ya la Princeton lo wodja w’États-Unis akɛnyi dia pursa 40 y’anto wakandakɔnya waketawɔ ɔnɛ nkɛtɛ kɛnɛ kayolanyema lo ta dia “Aramangedona.”

Kɛnɛ kata anto: Anto efula mbutaka ɔnɛ sho kôtongama dia ndjɔsɛna pondjo pondjo la nkɛtɛ ndo nkɛtɛ kôtongama dia tshikalaka pondjo. Nzambi akatonge anto la kanyi ya vɔ ndjodiakema tshɛ l’etena kɛmɔtshi.

Kɛnɛ ketsha Bible: Bible mbutaka ɔnɛ Nzambi “akashikike kete lu dikitshelu diayo, diako mbahayasukasukaki pundju.” (Osambu 104:5) Bible mbutaka lo dikambo di’anto wayodjasɛ la nkɛtɛ ɔnɛ: “Antu w’ololo wayukita kete, wayudjaseka loko pundju.”—Osambu 37:29.

Mbokɛmaka hwe dia kɛnɛ kata Bible ntshikitana la kɛnɛ kata anto lo dikambo di’Aramangɛdɔna. Ko kakɔna kele mɛtɛ?

[Nɔte ka l’ɛse ka dikatshi]