Tokondja Ɛlɔlɔ Watomba Oma Lo Kalasa K’olimu Wa Teokrasi Ka 1996— Etenyi Ka Ntondo
1 Onde wɛ akâle alako wele lo “Ekongelo k’Olimu wa Teokrasi ka 1996”? Onde wɛ akɛnyi etshikitanelo ɛmɔtshi? Oma lo Tshango polo lo Mɔmbi, sawo No. 3 diayɔsamaka oma lo dibuku Comment raisonner, ko oma lo Yitshu polo lo Diɛla Woke, lo dibuku di’oyoyo di’elɛwɔ Ewo. Sawo No. 4 diayɔtɛkɛtaka dikambo di’onto ɔmɔtshi latɛkɛtawɔ diande lo Bible, onto l’onto lo lomingu.
2 Asawo w’Ombeki: Sawo No. 3 mbishamaka le kadiyɛso kɛmɔtshi. Naka diɔ diakɔsama oma lo dibuku Comment raisonner, kete pombaka disala lo yoho yatosalemaka esambishelo ka lo luudu la luudu kana ka tshakitudi. Naka awui akɔ wambɔsama oma lo dibuku Ewo, kete sawo pombaka salema oko onto lasala diendelo di’oyoyo kana lêka l’onto Bible. Dikambo sɔ diayonga ohomba efula, nɛ dia dibuku Ewo diayokambema olimu efula dia mbeka l’anto Bible la ngelo.
3 Naka lo yoho yele oko onto lêka l’onto Bible mbɔsɔninde, kete akadiyɛso akɔ ahende kokaka mbidjasɛ. Ɔtɔ esadi esadi lo tshondo ya sawo l’ɔkɔngɔ wa wɛ mbisha kɔmatɛrɛ mɔtshi ya lo mbɔtwɛlɔ lo tshena pe, ko wɛ ndjombola wembola wele lo dibuku. Ɔtɛkɛtshi pombaka sala ɔkɛndɛ ande lo yoho yokosalemaka. Avɛsa woshilami kokaka mbɔsama oma lo Bible ndo mbalema naka etena kekɔ. Kadiyɛso kasala sawo diakɔ pombaka monga la yewo ya ndakanya lo tɛkɛtshaka ɔtɛkɛtshi ande la wembola wayondowokaka ndo lo mbotshutshuyaka dia nde kana yimba lo avɛsa wɔshiwɔ.
4 Ahombaso sala naka awui akɔ wekɔ l’avɛsa efula woshilami ko hawokoke sɛdingɔma lo taahe 5? Sɔna avɛsa waka epole ɔsɛkɛ l’akambo woleki ohomba. Naka ekɔ paka avɛsa angana ato, kete akambo akɔ wayokoka sɛdingɔma dimɛna efula. Tena la tena, wɛ kokaka mbala odingɔ ɔtɔi kana etelo kɛmɔtshi kele lo dibuku ko wɛ kɛtshanya l’ɔtɛkɛtshi ayɛ lɔkɔ.
5 Naka ndo odingɔ wa ndjihelo wa tshapita mɔtshi yele lo dibuku Ewo mbele l’atei w’awui wakawakosha dia wɛ mɔmbɔla, kete nyu kokaka sɛdingola kiombokombo yele l’ɔtɛ a dui w’ɔnɛ: “Hemba Ewo Kayɛ “ yatanema l’ekomelo lo tshena pe. Ndo tokombokombo tele l’atei w’edingɔ wakawakosha kokaka sɛdingɔma naka etena kekɔ. Naka kiombokombo mɔtshi yekɔ l’atei wa tenyi diosadi akadiyɛso ahende wotshikitanyi, kete ɔnɛ layosala etenyi ka ntondo mbeyaka titɛkɛta. Asango wele lo dibuku kokaka nembetshiyama etena tshɛ kɔtɔnɛwɔ l’awui wɔsɛdingɔmi.
6 Sawo No. 4 pombaka salema lo yoho yakotola yambalo y’anto ndo yasungana. Lomingu tshɛ tayɔtɛkɛtaka dikambo di’onto ɔmɔtshi latɛkɛtawɔ diande lo Bible. Tɔsɛdingole ɔlɔlɔ kɛnɛ katewoya dibuku Auxiliaire lo dikambo dia onto akɔ. Tɔ̂mbɔlɛ sawo lo ndjela ɔtɛ a dikambo, ndo tɔsɔtɔlɛ avɛsa wayokimanyiya ampokami dia vɔ ndjasha le onto ɔsɔ latawɔ lo Bible ndo dia lonto lande, mbidja ndo waonga ande kana tokanyi tande talangaso mbokoya kana mbewɔ. Sho kokaka shila avɛsa wahatɛkɛta dikambo di’onto ɔsɔ mbala kakɔ ɔtɔi naka vɔ mbikaka epole ɔsɛkɛ lo woho wɛna Jehowa waonga amɔtshi lo asho ande, ɔlɔlɔ kana kɔlɔ, kana naka wekɔ lo mbɔtɔnɛ l’ɔtɛ a dikambo wa sawo diakɔ.
7 Naka sho kondja ɛlɔlɔ tshɛ w’oma l’olowanyelo wakondjaso lo Kalasa k’Olimu wa Teokrasi, kete tayeya ‘sambisha dui’ dimɛna tasala la weolo aso tshɛ dia ndowanya“ yewo ya ndakanya.”—2 Tim. 4:2, NW.