Jehowa mbokaka alelo aso
“ashu wa [Jehowa] weko le antu w’ololo, la atui andi weko hwe lu alelu awo.”—OSAM. 34:15.
1, 2. a) Ngande wayaoka anto efula ɛlɔ kɛnɛ? b) Bonde kahatambiya dikambo sɔ?
ONDE wɛ ekɔ lo diɛnɛ la asui? Naka eelo, kete eya diaha wɛ oto mbadiɛnɛ. Anto efula wekɔ lo ndɔshana la ekakatanu wa lushi la lushi wa lo lɔsɛnɔ lo dikongɛ nɛ di’akambo dia kɔlɔ. Amɔtshi mɛnaka dia hawokoke mbikikɛ ekakatanu akɔ. Wekɔ lo ndjaoka woho wakayaoke omembi w’esambo Davidi lakafunde ate: “Dimi kema la wulu, lambowediawediama tshe. Dimi latukhumaka akhumu ne dia ohenyohenyo weli l’utema ami. Diui diami diambudidima, wulu ami ambushila, ndu ashu ami wambule.”—Osam. 38:8, 10.
2 Oko weso Akristo, asui wa lo lɔsɛnɔ hawotambiya. Sho mbeyaka dia “asui” wekɔ etenyi kɛmɔtshi ka djembetelo ya wôngelo wa Yeso yakatewoyishami. (Mako 13:8; Mat. 24:3) Tshɛkɛta ya lo ɛtɛkɛta w’etatelo wakafundama Bible yokadimɔmi ɔnɛ “asui” nembetshiyaka lɔ̂nɔ latotataka womoto la mbota. Dikambo sɔ nembetshiyaka mɛtɛ asui wa wolo wele l’anto lo tena dia “wulu” kana dia “paa,” dia ‘wolo mbikikɛ’!—2 Tim. 3:1; Dyookaneelo dy’Oyooyo.
Jehowa mɛnaka asui aso
3. Kakɔna keya ekambi waki Nzambi dimɛna?
3 Ekambi wa Jehowa mbeyaka dimɛna ɔnɛ ndoko onto ahadiɛnyi ndo mɛnaka mɛtɛ dia asui wayotalekaka ntshɔ otsha lo kɔlɔ. Lâdiko dia asui wele la anto tshɛ, oko weso ekambi waki Nzambi, sho ndɔshanaka nto la “utunyi [aso] uhimbanyi” lamboyashikikɛ dia ndanya mbetawɔ kaso. (1 Pet. 5:8) Sho kokaka ndjaoka esadi eto oko wakayaoke Davidi lakate ate: “Tengo yambukunyamia utema ami khunya. Dimi latuyangaka wane wambuka ketshi, ku nduku untu; latuyangaka wane wa nsamba, ku nduku untu.”—Osam. 69:20.
4. Esambelo kakɔna kakondjaso etena keso lo asui?
4 Onde Davidi akalangaka mbuta dia nde akashisha elongamelo tshɛ? Kema. Tende ɛtɛkɛta ande wayela wa lo osambu akɔ: “Jehowa atohokamɛka ase wola; nde hɔnyɔlaki ase lokanu wakinde pondjo” kana “anto wakinde wele ase lokanu.” (Osam. 69:33, NW, nɔtɛ) Tena efula sho kokaka ndjaoka mbala mɔtshi oko ase lokanu waya ɛhɔmbɔ w’asui. Mbeyaka mɛnama dia anto akina hawoshihodia mɛtɛ ekakatanu waso. Koko lo ɛnyɛlɔ ka Davidi, sho kokaka kondja esambelo lo mbeya dia Jehowa mɛnaka asui aso tshɛ.—Osam. 34:15.
5. Eshikikelo kakɔna kaki la nkumekanga Sɔlɔmɔna?
5 Sɔlɔmɔna k’ɔnaki Davidi akatɔtɔmiya dikambo sɔ lo osapwelo wa tɛmpɛlɔ ka la Jerusalɛma. (Adia 2 Ekondo 6:29-31.) Nde akasɛngasɛnga Jehowa dia mboka alɔmbɛlɔ wa onto tshɛ laki la otema w’osembwe lakayasukanyaka la Nde lo dikambo dia “sui di’utema andi kana okei andi.” Kakɔna kakahombe Nzambi sala la ntondo ka alɔmbɛlɔ w’amɛnyi fɔnu asɔ? Sɔlɔmɔna akɛnya eshikikelo kande k’ɔnɛ Nzambi hatoka ntsho alɔmbɛlɔ awɔ koko ayosala ndo dikambo dimɔtshi dia mbakimanyiya. Lande na? Nɛ dia nde mbeyaka “etema w’antu tshe.”
6. Ngande wakokaso ndɔshanaka la ekiyanu ndo lande na?
6 Sho lawɔ kokaka ndjasukanya la Jehowa lo dɔmbɛlɔ lo dikambo dia “sui di’utema a[so] kana okei a[so],” mbuta ate asui aso hita. Sho pombaka keketshama lo mbeya dia nde mɛnaka asui aso ndo ndjakiyanyaka dikambo diaso. Ɔpɔstɔlɔ Petero akashikikɛ dikambo sɔ etena kakandate ate: “Nyukitsha ukananu anyu tshe le ndi, ne dia ndi atunyukanelaka.” (1 Pet. 5:7) Jehowa ndjakiyanyaka efula lo kɛnɛ katokomɛ. Yeso akatɔtɔmiya yoho yakotsha Jehowa ehomba aso la ngandji tshɛ lo mbuta ate: “Hawutusundjaka tufudu tuhendi dikuta diame? Keli nduku otoi ayoko lu kete ku Shenyu heyi. Ndu divu dia l’ete anyu diambalema tshe. Okone tanyukaki woma. Nyu nyambuleka tufudu efula limbu la wuki.”—Mat. 10:29-31.
Toyaɛkɛ lo ekimanyielo ka Jehowa
7. Osukɔ akɔna weso la etshikikelo ka kondja?
7 Sho kokaka mɛtɛ ndjashikikɛ ɔnɛ Jehowa nangaka ndo nde ekɔ la akoka wa tokimanyiya etena kadiɛnɛso la asui. Omembi w’esambo akate ate: “[Nzambi] eli eshamelu kasu la wulu asu, ekimanyelu ka wulu lu nshi ya pa.” (Osam. 34:15-18; 46:1) Ngande watosha Nzambi ekimanyielo kɛsɔ? Tɔsɛdingole kɛnɛ kata 1 Koreto 10:13: “Keli [Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba ndi ayunyutshela mbuka ka nyu mpanda dia nyu ndjala la wulu wa nshikikala.” Jehowa mbeyaka sala dia asui aso shila kana nde tosha wolo wa sho mbakikɛ. Jehowa ayotokimanyiya lo yoho tshɛ.
8. Ngande wakokaso kondja wahɔ oma lo ekimanyielo kaki Nzambi?
8 Ngande wakokaso kondja wahɔ oma lo ekimanyielo kɛsɔ? Tende dako diahombaso kamba la diɔ: “Nyukitsha ukananu anyu tshe le ndi.” (Sho mbɛnganyisha alɛta ango lo sawo nɛ di’otondo.) Kɛsɔ nembetshiyaka dia lo yoho ya didjidji tekɔ lo kitsha wetsho ndo ekiyanu aso tshɛ le Jehowa. Sho salaka la wolo dia tshika ndjakiyanya ndo ndjaɛkɛka la solo dia lotutsha tshɛ le nde dia nde kotsha ehomba aso. (Mat. 6:25-32) Wɛkamu wa ngasɔ nɔmbaka dia sho ndjala la okitshakitsha ndo aha ndjaɛkɛ lo wolo kana lo lomba laso hita. Lo ndjakitshakitsha ‘l’ɛse ka lonya la wolo la Nzambi,’ sho mbetawɔka dia tekɔ l’ɛse kande. (Adia 1 Petero 5:6.) Lo wedi okina, dikambo sɔ tokimanyiyaka dia sho ndɔshana la kɛnɛ tshɛ katshika Nzambi dia tɔ tokomɛ. Sho mbeyaka kombola la nsaki ka wolo dia kondja ekimanyielo ko wonya akɔ wâmɛ, koko sho tekɔ la eshikikelo dia Jehowa mbeyaka dimɛna etena ndo woho wakokande sala dikambo sɔ lo wahɔ aso.—Osam. 54:7; Is. 41:10.
9. Wotsho akɔna wakahombe Davidi kitsha le Jehowa?
9 Tohɔ ɛtɛkɛta waki Davidi wofundami lo Osambu 55:22: “Ukitsha wutshu aye le [Jehowa], ku ndi ayukembelawo. Ndi hetawo untu ololo nsutshasutshama.” Etena kakafunde Davidi ɛtɛkɛta ɛsɔ nde akadiɛnɛka la asui efula. (Osam. 55:4) Mbokɛmaka dia osambu ɔnɛ wakafundama etena kakawɔtwɛ Abisalɔmɔ w’ɔnande sheke ya mbokumuya lonkumekanga. Ndo ondaki waki Davidi wakandalekaka mbɛkɛ otema le nde, mbuta ate Ahitɔfɛlɛ mbaki lo sheke shɔ. Davidi akahombe ndawɔ oma la Jerusalɛma dia nkokɛ lɔsɛnɔ lande. (2 Sam. 15:12-14) Kânga l’atei w’asui asɔ, Davidi akatetemala ndjaɛkɛ le Nzambi ndo nde kɔmbɔsa sɔnyi.
10. Kakɔna kahombaso sala etena keso la asui?
10 Lo ɛnyɛlɔ ka Davidi, sho pombaka ndjasukanyaka la Jehowa lo dɔmbɛlɔ lo dikambo dia asui tshɛ wakokaso monga lawɔ. Tɔsɛdingole kɛnɛ katokeketsha ɔpɔstɔlɔ Paulo dia sho sala lo dikambo sɔ. (Adia Filipi 4:6, 7.) Etombelo akɔna wayotokondja naka sho nɔmba la otema ɔtɔi? Bible kadimolaka ɔnɛ: “Ki ka [Nzambi], kuleki yimba tshe, ayulama etema anyu la tukanyi tanyu le Kristu Jesu.”
11. Ngande wakokɛ ‘ki ka Nzambi’ etema ndo akoka aso w’ekanelo ka yimba?
11 Onde dɔmbɛlɔ diayotshikitanya lɔsɛnɔ laso? Dikambo sɔ kokaka salema. Koko sho pombaka mbeya ɔnɛ Jehowa hatokadimolaka nshi tshɛ alɔmbɛlɔ aso lo yoho yalangaso. Koko dɔmbɛlɔ tokimanyiyaka dia nama wɛdimo aso wa lo yimba. ‘Ki ka Nzambi’ kokaka tutsha yimba yaso etena kadiɛnɛso la asui. Lo ɛnyɛlɔ ka olui w’alembe wele la ɔkɛndɛ wa kokɛ osomba oma le andɔshi, ‘ki ka Nzambi’ kayokokɛ etema ndo akoka aso wa ekanelo ka yimba. Tɔ kayotokimanyiya dia minya tâmu ndo wɔma aso ndo tokanyi ta kɔlɔ ndo kayotoshimba dia sala akambo la esasesase ndo aha la lomba.—Osam. 145:18.
12. Sha ɛnyɛlɔ kɛnya woho wakoka onto monga la ki ka lo yimba.
12 Ngande wakokaso monga la ki ka lo yimba etena kadiɛnɛso la asui? Nyɛsɔ tɔsɛdingole ɛnyɛlɔ kɛmɔtshi kele lo akambo amɔtshi mbɔtɔnɛka la akambo wele laso. Os’olimu ɔmɔtshi mbeyaka monga la jɛra yatondjanɛ tohaso. Koko ose olimu ɔsɔ ekɔ la diaaso dia nde sawola la kanga kɔpanyi lele onto ɔlɔlɔ ndo lele la ekanelo k’ɔlɔlɔ. Kanga kɔpanyi amboshikikɛ ose olimu ɔsɔ dia nde mbeyaka dikambo diande ndo ambowewoya ɔnɛ kema edja jɛra ayonyɛma oma lo dihole diande. Ngande wayoyaoka ose olimu ɔsɔ na? Naka nde mbetawɔ eshikikelo kɛsɔ ndo mbeya kɛnɛ kotsha salema, kete dui sɔ diayokeketsha yɛdikɔ yande ya tetemala, oyadi kânga nde la dia mbikikɛ ekakatanu efula kakianɛ. Woho akɔ wâmɛ mbele, sho mbeyaka dia Jehowa mɛnaka akambo wahomana laso ndo nde toshikikɛka dia kema edja “umbuledi a kete nye ayukadjema.” (Joa. 12:31) Ande esambelo kakondjaso lee!
13. Oma lâdiko wa dɔmbɛlɔ, kakɔna kahombaso nto sala?
13 Onde lâsɔ ekɔ tsho ohomba mbutɛ Jehowa ekakatanu aso lo dɔmbɛlɔ ko pe? Ndooko. Akambo efula nɔmbamaka. Ekɔ ohomba sho sala akambo lo yoho yɔtɔnɛ la alɔmbɛlɔ aso. Etena kakatome nkumekanga Saulo apami laka Davidi dia todiaka, Davidi akalɔmbɛ ate: “Untshunguli uma le atunyi ami, we [Nzambi k]ami. Umpandja uma le wane watulangaka dia ndo la mi. Untshunguli uma le atshi wa kolo.” (Osam. 59:1, 2) Oma lâdiko wa dɔmbɛlɔ, Davidi akahokamɛ wadɛnde ndo akasale kɛnɛ kakahombamaka dia nde pandɔ. (1 Sam. 19:11, 12) Woho akɔ wâmɛ mbele, sho kokaka nɔmba Nzambi dia nde tosha lomba l’oshika layotokimanyiya dia ndɔshana ndo ondo dia kandola ekakatanu aso.—Jak. 1:5.
Woho wakokaso kondja wolo wa mbikikɛ
14. Kakɔna kakoka tokimanyiya dia mbikikɛ asui?
14 Mbeyaka monga ko asui aso hawonyɛmi ko wonya akɔ wâmɛ. Vɔ mbeyaka kânga tetemala lo tshanda mɔtshi. Naka amonga ngasɔ, kakɔna kayotokimanyiya dia mbikikɛ? Ntondotondo, tohɔ dia etena katetemalaso kambɛ Jehowa la kɔlamelo tshɛ kânga l’atei w’ekakatanu, sho mɛnyaka dia sho mbôkaka ngandji. (Etsha 14:22) Tolame lo yimba woho wakasɔngwɛ Satana Jɔbɔ ate: “Undi, Jobo mbukaka [Nzambi] woma wukuka? We kumbudinga lukumbu dia mbulama, ndi la wa lu luudu landi la diango diandi tshe? We akatshokola ulimu w’anya andi, dungalunga diandi diambufulanela la kete. Keli uhusimbula lunya laye kakiane, unandi kene tshe keli la ndi. Mete, ndi ayukoseka kaku.” (Jobo 1:9-11) Oma lo olowanyi ande, Jɔbɔ akɛnya dia emamatanya waki Satana waki tshɛ kashi. Ndo sho lawɔ mbele la diaaso dia mɛnya ɔnɛ Satana ekɔ kanga kashi oma lo woho wakikɛso ekakatanu. Lo wedi okina, ekikelo kaso keketshaka elongamelo ndo wɛkamu aso.—Jak. 1:4.
15. Naa bɛnyɛlɔ diakoka tokeketsha na?
15 Dui dia hende, tohɔ dia “anya[so] wa la kete watusuwaka pupu.” (1 Pet. 5:9) Eelo, ‘ndoko ohemba wambotokomɛ wahatakomɛka anto akina.’ (1 Kor. 10:13) Ɔnkɔnɛ, sho kokaka kondja wolo ndo dihonga lo kanaka yimba la bɛnyɛlɔ dia anto akina lo dihole dia sho mbidjaka yimba paka lo ekakatanu aso hita. (1 Tes. 1:5-7; Heb. 12:1) Tɔshi etena ka kana yimba la bɛnyɛlɔ dia wanɛ weyaso ɔnɛ wakakikɛ la kɔlamelo tshɛ asui wa kandji efula. Onde sho tamboyangaka ɛkɔndɔ wa nsɛnɔ y’anto wakatondjama lo abuku aso dia sho tana ɛkɔndɔ w’anto waki la ekakatanu wɔfɔnyi la wɛnɛ weso lawɔ? Ɛkɔndɔ ɛsɔ mbeyaka tokeketsha efula mɛtɛ.
16. Woho akɔna watokeketsha Nzambi etena kahomanaso la ehemba wotshikitanyi?
16 Dui dia sato, tohɔ dia Jehowa ekɔ “Shesu ka ketshi, [Nzambi k]’ekeketshelu tshe; [k]atutukikitshaka lu asui tshe, dia shu mbeya nkikitsha akina lu asui awo l’ekikitshelu kakatukikitsha [Nzambi].” (2 Kor. 1:3, 4) Ekɔ oko Nzambi akemadi suke la so dia tokeketsha, aha paka lo ekakatanu aso wa kakianɛ, koko “lu asui [aso] tshe.” Kɛsɔ toshaka akoka wa samba anto akina ‘lo oseka sui tshɛ.’ Paulo ndamɛ akashihodia mɛtɛ ka ɛtɛkɛta ɛsɔ.—2 Kor. 4:8, 9; 11:23-27.
17. Ngande wakoka Bible tokimanyiya dia sho ndɔshana la ekakatanu wa lo lɔsɛnɔ?
17 Dui dia nɛi, tekɔ la Ɔtɛkɛta wa Nzambi, Bible wele “ololo mbetsha antu, la mbalaka, la mbaewula, la mbaekiya lu akambu w’ololo. Dia untu a [Nzambi] aluwani, ndu akuki dia ntsha elimu w’ololo tshe.” (2 Tim. 3:16, 17) Ɔtɛkɛta wa Nzambi hawotokonya tsho ‘anto wele la akoka’ ndo la ‘dihomɔ diahombama dia ntsha olimu w’ɔlɔlɔ tshɛ.’ Vɔ tokimanyiyaka nto dia ndɔshana la ekakatanu wa lo lɔsɛnɔ. Vɔ toshaka ‘akoka tshɛ’ ndo ‘dihomɔ tshɛ.’ Tshɛkɛta ya lo ɛtɛkɛta w’etatelo wakafundama Bible yokadimɔmi ɔnɛ “dihomɔ tshɛ” nembetshiyaka lo ndjela ekadimwelo ka tshɛkɛta la tshɛkɛta ɔnɛ “ɔnɛ lakoka.” Lo nshi y’edjedja wakakokaka kamba la tshɛkɛta shɔ dia nembetshiya masuwa waki la ɛngɔ tshɛ kakahombamaka dia minda lɔkɛndɔ kana mashinyi ɔmɔtshi wakakokaka sala dikambo tshɛ diakawawange dia sala. Woho akɔ wâmɛ mbele, oma lo tshimbo y’Ɔtɛkɛta ande, Jehowa toshaka tshɛ keso l’ohomba dia kandola dikambo tshɛ diakoka tokomɛ. Oma lɔkɔ mbele sho kokaka mbuta ɔnɛ: “Naka Nzambi ambetawɔ dia sui dimɔtshi tokomɛ, kete tayoditondoya la ekimanyielo kande.”
Etshungwelo oma lo asui aso tshɛ
18. Dui diakɔna diayotokimanyiya nto dia sho mbikikɛ naka sho mbika washo lɔkɔ?
18 Dui dia tanu, tokake washo nshi tshɛ lo woho ɔnɛ wele kema edja Jehowa otsha tshungola anto oma lo asui tshɛ. (Osam. 34:19; 37:9-11; 2 Pet. 2:9) Lo ekomelo, teye dia etshungwelo kaso k’oma le Nzambi halembetshiya tsho tshungɔ oma lo asui wa kakianɛ, koko tɔ nembetshiyaka nto diɛsɛ dia monga la lɔsɛnɔ la pondjo, oyadi l’olongo kâmɛ la Yeso kana lo paradiso ka la nkɛtɛ.
19. Ngande wakokaso mbikikɛ asui la kɔlamelo tshɛ?
19 Lam’akatakongɛ etena kɛsɔ, tekɔ lo tetemala ndɔshana la ekakatanu wa lo andja ɔnɛ wa kɔlɔ. Ande woho wakombolaso etena kahonga akambo asɔ nto lee! (Osam. 55:6-8) Tohɔ dia woho wakikɛso la kɔlamelo tshɛ mɛnyaka dia Diabolo ekɔ kanga kashi. Nyɛsɔ tokondja wolo oma lo alɔmbɛlɔ aso ndo oma le nkumbo kaso k’anto l’ɔnango k’Akristo, teya dia anangɛso wekɔ lo pomana la ehemba akɔ wâmɛ. Nyɛsɔ totetemale monga la akoka ndo la dihomɔ tshɛ diahombama lo kamba dimɛna la Ɔtɛkɛta wa Nzambi. Tatetawɔke pondjo dia wɛkamu wambotokitsha lo woho watokokɛ ‘Nzambi ka esambelo tshɛ’ la ngandji kitakita. Tohɔ dia “ashu wa [Jehowa] weko le antu w’ololo, la atui andi weko hwe lu alelu awo.”—Osam. 34:15.
Onde wɛ kokaka kadimola?
• Ngande wakayaoke Davidi lam’akinde lo asui?
• Eshikikelo kakɔna kakɛnya nkumekanga Sɔlɔmɔna?
• Kakɔna kakoka tokimanyiya dia sho ndɔshana la ekakatanu wetawɔ Jehowa dia vɔ tokomɛ?
[Osato wa lo lɛkɛ 13]
Sɔlɔmɔna aki la eshikikelo ɔnɛ Jehowa ayokokɛ ekambi Ande wakadiɛnɛka la asui
[Osato wa lo lɛkɛ 15]
Davidi akakitsha wotsho ande le Jehowa lo dɔmbɛlɔ ndo akayosala akambo lo yoho yɔtɔnɛ la kɛnɛ kakandalɔmbɛ