Tolomialomia Saki y’Anto lam’Asalaso Waembwelo w’Eyoyo
1 Mɛtɛ olimu kokaka mbɛdinyama la wônelo, ko waembwelo w’eyoyo oko wotelo w’ashi. (Mat. 13:23; Luka 10:2; 2 Kor. 9:10) Sho wanɛ wele “ekambi kame la [Nzambi, NW],” tekɔ l’ɔkɛndɛ wa kimanyiya oseka lɔtɔngɔ tshɛ leke ka monɛma dia lɔ mbola polo ndo koma osongo ndo tɔ elowa. (1 Kor. 3:6, 9) Woho akɔna wokokiso sala la weolo aso tshɛ lo dikambo sɔ na?
2 Tokalolake esadi dia tênda wanɛ tshɛ wakɛnya saki kawɔ. Tonyomenda aui wakatafunde lo tokatshi ta lo luudu la luudu, ndo toshikikɛ akɔna ayototênda nto ndo dikambo diayototosawola lande. Dikambo dia sawola mendanaka esangɔ efula la kɛnɛ kakatatɛkɛta mbala ka ntondo. Toyale esasɔki, tônge la tokanyi tokina t’oma lo Bible lo yimba tayotokoka mbɔtshiya lo sawo diaso. Ekɔ dimɛna kambaka olimu la Bible nshi tshɛ, nɛ dia tɔ kekɔ la wolo wa munanda asolo w’onto.—Heb. 4:12.
3 Naka takatshike biukubuku “Dieu se soucie-t-il vraiment de nous?”, sho kokaka mbuta ɔnɛ:
◼ “Anto efula mbetawɔka l’otema ɔtɔi ɔnɛ: Nzambi ayolanya kɛtɛ, koko akina wekɔ lo mboka wɔma ɔnɛ onto ndamɛ mbeyaka ndjolanya kɛtɛ. Ko wɛ akanayɛ lo dikambo sɔ na? [Tshikɛ onto akɔ dihole akadimole.] Bible totɛka ɔnɛ: lo dihole dia nanya kɛtɛ, Nzambi ayonya akambo wa kɔlɔ malɔkɔ ndo ayokikadimola dihole dia wɔladi ndo di’oshika.” Tokotole yambalo y’onto akɔ lo lɛkɛ 22 ndo tâle divɛsa dia Tokedi 2:21, 22 dioshilami lɔkɔ. Naka onto akɔ ekɔ lo ndjasha, tolembetshiya woho wasalema wekelo wa Bible, kana tokane lande dia mbotshikɛ periodikɛ yeke katomba ndo dia ndjowembola mbala kekina dia ndjɔtɛkɛta dikambo di’andja w’oyoyo wakalake Nzambi.
4 Naka takatshike biukubuku “Voici”, sho kokaka mbuta ɔnɛ:
◼ “Lo diembwelo diami dia mbala ketshi, takale lo Bible dikambo dia daka dia Nzambi dia kadimola kɛtɛ paradiso kele oko kɛnɛ kakawasange lo lohoso la biukubuku yakamakotshikɛ. Sho kokaka kondja ɛlɔlɔ ɛsɔ naka sho mbeka ele lolango la Nzambi ndo shɛngiya yakɔna yele la lolango lakɔ lo lɔsɛnɔ laso.” Tâle Joani 17:3, l’ɔkɔngɔ diko tofole biukubuku yakɔ lo palagalafɛ 52 la 53, lo lɛkɛ 27. Tolembetshiya lo tshena pe lande na kele ekɔ ohomba ndjâla la ewo k’oshika ka Dui dia Nzambi.
5 L’ɔkɔngɔ a sho tshika biukubuku “But de la vie” le onto layasha l’akambo w’ɛtɛmwɛlɔ, ondo tayoleka mɛna dimɛna mbuta ɔnɛ:
◼ “Aha la tâmu, wɛ akashile la nɔmba disambɛ dia Shɛso mbala efula. Etena katoyɔlɔmbaka Nzambi ɔnɛ: Diolelo diande diaye, atoyɔfɔnyaka na?” L’ɔkɔngɔ w’ɔtɛkɛtshi aso kadimola, totshu lande lo palagalafɛ 8 la 9 lo lɛkɛ 26, ko ndjâla Danyele 2:44. Ondo sho kokaka tetemala la sawo lo mbolembetshiya ɔnɛ: oyelo wa Diolelo dia Nzambi kɛdikɛdi ekomelo k’akambo wa kɔlɔ la paa. Toke epole ɔsɛkɛ lo dikambo di’ɔnɛ naka tekɔ anto w’ɛlɔlɔ lo washo wa Nzambi, kete tayônga la lɔsɛnɔ la pondjo lo Paradiso la kɛtɛ.
6 Tôhɔke dia sho kokaka nyomembola onto tshɛ lakatolonge, oyadi takôtshikɛ okanda ɔmɔtshi kana bu. Toyatshutshuya dia ndjaombɛka etena lomingu tshɛ dikambo dia sala waembwelo w’eyoyo. Jehowa ayɔtshɔkɔla weolo wadjaso dia nomialomia saki k’ɛnaso. Dikambo sɔ diatɔ elowa dia lokumu lande!—Joani 15:8.