Pɛkato kɛdikɛdi na?

Ekadimwelo washa Bible

Pɛkato ekɔ tshelo tshɛ, nsaki tshɛ ndo tokanyi tshɛ talɔshana l’atɔndɔ wa Nzambi. Tɔ nembetshiyaka nto nsekola ɛlɛmbɛ wa Nzambi lo nsala dui dimɔtshi dia kɔlɔ kana diele keema losembwe lo washo wa Nzambi. (1 Joani 3:4; 5:​17) Bible mbutaka nto dia ntona dia nsala kɛnɛ kele ɔlɔlɔ ekɔ pɛkato.​—Jakɔba 4:​17.

Lo ɛtɛkɛta wa ntondo wakafundama Bible, etelo kokadimɔmi ɔnɛ pɛkato nembetshiyaka “mpekɔ dia nkotsha dui dimɔtshi” kana oyango ɔmɔtshi. Ɛnyɛlɔ, olui ɔmɔtshi w’asɔlayi wa l’Isariyɛlɛ w’edjedja wakeyaka dimɛna mboka mpito ndo vɔ “kɔmɔnyaka dia nkotsha oyango awɔ.” Naka sho nkadimola etelo kɛsɔ tshɛkɛta lo tshɛkɛta, kete tɔ koka kadimɔma ɔnɛ “hosala pɛkato.” (Embadi 20:16) Laasɔ, nsala pɛkato nembetshiyaka mpandja dia nkotsha oyango wendana la nkitanyiya wadjango wa kokele wa Nzambi.

Oko wende Otungi, Nzambi ekɔ la lotshungɔ la mbidjɛ anto ɛlɛmbɛ. (Ɛnyɛlɔ 4:​11) Tayoyokoya la Nzambi l’ɔtɛ w’etsha aso.​—Rɔmɔ 14:12.

Onde onto koka mbewɔ diaha nsala ndooko pɛkato ɔtɔi?

Ndooko. Bible mbutaka dia “anto tshɛ wakasale pɛkato ndo hawokome lo lotombo la Nzambi.” (Rɔmɔ 3:​23; 1 Nkumi ya dikanga 8:​46; Ondaki 7:​20; 1 Joani 1:8) Lande na kɛdiɔ ngasɔ?

Ambutshi aso wa ntondo, Adama l’Eva komonga la pɛkato l’etatelo. Aki ngasɔ nɛ dia vɔ wakatongama kokele l’efanelo ka Nzambi. (Etatelo 1:​27) Koko, ohindodi awɔ le Nzambi akayashishɛka eongelo ka kokele kaki lawɔ. (Etatelo 3:​5, 6, 17-​19) Etena kakawayotaka ana, vɔ wakayasambiyɛka pɛkato ndo eongelo kele bu kokele. (Rɔmɔ 5:​12) Diakɔ diakate nkumekanga Davidɛ ka l’Isariyɛlɛ w’edjedja ɔnɛ: “Dimi lakotɔ la onongo wa munga.”​—Osambo 51:5.

Onde pɛkato mɔtshi yekɔ weke ndeka kina?

Eelo. Ɛnyɛlɔ, Bible mbutaka di’anto wa la Sɔdɔma k’edjedja waki “anto wa kɔlɔ ndo waki atshi wa pɛkato wa lokolokolo.” (Etatelo 13:13; 18:20) Tɔsɛdingole akambo asato wɛnya woke woke wa pɛkato.

1. Woke woke wa dikambo. Bible tɔhɛmɔka dia sho mbewɔ pɛkato ya weke yele oko awui wa mindo wa dieyanelo, ɔtɛmwɛlɔ wa dikishi, wovi, wodjwelo a wanu, mpɔtɔla, ndjka ndo monga la diɔtɔnganelo la ɛdiɛngɛ. (1 Kɔrɛtɔ 6:​9-​11; Ɛnyɛlɔ 21:8) Bible mɛnyaka otshikitanu wele lam’asa ditshelo sɔ la pɛkato yasalaso aha la mbeya kana aha la lolango, ɛnyɛlɔ oko ɛtɛkɛta kana etsha washa anto akina paa l’asolo. (Tokedi 12:18; Ɛfɛsɔ 4:​31, 32) Koko, Bible tokeketshaka diaha mbɔsaka dia pɛkato mɔtshi yekɔ totshitshɛ nɛ dia kɛsɔ koka ndjotokonya lo pɛkato ya weke yɔnyɔla ɛlɛmbɛ wa Nzambi.​—Mateo 5:​27, 28.

2. Eyango. Anto amɔtshi salaka pɛkato l’ɔtɛ wahaweye kɛnɛ kalɔmba Nzambi. (Etsha 17:30; 1 Timɔte 1:​13) Kanga mbele tɔ hasukɛ dui sɔ, Bible tshikitanyaka pɛkato shɔ la nyɛ yɔnyɔla ɛlɛmbɛ wa Nzambi l’okonda. (Walelo 15:30, 31) Pɛkato ya l’okonda ndjaka oma lo “otema wa kɔlɔ.”​—Jɛrɛmiya 16:12.

3. Mbala yosalemi dikambo diakɔ. Bible mɛnyaka nto otshikitanu wele lam’asa nsala pɛkato mbala ɔtɔi ndo mbekelo ka salaka pɛkato. (1 Joani 3:​4-8) Wanɛ waya la tshondo ya mbekelo ka “nsala pɛkato la okonda,” kaanga mbamboweka dia nsala kɛnɛ kele ɔlɔlɔ, wayolomboshama oma le Nzambi.​—Hɛbɛru 10:26, 27.

Wanɛ wambosala pɛkato ka woke, koka monga la lonyangu l’efula l’ɔtɛ wa kɔlɔ yawɔ. Ɛnyɛlɔ, nkumekanga Davidɛ akafunde ate: “Munga yami yambombahema l’ɔtɛ; oko oshikɔ wa wotsho, dimi haakoke mɛmba.” (Osambo 38:4) Koko Bible mbishaka elongamelo kɛnɛ ɔnɛ: “Kanga kɔlɔ atshike mboka kandeNdo onto a kɔlɔ atshike tokanyi tande; akalole le Jehowa, ko nde ayowoka kɛtshi, ɛɛ, le Nzambi kaso, nɛ dia nde ayowodimanyiya tshɛ lo tshɛ.”​—Isaiah 55:7.