Anto wa weho tshɛ wayoshimbamela
1. Woho wetawɔmaso le Nzambi nemanɛka la dikambo diakɔna?
1 Ngandji ka lɔsɛngɔ ka Jehowa akadihola mboka dia anto shimbamela. Jehowa nangaka dia ‘anto wa weho tshɛ shimbamela ndo koma lo ewo k’oshika ka akambo wa mɛtɛ.’ (1 Tim. 2:3, 4) Aha l’ɔtɛ wa lokoho laso la demba, dihole diele laso lo tshunda di’anto, akoka wele laso ndo ɛnamelo kaso mbetawɔmaso le Nzambi, koko dui sɔ nemanɛka la mbetawɔ kele laso lo olambo wa tshungo wa Yeso. (Joa. 3:16, 36) Oko weso ekambi kâmɛ la Nzambi, sho pombaka minya oseka tshelo tshɛ ya shɔnɔdi, yakoka mɛnganya etema aso dia sho petsha anto wele Jehowa mbaetawɔka.
2, 3. Kakɔna kayotokimanyiya diaha sho nomboya anto oma lo ɛnamelo kawɔ ka lo washo?
2 Tewɔ dia nomboya: Jehowa mendaka kɛnɛ kele onto l’etei aha la kanyi ya kɔlɔ kana la shɔnɔdi. (1 Sam. 16:7) Nde mendaka nto kɛnɛ kakokawɔ ndjoyala lo nshi yayaye. Diakɔ diele, nde mbɔsaka wanɛ walanga mbɔngɛnyangɛnya oko diangɔ di’oshinga wolo. (Hang. 2:7) Onde sho mbɔsaka anto akina oko wawaɔsa Nzambi?
3 Anto amɔtshi wahomana laso l’olimu w’esambishelo kokaka tonyangiya efula oma lo ɛnamelo kawɔ. Vɔ mbeyaka ndɔta ahɔndɔ wa kɔlɔ ndo waha la shunganyi, monga la ndɛdu y’efutafuta, kana wodjisha shingo lo ɔhɛmbɛ kana lo ɛlɔmɔ. Amɔtshi mbeyaka monga ko bu l’ahole wa mbidjasɛ. Akina mbeyaka tosalɛ akambo la djawudi tshɛ. L’ɔtɛ wa sho nomboya anto asɔ oko wanɛ wahakokaki koma atɛmɔdi wa Jehowa, sho pombaka mɛna akambo la sso di’ɔlɔlɔ, “ne dia ndu shu mbaki dinginya ntundu, taki la uhedia, taka[nganyiyama].” (Tito 3:3) Naka sho mbeya dui sɔ, kete tayolomɔlomɔ dia sambisha anto tshɛ, kânga wanɛ wele oma lo ɛnamelo ka lo washo mbeyaka mɛnama oko wanɛ wahakoke sambishama.
4, 5. Kakɔna kekaso oma lo ɛnyɛlɔ kaki Yeso ndo kaki Paulo?
4 Bɛnyɛlɔ dia lo ntambe ka ntondo: Yeso Kristo akayatshungwɛka etena dia kimanyiya anto wele akina wakakokaka mbaɔsa oko wanɛ wahakokaki koma atɛmɔdi wa Jehowa. (Luka 8:26-39) Kânga mbâkinde kodihaka washo kânga yema lo etsha wa kɔlɔ waki anto, nde akeyaka ate anto kokaka ndjatambiya lo mboka ya kɔlɔ. (Luka 7:37, 38, 44-48) Ɔnkɔnɛ, nde akayadje lo dihole diawɔ, ndo “akawauki ketshi, ne dia vo waki uku ekoko waha la ulami.” (Mako 6:34) Onde sho kokaka mbokoya ɛnyɛlɔ kande lo yɛdikɔ y’efula?
5 Ɔpɔstɔlɔ Paulo, akokama ave, akakɔmama ndo akadjama lo lokanu. (Etsha 14:19; 16:22, 23) Onde awui asɔ wa kɔlɔ wakandahomana lawɔ akokonya dia nde monga la lohetsho ndo mbuta dia nde aketshaka wenya ande wetshetsha l’atei wa wedja kana wa elui ɛmɔtshi wa dibila? Ndooko. Nde akeyaka dia anto w’etema w’ɛlɔlɔ wakakokaka tanema l’atei w’elui tshɛ wa dibila, ndo nde akasale tshɛ dia mbatana. Onde ngasɔ mbɔsaso anto wa lo bɛtshi diaso dia nkɛtɛ woye oma lo ahole wotshikitanyi ndo wele la mbekelo yotshikitanyi?
6. Etombelo akɔna wakoka monga la dionga diaso le eyoyo waya lo nsanganya ya lo etshumanelo?
6 Tolongolake anto akina ɛlɔ kɛnɛ: Ekambi efula wa Nzambi wekɔ la ɔngɛnɔngɛnɔ lo woho wakawalongɔma lo etshumanelo oma le anangɛwɔ la akadiyɛwɔ waki kombidja yimba lo ɛnamelo ka lo washo. Onto ɔmɔtshi laki la lɔlɛdu l’efutafuta ndo la divo diakakɔka polo lo ahɛka lakalɔtɛ ahɔndɔ wa mindo akɔtɔ lo Mbalasa kɛmɔtshi ka Diolelo ka lo wodja wa Allemagne. Nde aki la lokumu la kɔlɔ. Koko, nde akalongɔma la wangasanu tshɛ lo losanganya. Nde akâmbe efula heyama ko lomingu lakayele nde akaye nto lo losanganya. L’ɔkɔngɔ w’etena ka tshitshɛ, nde akalɔngɔsɔla ɛnamelo kande, akatshike nnɔ mfɔka, ndo akatofundja diwala diande la oseka ande laka lɛɛta. Kombeta edja, vɔ la anawɔ ahende wakatatɛ kambɛ Jehowa oko nkumbo kele kâmɛ.
7. Ngande wakokaso mbokoya Nzambi kaso kaha la shɔnɔdi?
7 Lo ɛnyɛlɔ ka Nzambi kaso kaha la shɔnɔdi, nyɛsɔ têle anto tshɛ dia vɔ ndjokondja wahɔ oma lo ngandji ka lɔsɛngɔ ka Jehowa.
[Efundelo wa l’etei w’odingɔ wa lo lɛkɛ 3]
“[Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”—Etsha 10:34, 35.