Tɔkɛndɛkɛndɛ la mbetawɔ, koko aha la lɛɛnɔ!
‘Sho kɛndakɛndaka la mbetawɔ, koko aha la lɛɛnɔ.’—2 KORETO 5:7.
1. Kakɔna kɛnya ɔnɛ ɔpɔstɔlɔ Paulo akakɛndakɛndaka la mbetawɔ, koko aha la lɛɛnɔ?
TEKƆ lo ɔnɔnyi 55 lo tena diaso (T.D) nɛ. Ambeta ɛnɔnyi akumi ahende l’ɛmɔtshi wele Paulo, pami kakeyamaka ntondo lo lokombo la Saulo ndo kakahɛnyahɛnyaka Akristo akakome Okristo. Ɛnɔnyi wakatetaka kondanya kana kitshakitsha mbetawɔ kande le Nzambi. Kânga mbakinde atɛnaka akambo wa mɛtɛ wa l’olongo la washo ande, nde akalame mbetawɔ kande nge. Diɔ diakɔ diele, etena kakandafundɛ Akristo w’akitami wa nyuma, wele la elongamelo ka tɔsɛna l’olongo, ɔpɔstɔlɔ Paulo akakoke mbuta ate: ‘Sho kɛndakɛndaka la mbetawɔ, koko aha la lɛɛnɔ.’—2 Koreto 5:7.
2, 3. a) Ngande wɛnyaso ɔnɛ tekɔ lo kɛndakɛnda la mbetawɔ? b) Kakɔna kalembetshiya kɛndakɛnda la lɛɛnɔ?
2 Dia kɛndakɛnda la mbetawɔ, sho pombaka monga la wɛkamu wa tshɛ lo dikoka diele la Nzambi dia nɔmbɔla nsɛnɔ yaso. Sho pombaka monga la eshikikelo ka tshɛ ɔnɛ nde mbeyaka kɛnɛ koleki ɔlɔlɔ le so. (Osambu 119:66) Etena kɔsaso tɛdikɔ ndo kasalaso akambo lo yoho yɔtɔnɛ la tɔ, sho mbidjaka yimba lo ‘akambo wa mɛtɛ wahɛnama.’ (Heberu 11:1) L’atei w’akambo wa mɛtɛ asɔ mbele ndo “ulungu w’uyuyu la kete y’uyuyu” yakalake Nzambi. (2 Petero 3:13) Lo wedi okina, kɛndakɛnda la lɛɛnɔ nembetshiyaka monga la yoho ya lɔsɛnɔ yalɔmbwama paka la awoki aso wa demba. Dui sɔ diekɔ wâle nɛ dia diɔ koka tokonya diaha mbidja yimba lo lolango laki Nzambi.—Osambu 81:12; Undaki 11:9.
3 Oyadi tekɔ l’atei wa “limba la tshitshe,” lele la leeta l’otsha l’olongo, kana l’atei wa “ekoko ekina,” wele la elongamelo ka nsɛna la nkɛtɛ, onto tshɛ la l’atei aso pombaka nama l’otema ande dako diatɔlɔmba dia kɛndakɛnda la mbetawɔ, koko aha la lɛɛnɔ. (Luka 12:32; Joani 10:16) Lo sawo nɛ, tayɔsɛdingola woho wakoka tokokɛ dako nɛ diakasambiyama oma lo tolonga tɔnɛ: ‘ɔngɛnɔngɛnɔ wa tshenyi ya wonya tsho wa pɛkato,’ nsaki ka lomombo la l’emunyi, ndo djonga ya mbohɛ ɔnɛ ekomelo ka dikongɛ nɛ di’akambo kaya suke. Tayɔsɛdingola nto wâle wonga lo kɛndakɛnda la lɛɛnɔ.—Heberu 11:25.
Totone ‘ɔngɛnɔngɛnɔ wa tshenyi ya wonya tsho wa pɛkato’
4. Mɔsɛ akasɔnɛ dia mbeta lo wedi akɔna ndo lande na?
4 Tokanyiya yema yoho ya lɔsɛnɔ lakakoke monga la Mɔsɛ, ɔnaki Amurama. Nde akole lo dioho dia nkumekanga dia l’Edjibito w’edjedja, ndo nde aki la akoka wa monga la lowandji, ɔngɔnyi, ndo monga onto la lokumu. Mɔsɛ akakoke kanyiya ɔnɛ: ‘Dimi lambokondja wetshelo w’efula lo lomba la nɛmɔ efula la l’Edjibito, ndo lekɔ la wolo lo ɛtɛkɛta ndo lo ditshelo diami. Naka dimi tshikala lo luudu la nkumekanga, kete dimi koka kamba la dihole diami lo wahɔ w’anangɛmi w’ase Hɛbɛru wasɔkishama.’ (Etsha 7:22) Koko, Mɔsɛ akasɔnɛ dia “nsuwa la antu wa [Nzambi].” Lande na? Kakɔna kakatshutshuya Mɔsɛ dia tona kɛnɛ tshɛ kakandakoke kondja l’Edjibito? Bible kadimolaka ɔnɛ: “Dia mbetawo, [Mɔsɛ akamɔ] uma l’Edjibitu, kumbuka kele ka khum’ekanga woma; ne dia ndi akatetemala, uku untu lena one lahenamaka.” (Heberu 11:24-27) Mɔsɛ aki la mbetawɔ dia Jehowa ayowofuta l’ɔtɛ wa losembwe lande, ndo dui sɔ diakokimanyiya dia nde shika tanga la ntondo ka pɛkato ndo ka ɔngɛnɔngɛnɔ atɔ wa tshenyi ya wonya tsho.
5. Ɛnyɛlɔ ka Mɔsɛ tokeketshaka dia sala na?
5 Sho lawɔ mongaka la ntondo ka tɛdikɔ ta wolo tahombaso mbɔsa tele oko tɔnɛ: ‘Onde dimi halohombe tshika ditshelo kana mbekelo mɔtshi yahaleke mbɔtɔnɛ la atɔndɔ wa lo Bible? Onde dimi pombaka mbetawɔ olimu wɛnama dia wekɔ la wahɔ wa l’emunyi koko wayoshimba dia dimi pama lo nyuma?’ Ɛnyɛlɔ ka Mɔsɛ tokeketshaka diaha sho mbɔsa tɛdikɔ tɛnya dia tekɔ oko ase andja ɔnɛ wahɛnyi etale; koko sho pombaka monga la mbetawɔ lo lomba laki “One lahenama,” mbuta ate Jehowa Nzambi ndo lo dikoka diande dia mɛna etale. Oko Mɔsɛ, tɔngɛnɛngɛnɛ lɔngɛnyi lasaso la Jehowa oleki ɛngɔ tshɛ kakoka tosha andja ɔnɛ.
6, 7. a) Ngande wakɛnya Esau ɔnɛ nde akalangaka kɛndakɛnda la lɛɛnɔ? b) Ɔhɛmwɛlɔ akɔna wakondjaso oma lo ɛnyɛlɔ kaki Esau?
6 Dionga diaki Mɔsɛ diakatshikitana efula la nɛ diaki Esau, ɔnaki owandji wa nkumbo Isaka. Esau akakombola ɔngɛnɔngɛnɔ wa tshenyi ya wonya tsho. (Etatelu 25:30-34) ‘Oko wakinde kɔnɛmiyaka akambo w’ekila,’ Esau akasondja okitɔ ande w’ɔna enondo “la yema ya mbu ya nde.” (Heberu 12:16) Nde kokanyiya woho wele yɛdikɔ yande ya sondja okitɔ ande w’ɔna enondo akahombe monga la shɛngiya lo diɔtɔnganelo diasande la Jehowa kana lo etombelo wakahombe monga la yɛdikɔ shɔ le ekana ande. Nde kɔmɛnaka akambo lo yoho ya lo nyuma. Esau akɔnyɔla alaka w’oshinga wolo waki Nzambi, ndo akawaɔshi oko waki la nɛmɔ dia yema tshitshɛ. Nde akakɛndakɛnda la lɛɛnɔ, koko aha la mbetawɔ.
7 Ɛnyɛlɔ kaki Esau toshaka ɔhɛmwɛlɔ ɛlɔ kɛnɛ. (1 Koreto 10:11) Etena kahombaso mbɔsa tɛdikɔ, oyadi ta weke kana tatotshitshɛ, hatohombe kesama oma lo awui wa kashi w’andja waki Satana, watotshutshuya dia kotsha nsaki yaso paka ko wonya akɔ wâmɛ. Sho pombaka ndjambola ɔnɛ: ‘Onde tɛdikɔ tɔsami mɛnyaka dia lekɔ la tokanyi tele oko taki Esau? Naka dimi nanga dia kondja kɛnɛ kakombolami etena kɛnɛ, onde dui sɔ diayotshutshuya dia dimi tshindja wahɔ wa lo nyuma l’ɔkɔngɔ? Onde ɛsɔnwɛlɔ ami mbidjaka lɔngɛnyi lasami la Nzambi ndo difuto diami dia lo nshi yayaye lo wâle? Ɛnyɛlɔ ka woho akɔna kashami anto akina?’ Naka ɛsɔnwɛlɔ aso mɛnyaka dia sho mamemaka akambo w’ekila, kete Jehowa ayotɔtshɔkɔla.—Tukedi 10:22.
Tatɔkɔke lo djonga ya nsaki ka lomombo la l’emunyi
8. Ɔhɛmwɛlɔ akɔna wakasha Yeso Akristo wa la Laɔdikiya, ndo lande na kakokaso kondja wetshelo oma lɔkɔ ɛlɔ kɛnɛ?
8 Lo ɛnɛlɔ kɛmɔtshi kakawɛnya ɔpɔstɔlɔ Joani otsha l’ekomelo ka ntambe ka ntondo, Yeso Kristo laki lo lotombo akewoya etshumanelo ka la Laodikiya, kaki lo Asie Mineure losango lɔmɔtshi. Ɔsɔ akikɔ losango l’ɔhɛmwɛlɔ lo kɛnɛ kendana la nsaki ka lomombo la l’emunyi. Kânga mbakiwɔ ɛngɔnyi l’emunyi, Akristo wa la Laodikiya waki wola lo nyuma. Lo dihole dia vɔ tetemala kɛndakɛnda la mbetawɔ, vɔ waketawɔ dia lomombo la l’emunyi ndanya ɛnɛlɔ kawɔ ka lo nyuma. (Enyelo 3:14-18) Nsaki ka lomombo la l’emunyi kekɔ la etombelo akɔ wâmɛ ɛlɔ kɛnɛ. Nsaki kɛsɔ tɛwɔlaka mbetawɔ kaso ndo toshimbaka dia ‘ndawɔ la ekikelo lowango’ la kondja lɔsɛnɔ. (Heberu 12:1) Naka hatongi la yewo, kete “ongenongeno wa lumu lone,” kokaka tshidia elimu aso wa lo nyuma polo ndo lo ‘mbasenya tshɛ.’—Luka 8:14.
9. Lande na kakokadiɔ mbutama dia ɔngɛnɔngɛnɔ ndo lowando lele laso lo mbo ya ndɛ ya lo nyuma tokokɛka?
9 Yoho mɔtshi ya ndjakokɛ lo nyuma ele ngɛnangɛna la kɛnɛ kele laso lo dihole dia sho nyanga dia ndjasha tshɛ lo andja ɔnɛ ko ndjangɔnya l’emunyi. (1 Koreto 7:31; 1 Timote 6:6-8) Naka tekɔ lo kɛndakɛnda la mbetawɔ, koko aha la lɛɛnɔ, kete tekɔ lo kondja ɔngɛnɔngɛnɔ lo paradiso ka lo nyuma kele kakianɛ. Onde mbo ya ndɛ ya lo nyuma yalongolaso mbala la mbala hatotshutshuyama dia ‘mbida ekoko w’ɔngɛnɔngɛnɔ nɛ dia eongelo kaso k’ɔlɔlɔ k’otema’? (Isaya 65:13, 14) Lâdiko dia lâsɔ, sho ngɛnangɛnaka lɔngɛnyi la la wanɛ wakɛnɛmɔla elowa wa nyuma ka Nzambi. (Ngalatiya 5:22, 23) Ekɔ ohomba mɛtɛ dia sho monga l’ɔngɛnɔngɛnɔ ndo keketshama oma lo kɛnɛ katosha Jehowa lo nyuma!
10. Ambola akɔna wahombaso ndjambola shoamɛ?
10 Ambola amɔtshi wahombaso ndjambola vɔanɛ: ‘Dihole diakɔna diele la diangɔ dia l’emunyi lo lɔsɛnɔ lami? Onde dimi kambaka la diangɔ diami dia l’emunyi dia sɛna lɔsɛnɔ l’ɔngɛnɔngɛnɔ kana dia tɔla ɔtɛmwɛlɔ wa mɛtɛ otsha la ntondo? Kakɔna kambisha ɔngɛnɔngɛnɔ woleki? Onde wekelo wa Bible ndo lɔngɛnyi la lo nsanganya y’Akristo, ko kana wikɛndɛ yalawɔmi ɛkɛndɛ w’Okristo? Onde dimi ndjaombɛka wikɛndɛ efula dikambo dia tɔkɛnyɔ lo dihole dia momba tena sɔ dikambo di’olimu w’esambishelo ndo di’elimu ekina wendana la ɔtɛmwɛlɔ wa pudipudi?’ Naka sho nangaka kɛndakɛnda la mbetawɔ, kete sho pombaka ndjasha efula l’olimu wa Diolelo ndo ndjaɛkɛ tshɛ lo alaka waki Jehowa.—1 Koreto 15:58.
Tohɔke dia ekomelo kaya suke
11. Ngande wele kɛndakɛnda la mbetawɔ tokimanyiyaka diaha sho mbohɛ ɔnɛ ekomelo kaya suke?
11 Naka sho kɛndakɛnda la mbetawɔ, kete hatonga wolo sho mbikadja tokanyi ta lo demba t’ɔnɛ ekomelo ka dikongɛ nɛ di’akambo kekekɔ etale kana ɔnɛ tɔ hoya. Otshikitanyi la akanga a tâmu wɔnyɔla prɔfɛsiya ya lo Bible, sho shihodiaka dia awui weta l’andja ɔnɛ mbɔtɔnɛka la kɛnɛ kakate Ɔtɛkɛta wa Nzambi dikambo dia nshi yaso nyɛ. (2 Petero 3:3, 4) Oko ɛnyɛlɔ, onde waonga ndo nkɛwɔ ya efula k’anto wa lo nshi yaso nyɛ hɛnya dia tekɔ lo nsɛna lo “nshi y’ekumelu” oka? (2 Timote 3:1-5) La washo wa mbetawɔ, sho mɛnaka dia akambo weta nshi nyɛ l’andja ɔnɛ kema tsho oko akambo akɔ wâmɛ wa l’ɔkɔndɔ mbatasalema. Koko, akambo asɔ kengaka ‘djembetelo ya wôngelo wa Kristo ndo y’ekomelo ka dikongɛ nɛ di’akambo.’—Mateu 24:1-14.
12. Ngande wakakotshama ɛtɛkɛta waki Yeso wele lo Luka 21:20, 21 lo ntambe ka ntondo?
12 Tɔsɛdingole dikambo dimɔtshi diakete lo ntambe ka ntondo ka tena diaso nɛ diele la diɔtɔnganelo la nshi yaso nyɛ. Lam’akinde la nkɛtɛ, Kristo akewola ambeki ande ate: “Lam’ayunyena elui w’alimbi wambudinga Jerusalema, kanyeyi nyati: Elanyelu kayo kaya suki. Lushi lako, wane weli la Judiya, kawulawo l’ekungu; wane weli l’atei a ngelu, kawumo.” (Luka 21:20, 21) Prɔfɛsiya kɛsɔ kakakotshama etena kakadinge alembe w’ase Rɔma wakalɔmbwama oma le Cestius Gallus Jerusalɛma lo 66 T.D. Koko alembe asɔ wakamɔ la shashimoya ndo dui sɔ diakasha Akristo ɔhɛmwɛlɔ ndo diaaso dia vɔ ‘ndawɔ otsha lo akona.’ Lo 70 T.D., alembe w’ase Rɔma wakakalola, wakɔtwɛ osomba wa Jerusalɛma la ta ndo wakalanya tɛmpɛlɔ kayɔ. Lo ndjela Josèphe, ombewi ɔmɔtshi w’ɛkɔndɔ, olekanyi miliyɔ k’ase Juda wakavu, ndo anto 97 000 wakatɔlama lo fumbe. Nzambi akalanya dikongɛ di’akambo di’ase Juda dia lo nshi shɔ. Wanɛ wakakɛndakɛnda la mbetawɔ ndo wakayele ɔhɛmwɛlɔ waki Yeso wakahande elanyelo kɛsɔ.
13, 14. a) Akambo akɔna wayanga salema kema edja? b) Lande na kahombaso mambalɛka ekotshamelo ka prɔfɛsiya ya lo Bible?
13 Dikambo dia woho akɔ wâmɛ diayanga salema lo nshi yaso nyɛ. Atshunda wa lo Wedja wosanganyi wayosha lonya lo ekotshamelo k’elombwelo kaki Nzambi. Oko waki alembe w’ase Rɔma wa lo ntambe ka ntondo la ɔkɛndɛ wa nama Pax Romana (Wɔladi wa Rɔma), mbele Wedja wosanganyi wekɔ ɛlɔ kɛnɛ ehomɔ ka nama wɔladi. Kânga mbakahembe alembe w’ase Rɔma dia kokɛ wɔladi lo yɛdikɔ mɔtshi lo andja w’otondo wakeyamaka nshi shɔ, paka ko vɔ akɔ mbakayolanyaka Jerusalɛma. Woho akɔ wâmɛ mbele ɛlɔ kɛnɛ, prɔfɛsiya ya lo Bible mɛnyaka dia alembe wa lo Wedja wosanganyi wayɔsa ɔtɛmwɛlɔ oko ɛngɔ kadja lofunge ndo wayolanya Jerusalɛma ya nshi nyɛ, mbuta ate Lokristokristo ndo atshikadi wa lo Babilɔna ka Woke. (Enyelo 17:12-17) Eelo, tshunda dia l’andja w’otondo di’ɛtɛmwɛlɔ wa kashi diekɔ suke la ndanyema.
14 Elanyelo k’ɛtɛmwɛlɔ wa kashi kayolembetshiya etatelo ka fɔnu ka woke. Lo etenyi k’ekomelo ka fɔnu ka woke kɛsɔ, atshikadi wa dikongɛ di’akambo dia kɔlɔ nɛ wayoyolanyema. (Mateu 24:29, 30; Enyelo 16:14, 16) Kɛndakɛnda la mbetawɔ tokimanyiyaka dia sho mambalɛka ekotshamelo ka prɔfɛsiya ya lo Bible. Tatokesamake la kanyi ya ɔnɛ tshunda dimɔtshi diaki ana w’anto, oko Wedja wosanganyi koka monga ehomɔ kayokamba la Nzambi dia mbidja ki ndo lotui ntshitshi la mɛtɛ. Lâsɔ shi yoho yaso ya lɔsɛnɔ pombaka mɛnya dia sho mbetawɔka dia “lushi la wuki la [Jehowa] laya suki”?—Zefaniya 1:14.
Kɛndakɛnda la lɛɛnɔ ekɔ la wâle akɔna?
15. Kânga mbakawakondjaka ɛtshɔkɔ oma le Nzambi, wodja wa Isariyɛlɛ wakayɔkɔka lo djonga yakɔna?
15 Akambo wakakomɛ Isariyɛlɛ w’edjedja mɛnyaka wâle wakomɛ wanɛ wakɛndakɛnda la lɛɛnɔ lo tshika dia mbetawɔ kawɔ monga wɔdu. Kânga mbakawɛnyi asui dikumi wakasha tozambizambi ta kashi ta l’Edjibito sɔnyi ndo mbakawatshungɔ lo yoho ya diambo efula oma lo ndjale ka Beela, ase Isariyɛlɛ wakahindolɛ Nzambi ndo wakatshe yana ya ngɔmbɛ ya paonyi ko wakatatɛ ndjitɛmɔla. Lande na? Aki nɛ dia vɔ komonga la solo dia lotutsha ndo wakahekɔ dia kongɛ Mɔsɛ, ‘lakatshimbatshimbaka dia polɔ oma l’okongo.’ (Etumbelu 32:1-4) Woho wakiwɔ komonga la solo dia lotutsha akâkonya dia vɔ tɛmɔla ekishi kɛnama la washo. Vɔ wakatɛngɛ Jehowa lo woho wakawakɛndakɛnda la lɛɛnɔ ndo “apami nunu satu w’asi Isariyele” wakadiakema l’ɔtɛ wa dui sɔ. (Etumbelu 32:25-29) Ande dui dia kandji naka ɛlɔ kɛnɛ ɔtɛmɔdi ɔmɔtshi waki Jehowa mbɔsa tɛdikɔ tɛnya dia nde aya bu la wɛkamu lo dikoka diele la Nzambi dia kotsha alaka Ande lee!
16. Lo waaso akɔna wakakesama ase Isariyɛlɛ la akambo wɛnama la washo?
16 Ɛnamelo ka la washo akonge la etombelo ekina nto le ase Isariyɛlɛ. Lam’ele wakakɛndakɛnda la lɛɛnɔ, vɔ wakasake lokomba la wɔma la ntondo k’atunyi awɔ. (Walelu 13:28, 32; Euhwelu k’Elembe 1:28) L’ɔtɛ wa dui sɔ mbakawɔnyɔla lowandji lakasha Nzambi Mɔsɛ ndo ndjakiyanya dikambo dia yoho ya lɔsɛnɔ yaki lawɔ. Woho wakiwɔ komonga la mbetawɔ akâkonya dia vɔ kombola wodja w’Edjibito waki la ɛdiɛngɛ efula lo dihole dia Nkɛtɛ ya daka. (Walelu 14:1-4; Osambu 106:24) Ande woho wakanyange Jehowa lo mɛna woho waki wodja ande komonga la dilɛmiɛlɔ otsha le Nkumekanga kawɔ kahɛnama lee!
17. Lande na kakakadja ase Isariyɛlɛ ɛlɔmbwɛlɔ kaki Jehowa lo nshi ya Samuɛlɛ?
17 Lo nshi ya ɔprɔfɛta Samuɛlɛ, wodja wa Isariyɛlɛ wakaleke nangema kɔkɛndakɛnda la mbetawɔ. Ase Isariyɛlɛ wakatatɛ kombola nkumekanga kakawakokaka mɛna la washo. Kânga mbakɛnya Jehowa dia nde mbaki Nkumekanga kawɔ, dikambo sɔ kokoka le wɔ dia vɔ kɛndakɛnda la mbetawɔ. (1 Samuele 8:4-9) Lo ndjayangɛ mpokoso vɔamɛ, vɔ wakakadja ɛlɔmbwɛlɔ ka kokele kaki Jehowa, lo kombola dia vɔ monga oko wedja wakâdinge.—1 Samuele 8:19, 20.
18. Wetshelo akɔna wakokaso kondja oma lo wâle wa kɛndakɛnda la lɛɛnɔ?
18 Sho wanɛ wakambɛ Jehowa nshi nyɛ, tekɔ lo mbɔsa diokanelo di’ɔlɔlɔ diasaso la Nzambi la nɛmɔ di’efula. Tekɔ la mposa k’efula ka mbeka ndo kamba olimu la wetshelo w’ohomba w’akambo waki lo nshi yakete lo nsɛnɔ yaso. (Romo 15:4) Lam’ele ase Isariyɛlɛ wakakɛndakɛnda la lɛɛnɔ, vɔ wakohɛ dia Nzambi akatawalɔmbɔlaka oma lo tshimbo ya Mɔsɛ. Naka hatongi la yewo, kete sho lawɔ koka ndjohɛ ɔnɛ Jehowa Nzambi ndo Mɔsɛ ka Woke, mbuta ate Yeso Kristo, mbalɔmbɔla etshumanelo ka Akristo ɛlɔ kɛnɛ. (Enyelo 1:12-16) Sho pombaka ndjalama diaha mɛna okongamelo waki Jehowa wa la nkɛtɛ lo yoho ya lo demba. Naka sho sala munga kɛsɔ, kete dui sɔ koka tokonya dia monga la dionga dia diɔnyɔ otsha le enyimpala waki Jehowa ndo mɔnyɔla mbo ya ndɛ ya lo nyuma yatosha ‘ɔhɔmbɔ wa kɔlamelo ndo wa kɛsɔ.’—Mateu 24:45.
Toyashikikɛ dia kɛndakɛnda la mbetawɔ
19, 20. Yɛdikɔ yakɔna yamboyɔsa, ndo lande na?
19 Bible mbutaka ɔnɛ: “Ne dia shu hatolo ta la emunyi la dikila, keli tambolo la waulelu la akambu wa wulu, la embuledi wa la kete wa udjima one, la elui w’edienge wa lu ahuli wa l’ulungu.” (Efeso 6:12) Otunyi aso wa ntondo ekɔ Satana Diabolo. Oyango ande ele wa ndanya mbetawɔ kaso le Jehowa. Nde ekɔ lo nyanga diaaso tshɛ dia tetawoya dia sho tshika yɛdikɔ yakatɔshi ya kambɛ Nzambi. (1 Petero 5:8) Ngande wayotoyakokɛ oma lo awui wa kashi watɛnya dikongɛ nɛ diaki Satana na? Ele lo kɛndakɛnda la mbetawɔ, koko aha la lɛɛnɔ! Ndjaɛkɛ lo alaka waki Jehowa ayotokokɛ diaha sho ‘ndjoshisha mbetawɔ kaso.’ (1 Timote 1:19) Lo weho akɔ tshɛ, nyɛsɔ toyashikikɛ dia tetemala monga la mbetawɔ, tele la elongamelo ka kondja ɛtshɔkɔ waki Jehowa. Ndo totetemale nɔmba dia sho pandɔ oma l’akambo tshɛ wahomba ndja lo nshi yayaye.—Luka 21:36.
20 Lo kɛnɛ kendana la kɛndakɛnda la mbetawɔ, koko aha la lɛɛnɔ, tekɔ la ɛnyɛlɔ kɛmɔtshi ka dimɛna efula. Bible mbutaka ɔnɛ: “Kristu akanyusuwela, akanyutshikela djimbitelu, dia nyu mbuyela lu wanya andi.” (1 Petero 2:21) Lo sawo diayela, tayɛna woho wakokaso kɛndakɛnda oko wakakɛndakɛnda Yeso Kristo.
Onde wɛ âkohɔ?
• Wetshelo akɔna wamboyokondja oma l’ɛnyɛlɔ ka Mɔsɛ ndo Esau lo kɛnɛ kendana la kɛndakɛnda la mbetawɔ, koko aha la lɛɛnɔ?
• Naa yoho mɔtshi ya mbewɔ djonga ya nsaki ka lomombo la l’emunyi?
• Ngande wele kɛndakɛnda la mbetawɔ tokimanyiyaka diaha fɔnya ɔnɛ ekomelo eke etale?
• Lande na kele ekɔ wâle kɛndakɛnda la lɛɛnɔ?
[Osato wa lo lɛkɛ 9]
Mɔsɛ akakɛndakɛnda la mbetawɔ
[Osato wa lo lɛkɛ 10]
Onde tena dimɔtshi tɔkɛnyɔ kɔsɛka wenya wahombayɛ mbetsha l’elimu wa teokrasi?
[Osato wa lo lɛkɛ 12]
Ngande wakokamɛyɛ lo mbidja yimba lo Ɔtɛkɛta waki Nzambi?