Sha elembetshiyelo w’eshika

ETENA katayɛ dui dimɔtshi, ampokami ayɛ wekɔ la lotshungɔ la ndjambola ɔnɛ: “Kakɔna kɛnya di’awui asɔ wekɔ mɛtɛ? Djembetelo yakɔna yɛnya dia kɛnɛ kata ɔtɛkɛtshi kɛsɔ pombaka mbetawɔma?” Ombetsha ekɔ l’ɔkɛndɛ wa kadimola wembola wa ngasɔ kana kimanyiya ampokami ayɛ dia tana ekadimwelo. Naka dikambo diashayɛ kanyi yayɛ diekɔ ohomba efula, kete yashikikɛ dia wɛ ambosha ampokami ayɛ ɛkɔkɔ w’eshika wakoka mbaetawoya dikambo sɔ. Kɛsɔ mbayowatshutshuya dia vɔ mbetawɔ awui watayɛ.

Ɔpɔstɔlɔ Paulo akakambe la yewo ya mbetawoya. Lo kamba l’elembetshiyelo w’eshika, la yoho ya dimɛna ya kana l’anto yimba, ndo l’ɔsɛngɔsɛngɔ wa l’otema ɔtɔi, nde akakome lo tshikitanya tokanyi ta wanɛ wakatɛkɛtaka la nde. Nde akatotshikɛ ɛnyɛlɔ ka dimɛna. (Etsha 18:4; 19:8) Koko, atɛkɛtshi amɔtshi kambaka la yewo ya mbetawoya dia kesa anto. (Mat. 27:20; Etsha 14:19; Kol. 2:4) Vɔ koka tatɛ la fɔnya dikambo dimɔtshi ɔfɔnyafɔnya, ndjaɛkɛ l’awui wa lokolonganya, kamba la tokanyi taheyama ɔtɛ l’ekolo, mbikasha awui wahɔtɔnɛ la kanyi yawɔ, kana kamba la nsaki lo dihole dia kana l’anto yimba. Sho pombaka mbewɔ toho tɔsɔ tshɛ.

Elembetshiyelo watombe paka oma l’Ɔtɛkɛta wa Nzambi. Kɛnɛ ketshaso hahombe monga awui aso hita. Sho salaka la wolo dia mbewoya anto akina awui wakateke oma lo Bible. Ekanda watondja ɔhɔmbɔ wa kɔlamelo ndo wa kɛsɔ tokimanyiyaka efula lo dikambo sɔ. Ekanda ɛsɔ tokeketshaka dia sɛdingola Afundelo la yambalo tshɛ. Lo wedi aso, sho kotolaka yambalo y’anto oya lo Bible, aha l’oyango wa mbaɛnya dia sho mbele la shadiya, koko dia vamɛ mɛna kɛnɛ katatɔ. Sho tekɔ kanyi ɔtɔi la Yeso Kristo, lakate lam’akandalɔmbaka She ate: “Dui diaye dieko mete.” (Joa. 17:17) Ndoko loleki Jehowa Nzambi, Otungi w’olongo la nkɛtɛ. Mɛtɛ k’elembetshiyelo aso nemanɛka la woho wɔsamiwɔ oma l’Ɔtɛkɛta ande.

Mbala mɔtshi wɛ koka kondja diaaso dia tɛkɛta l’anto waheye Bible kana wahakiɔshi oko Ɔtɛkɛta wa Nzambi. Wɛ pombaka monga la shɛnɔdi efula dia mbeya etena ndo woho wakokayɛ mbɔtshiya avɛsa amɔtshi. Koko wɛ hahombe tshimbatshimba dia kotola yambalo yawɔ oya lo dibuku diɔsami awui asɔ naka kokaka.

Onde naka wɛ amboshilɛ onto awui wele lo divɛsa dimɔtshi, kete lâsɔ olembetshiyelo ayɛ pombaka mbetawɔma? Kema. Wɛ koka kotola yambalo lo dikambo diatɛkɛtama l’etenyi kakɔ dia mɛnya woho wasukɛ divɛsa sɔ awui watayɛ. Naka wɛ ekɔ lo tɛkɛta tsho dia tɔndɔ di’oma lo divɛsa dimɔtshi ko dikambo diatama l’etenyi kakɔ hendana la tɔndɔ sɔ, kete ondo wɛ ayohomba nyomosha tolembetelo tokina. Wɛ koka kamba l’avɛsa akina wendana la dikambo sɔ dia mɛnya ampokami ayɛ di’awui watayɛ tomba mɛtɛ oma l’Afundelo.

Ewɔ dia mɔtsha oshimu lo kɛnɛ kɛnya divɛsa dimɔtshi. Koko adia divɛsa diakɔ la yambalo tshɛ. Divɛsa diakɔ koka mendana l’akambo tshɛ weyɛ lo tɛkɛta. Koko, dia elembetshiyelo ayɛ mbaetawoya, ampokami ayɛ pombaka monga l’akoka wa mɛna mɛtɛ k’elembetshiyelo akɔ oma lo divɛsa diakɔ.

Elembetshiyelo wasukame la tolembetelo taha oma lo Bible. Mbala mɔtshi, mbeyaka monga ohomba kamba la djembetelo y’oma lo dihole dikina di’oshika diele aha Bible dia kimanyiya anto dia vɔ shihodia woho wele Afundelo wekɔ l’awui wa lomba.

Ɛnyɛlɔ wɛ koka kamba l’andja ɔnɛ wɛnama dia mɛnya ɔnɛ Otungi ɔmɔtshi ekɔ. Wɛ koka kotola yambalo y’anto oya l’ɛlɛmbɛ wa lo diangɔ diakatongama, ɛnyɛlɔ wolo w’okotwelo wa lasa diangɔ pende dianganyi, ndo mbaɛnya dia wôngelo w’ɛlɛmbɛ ɛsɔ mɛnyaka di’Ombidji ɔmɔtshi w’ɛlɛmbɛ ekɔ. Elembetshiyelo ayɛ wayonga amɛna naka vɔ mbɔtɔnɛka la kɛnɛ kotami l’Ɔtɛkɛta wa Nzambi. (Jobo 38:31-33; Osam. 19:1; 104:24; Romo 1:20) Djembetelo ya ngasɔ yekɔ ohomba nɛ dia yɔ mɛnyaka dia kɛnɛ kata Bible mbɔtɔnɛka la kɛnɛ kakoka anto mɛna.

Onde wɛ nangaka kimanyiya onto ɔmɔtshi dia nde mbetawɔ dia Bible ekɔ mɛtɛ Ɔtɛkɛta wa Nzambi? Onde wɛ koka mbuta awui wa waa nomb’ewo mɔtshi yakate dia Bible kekɔ Ɔtɛkɛta wa Nzambi aha la vɔ mbisha djembetelo mɔtshi yɛnya dui sɔ? Awui asɔ kimanyiyaka tsho anto walɛmiya waa nomb’ewo shɔ. Onde wɛ koka kamba l’awui wa siansɛ dia mɛnya dia Bible kekɔ mɛtɛ? Naka wɛ ndjaɛkɛ lo tokanyi ta wa nomb’ewo, kete tokanyi tayɛ bu l’osukɔ wa dimɛna nɛ dia vɔ kema kokele. Lo wedi okina, naka wɛ tatɛ l’Ɔtɛkɛta wa Nzambi ko oma lâsɔ wɛ ndjotshɔ l’awui wakashola ase siansɛ wɛnya dia Bible kekɔ l’awui wa mɛtɛ, kete elembestshiyelo ayɛ wayonga l’osukɔ wa dimɛna.

Oyadi kɛnɛ tshɛ kalangayɛ mɛnya, sha tolembetelo efula. Efula ka tolembetelo tayonga layɛ ohomba nemanɛka l’ampokami ayɛ. Ɛnyɛlɔ, naka wɛ ekɔ lo tɛkɛta dia nshi y’ekomelo yatɛkɛtawɔ lo 2 Timote 3:​1-5, kete wɛ koka kotola yambalo y’ampokami ayɛ lo dikambo dimɔtshi diakatombe dieya anto dimɛna diɛnya dia anto ‘waya bu la ngandji k’oshika.’ Ɛnyɛlɔ kɛsɔ keto mbeyaka koka dia mɛnya ɔnɛ dikambo sɔ diendana la djembetelo ya nshi y’ekomelo diekɔ lo kotshama ɛlɔ kɛnɛ.

Mbala efula wɛdikelo w’akambo ahende wotshikitanyi wele l’awui w’ohomba wafɔna koka kimanyiya. Aha wɛdikelo vɔamɛ oto mbata dikambo, koko ohomba awɔ pombaka mɛnama oma lo kɛnɛ kata Bible. Koko woho wa wɛdikelo ɔnɛ koka kimanyiya onto dia mɛna mɛtɛ ka kanyi mɔtshi. Wɛ koka kamba la wɛdikelo wa ngasɔ ɛnyɛlɔ etena kalembetshiyayɛ dia Diolelo diaki Nzambi diekɔ lowandji lɔmɔtshi. Wɛ koka mɛnya dia oko wele mandji y’anto, Diolelo diaki Nzambi diekɔ l’ɛnɔmbɔdi, l’anto wayowɔlɔmbɔla, l’ɛlɛmbɛ, l’anto walomboshana, ndo l’ekongelo kendana la wetshelo.

Wɛ koka kamba l’akambo weta lo lɔsɛnɔ dia mɛnya ohomba wa kamba l’alako wa lo Bible. Wɛ koka kamba l’akambo wakakokomɛ dia sukɛ kɛnɛ kotami. Ɔnkɔnɛ, etena kɛnyayɛ onto ohomba wa mbadiaka ndo mbekaka Bible, wɛ koka mbolembetshiya woho wakalowanya dikambo sɔ lɔsɛnɔ layɛ. Dia keketsha anango, ɔpɔstɔlɔ Petero akatɛkɛta dikambo di’ohilwelo wele ndamɛ akɛnyi la washo ande nganɛ. (2 Pet. 1:16-18) Paulo nde lawɔ akakambe l’awui wakokomɛ. (2 Kor. 1:8-10; 12:7-9) Lo mɛtɛ, wɛ pombaka kamba l’awui wakakokomɛ lo yɛdikɔ yakoka di’aha wɛ ndjoleka kotola yambalo y’anto oya le yɛ.

Lam’ele ahole ndo tokanyi t’anto tshikitana, djembetelo yetawoya onto ɔmɔtshi koka monga ko hayetawoya onto okina. Lâsɔ, enda tokanyi tele l’ampokami ayɛ etena kasɔnayɛ elembetshiyelo wayoyosha ndo woho wayoyosha elembetshiyelo akɔ. Tukedi 16:23 mbutaka ɔnɛ: “Utema wa kanga yimba atulakanyaka unyo andi, ndu atufudiaka yimba lu elomo andi.”