Ngɔndɔ ka dikumi l’ɔtɔi

Naka wɛ ekɔ ombutshi, kete nkimanyiya anayɛ dia vɔ ndjalɔngɔsɔla lo mbisha kɔmatɛrɛ yɛdimi l’ɛnɔnyi awɔ. Lo ntena dimɔ, awui wa wolo, ɛnyɛlɔ, ekakatanu wa lo diwala kana awui wendana la lɔkɛwɔ sɛdingɔmaka lo wekelo, koko ondo ekɔ odingɔ ɔtɔi kana ehende wakoka ɔna mbisha kɔmatɛrɛ. Ndo nto, nkimanyiya anayɛ dia vɔ nshihodia lande na kele aha mbala tshɛ kayowemɛka anya mbayowaasɔnaka dia nkadimola. Mbalembetshiya ngasɔ koka mbakimanyiya diaha vɔ nkɔmɔ etena kasɔnawɔ anto akina dia mbisha kɔmatɛrɛ lo dihole diawɔ. (1 Tim. 6:18) Sho tshɛ koka nɔngɔsɔla kɔmatɛrɛ yakeketsha dia mbisha Jehowa kɛnɛmɔ ndo nkeketsha asekaso Akristo. (Tok. 25:11) Kaanga mbakokaso lo ntena dimɔ mbisha kɔmatɛrɛ ka lo tshena pe kendana la dui dimɔ diakahomana la so, sho pombaka mbewɔ dia ntɛkɛta awui efula lo awui wendana la so shoamɛ. (Tok. 27:2; 2 Kɔr. 10:18) Lo dihole dia nsala ngasɔ, sho salaka la wolo dia kɔmatɛrɛ yaso ndeka mendana la Jehowa, la Ɔtɛkɛta ande ndo l’ekambi wakinde lo tshɛ kawɔ.—Ɛny. 4:11. w23.04 24-25 od. 17-18

Ngandji kekɔ ohomba dia ntetemala sungukala ndo monga la yimba y’ɔlɔlɔ. (Mat. 22:​37-39) Ngandji kokaso Nzambi tokimanyiyaka dia mbikikɛ l’olimu w’esambishelo kaanga la ntondo ka woho akɔna w’okakatanu wakoka tokomɛ. (2 Tim. 1:​7, 8) Kaanga mbɛnyaso ngandji kaso otsha le wanɛ wele bu la so mbetawɔ ɔtɔi, sho tetemalaka nsambisha kaanga lo tshimbo ya telefɔnɛ ndo ya mikanda. Hatoshisha elongamelo di’ɔnɛ lushi lɔmɔ asukanyi aso wayotshikitana ndo wayotatɛ nsala kɛnɛ kele ɔlɔlɔ. (Ɛzk. 18:​27, 28) Ngandji kokaso anto mendanaka ndo la asekaso Akristo. Sho mɛnyaka ngandji k’efula ka ngasɔ lo “keketshana onto la wonyande ndo mbodiana onto la wonyande.” (1 Tɛs. 5:11) L’ɛnyɛlɔ k’asɔlayi wakamba dihɛka lo dihɛka lo ta, sho keketshanaka onto la wonyande. Sho hatohombe salɛ anangɛso ndo akadiyɛso kɔlɔ l’okonda ndo hatokoke nkaloya kɔlɔ lo kɔlɔ. (1 Tɛs. 5:​13, 15) Sho mɛnyaka nto ngandji kaso lo nɛmiyaka anangɛso walɔmbɔla etshumanelo.—1 Tɛs. 5:12. w23.06 10 od. 6; 11 od. 10-11

Yoho mɔ yakokaso nkeketsha mbetawɔ kaso ele lo kanaka yimba l’oshinga w’etshungwelo. Oshinga w’etshungwelo toshikikɛka di’alaka wa Nzambi wayokotshama ndooko onyake. Naka sho nkana yimba l’oshinga w’etshungwelo ndo kɛnɛ kalembetshiya dui sɔ, kete tayokeketsha mbetawɔ kaso k’ɔnɛ daka dia Nzambi diendana la lɔsɛnɔ laha l’ekomelo l’andja woleki dimɛna efula diayokotshama. Lande na kakokaso mbuta ngasɔ? Kakɔna kalembetshiya oshinga w’etshungwelo? Jehowa akatome ɔnande la ngandji l’enondo, ɔngɛnyi ande wa ma ma oma l’olongo dia ndjotɔ oko onto la kokele. Etena kakinde lanɛ la nkɛtɛ, Yeso akakikɛ weho tshɛ w’ekakatanu wa wolo. Oma laasɔ, nde akasowe ndo akadiakema nyɔi k’esehe efula. Ande oshinga wa wolo wakafute Jehowa lee! Nzambi kaso ka ngandji totondetawɔ pondjo di’Ɔnande nsowa ndo mvɔ paka dia sho monga la lɔsɛnɔ la dimɛna efula koko la lo tshanda mɔtshi tsho. (Jni. 3:16; 1 Pe. 1:​18, 19) L’ɔtɛ w’oshinga wakandafute, Jehowa ayosala woho wa daka diande diendana la lɔsɛnɔ la pondjo la l’andja w’oyoyo kotshama. w23.04 27 od. 8-9

Onde Jehowa ekɔ la nsaki ka mbolola anto? Nde mɛtɛ ekɔ la tɔ. Nde akasambiya lofulo lɔmɔ l’afundji wa Bible dia vɔ mfunda daka diande dia lo nshi yayaye dia eolwelo. (Isa. 26:19; Ɛny. 20:​11-13) Ndo etena kalaka Jehowa daka dimɔ, ntena tshɛ nde todikotshaka. (Jas. 23:14) Lo mɛtɛ, Jehowa ekɔ lo nomɔlomɔ dia mbolola wanɛ wakavu. Tokane yimba la ɛtɛkɛta wakate Jɔbɔ laki owandji wa nkumbo. Nde aki l’eshikikelo dia kaanga nde kovɔka, Jehowa ayokombola nyomowɛna nto. (Jɔbɔ 14:​14, 15, nɔtɛ) Kɛsɔ mbakombola Jehowa ndo lo dikambo di’atɛmɔdi ande tshɛ wakavu. Nde ekɔ lo nomɔlomɔ dia nyomowasha nto lɔsɛnɔ dia vɔ ngɛnangɛna la yoonge ya dimɛna. Kayotota dikambo dia miliyara y’anto wakavu aha la monga la diɛsɛ dia mbeka awui wa mɛtɛ wendana la Jehowa? Nzambi kaso ka ngandji nangaka mbowaolola ndo vɔ la wɔ. (Ets. 24:15) Nde nangaka dia vɔ nkondja diaaso dia nkoma angɛnyi ande ndo sɛnaka pondjo pondjo la nkɛtɛ.—Jni. 3:16. w23.04 9 od. 5-6

Ngande wakokayɛ nkeketsha elongamelo kayɛ? Ɛnyɛlɔ, naka wɛ ekɔ l’elongamelo ka nsɛna pondjo pondjo lanɛ la nkɛtɛ, adia woho walembetshiya Bible woho wayonga paradiso ndo nkana la tɔ yimba. (Isa. 25:8; 32:​16-18) Nkanyiya woho wayoyala lɔsɛnɔ l’andja w’oyoyo. Ɔsa diele oko wɛ aya lɛkɔ. Naka sho mbɔsaka etena ka nkana yimba l’elongamelo k’andja w’oyoyo, ekakatanu aso wayonga wa lo “tshanda mɔtshi tsho ndo bu wolo.” (2 Kɔr. 4:17) Elongamelo kakosha Jehowa kayokokeketsha. Nde ambootoshaka kɛnɛ tshɛ kele laso ohomba dia nongola ekeketshelo k’oma le nde. Ɔnkɔnɛ, etena keyɛ l’ohomba wa nkotsha ɔkɛndɛ ɔmɔ, dia mbikikɛ ohemba, kana dia ntetemala monga l’ɔngɛnɔngɛnɔ, lɔmba Jehowa l’otema ɔtɔi ndo yanga ɛlɔmbwɛlɔ kande lo wekelo w’onto ndamɛ. Etawɔ ekeketshelo k’oma le anangɛyɛ l’akadiyɛyɛ w’Akristo. Ɔsaka etena ka kanaka yimba lo dikambo di’elongamelo kayɛ ka nshi yayaye. Oma laasɔ, wɛ “[ayokeketshama] la wolo w’efula lo ndjela nkudu ka [Nzambi] ka diambo dia [wɛ] monga l’akoka wa mbikikɛ tshɛ lo tshɛ la solo dia lotutsha ndo l’ɔngɛnɔngɛnɔ.”—Kɔl. 1:11. w23.10 17 od. 19-20

Tekɔ l’ɛkɔkɔ efula wa mbishaka Jehowa losaka lo dɔmbɛlɔ. Sho kokaka mbosha losaka lo dui tshɛ di’ɔlɔlɔ diele la so; laadiko a laasɔ, woshasha tshɛ w’ɔlɔlɔ ndja oma le nde. (Jak. 1:17) Ɛnyɛlɔ, sho koka nkɛnɛmɔla lowando laso, l’ɔtɛ wa nkɛtɛ k’olangala ndo diangɔ dia diambo diakandatonge. Sho koka nto nkɛnɛmɔla lowando lo lɔsɛnɔ lele la so, lele la nkumbo kaso, lele la angɛnyi aso ndo elongamelo kele la so. Ndo sho kombolaka dia mbosha losaka l’ɔtɛ wetawɔnde dia sho monga la lɔngɛnyi la dimɛna la nde. Sho mbeyaka monga l’ohomba wa mbidja welo wa laande dia nkanyiya dikambo di’ɛkɔkɔ wele la so onto l’onto wa monga la lowando otsha le Jehowa. Tekɔ lo nsɛna l’andja wele la wendjudi. Mbala efula anto ndjashaka paka lo kɛnɛ kalangawɔ lo dihole dia kɛnɛ kakokawɔ nsala dia vɔ mɛnya lowando lo kɛnɛ kele lawɔ. Naka sho ntatɛ mbokoya dionga sɔ, kete alɔmbɛlɔ aso koka monga listɛ la dɔmbalɔmba. Dia mbewɔ diaha dui sɔ tokomɛ, tekɔ l’ohomba wa ntetemala nkɛnɛmɔla ndo mɛnya lowando lo kɛnɛ tshɛ kasala Jehowa lo dikambo diaso.—Luka 6:45. w23.05 4 od. 8-9

Oko wende Shɛso ka ngandji, Jehowa halange tɛna tasowa. (Isa. 63:9) Koko, nde hatoshimbɛ oma l’ehemba tshɛ wahomana la so, wele oko ɛkɛdi kana loombe la dja. (Isa. 43:2) Koko nde tolakaka dia nde ayotokimanyiya ‘dia mbaatehɔ.’ Ndo nde hetawɔki di’ehemba wele la so ɛlɔ kɛnɛ tokonya dia sho sowaka pondjo. Jehowa toshaka nto wolo ande wa nyuma kande k’ekila katokimanyiya dia sho mbikikɛ. (Luka 11:13; Flpɛ. 4:13) Etombelo wele la dui sɔ ele, sho koka monga l’eshikikelo dia tayongaka nshi tshɛ la kɛnɛ keso la tɔ mɛtɛ ohomba dia mbikikɛ ndo ntetemala ntshikala la kɔlamelo le nde. Jehowa nongamɛka dia sho ndjaɛkɛ le nde. (Hɛb. 11:6) Lo tena dimɔ, ehemba wahomanaso la wɔ mbeyaka mɛnama diele oko hatotowatondoya. Sho mbeyaka kaanga ntatɛ mbidja taamu ɔnɛ Jehowa ayotokimanyiya. Koko Bible toshikikɛka dia lo tshimbo ya wolo waki Nzambi sho koka “mbidɛ lo ehele.” (Os. 18:29) Ɔnkɔnɛ, lo dihole dia sho monga la taamu, sho pombaka nɔmba dia monga la mbetawɔ k’efula tele l’eshikikelo dia Jehowa ayokadimola alɔmbɛlɔ aso.—Jak. 1:​6, 7. w23.11 22 od. 8-9

Ande woho wolembetshiyami dimɛna ngandji ka mɛtɛ lee! Ɛtɛkɛta ɛsɔ wekɔ lo nkeketsha atshukanyi ɔnɛ: Nyu koka monga la ngandji ka wolo lam’asanyu. Dui sɔ nɔmbaka dia atshukanyi mbidja welo dia mɛnyanya ngandji lam’asawɔ edja tshɛ kekewɔ la lɔsɛnɔ. Ɛnyɛlɔ, seka dia dja koka ntetemala mpɛta, naka wekɔ lo ntetemala mbidja nkunyi lɔkɔ. Yɔ koka nyimala naka ndooko onto ladja nkunyi lɔkɔ. Woho akɔ waamɛ mbele, ngandji kele lam’asa wadi l’omi koka ntetemala monga wolo paka naka wekɔ lo nkeketsha diɔtɔnganelo diele lam’asawɔ. Lo ntena dimɔ, atshukanyi koka ndjaoka dia ngandji kawɔ kambɔla, djekoleko etena kahomanawɔ l’ekakatanu wendana l’ekondjelo, yoonge kana nshɛngiya yendana la wodielo w’ana. Dia ntetemala mpɛtsha “loombe la Jah,” wadi l’omi pombaka nkamba la wolo dia nkeketsha diɔtɔnganelo diele lam’asawɔ la Jehowa. w23.05 20-21 od. 1-3

Dia monga la dihonga, kakɔna kahombaso nsala? Ambutshi aso mbeyaka tokeketsha dia monga la dihonga, koko vɔ hawokoke tosambiyɛ dionga sɔ oko etenyi k’okitɔ wa nkumbo. Monga la dihonga ekɔ oko mbeka dia monga la dikoka kana diewo dimɔ. Yoho mɔ yakoka onto monga la diewo sɔ ele lo mendaka etsha w’ombetsha ande, ko oma laasɔ, nde mbokoya ɛnyɛlɔ kande. Woho akɔ waamɛ mbele, sho mbekaka dia monga la dihonga lo sɛdingolaka la yambalo tshɛ woho wakɛnɛmɔla anto akina dionga sɔ, ko oma laasɔ, sho mbokoya ɛnyɛlɔ kawɔ. L’ɛnyɛlɔ ka Danyɛlɛ, sho pombaka mbeya Ɔtɛkɛta wa Nzambi dimɛna. Sho pombaka monga la diɔtɔnganelo dia ma ma la Jehowa lo sawolaka la nde mbala la mbala aha la mboka wɔma. Ndo sho pombaka ndjaɛkɛ le Jehowa, tele l’eshikikelo dia nde ekɔ lo tosukɛ. Laasɔ, etena kayɔtɔ mbetawɔ kaso l’ohemba, sho tayonga la dihonga. Anto wele la dihonga nɛmiyamaka mbala efula oma le anto akina. Vɔ koka nkotola anto wele l’etema w’ɛlɔlɔ oya le Jehowa. Lo mɛtɛ, tekɔ l’ɛkɔkɔ efula wa monga la dihonga. w23.08 2 od. 2; 4 od. 8-9

Tshɛkɛta ya lo Grɛkɛ yokadimɔmi ɔnɛ “nyɔsɛdingole” yakakambemaka dia nembetshiya yoho yakahembaka anto mbolo dia menda kana yɔ yekɔ nkonga ndo mfɛsa dia ndjashikikɛ dia kana yɔ yekɔ amɛna. Woho akɔ waamɛ mbele sho pombaka mpemba kɛnɛ kahokamɛso kana kɛnɛ kadiaso dia nshikikɛ kana kekɔ dimɛna. Diɔ diamboleka monga ohomba efula le so etena kayasukana mfɔnu ka woke. Lo dihole dia mbetawɔ dui tshɛ diata anto akina, sho kambaka l’akoka aso w’ekanelo ka yimba dia mbɛdika kɛnɛ kadiɛso la kɛnɛ kokaso la kɛnɛ kata Bible ndo okongamelo wa Jehowa. Lo nsala ngasɔ, hatotokesama oma lo prɔpagandɛ tshɛ y’ɛdiɛngɛ kana lokeso lawɔ. (Tok. 14:15; 1 Tim. 4:1) Oko olui, ekambi wa Nzambi wayoka lo mfɔnu ka woke. Koko, le onto ndo l’onto, hateye kɛnɛ kakoka tokomɛ loyi. (Jak. 4:14) Koko, oyadi tayonga la lɔsɛnɔ lo mfɔnu ka woke kana tayovɔ la ntondo ka tɔ ndja, tayolongola difuto dia lɔsɛnɔ la pondjo naka tayotetemala ntshikala la kɔlamelo. Nyɛsɔ sho tshɛ toleke ndjasha lo elongamelo kaso ka diambo ndo ntetemala monga suke dikambo dia lushi la Jehowa! w23.06 13 od. 15-16

Hateye woho wayokotshama prɔfɛsiya mɔ ya lo Bible. (Dan. 12:​8, 9) Koko aha naka hatoshihodia tshɛ lo tshɛ woho wayokotshama prɔfɛsiya kɛmɔ, kete laasɔ tɔ hatokotshama. Aha la taamu, sho koka monga l’eshikikelo dia Jehowa ayotosholɛ kɛnɛ kahombaso mbeya l’etena shikaa oko wakandasale lo nshi yakete. Diewoyelo dia “ki la lotui tshitshi” diayoshama. (1 Tɛs. 5:3) Oma laasɔ, mandji ya pɔlitikɛ yayokadimwɛ ɛtɛmwɛlɔ wa kashi ndo wayowalanya tshɛ. (Ɛny. 17:​16, 17) Oma laasɔ nto, vɔ wayɔlɔsha ekambi wa Nzambi. (Ɛzk. 38:​18, 19) Awui asɔ mbayokonya mbala kakɔ ɔtɔi lo ta di’ekomelo di’Aramangɛdɔna. (Ɛny. 16:​14, 16) Sho koka monga l’eshikikelo di’awui asɔ wayanga salema keema edja. Koko etena kaakatakongɛ awui asɔ, nyɛsɔ totetemale mɛnya lowando laso le Shɛso lele l’olongo loludi la ngandji lo mbidja yimba lo prɔfɛsiya ya lo Bible ndo lo nkimanyiya anto akina dia nsala woho akɔ waamɛ. w23.08 13 od. 19-20

Etena kakatɛkɛtaka ɔpɔstɔlɔ Pɔɔlɔ dikambo dia mbetawɔ, di’elongamelo ndo dia ngandji, nde akakomiya lo mbuta dia “kɛnɛ koleki woke l’atei [wa waonga asɔ] ko ngandji.” (1 Kɔr. 13:13) Lande na kakate Pɔɔlɔ ngasɔ? Lo nshi yayaye, hatotonga nto l’ohomba wa monga la mbetawɔ l’alaka wa Nzambi wendana l’andja ande w’oyoyo kana nongamɛ di’alaka asɔ wayokotshama nɛ dia laasɔ ko wamboshila la kotshama. Koko tayongaka l’ohomba wa mboka Jehowa ndo anto ngandji. Ngandji kawaokaso kayotetemalaka mpama pondjo. Ngandji teyanyaka oko Akristo wa mɛtɛ. Yeso akatɛ apɔstɔlɔ ande ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Jni. 13:35) Ndo nto, mbokana ngandji lam’asaso tokonyaka dia sho ntetemala monga kaamɛ. Pɔɔlɔ akelɛ ngandji ɔnɛ “dimama dia kokele.” (Kɔl. 3:14) Ɔpɔstɔlɔ Joani akafundɛ asekande ambetawudi ɔnɛ: “Onto loka Nzambi ngandji pombaka nto nanga ɔnango.” (1 Jni. 4:21) Etena kɛnyanyaso ngandji lam’asaso, sho mɛnyaka dia sho mbokaka Nzambi ngandji. w23.11 8 od. 1, 3

Bible mbɛdikaka lɔsɛnɔ laso l’Okristo l’ondawi wa lowango. Andawi wa mango wakoma polo l’oshidi w’ekomelo, wayokondja lɔsɛnɔ la pondjo. (2 Tim. 4:​7, 8) Sho pombaka nsala la wolo tshɛ dia ntetemala ndawɔ, djekoleko lam’ele taya suke l’ekomelo ka lowango laso. Ɔpɔstɔlɔ Pɔɔlɔ akɛnya kɛnɛ kakokaso nsala dia mbidja otshumba lo lowango. Nde akatodjangɛ dia ‘minya wetsho tshɛ ndo ndawɔ l’ekikelo tshɛ lo lowango lele la ntondo kaso.’ Onde Pɔɔlɔ akalange mɛnya dia aki wotsho ɔmɔ wele Okristo hakoke mɛmba? Ndooko, aha kɛsɔ mbakandalange mbuta. Koko, nde akalange mbuta dia sho pombaka minya wotsho tshɛ wele bu ohomba. Wotsho wa ngasɔ koka nkitshakitsha lowango laso ndo tokonya dia sho nɛmba. Sho pombaka mbikikɛ, minya ndo mbeya esadi eto wotsho tshɛ wele bu ohomba wakoka tokonya dia sho nɛmba. L’etena kakɔ kaamɛ, sho hatohombe mbikadja wetsho wahombaso mɛmba. Naka sho ntshika mɛmba wetsho ɛsɔ, kete hatototetemala ndawɔ.—2 Tim. 2:5. w23.08 26 od. 1-2

Ekanelo k’ɔlɔlɔ koka tokimanyiya nto dia nɛmiya tokanyi t’anto akina. Ɛnyɛlɔ, akadiyɛso amɔ nangaka ndjalɛnga etena kele akina hawolange nsala dui sɔ. Akristo amɔ nangaka nnɔ wanu la wɛdimo, koko akina hawolange ndɛta kaanga yema. Akristo tshɛ kombolaka monga la yoonge ya dimɛna, koko vɔ sɔnaka toho t’esakelo totshikitanyi. Naka sho fɔnyaka mbala tshɛ dia sho mbele la shadiya ndo sho salaka la wolo dia mbetawoya anangɛso l’akadiyɛso dia nsala dui diakombolaso, kete dui sɔ koka ntakanya anto akina ndo mbidja diatɔnelo. (1 Kɔr. 8:9; 10:​23, 24) Ɛnyɛlɔ, lo dihole dia nde tohikɛ ɛlɛmbɛ la wolo wendana la ɔlɔtɔ, Jehowa akatosha atɔndɔ wahombaso ndjela. Sho ndɔtaka lo yoho yasungana l’ekambi wa Nzambi, mbuta ate la wɛdimo ndo la “yimba y’ɔlɔlɔ.” (1 Tim. 2:​9, 10) Koko hatosale dia nkotola yambalo y’anto tshanana oma lo yoho yaso ya ndɔta. Atɔndɔ wa lo Bible wayokimanyiya nto dikumanyi dia mbewɔ mbidja ɛlɛmbɛ awɔ hita lo kɛnɛ kendana la ɔlɔtɔ ndo la ɔlɔngɔswɛlɔ wa divo. w23.07 23-24 od. 13-14

Jehowa kambaka la bɛnyɛlɔ dia wamato ahende wa didjidji asɔ dia tɛnya woho wa monga l’ɔngɛnɔngɛnɔ lo nshi yayaye. Wanɛ wetawɔ leeta l’oma le “womoto l’enginya” pembaka ntana ɔngɛnɔngɛnɔ lo nsala awui wa mindo wa dieyanelo. Koko lo mɛtɛ, vɔ hawoshihodia dia kɛnɛ kasalawɔ kayonga la shɛngiya lo kɛnɛ kayowakomɛ lo nshi yayaye. Etsha awɔ wayowakonya “lo ɛhɔngɔ wa Diombo.” (Tok. 9:​13, 17, 18) Wanɛ wetawɔ leeta l’oma le womoto la didjidji lele la “lomba la mɛtɛ” wayokondja ɛngɛnɔngɛnɔ wotshikitanyi lo nshi yayaye! (Tok. 9:1) Sho mbekaka dia mbeya kɛnɛ kalanga Jehowa ndo petshaka kɛnɛ kahetshande. (Os. 97:10) Ndo sho mongaka l’ɔngɛnɔngɛnɔ nɛ dia sho koka mbelɛ anto akina dia vɔ ndjokondja wahɔ oma lo “lomba la mɛtɛ.” Tekɔ oko ekambi wanɛ welɛ “oma lo dongolongo la diko di’osomba ɔnɛ: ‘Onto tshɛ lahatahokɔ akambo aye lanɛ.’” Wahɔ wakondjaso ndo wakondja wanɛ wetawɔ leeta lɔsɔ bu tsho lanɛ ndo l’etena kɛnɛ. Vɔ wekɔ lo mbikikɛ, tokimanyiyaka dia “nsɛna” pondjo pondjo oko tekɔ lo tatshu “otsha la ntondo lo mboka ka yimba.”—Tok. 9:​3, 4, 6. w23.06 24 od. 17-18

Ngande watoyoyaokaka etena kakombola osekayɛ la l’olimu kana la la kalasa awui wendana la dietawɔ diayɛ? Onde wɛ tomalaka? Efula ka l’atei aso tomalaka. Koko dimbola diele oko sɔ koka tokimanyiya dia nshihodia kanyi yele l’onto kana dietawɔ diande ndo toshaka diaaso dia mbosambisha. Lo tena dimɔ, onto koka mboka dimbola diakombolande dia sho mana la nde. Dui sɔ hadiotambiya. Anto amɔ wekɔ la kanyi ya kɔlɔ lo dikambo dia dietawɔ diaso. (Ets. 28:22) Ndo nto, tekɔ lo nsɛna lo “nshi y’ekomelo” etena kele anto efula ‘hawotolanga mbokana’ ndo “wayonga akanga w’ekonda.” (2 Tim. 3:​1, 3) Wɛ mbeyaka ndjambola ɔnɛ: ‘Ngande wahombami monga la memakana ndo la loshilambo etena kɛnama diele oko onto ɔmɔ ekɔ lo nanga mana la mi lo dikambo dia dietawɔ diami?’ Kakɔna kayokokimanyiya? Lo tshena pe, memakana kayokokimanyiya. Onto lele la memakana homala esadi, nde mongaka la solo dia lotutsha etena kosolawɔ kana etena kawokawɔ dimbola diende heye okadimwelo shikaa. w23.09 14 od. 1-2

Lo tena dimɔ, alako walongolaso oma le okongamelo tokokɛka oma lo lomombo la l’emunyi ndo l’elimu wakoka mbidja diɔtɔnganelo diasaso la Nzambi lo waale. Ndo lo dikambo sɔ nto, tambɔtshɔkɔma lo ndjela ɛlɔmbwɛlɔ katosha Jehowa. (Isa. 48:​17, 18; 1 Tim. 6:​9, 10) Aha la taamu, Jehowa ayotetemala nkamba l’anto wele enyimpala ande dia tosha ɛlɔmbwɛlɔ lo mfɔnu ka woke ndo l’ɛlɔmbwɛlɔ k’ɛnɔnyi kinunu. Onde tayotetemala ndjela ɛlɔmbwɛlɔ kɛsɔ? Ɛtshɔkɔ efula wayotokondja nemanɛka la kɛnɛ kasalaso dia ndjela ɛlɔmbwɛlɔ katosha Jehowa ɛlɔ kɛnɛ. Diakɔ diele, nyɛsɔ totetemalake ndjela ɛlɔmbwɛlɔ katosha Jehowa nshi tshɛ, mbidja ndo kɛnɛ koye oma le apami wakandasɔnɛ dia tolama. (Isa. 32:​1, 2; Hɛb. 13:17) Ndo naka sho nsala ngasɔ, tayonga l’ɛkɔkɔ wa ndjaɛkɛ le Ɔnɔmbɔdi aso, Jehowa, ɔnɛ latɔlɔmbɔla oma lo waale wa lo nyuma ndo latatɔlɔmbɔla otsha lɛnɛ atatatshu, mbuta ate otsha lo lɔsɛnɔ la pondjo lo andja w’oyoyo. w24.02 25 od. 17-18

Ɔpɔstɔlɔ Pɔɔlɔ aki l’ɔngɛnɔngɛnɔ l’olimu wa Jehowa, koko nde akahomana l’ekakatanu efula wakandahombe nkandola. Mbala efula, Pɔɔlɔ akande nkɛndɔ y’etale ndo munda nkɛndɔ komonga wɔdu lo nshi yande shɔ. Lo nkɛndɔ yande, tena dimɔ Pɔɔlɔ “aki lo waale lo nkushi” ndo “lo waale w’oma le apɔtwanyi.” Lo tena dimɔ nto, atunyi ande wakɔkɔmɔla. (2 Kɔr. 11: 23-27) Ndo aha mbala tshɛ mbaki anango w’Akristo la lowando le nde l’ɔtɛ w’akambo w’ɛlɔlɔ wakandasalaka dia mbaakimanyiya. (2 Kɔr. 10:10; Flpɛ. 4:15) Kakɔna kakakimanyiya Pɔɔlɔ dia ntetemala kambɛ Jehowa? Pɔɔlɔ akeke awui efula lo kɛnɛ kendana la lonto la Jehowa oma l’Afundelo ndo oma l’awui wakokomɛ. Pɔɔlɔ akayonga l’eshikikelo dia Jehowa Nzambi mbookaka ngandji. (Rɔmɔ 8:​38, 39; Ɛf. 2:​4,5) Ndo nde akayokoma lo mboka Jehowa ngandji k’efula. Pɔɔlɔ akɛnya ngandji kakandokaka Jehowa lo “kambɛ ekilami ndo lo ntetemala mbakambɛ.”—Hɛb. 6:10. w23.07 9 od. 5-6

Anto efula mbetawɔka dia tekɔ l’ohomba w’ewandji wa lɛɛta ndo sho pombaka nkitanyiya ɛlɛmbɛ ɛmɔ watodjɛ “ewandji wa laadiko.” (Rɔmɔ 13:1) Koko anto akɔ waamɛ mengengaka dia nkitanyiya ɛlɛmbɛ ɛmɔ wɛnawɔ dia keema losembwe kana wɛnawɔ dia wekɔ lo mbahika awui efula. Bible mbetawɔka dia ewandji w’ana w’anto mbele lo kiɔkɔ y’asui wadiɛnɛ anto, wekɔ l’ɛlɔmbwɛlɔ ka Satana ndo keema edja wayanga ndanyema. (Os. 110:​5, 6; Ond. 8:9; Luka 4:​5, 6) Ndo tɔ totɛka nto ɔnɛ “onto tshɛ lalɔshana la lowandji ambɔlɔshana la yɛdikɔ y’oma le Nzambi.” L’etena kɛnɛ Jehowa aketawɔ di’ewandji wa lɛɛta tɔlɔmbɔla ndo nɔmbɔla akambo ndo nde nongamɛka dia sho mbakitanyiya. Ɔnkɔnɛ, sho pombaka “mbasha kɛnɛ tshɛ kahombawɔ nongola,” mbidja ndo elambo, dilɛmiɛlɔ, ndo okitanyiya. (Rɔmɔ 13:​1-7) Sho mbeyaka mɛna di’ɔlɛmbɛ ɔmɔ bu dimɛna, bu la losembwe ndo ekɔ wolo nkitanyiya. Koko sho kitanyiyaka Jehowa ndo nde tɔlɔmbaka dia nkitanyiya ewandji ɛsɔ wa laadiko etena tshɛ kewɔ watatɔlɔmbɛ dia mɔnyɔla wadjango ande.—Ets. 5:29. w23.10 8 od. 9-10

Lam’akotɔ Samisɔna, ko ase Filistiya wolɛ wodja w’Isariyɛlɛ ndo waahɛnyahɛnya. (Emb. 13:1) Lowandji lawɔ la hiadi lɔsɔ lakela ase Isariyɛlɛ asui efula. Jehowa akasɔnɛ Samisɔna dia nde “[ntatɛ] nshimbɛ ase Isariyɛlɛ oma lo anya w’ase Filistiya.” (Emb. 13:5) Dia nkotsha ɔkɛndɛ wa wolo ɔsɔ, Samisɔna akahombe ndjaɛkɛ le Jehowa. Lo diaaso dimɔ, olui w’asɔlayi w’ase Filistiya wakaye ndjonda Samisɔna la Lehi ondo la Juda. Apami w’ase Juda waki la wɔma diakɔ diakawɔshi yɛdikɔ ya nkimɔ Samisɔna le atunyi. Anto waki Samisɔna hita wakawonde, wakokeleka la ɛkɔdi ehende w’eyoyo ndo wakɔtɔlɛ le ase FiIistiya. (Emb. 15:​9-13) Koko, “nyuma ka Jehowa kakawosha wolo” ndo kakotshungola oma l’ɛkɔdi. Oma laasɔ, nde “akɛnyi lowanga la mponda k’omi leke oyoyo,” ko akaliɔshi ndo akakambe la lɔ dia ndjaka apami w’ase Filistiya 1000!—Emb. 15:​14-16. w23.09 2 od. 3-4

Jehowa akatasholaka yema yema “sangwelo dia pondjo” diatanema lo Bible. Lo yoho mɔ kana kina, nde tondoyaka nshi tshɛ nɛ dia nde “akasale elimu tshɛ dikambo dia sangwelo diande.” (Tok. 16:4) Ndo etombelo wa kɛnɛ kasala Jehowa wayotshikalaka pondjo. Naa sangwelo diaki Jehowa ndo etshikitanu akɔna wakandasale l’oyango wa dikotsha? Nzambi akatɛ anto wa ntondo wakandatonge sangwelo diande lo dikambo diawɔ. Vɔ wakahombe ‘mbotanɛ, fulanɛ, ndodia nkɛtɛ ndo mbolɛ ditongami tshɛ diele la lɔsɛnɔ diakɛndakɛnda la nkɛtɛ.’ (Eta. 1:28) Ɔtɔmbɔkwɛlɔ w’Adama la Eva mbakayɔtshiya pɛkato lo nkumbo k’ana w’anto, koko dui sɔ koshimba dia sangwelo diaki Jehowa kotshama. Nde akasale etshikitanu lo yoho ya mbodikotsha. Aha la ntshimbatshimba, nde akɔsɛ yɛdikɔ ya ntondja Diolelo dia l’olongo diayokotsha sangwelo diande di’oma k’etatelo lo dikambo di’anto ndo dia nkɛtɛ.—Mat. 25:34. w23.10 20 od. 6-7

Jehowa koka tokimanyiya dia sho ntetemala mbokambɛ. Dui sɔ mbeyaka monga tshondo ya ta lo yoho ya laande naka tekɔ lo ndɔshana la wɔdu ɔmɔ wambokaka edio. Lo tena dimɔ, wɛɔdu aso ɛsɔ mbeyaka mɛnama dia wekɔ wolo efula oleki wɛnɛ wakalɔshanaka l’ɔpɔstɔlɔ Petero. Koko Jehowa koka tosha wolo waha mpekɔ. (Os. 94:​18, 19) Ɛnyɛlɔ, ɔnangɛso ɔmɔ akayasha lo dieyanelo dia lam’asa pami la pami l’edja k’ɛnɔnyi efula la ntondo ka nde ndjeka akambo wa mɛtɛ. Nde akɔshi yɛdikɔ ya nde ntshikitanya yoho yande ya lɔsɛnɔ shɔ ndo oma laasɔ nsɛna lo ndjela atɔndɔ wa lo Bible. Koko, tena la tena nde akalɔshanaka la nsaki ya kɔlɔ shɔ. Kakɔna kakokimanyiya dia ntetemala? Nde nembetshiyaka ɔnɛ: “Jehowa toshaka wolo.” Nde kotshaka ɔnɛ: “L’ekimanyielo ka nyuma ka Jehowa . . . , lakeke dia kokaka [ntetemala] nsɛna lo yoho yangɛnyangɛnya Jehowa . . . Jehowa ekɔ l’akoka wa nkamba la mi kaanga la ntondo ka wandja ami, nde tetemalaka mbishami wolo.” w23.09 23 od. 12

Anangɛso w’ɛlɔngɔlɔngɔ le, hanyotokoma Akristo wa mbotshunda lo nyuma aha la mbidja welo. Nyu pombaka nsɔna bɛnyɛlɔ di’amɛna dia mbokoya, monga la dikoka di’ekanelo ka yimba, monga anto wakokawɔ mbɛkɛ otema, monga l’akoka wele ohomba lo lɔsɛnɔ ndo ndjalɔngɔsɔla dia ndjɛmba ɛkɛndɛ lo nshi yayaye. Lo tena dimɔ nyu mbeyaka nkɔmɔ naka nyu menda olimu w’efula wele la ntondo kanyu. Koko nyu koka ntondoya. Nyohɔ dia Jehowa ekɔ lo nomɔlomɔ dia nyokimanyiya. (Isa. 41:​10, 13) Lo mɛtɛ, anangɛnyu l’akadiyɛnyu wa lo etshumanelo wayonyokimanyiya ndo vɔ lawɔ. Etena kakomayɛ Okristo wa mbotshunda lo nyuma, wɛ ayonga la lɔsɛnɔ la dimɛna ndo l’ɔngɛnɔngɛnɔ. Ɛlɔngɔlɔngɔ le, sho nyokaka ngandji efula! Jehowa atshɔkɔlɛ welo wadjanyu oma ko kakianɛ dia nkoma Akristo wambotshunda lo nyuma. w23.12 29 od. 19-20

Ohɔsa dia nyakasanganyi kaamɛ lo dihole dimɔ wɛ l’anangɛyɛ l’akadiyɛyɛ. Nyekɔ lo mbetsha etena ka dimɛna efula ndo l’ekomelo nyambɔtɔ foto kɛmɔ. Ko wɛ ambonda foto olekanyi hiende ko ka ntondo kakayandji hatombi dimɛna. Wonya ɔnɛ wɛ aya la foto shato. Koko wɛ ambɛna dia foto kɛmɔ l’atei ayɔ, ɔnangɛso ɔmɔ hɔdi. Wɛ ayokidimola nɛ dia wɛ ekɔ la foto kina hiende yele onto tshɛ la l’olui mbidja ndo ɔnangɛso akɔ ekɔ lo mbɔla. Mbala efula sho namaka lo yimba tena di’amɛna diakatetshisha l’anangɛso l’akadiyɛso. Koko ohɔsa dia lo diaaso dimɔ l’atei wa waaso asɔ, ɔnangɛso kana kadiyɛso kɛmɔ akatshi kana akasadi dui dimɔ dia kɔlɔ. Kakɔna kahombaso nsala la dui sɔ diele lo wɔɔngɔ aso? Lande na keyɛ hasale tshɛ dia dimola dui diakɔ oko onto ladimola foto kɛmɔ l’atei wa foto shɔ? (Ɛf. 4:32) Sho koka mbohɛ nɛ dia tekɔ lo mbohɔ tena di’amɛna efula diakatetsha la wɔ kaamɛ l’onto ndo l’onto. Wasɔ mbele awui wakombolaso mbohɔka ndo namaka. w23.11 12-13 od. 16-17

Tɔtɛkɛta ta lo Grɛkɛ tokambiwɔ lawɔ lanɛ mɛnyaka dia Okristo wa womoto pombaka ndɔta lo yoho yayowosha kɛnɛmɔ ndo mbidja yimba lo nsaki y’anto akina kana kɛnɛ kayowota. Ande ofunu wele laso lo dikambo dianyu nyu akadiyɛso w’Akristo wambotshunda lo nyuma lo woho walɔtanyu la wɛdimo lee! Shɛnɔdi ekɔ dionga dikina diahomba akadiyɛso w’Akristo tshɛ wambotshunda lo nyuma nkɛnɛmɔla. Shɛnɔdi kɛdikɛdi na? Ekɔ dikoka dia mbeya kɛnɛ kele ɔlɔlɔ ndo kɛnɛ kele kɔlɔ ndo oma laasɔ nsɔna dia nsala kɛnɛ kele ɔlɔlɔ. Tɔsɛdingole ɛnyɛlɔ kaki Abigayɛlɛ. Omɛnde akɔshi yɛdikɔ ya kɔlɔ yakakoke nkonya ase luudu lande tshɛ lo mpokoso ka wolo. Abigayɛlɛ akasale akambo aha la ntshimbatshimba. Yimba yande y’ɔlɔlɔ yakashimbɛ nsɛnɔ y’anto. (1 Sa. 25:​14-23, 32-35) Shɛnɔdi tokimanyiyaka nto dia mbeya etena ka ntɛkɛta ndo etena ka mbɔlama. Ndo yɔ tokimanyiyaka dia sho ntetemala monga la wɛdimo etena kɛnyaso dia sho ndjashaka le anto akina.—1 Tɛs. 4:11. w23.12 20 od. 8-9

Ɔpɔstɔlɔ Pɔɔlɔ, etshumanelo ka la Rɔmɔ kakandafundɛ ɛtɛkɛta ɛsɔ. Anangɛso l’akadiyɛso wa la Rɔmɔ wakeke akambo wendana la Jehowa ndo la Yeso, vɔ wakonge la mbetawɔ ndo wakakome Akristo. Ɔnkɔnɛ, Nzambi “aka[waɔshi] oko anto w’ɛlɔlɔ l’ɔtɛ wa mbetawɔ kawɔ,” ndo akawasha nyuma k’ekila. (Rɔmɔ 5:1) Vɔ wakakondja elongamelo ka shikaa ndo ka diambo. L’ɔkɔngɔ diko Pɔɔlɔ akayofundɛka Akristo w’akitami wa l’Ɛfɛsɔ lo kɛnɛ kendana l’elongamelo kakawasha Nzambi. Elongamelo kɛsɔ kakendanaka nto la nongola elongamelo kelamɛ “ekilami oko etenyi k’okitɔ.” (Ɛf. 1:18) Ndo nto Pɔɔlɔ akɛnya ase Kɔlɔsayi lɛnɛ ayowolongola difuto diawɔ. Nde akelɛ difuto sɔ ɔnɛ “elongamelo kanyolamɛwɔ l’olongo.” (Kɔl. 1:​4, 5) Elongamelo kele l’Akristo w’akitami, ele ka vɔ mbolwama otsha lo lɔsɛnɔ la pondjo la l’olongo lɛnɛ ayowotolɛ kaamɛ la Kristo.—1 Tɛs. 4:​13-17; Ɛny. 20:6. w23.12 9 od. 4-5

Tshɛkɛta y’edjedja yokambi la wɔ ɔnɛ “nama” yakendanaka la etelo k’asɔlayi ndo wakakambaka la yɔ dia nembetshiya asɔlayi walama osomba ndo wawokokɛ oma lo weho w’ɛlɔshamelo tshɛ. Anto wa l’osomba wakawalamaka wakalalaka djɔ ya baku, weya dia asɔlayi wekɔ la soko dia mbalamaka. Woho akɔ waamɛ mbele, etena kalama wɔladi wa Nzambi etema ndo tokanyi taso, sho ndjaokaka lo wɔladi, teya dia tekɔ l’ekokelo. (Os. 4:8) L’ɛnyɛlɔ ka Hana, kaanga naka okakatanu aso hawoshidi mbala kakɔ ɔtɔi, sho koka ntetemala ndjaoka yema lo wɔladi. (1 Sa. 1:​16-18) Ndo etena kayaokaso lo wɔladi, mbala efula mongaka wɔdu l’eso dia nkanyiya lo yoho ya dimɛna ndo mbɔsa tɛdikɔ ta lomba. Ngande wakokaso nsala dui sɔ. Etena keyɛ l’ekiyanu, elɛ olami, ko wɛ ntɛkɛta la nde. Lo ngande? Lo nɔmba edja ndo wɛ ambokondja wɔladi wa Nzambi. (Luka 11:9; 1 Tɛs. 5:17) Naka wɛ ambohomana la mpokoso kɛmɔ, tetemala ndjasha lo dɔmbɛlɔ ndo wɛ ayɛna dia wɔladi wa Jehowa wekɔ lo nama otema ndo yimba yayɛ.—Rɔmɔ 12:12. w24.01 21 ¶5-6

Dia nkidia lokombo la She, Yeso akakikɛ weho w’ɛhɛnyɔhɛnyɔ tshɛ, ntɛngɔ ndo emamatanya. Nde akeyaka dia nde akakitanyiyaka She l’oseka dui tshɛ; takinde l’ɔkɔkɔ wa mboka nsɔnyi. (Hɛb. 12:2) Nde akeyaka nto dia Satana mbakɔlɔshaka mbala kakɔ ɔtɔi lo tena di’ekakatanu dia wolo sɔ. (Luka 22:​2-4; 23:​33, 34) Satana akalongamɛka dia Yeso ayoshisha olowanyi ande; koko Satana akakite tatala! Yeso akɛnya hwe dia Satana ekɔ kanga kashi ka lokolokolo ndo ɔnɛ Jehowa ekɔ l’ekambi wele la kɔlamelo wayotetemala nama olowanyi awɔ, kaanga la ntondo ka ehemba woleki tshɛ welo! Onde wɛ kombolaka ngɛnyangɛnya Nkumekanga kayɛ koolɛ? Tetemala ntombola lokombo la Jehowa, nkimanyiya anto akina dia mbeya Nzambi kaso dimɛna dimɛna. Etena kasalayɛ dui sɔ, wɛ ndjelaka wanya wa Yeso. (1 Pe. 2:21) L’ɛnyɛlɔ ka Yeso, wɛ ekɔ lo ngɛnyangɛnya Jehowa ndo ekɔ lo mɛnya dia otunyi Ande, mbuta ate Satana ekɔ kanga kashi kahoke nsɔnyi! w24.02 11-12 od. 11-13

L’ɛnɔnyi etanu w’etshi, anto ndekana miliyɔ ɔtɔi wakabatizama oko Ɛmɛnyi wa Jehowa. Etena kayakimɔyɛ le Jehowa, wɛ sɔnaka dia nkoma ombeki wa Yeso Kristo ndo wɛ mbetɛka osalelo wa lolango la Nzambi dui dioleki ohomba lo lɔsɛnɔ layɛ. Kakɔna kalɔmba ndjakimɔ k’Okristo le yɛ? Yeso akate ɔnɛ: “Naka onto nangaka ndjelami, nde ayasɛkɛ.” (Mat. 16:24) Etelo ka lo Grɛkɛ kakakadimɔma ɔnɛ “nde ayasɛkɛ” koka nto nembetshiya “dia nde pombaka mbuta ndooko lo dikambo diande ndamɛ.” Oko okambi wa Jehowa wakayakimɔ, wɛ ayonga l’ohomba wa mbuta ndooko l’oseka dui tshɛ diahɔtɔnɛ la lolango lande. (2 Kɔr. 5:​14, 15) Kɛsɔ nembetshiyaka nto dia wɛ ayota ndooko “l’etsha wa demba,” ɛnyɛlɔ oko awui wa mindo wa dieyanelo. (Ngal. 5:​19-21; 1 Kɔr. 6:18) Onde nkitanyiya wadjango asɔ koka mbela ekakatanu lo lɔsɛnɔ layɛ? Ndooko, naka wɛ mbokaka Jehowa ngandji ndo wɛ shikikɛka dia ɛlɛmbɛ ande wekɔ mɛtɛ lo dikambo dia wahɔ ayɛ hita.—Os. 119:97; Isa. 48:​17, 18. w24.03 2 od. 1; 3 od. 4

Jehowa mbishaka nyuma k’ekila le wanɛ wetawɔma le nde. (Mat. 12:18) Sho koka ndjambola ɔnɛ: ‘Onde lekɔ l’akoka wa nkɛnɛmɔla dionga dimɔ dia l’olowa wa nyuma k’ekila ka Nzambi lo lɔsɛnɔ lami?’ Onde wɛ amboshola dia wɛ amboleka nkɛnɛmɔla solo dia lotutsha otsha le anto akina oleki woho wakayasalaka dui sɔ la ntondo ka wɛ mbeya Jehowa? Etena tshɛ kayotalekaka nkɛnɛmɔla waonga w’amɛna wa l’olowa wa nyuma ka Nzambi, mbayotalekaka monga l’eshikikelo dia wɛ mbetawɔmaka le Jehowa! Jehowa kambaka la nɛmɔ di’oshinga w’etshungwelo le anto wetawɔma le nde. (1 Tim. 2:​5, 6) Ko kakɔna kayotosala naka toyaoka oko Jehowa hatetawɔ kaanga mbeso la mbetawɔ l’oshinga w’etshungwelo ndo kakatabatizama? Kɛnɛ kahombaso mbohɔka ele, hatokoke ndjaɛkɛ lo nsaki yaso hita, koko sho koka ndjaɛkɛ le Jehowa. Nde mbɔsaka wanɛ wele la mbetawɔ l’oshinga w’etshungwelo oko anto w’ɛlɔlɔ lo washo ande ndo nde mbalakaka dia nde ayowatshɔkɔla.—Os. 5:12; Rɔmɔ 3:26. w24.03 30 od.15; 31 od. 17