Tokondja Wahɔ Oma Lo Kalasa K’olimu Wa Teokrasi Ka 1999
1 Yeso aki Ombetsha wa Woke. Anto ‘wakambaka dia wetshelo ande.’ (Mako 1:22) Kânga mbele ndoko onto l’atei aso lakoka tɛkɛta ndo mbetsha oko Yeso, sho koka ntsha tshɛ dia mbôkoya. (Etsha 4:13) Tayokoka ntsha ngasɔ naka sho salaka asawo lo ekongelo ka Kalasa k’Olimu wa Teokrasi ndo tetemala la ndowanya akoka aso wa tɛkɛta ndo mbetsha.
2 Lo 1999, Sawo No. 1 diayɔsamaka oma lo asawo wa Tshoto y’Etangelo la Réveillez-vous! wa 1997. Tayolekaka shihodia akambo wa lo nyuma naka sho mbadiaka awui akɔ la ntondo ko ndjowaoka nto lo kalasa. Wanɛ wakasɔnama dia mbishaka alako wa wetshelo pombaka mɛnya woho wakokaso kamba l’awui akɔ, mbâtɛkɛta lo yoho yakotola yambalo ndo yahɛtshahɛtsha asolo. Sawo No. 3 diayɔsamaka oma lo dibuku Ɔngɛnɔngɛnɔ wa lo Nkumbo ndo Sawo No. 4 awui wendana l’onto ɔmɔtshi la lo Bible kânga mbayengɔnyamaka abuku w’asawo akɔ ahende. Omendji wa kalasa pombaka tasɛdingolaki awui akɔ dimɛna la ntondo ka ndjosha anto dia vɔ mbasala. Ambeki tshɛ wayowoshaka asawo w’oma lo dibuku Ɔngɛnɔngɛnɔ wa lo Nkumbo pombaka monga la lɔkɛwɔ l’ɔlɔlɔ lo nkumbo yawɔ hita.
3 Kamba l’Alako, ndo Lɔngɔsɔla Dimɛna: Onto tshɛ kokaka nyomoyalowanya lo kɛnɛ kendana la mbeya tɛkɛta ndo mbetsha. (1 Tim. 4:13) Omalɔkɔ, sho pombaka nyangaka alako ndo aha mbaɛna oko ɛngɔ kɛmɔtshi ka mbewɔ. (Tuk. 12:15; 19:20) Ndakanya akambo wa mɛtɛ dimɛna efula lo nsanganya ndo l’olimu w’esambishelo hate ɔnɛ kɔndɔla awui akɔ kana mbadia avɛsa aha la mboka kɛnɛ katawɔ lɔkɔ ko pe. Sho pombaka munanda etema w’ampokami ndo mbatshutshuya lo vɔ ntsha dikambo dimɔtshi. Dia ntsha ngasɔ, sho la dia tɛkɛtaka l’eshikikelo tshɛ oma ka tshina di’otema. (Ɛdika la Etsha 2:37.) Dako diatoshawɔ lo kalasa diayotokimanyiya dia sho ntsha dui sɔ.
4 Kam’alongolɛ kiatshi ya sawo, kanyiya akoka w’ɔtɛkɛtshi wakawakɔlɔmbi dia kamba oko wɛnyishawɔ lo dibuku Manuel pour l’École. Enda kɛnɛ kahombayɛ ntsha dia kamba la dako diakawakosha. Kana yimba l’ɔtɛ a dui, woho w’esambishelo kayosala naka ngasɔ mbakɔlɔmbawɔ, ndo woho wayokamba l’avɛsa wele lo sawo diayɛ. Kanyiya yoho yoleki ɔlɔlɔ ya kamba l’awui akɔ dia ndakanya ndo tshutshuya anto.—1 Tim. 4:15, 16.
5 Naka wɛ mbokaka sɔnyi dia ndjafundja lo kalasa, kete lɔmba Jehowa lo dikambo diakɔ ko wɛ ndjosawola l’omendji wa kalasa. Onto tshɛ kokaka kondja wahɔ efula oma lo ekongelo ka Kalasa k’Olimu wa Teokrasi lo 1999.