Sho kokaka mbisha Jehowa ɛngɔ kɛmɔtshi
1 Onde wɛ mbeyaka di’anto kokaka mbisha Nzambi ɛngɔ kɛmɔtshi? Abɛlɛ akalambola Jehowa nyama y’amɛna efula ndo Nɔa la Jɔbɔ wakasale woho akɔ wâmɛ. (Etat. 4:4; 8:20; Jobo 1:5) Koko, elambo ɛsɔ kɔngɔnya Otungi, nɛ dia nde mbakanga diangɔ tshɛ. Elambo ɛsɔ wakɛnyaka ngandji k’efula kaki l’apami asɔ wa kɔlamelo otsha le Nzambi. Ɛlɔ kɛnɛ, sho kokaka kamba la wenya aso, wolo aso ndo ekundji aso dia mbisha Jehowa ‘olambo wa lotombo.’—Heb. 13:15.
2 Wenya: Ekɔ mɛtɛ dui dia lomba dia sho ‘ndjatshungwɛ’ etena oma lo akambo wele bu ohomba efula dia sho ndeka sambisha! (Ef. 5:15, 16) Ondo, sho kokaka tshikitanya ekongelo kaso dia kamba oko ombatshi mboka wa tshanda ngɔndɔ ɔtɔi kana ngɔndɔ efula l’ɔnɔnyi. Ondo sho mbeyaka fudia wenya watotetshaka mbala la mbala l’esambishelo. Kotsha minitɛ 30 lâdiko dia wenya watotosambishaka lomingu tshɛ ayodiya wenya ehende lâdiko dia wenya watotokimɔka lo ngɔndɔ!
3 Wolo: Dia monga la wolo w’efula wa sambisha sho pombaka mbewɔ tɔkɛnyɔ ndo elimu wakoka tɔlɛndja efula polo lo yɛdikɔ yahatatokoka mbisha Jehowa kɛnɛ koleki ɔlɔlɔ oma le so. Hatohombe ndjakiyanya efula polo lo yɛdikɔ ya etema aso ‘kɔmɔ,’ ko toshishɛ wolo wakokaso kambɛ Nzambi olimu. (Tuk. 12:25) Oyadi tekɔ la ɔkɔkɔ ɔmɔtshi wa shikaa wa ndjakiyanya, ayoleka dimɛna sho ‘kitsha wetsho aso le Jehowa.’—Osam. 55:22; Fil. 4:6, 7.
4 Ekundji: Sho kokaka nto kimɔ ekundji aso dia sukɛ olimu w’esambishelo. Paulo akakeketsha asekande Akristo dia vɔ ‘mombaka yangɔ mɔtshi’ mbala la mbala dia vɔ monga la yangɔ ya mbisha wanɛ wele lo dihombo. (1 Kor. 16:1, 2) Woho akɔ wâmɛ mbele, sho mbeyaka momba yema ya dikuta dia ndjokimɔ dikambo di’ehomba wa l’etshumanelo kaso ndo dikambo di’olimu wakambema l’andja w’otondo. Jehowa ngɛnangɛnaka kɛnɛ kakimɔso oma k’ɛse otema, oyadi kânga kekɔ tshitshɛ.—Luka 21:1-4.
5 Jehowa akatosha diangɔ efula. (Jak. 1:17) Sho mɛnyaka lowando laso lo kimɔ wenya aso, wolo aso ndo ekundji aso la lokaho tshɛ dia mbokambɛ. Etena kasalaso ngasɔ, sho ngɛnyangɛnyaka Jehowa, “ne dia [Nzambi] nangaka untu latukimoka l’ongenongeno.”—2 Kor. 9:7.