Tɔlɛmiya Jehowa La Eshasha Aso Wa La Lolango
1 “Keli mananu kayali le kanga lukesu, leli la okoko w’umi lu limba landi, latutshikaka dokoloko, ku ndi ndjukimo one weli la ekomo le Khumadiondjo! Ne dia dimi leko Khum’ekanga ka wuki, la lukumbu lami leko woma l’atei a wedja, mbata [Jehowa, NW] kanga lulimbilimbi.” (Malaki 1:14) Onde sho mɛnaka di’ekɔ wolo di’anto w’ekokele mbisha Otungi ɛngɔ kɛmɔtshi? Ndoko ɛngɔ l’andja w’otondo kaha kande. Nzambi ndamɛ ekɔ lo mbuta lo Dui diande ate: “Fesa yeli yami, ndu paunyi yeli yami, mbata [Jehowa, NW] kanga lulimbilimbi.” (Hang. 2:8) Nzambi kema l’ohomba wa eshasha aso, nɛ dia nde amboyakotshaka. Nkumekanga Davidi akeye dia oko weso anto, hatokokaki ngɔnya Kanga-Wolo-Tshɛ. Mɛtɛ, oyadi kakɔna kawoshaso, sho mboshaka paka tshenyi tshitshɛ ya kɛnɛ kakatalongola oma le nde, kiɔkɔ ya “oshasha tshɛ w’ɔlɔlɔ ndo losha tshɛ la kokele.” Onde sho kokaka kitɛ lo mbuta ɔnɛ eshasha wakimɔso lo dikambo dia ɔtɛmwɛlɔ waki Jehowa kema la nɛmɔ lo asho ande? Onde Nzambi mɔnyɔlaka eshasha aso wa la lolango? Omembi w’esambu kadimolaka ate: “Nyela elambu, nyoto lu aseke andi.”—Osam. 96:8.
2 Ngande wasukamɛ esambishelo ka lokumu l’ɔlɔlɔ la Diolelo la falanga lo wodja aso na? Oma lo eshasha wa la lolango wasala ekambi wa Jehowa la anto watoka ngandji. Oma l’ekimanyielo ka eshasha ɛsɔ mbakokɛ ɔlɔngɔswamelo waki Jehowa ambatshi mboka wa lânde, wa misiɔnɛrɛ ndo emendji w’eteta kâmɛ la nkumbo ka Bɛtɛlɛ. Totokokanyiya yema lo woho watomba falanga efula dia toma ekanda la wa periodikɛ lo tshumanelo ndekana 2200 dia lo Burundi, lo Congo la lo Zaïre. Onde sho kanyiyaka yema lo kɛnɛ katomba oko ɛnyɛlɔ, l’ɔlɔngɔswɛlɔ wa nsanganya ya distrikɛ? Ko kayotota dia ofundelo ndo otondjelo w’ekanda aso? Oma lende aya falanga shɔ mɛtɛ na? Polo ndo kakianɛ, tayota shate otondjelo wa falanga shɔ wakasalema oma lo eshasha wa la lolango w’anangɛso l’akadiyɛso wele oko lo wodja wa Belgique, France, ndo ekina. Wanɛ wakimɔ eshasha lo wedja ɛsɔ kema akanga w’ɛngɔnyi vɔ tshɛ. Kema ekɔ atɛmɔdi wa Jehowa mbɛnya lowando lele lawɔ lo diangɔ dia lo nyuma. Vɔ mbohɔka ɔtɛmwɛlɔ waki Jehowa lo takanyiyaki nshi tshɛ dia mbela oshasha ɔmɔtshi lo luudu la Jehowa. (Enda lo 1 Koreto 16:2.) Vɔ wekɔ apami la amato, ana w’akɛnda, ɛlɔngɔlɔngɔ la dikumanyi, oko wediɔ lawakaso.
3 L’eleko ka ntondo lo tena diaso nɛ, ɔpɔstɔlɔ Paulo akandola etshumanelo ka la Filipi l’ɛtɛkɛta ɛnɛ: “Keli nyu nyakatshi ololo, ne dia nyakasuwi la mi lu asui ami. . . . Ne dia lam’akimi la Tesalonika, nyu nyakantumelaka etena l’etena diango diakimi la uhumba.” (Fil. 4:14, 16) Onde sho kokaka mbuta ɔsɔku lo dikambo dia mbilo kaso? Onde sho mɛnyaka yimba ya ngasɔ? Onde onto l’onto l’atei aso kokaka ndo kombolaka mɛnya lowando lande lo diangɔ dia lo nyuma lo kimɔka eshasha wa la lolango? Lo ngɔndɔ yetshi, eshasha wakatalongola, ɛnyɛlɔ oko w’oma lo Zaïre waki lo yɛdikɔ ya l’atei atei nouveaux zaïres 180 l’opandjudi l’opandjudi. Koko dia sho kotsha falanga tshɛ y’endana l’esambishelo ka lokumu l’ɔlɔlɔ lo wodja, eshasha wa la lolango wotohomba mongaka ngɔndɔ tshɛ, yɛdikɔ ya l’atei atei: dɔlara 4,45 l’opandjudi l’opandjudi.
4 Lo ndjela kɛnɛ komiso la mbuta, mɛnamaka dia sho pombaka ndjasɛdingola dia menda akoka wa mɛtɛ mɛtɛ wa lo mbilo kaso, dia kɛnɛ k’endana la falanga yatomba dia kamba olimu wa Diolelo. Sunganaka sho mbidja yimba lo dako dia dimɛna efula diatanema lo mukanda wa hende wakafundɛ Paulo Ase Kɔrɛtɔ, lo tshapita y’enanei. Naka sho ngɛnangɛnaka diɛsɛ diele laso dia kambɛ Jehowa, kete tayokimɔ eshasha ‘oko ele akoka aso mɛtɛ.’ (divɛsa 3) Sho pombaka, onto l’onto ndjasɛdingola ndamɛ, nɛ dia “Naka lulangu leko, layetawoma uku yediko [yele la, NW] untu, aha yediko yaha la ndi.”
5 Onde sho kokaka minya yema oma lo “tshitshɛ yele laso” dia nambola lo dikambo dia ɔtɛmwɛlɔ wa pudipudi? Ɔmɔtshi mbeyaka ndjatɛ ate: “Dimi nangaka kimɔ eshasha mɛtɛ koko, dimi ndoko l’ɛngɔ.” Ondo ayoleka monga wolo le amɔtshi oleki akina. Ɛlɔngɔlɔngɔ la esombe, apami la amato, akɛnda la epalanga, sho tshɛ kokaka ndjasɛdingola dimɛna dimɛna dia menda kɛnɛ kokokiso kimɔka tena tshɛ lo yoho yasungana. Tatoyakiyanyake nɛ dia oshasha aso wekɔ tshitshɛ efula. (Enda lo Luka 21:2-4.) Naka onto l’onto ekɔ lo disala la lolango lande, l’otema ɔtɔi ndo l’ɔngɛnɔngɛnɔ, ndo naka wanɛ wele l’akoka efula wekɔ lo kimɔ efula, kete eshasha wayɛdima dia kotsha kɛnɛ kahombama le akina.—2 Kor. 8: 13, 14; 9:7.
6 Olui wa dikumanyi wa l’etshumanelo mbeyaka sala wolo dia yimba ya lowando shɔ fula ndo pama l’etshumanelo. [Enda ndo tokanyi tele lo Tshoto y’Etangelo ya Diɛla Woke 1, 1992 (lo Falase), lɛkɛ 8 la 9, odingɔ 8 polo 10 ndo lɛkɛ 16, odingɔ 16 la 17, lo dikambo dia etenyi ka dikumi.] Dikumanyi, onde hanyokoke mɛnya etshumanelo sangoyelo dimɔtshi woho wa tomaka oshasha wa la lolango tena la tena ngɔndɔ tshɛ lo filialɛ? (Nyende lo Olimu Aso wa Diolelo wa Loseketanya, 1994 l’ɔlɔndji wa ndjela dia mɛnya esangoyelo le etshumanelo) Lofulo la falanga mbeyaka tshikitana ngɔndɔ la ngɔndɔ, lo yɛdikɔ yatangɔnɛ etshumanelo lo nyuma ndo yatatshɔkɔla Jehowa weolo atɔ w’ɛlɔlɔ.—Tuk. 10:22.
7 Naka sho kimɔ eshasha l’ɔngɛnɔngɛnɔ ndo la lokaho l’oweso wa sukɛ ɔtɛmwɛlɔ wa mɛtɛ, kete tayokondja etombelo w’ɔlɔlɔ. Tohokɛ lotui l’ekeketshelo kɛnɛ kele lo Tukedi 3:9, 10: “Olemia [Jehowa, NW] la ekundji aye, la elonga w’uma lu dikambo diaye tshe. Ku apenge aye wayululanelaka la diango.” Ɔnkɔsɔ kete tayokoka mɛnya lowando laso lo diɛsɛ diatosha Jehowa dia mbokambɛ olimu w’ekila. Oma l’ekimanyielo ka eshasha wa la lolango wayokimɔ ɔm’ɔmɔ a l’atei aso, sho tayela oshasha aso w’oshinga a wolo dia pamia ɔtɛmwɛlɔ wa pudipudi lo mbilo kaso. Djekoleko tohɔ dia: lo sala ɔsɔku, tayɔlɛmiya Jehowa la diangɔ diaso dia nɛmɔ.