Toyalake L’oyango Ɔmɔtshi Lam’asalaso Waendelo Aso W’eyoyo
1 Lam’embolaso onto, tosale tshɛ dia kamba la divɛsa dimɔtshi diayofudia ewo kele l’onto l’akambo wa Bible wakatakɛtshanya lande.
2 Oyango ɔmɔtshi a waendelo w’eyoyo etena kakatatshike periodikɛ ele dia sala otadimbo w’okahanyelo. Wɛnyanyelo wa wɔɔdu wele oko wɔnɛ kokaka ndjâla dimɛna:
◼ “Dimi kanaka dia wɛ akangɛnangɛna walelo wa sawo dialembetshiya bonde kahombaso mboka Nzambi wɔma, lo Tshoto y’Etangelo yakamakotshikɛ. Ɛlɔ lakakela sawo dimɔtshi dia lo Réveillez-vous! dioka dimbola nɛ: ‘Lande na kele lɔsɛnɔ tshenyi nganɛ?’ Ɔsɔ ekɔ dimbola dia dimɛna efula, shi mɛtɛ?” Totetemale la mbuta oko ɛnyɛlɔ ɔnɛ: “Joani 3:16 ekɔ lo kɔndɔla ɛtɛkɛta wa Yeso weyama efula w’endana la daka dia sɛna pondjo pondjo. Naka wɛ nongola periodikɛ kɛnɛ, kete wɛ ayokeketshama l’elongamelo k’oshika kasha Dui dia Nzambi.” Ko sho ndjota l’ɔkɔngɔ ɔnɛ tayoya nto la numɛlɔ yayela ndo ɔnɛ ondo tayoyɔtɛkɛta mbala kekina nto dia kɛnɛ kakalake Nzambi anto w’okitanyiya. Tôhɔ dia mbala tshɛ katɔlɛso onto wa periodikɛ, sho kokaka funda diendelo di’oyoyo ɔtɔi.
3 Naka takatshike periodikɛ kele l’ɔtɛ a dui w’ɔnɛ “Etena Kakɔna Kayonga Andja Waha l’Ata?” kete sho mbeyaka mbuta shate:
◼ “Ngande wotonga lɔsɛnɔ otondoyala ata bu? [Tôtshike akadimole.] Ohenda kɛnɛ kasangoya Nzambi dia sala.” Tale Osambu 37:10, 11, ko sho nembetshiya akambo wayonga la nkɛtɛ lam’ayosalema lolango la Nzambi lanɛ. Tohole onto akɔ akambo wakalakanya Yeso ambeki ande dia nɔmbaka, lo ndjela Mateu 6:9, 10. Totshutshuya dia nde kana yimba l’olembetshiyelo w’ɛtɛkɛta wa Yeso. Naka onto akɔ ekɔ lo mɛnya saki mɛtɛ, kete sho kokaka mbɛ̂nya abɔnɛma wa Tshoto y’Etangelo kana wa Réveillez-vous! ko sho mbɔsa tɛdikɔ dia kalola la ndjosawola lande.
4 Naka tambokalola dia tɔkɛtshanya lo sawo diele l’ɔtɛ a dui w’ɔnɛ: “Lande na kele lɔsɛnɔ tshenyi nganɛ?” kete sho mbeyaka tatɛ sawo ɔnkɔnɛ:
◼ “Mbala ka ndjihelo, takatɛkɛta dikambo dia edja ka lɔsɛnɔ l’onto. Oko akayadiɛnyi aha la tamu l’asawo wele lo Réveillez-vous! wa nomb’ewo kema l’elongamelo efula ka tokimanyiya dia sho sɛna oleki ɛnɔnyi 70 kana 80. Ko akanyiyɛ dia kɛnɛ katolaka Bible? [Tôtshike akadimole.] Bible mɛnyaka ɔnɛ Nzambi ekɔ lo kanyiya dia salɛ anto ɛngɔ kɛmɔtshi ka dimɛna efula.” Tale Joani 17:3, ko sho mbuta ɔnɛ ewo kokaka tɔla otsha lo lɔsɛnɔ la pondjo. L’etena kɛsɔ, tɔ̂sɛngɔlɛ dia mbeka lande Bible kana tôkani dia ndja ndjosawola nto lo Bible.
5 Tatɛ mbeka l’onto Bible ekɔ oyango w’ohomba w’olimu aso. Ondo tambembolaka onto ɔmɔtshi letawɔ wa periodikɛ mbala ko mbala. Lande na kahatasale ɔnkɔnɛ mbala kekina kayotɛnana l’onto akɔ:
◼ “Anto wekɔ la weoho a tokanyi tshɛ lo kɛnɛ k’endana l’ɔtɛmwɛlɔ ndo ohomba awɔ lo lɔsɛnɔ la nshi nyɛ. Tokanyi tele l’anto lo kɛnɛ k’endana l’ɛkɔkɔ wakatshike Nzambi kɔlɔ dia tɔ monga kana ɔkɔkɔ watshundaso la wavɔso hɔtɔnganɛ. Amɔtshi nangaka mbeya ndo vɔ kɛnɛ kahombawɔ sala dia Nzambi mboka alɔmbɛlɔ awɔ.” Tofole okanda ɔmɔtshi wakasalema dia mbekaka l’anto Bible l’etenyi kɛmɔtshi katɛkɛta dikambo dimɔtshi diɛnaso ɔnɛ kokaka ngɛnyangɛnya onto akɔ, ko sho mbɛ̂nya lo tshena pe woho wekaso l’anto Bible.
6 Jehowa ndjashikikɛka eyango. Towôkoya l’edja ka ngɔndɔ ka Mɔmbi lo ndjâla l’oyango lam’asalaso waendelo aso w’eyoyo.