Totombole Jehowa lo etshumanelo ka woke
1, 2. Losanganya la distrikɛ toshaka diaaso diakɔna, ndo lo toho takɔna takokaso sala dikambo sɔ?
1 Nsanganya yaso ya distrikɛ yasalema ɔnɔnyi tshɛ toshaka diaaso dia tombola Jehowa. Nsaki yaso yekɔ oko ya Davidi, lakembe ate: “Dimi [“layokotombolaka lo etshumanelo ka woke,” NW], ee, l’atei [wa] ului a wuki w’antu kayumukandulaka.” (Osam. 35:18) Lo Losanganya la distrikɛ layaye lele l’ɔtɛ a dui ɔnɛ: “Okitanyiya le Nzambi,” ngande wakokaso ndjashikikɛ dia oko anto wele kâmɛ tekɔ lo tombola Jehowa?
2 Yoho mɔtshi yakokaso sala dikambo sɔ ele oma lo lɔkɛwɔ laso. Owandji wa dihole dimɔtshi diakasalema losanganya lɔmɔtshi la woke akate ate: “Lo menda woho wasalema nsanganya yanyu ya weke, sho takatɛ elui ekina w’ɛtɛmwɛlɔ walanga ndowɛ dihole nɛ dia vɔ ndjenda woho walɔta Ɛmɛnyi wa Jehowa lo losanganya lawɔ la woke oko wayalɔngɔsɔlawɔ la ɔkɔmi tshɛ.” Oma lo ɛnamelo kaso, woho wakambaso kâmɛ, ndo oma lo lɔkɛwɔ laso, onto tshɛ la l’atei aso kokaka kimanyiya dia anto akina tombola Nzambi kaso kakoka tombwama la ɛtɛkɛta wa diambo wa ngasɔ.—1 Pet. 2:12.
3, 4. Ngande wayotokimanyiya okitshakitsha dia ndɔta lo yoho yele ɔlɔlɔ le ekambi wa Akristo, lo losanganya la woke kana l’ɔkɔngɔ a lɔ?
3 Ɛnamelo kaso: Ndɔta ndo minya kana mbɛla divo lo yoho yatombola Jehowa nɔmbaka dia monga la okitshakitsha. (1 Tim. 2:9) Dibuku Kalasa k’olimu, lɛkɛ 132, mbutaka ɔnɛ: “Onto lele la ndjakitshakitsha salaka la wolo di’aha nyangiya anto akina tshanana kana kotola yambalo y’anto lo yoho yamboleka oya le nde.” Lo wedja efula ahɔndɔ wa kɔlɔ wambokokanɛ. Koko, Jehowa ngɛnangɛnaka welo wadjaso dia monga enyimpala ande walɔta la shunganyi. (Etsha 15:14) Kânga mbele losanganya la woke mbeyaka salema lo sɛkɛ dia ponde kana lo dihole dimɔtshi diatowosalaka tɔkɛnyɔ, losanganya lɔsɔ la woke komaka ‘etshumanelo kaso ka woke’ lo nshi shato yasalemalɔ. Omalɔkɔ, etena kasanganaso la ntondo ka Jehowa, sho pombaka ndɔta lo yoho yasha Onto laheme lâdiko dia andja w’otondo nɛmɔ.—1 Ek. 29:11.
4 Sho pombaka nto mbidjaka yimba lo ɛnamelo kaso lushi tshɛ l’ekomelo ka losanganya. Kânga mbele, sho mbeyaka kombola dia ndɔta ahɔndɔ wa amɛna efula, lo etena ka diomuyelo kana etena kalɛso lo rɛstora, ekɔ ohomba dia yoho yaso ya ndɔta ndo ya nɔngɔsɔla demba mbɔtɔnɛ la wanɛ ‘wayata ɔnɛ vɔ nɛmiyaka Nzambi.’ (1 Tim. 2:10) Ahɔndɔ w’amɛna kema wanɛ wambokokanɛ le anto tshɛ. (1 Joa. 2:16, 17) Ekanda aso wa Akristo wekɔ la fɔtɔ ya apami ndo wamato wɔlɔtshi dimɛna ndo la shunganyi lo tena diotshikitanyi yakoka tokimanyiya. Ndɔtaka tshapa yaso wonya watateteta lo osomba wasalema losanganya la woke ayotoholaka dia tekɔ ekambi wa Akristo wonya tshɛ.—2 Kor. 6: 3, 4.
5, 6. Ngande wakokaso mɛnya dia sho nɛmiyaka mɛsa wa lo nyuma wa Jehowa?
5 Tɔlɛmiya mɛsa wa Jehowa: Nkum’Olongo ambotɔlɔngɔsɔlɛ dambo dia woke la ntondo kaso. (Is. 25:6; 1 Kor. 10:21) Naka sho mɛtɛ mbɔsaka la nɛmɔ dihole diele laso lo mɛsa wa lo nyuma wa Jehowa, kete oyango aso ayonga wa mbɔtɔ lo nshi yakɔ shato ya losanganya la woke. Onde wɛ ambɔlɔngɔsɔlaka dihole dia wɛ tohanga, dikuta dia futa mutuka kana dikalo dia munda lɔkɛndɔ, ndo mbɔsa kɔnje oma lo olimu ayɛ wa l’emunyi? Onde wɛ ambôkongɛka etena kahombama dia wɛ ndjalɔngɔsɔla ndo munda lɔkɛndɔ otsha lo dihole diayosalema losanganya la woke dia wɛ koma esadi lɛkɔ dia tana dihole dia mbidjasɛ, woho wa wɛ tasawodi la ananyɔ la ntondo ka losanganya lakɔ mimɛ, ndo sangana kâmɛ la wɔ dia tombola Jehowa lo osambo ndo lo dɔmbɛlɔ dia ndjihwelo?—Osam. 147:1.
6 Woho walɛmiyaso mɛsa wa Jehowa ayototshutshuya dia mbidja yimba dimɛna lo ekongelo ndo mbewɔ dia sawolaka la anto akina, ndɛ, kana mbeteta lo ɛsɛsɛ. Oma lo tshimbo ya ɔhɔmbɔ wa kɔlamelo ndo wa kɛsɔ, Jehowa ekɔ lo tosha mbo ya ndɛ ya lo nyuma yele laso ohomba etena kɛnɛ. (Mat. 24:45) Aha sho pandja etenyi kɛmɔtshi ka losanganya. Ambutshi pombaka mbidjasɛ kâmɛ la anawɔ ndo mbakimanyiya dia vɔ kondja wahɔ efula.—Euh. 31:12.
7. Kakɔna kalɔmbamaso dia sala wonya wa diomuyelo dia la midi, ndo lande na?
7 Sho nɔmbamaka dia ndjâka la yangɔ ya ndɛ l’ɔtɛ wa sho ndjotshikaka dihole dia losanganya la woke ko ntshɔ dia toyanga yangɔ ya ndɛ wonya wa diomuyelo dia la midi. Aki lowando efula nɛ dia wanɛ wakɔtɔ lo losanganya la woke l’ɔnɔnyi wetshi wakayele alako asɔ. Ayonga dimɛna efula naka anto tshɛ sala dikambo sɔ ɔnɔnyi ɔnɛ. (Heb. 13:17) Ɔlɔngɔswɛlɔ ɔsɔ toshaka diaaso dia monga la lɔngɛnyi lakeketsha la anangɛso ndo akadiyɛso mbidja ndo kâmɛ la wɔladi washa Jehowa kɛnɛmɔ.—Osam. 133:1.
8, 9. Diaaso diakɔna nto dia tombola Jehowa diatosha losanganya laso la woke?
8 Esambishelo ka lo tshakitudi: Etena katatatshu kana kayatakalola oma lo dihole dia losanganya la woke, tekɔ la waaso efula wa tombola Jehowa la ɛlɔmɔ aso. (Heb. 13:15) Nyɛsɔ toyange waaso wa sambisha etena kalɛso lo rɛstora kana kasawolaso la onto ɔmɔ lakamba lo ɔtɛlɛ. Timba taso ndo etema aso wayolola tɔɔ la ɛngɔnyi wa lo nyuma oma lo losanganya laso la woke. Nyɛsɔ tokahane diangɔ sɔ di’ɛlɔlɔ la anto wasambishaso lo tshakitudi.—1 Pet. 3:15.
9 Tekɔ lo kongɛ la asolo walomɔlomɔ diaaso sɔ dia tombola Jehowa ‘l’atei wa lemba l’anto wotshumani.’ (Osam. 26:12) Nyɛsɔ katotombole Jehowa kâmɛ lo Losanganya la distrikɛ lele l’ɔtɛ a dui ɔnɛ: “Okitanyiya le Nzambi.”
[Kiombo ya lo lɛkɛ 5]
Waohwelo wendana la losanganya la distrikɛ
◼ Ekongelo ka wenya: Losanganya layomɛka lo eshidi 9:30 nshi yakɔ shato. Nkuke yayodihɔmaka lo eshidi 8:00. Minitɛ ngana tsho la ntondo ka losanganya mimɛ, ɔnɔmbɔdi ayodjasɛka lo lɔyɛnga etena kadjawɔ mishiki wa Diolelo wadihola losanganya. Sho tshɛ pombaka mbidjasɛ lo ahole aso etena kɛsɔ dia ekongelo tatɛ lo yoho ya dimɛna. Lushi la tanu ndo Lushi la samalo, losanganya layokomɛka lo eshidi 5:05 l’ɔkɔngɔ a midi ndo Lushi la lomingu lo eshidi 4:10 l’ɔkɔngɔ a midi.
◼ Weshasha: Akuta efula tshɔka dia kongɛ losanganya la distrikɛ. Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo.
◼ Olelo wa la midi: Wakatotɛ dia ekɔ ɔlɔlɔ dia onto la onto ndjaka la yangɔ ya ndɛ y’osadi koko y’ɔlɔlɔ efula, ɛnyɛlɔ: Mapa, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hetawɔma dia ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete dikambo sɔ ayoshimba diaha tosomba diangɔ sɔ le wanɛ wasondja mbo ya ndɛ. (Diewoyelo: Wanɛ wasondja mbo ya ndɛ hawokoke mbɔtɔ lɛnɛ asalema losanganya oyadi wonya akɔna tshɛ.—Joa. 2:13-17.) Wanɛ wayokamba la waa babola dia katɛ mbo ya ndɛ lo dihole dia losanganya pombaka kondja lotshungɔ oma le anangɛso wendana la dikambo sɔ dia mbeya lɛnɛ akokawɔ ndjikitsha. Tɛdikɔ pombaka mbɔsama diaha aksida monga.—Luka 10:38-42.
◼ Pudipudi: Akɛnama dia mbala efula, wanɛ watosombaka mbo ya ndɛ le asondji, tokashaka mposo kana akatshi wa diangɔ sɔ la nkɛtɛ. Lâsɔ sɛkɛ di’otondo ndjololanɛka la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwi, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha la nkɛtɛ. Naka tambɛna onto ambokasha dikatshi, lohoso kana ɔlɔndɔ wa ponde la nkɛtɛ, kete sho pombaka tɔngɔna ko tokasha lo ɛngɔ kakashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi katɛmɔlaso ka ekila.—1 Pet. 1:15, 16; Etum. 19:10; Euh. 23:14.
◼ Ambutshi la ana: Anto amɔtshi wakendaka woho waketaka losanganya wakambe efula dia mɛna akɛnda wodjashi ndo wahokamɛ la yambalo tshɛ woho watete losanganya, wɔsa wa nɔtɛ ndo wayela wadielo wa avɛsa lo Bible yawɔ. Ana wa akɛnda hawohombe mbidjasɛ vɔamɛ aha la onto lawalama. Naka vɔ wolanga ntshɔ lo komba, kete ombutshi kana owotɔ awɔ ɔmɔtshi w’opalanga pombaka mbatshindɛ. Ayonga nto dimɛna dia onto l’onto monga la ashi ande wa nnɔ, dia mbewɔ ndjononɛka dia toyanga ashi wonya wa losanganya. Wonya wa diomuyelo, sho pombaka sɛna wolo diaha anaso ndawɔlawɔ lo ɛsɛsɛ nɛ dia vɔ mbeyaka tɔkɔ kana tɔkɔsha anto akina. Minya yimba lo awui asɔ mbelaka ekiyanu ndo mɔnyɔlaka lokombo la Jehowa. Lɔkɛwɔ laso l’ɔlɔlɔ tombolaka Jehowa lele Nzambi kaha l’ofukutanu.—1 Kor. 14:40.
◼ Osangwelo wa awui: Ndoko ehomɔ ɔtɔi ka sangola awui kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka lo losanganya la woke ndo pombaka kamba la dihomɔ sɔ lo yoho yahafukutanya akina.
◼ Telefɔnɛ: Sho pombaka ndjidima diaha yɔ mbekola anto timba.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka nyu mbahɛ, talɔmbi kanga luudu kana ɔnangɛso lendana la ohangelo wa lo Mbalasa ka Diolelo dia tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ nshi tshɛ kɔmba, ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla elowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole diakɔ diamɛ.—Ngal. 5:22, 23.