Jehowa nyangaka toho ta mɛnya ekambi ande dia nde mbowaokaka ngandji ndo nde mbangɛnangɛnaka. Afundelo kɔndɔlaka waaso ahende wele Jehowa akatɛ Yeso dia nde mbookaka ngandji, mbuta ate Ɔnande lakandetawɔka. (Mat. 3:17; 17:5) Onde wɛ kombolaka mboka Jehowa akoshikikɛ dia wɛ mbetawɔmaka le nde? Jehowa hatɛkɛta la so oma l’olongo, koko nde tɛkɛtaka la so lo tshimbo y’Ɔtɛkɛta ande. Sho koka mboka dui dia Jehowa di’ɔnɛ nde tetawɔka etena kadiaso ɛtɛkɛta wa Yeso watanema lo Evanjiliɔ. Yeso akakɛnɛmɔla lo yoho ya kokele lonto laki She. Ɔnkɔnɛ etena kadiaso woho wakatɛka Yeso ambeki ande waki komonga kokele koko waki la kɔlamelo dia nde mbowaetawɔka, sho koka mbɔsa diele oko Jehowa mbatotɛ ɛtɛkɛta ɛsɔ. (Jni. 15:​9, 15) Naka tambohomana l’ehemba, kɛsɔ bu djembetelo yɛnya dia hatoyetawɔma le Nzambi. Koko, vɔ toshaka waaso wa mɛnya ngandji k’efula kokaso Nzambi ndo woho wayaɛkɛso le nde.—Jak. 1:12. w24.03 28 od. 10-11

Naka wɛ ekɔ ombutshi, kete nkimanyiya anayɛ dia vɔ ndjalɔngɔsɔla lo mbisha kɔmatɛrɛ yɛdimi l’ɛnɔnyi awɔ. Lo ntena dimɔ, awui wa wolo, ɛnyɛlɔ, ekakatanu wa lo diwala kana awui wendana la lɔkɛwɔ sɛdingɔmaka lo wekelo, koko ondo ekɔ odingɔ ɔtɔi kana ehende wakoka ɔna mbisha kɔmatɛrɛ. Ndo nto, nkimanyiya anayɛ dia vɔ nshihodia lande na kele aha mbala tshɛ kayowemɛka anya mbayowaasɔnaka dia nkadimola. Mbalembetshiya ngasɔ koka mbakimanyiya diaha vɔ nkɔmɔ etena kasɔnawɔ anto akina dia mbisha kɔmatɛrɛ lo dihole diawɔ. (1 Tim. 6:18) Sho tshɛ koka nɔngɔsɔla kɔmatɛrɛ yakeketsha dia mbisha Jehowa kɛnɛmɔ ndo nkeketsha asekaso Akristo. (Tok. 25:11) Kaanga mbakokaso lo ntena dimɔ mbisha kɔmatɛrɛ ka lo tshena pe kendana la dui dimɔ diakahomana la so, sho pombaka mbewɔ dia ntɛkɛta awui efula lo awui wendana la so shoamɛ. (Tok. 27:2; 2 Kɔr. 10:18) Lo dihole dia nsala ngasɔ, sho salaka la wolo dia kɔmatɛrɛ yaso ndeka mendana la Jehowa, la Ɔtɛkɛta ande ndo l’ekambi wakinde lo tshɛ kawɔ.—Ɛny. 4:11. w23.04 24-25 od. 17-18

Ngandji kekɔ ohomba dia ntetemala sungukala ndo monga la yimba y’ɔlɔlɔ. (Mat. 22:​37-39) Ngandji kokaso Nzambi tokimanyiyaka dia mbikikɛ l’olimu w’esambishelo kaanga la ntondo ka woho akɔna w’okakatanu wakoka tokomɛ. (2 Tim. 1:​7, 8) Kaanga mbɛnyaso ngandji kaso otsha le wanɛ wele bu la so mbetawɔ ɔtɔi, sho tetemalaka nsambisha kaanga lo tshimbo ya telefɔnɛ ndo ya mikanda. Hatoshisha elongamelo di’ɔnɛ lushi lɔmɔ asukanyi aso wayotshikitana ndo wayotatɛ nsala kɛnɛ kele ɔlɔlɔ. (Ɛzk. 18:​27, 28) Ngandji kokaso anto mendanaka ndo la asekaso Akristo. Sho mɛnyaka ngandji k’efula ka ngasɔ lo “keketshana onto la wonyande ndo mbodiana onto la wonyande.” (1 Tɛs. 5:11) L’ɛnyɛlɔ k’asɔlayi wakamba dihɛka lo dihɛka lo ta, sho keketshanaka onto la wonyande. Sho hatohombe salɛ anangɛso ndo akadiyɛso kɔlɔ l’okonda ndo hatokoke nkaloya kɔlɔ lo kɔlɔ. (1 Tɛs. 5:​13, 15) Sho mɛnyaka nto ngandji kaso lo nɛmiyaka anangɛso walɔmbɔla etshumanelo.—1 Tɛs. 5:12. w23.06 10 od. 6; 11 od. 10-11