Tokimanyiya wanɛ wele bu suke dia mbeka Bible etshatɔ
1. Onde onto tshɛ lasambishaso mbetawɔka dibuku Bible etshatɔ mbala kakɔ ɔtɔi? Lembetshiya.
1 Di’onto monga ɔtɛmɔdi wa Jehowa, nde pombaka mbeka kɛnɛ ketsha Bible. Koko, anto amɔtshi wekɔ lo ɛtɛmwɛlɔ wele bu w’Akristo ndo hawɔshi Bible oko Ɔtɛkɛta wa Nzambi. Anto akina bu la mbetawɔ le Nzambi ndo hawɔshi Bible la nɛmɔ. Dihomɔ diakɔna diakokaso nkamba ladiɔ dia nkimanyiya wanɛ wahetawɔ dibuku Bible etshatɔ mbala kakɔ ɔtɔi? Alako wele l’ɛse ango mbɔsama oma lo kɔmatɛrɛ y’apandjudi wele lo wedja oko 20 wotshikitanyi.
2. Naka onto ambototɛ dia nde bu la mbetawɔ le Nzambi, ahombaso nyanga dia mbeya, ndo lande na?
2 Wanɛ wele bu la mbetawɔ le Nzambi: Naka onto ɔmɔtshi ambota dia nde bu la mbetawɔ le Nzambi, kete ayoleka dimɛna sho nyanga dia mbeya lande na. Onde ekɔ nɛ dia nde ekɔ lo mbetawɔ wetshelo w’ohilwelo? Onde nde aya bu la mbetawɔ le Nzambi l’ɔtɛ w’akambo wa wɛngiya wa l’andja ɔnɛ kana woho wele ase ɛtɛmwɛlɔ la lɔkɛwɔ la dungi pende? Onde nde aki lo wodja wasekɛwɔ anto dia monga la mbetawɔ le Nzambi? Mbeyaka monga ko aha l’okonda mbahetawɔ onto ɔnɛ Nzambi ekɔ, koko ndooko lushi lakandɛnyi ohomba wa monga la mbetawɔ le nde. Etena kahomanawɔ l’onto la ngasɔ, dia mbokonya dia nde mbuta lande na kende bu la mbetawɔ le Nzambi, apandjudi efula mɛnaka ɔlɔlɔ mombola ɔnɛ: “Onde nshi tshɛ mbɔsayɛ akambo lo yoho shɔ?” Hokamɛnde ndo tohembolake ɔtɛkɛta. Naka tambeya lande na kende bu la mbetawɔ le Nzambi, kete tayeya yoho ya dimɛna yahombaso mbokadimola ndo ekanda akɔna wahombaso mbosha.—Tuk. 18:13.
3. Ngande wakokaso mɛnya dia sho nɛmiyaka ompokami ndo dietawɔ diande?
3 Etena kookadimolaso, tewɔ dia nkonya onto akɔ dia nde mfɔnya oko tɔlɔsha la kanyi yande. Opandjudi ɔmɔtshi wele l’États-Unis akasha dako nɛ: “Ekɔ ohomba efula nɛmiya lotshungɔ lele l’anto la nsɔna kɛnɛ kahombande mbetawɔ. Lo dihole dia nyanga dia paka sho mboyingi, ekɔ ohomba mboka ambola wakonya onto dia nkana yimba ndo dia mbɔsa yɛdikɔ mɔtshi.” L’ɔkɔngɔ wa mpokamɛ kanyi y’ompokami, mbala efula omendji ɔmɔtshi weteta tatɛka mbokadimola lo mombola ɔnɛ: “Onde wɛ atataka dia dui nɛ kokaka monga nganɛ?”
4. Ngande wakokaso nkimanyiya ase Buda?
4 Kanyi y’ɔnɛ Nzambi ekɔ, ekɔ dui di’oyoyo le ase Buda. Dia nsambisha weho w’anto asɔ, apandjudi amɔtshi wa l’Angleterre kambaka la biukubuku La paix et le bonheur durables : comment les trouver. L’ɔkɔngɔ wa vɔ nsɛdingola mbɔtwɛlɔ ka lɔkɔ, vɔ kɛtshanyaka etenyi kele l’ɔtɛ a dui ɔnɛ: “Existe-t-il vraiment un Créateur Très-Haut ?” ko oma laasɔ, etenyi kata ɔnɛ: “Un guide bénéfique pour tous les humains.” L’ɔkɔngɔ wa laasɔ, vɔ ndjotatɛka ntɛkɛta dikambo dia dibuku Bible etshatɔ ndo ndjotɛka ampokami awɔ ɔnɛ: “Oyadi wɛ bu la mbetawɔ le Nzambi, wɛ ayokondja wahɔ efula naka wɛ mbeka Bible nɛ dia tɔ kekɔ l’ɛlɔmbwɛlɔ k’oshika.” Ombatshi mboka ɔmɔtshi w’ose États-Unis wakamba la Chine akate ate: “Anto efula wa l’ɛtshi kaso ka nkɛtɛ ngɛnangɛnaka mbadia. Ndo mbala efula vɔ shidiyaka mbadia okanda w’otondo la ntondo ka sho ndjokalola dia towaembola. Koko, vɔ hawoleke nshihodia kɛnɛ kalembetshiya mbeka Bible. Diakɔ diele, dimi nangaka mbasha biukubuku Lokumu l’ɔlɔlɔ mbala ka ntondo kahomanami la wɔ nɛ dia yɔ yakafundama lo yoho yakeketsha anto dia ntetemala sawo.” Omendji w’otshimbedi ɔmɔtshi wa l’États-Unis wakamba l’otshimbedi watɛkɛtawɔ chinois akate dia bu dui dia wolo dia ntatɛ sawo l’ekimanyielo ka dibuku Bible etshatɔ mbala ka ntondo kahomanaso l’onto. Koko, ndeka dimɛna ntatɛ wekelo lo tshapita 2 yatɛkɛta dikambo dia Bible, lo dihole dia ntatɛ lo tshapita 1 yatɛkɛta dikambo dia Nzambi.
5. Lande na ekɔ ohomba monga la solo dia lotutsha?
5 Nɔmbamaka etena k’otale dia nkimanyiya onto ɔmɔtshi dia nde monga la mbetawɔ le Nzambi ndo ekɔ ohomba monga la solo dia lotutsha. Mbeyaka monga ko sawo diaso dia ntondo hotshutshuya dia nde mbetawɔ ɔnɛ Otungi ɔmɔtshi ekɔ. Koko ondo l’edjedja ka wonya, nde mbeyaka ndjetawɔ dia Otungi koka monga kana nde koka ndjoshihodia lande na kakoka onto mbetawɔ dui sɔ.
6. Lande na kahayasha anto amɔtshi lo Bible?
6 Wanɛ wahayasha kana wahayaɛkɛ lo Bible: Mbala efula onto letawɔ dia Nzambi mbeyaka monga, hayasha lo kɛnɛ ketsha Bible nɛ dia nde hetawɔ dia tɔ kekɔ Ɔtɛkɛta wa Nzambi. Mbeyaka monga ko nde mbidjasɛ lo wodja wele bu w’Akristo ndo ekɔ lo mbɔsa dia Bible kekɔ dibuku di’ase Lokristokristo. Kana mbeyaka monga ko nde mbidjasɛ lo wodja wayata anto dia wekɔ Akristo, koko vɔ ndjashaka paka l’oyango wa lomombo ndo nde mbeyaka mfɔnya dia Bible hatonga ohomba le nde. Ngande wakokaso nkimanyiya anto asɔ dia vɔ ndjasha lo Bible ndo mbetawɔ dia mbeka dibuku Bible etshatɔ?
7. Mbala efula, naa yoho ya dimɛna ya nomialomia nsaki k’onto oya lo Bible?
7 Bɛtɛlɛ ka la Grèce wakafunde ɔnɛ: “Yoho yoleki dimɛna ya nkimanyiya anto wahayasha lo Bible ele kifola ndo mbaɛnya awui wele lɔkɔ. Apandjudi efula wakashihodia dia losango la lo Bible lekɔ la shɛngiya y’efula le onto oleki kɛnɛ tshɛ kakokawɔ mbutɛ onto. (Hɛb. 4:12) Mɛna lokombo laki Nzambi lo Bible akakimanyiya anto efula dia vɔ monga la nsaki ka ndjasha lo Bible.” Bɛtɛlɛ ka la Inde kakafunde ɔnɛ: “Akambo wa mɛtɛ wendana la lɔsɛnɔ ndo la nyɔi, mbidja ndo daka dia lo Bible diendana l’andja wele anto hawoyokananɛ kɔlɔ kotolaka waa Hindu efula.” Lo ntɛkɛta di’ekakatanu wele l’ɛtshi kawɔ ka nkɛtɛ, mbala efula apandjudi mongaka la diaaso dia mbaɛnya kɛnɛ kata Bible kayoyosala Diolelo diaki Nzambi dia mbakandola.
8. Kakɔna kakokaso mbutɛ wanɛ wele la kanyi ya kɔlɔ lo dikambo dia Bible l’ɔtɛ wa Lokristokristo?
8 Naka onto ɔmɔtshi ekɔ la kanyi ya kɔlɔ lo dikambo dia Bible l’ɔtɛ wa Lokristokristo, towote dia Lokristokristo wakakambe la Bible ndo la kɛnɛ ketshatɔ lo yoho ya kɔlɔ. Bɛtɛlɛ ka la Inde kakafunde ɔnɛ: “Lo tena dimɔtshi, ekɔ ohomba sho nkimanyiya anto dia vɔ mbeya ɔnɛ aha ɛtɛmwɛlɔ mbakanga Bible.” Vɔ wakafunde dia mbala efula ase Hindu minandemaka l’awui wele l’etenyi 4 ka biukubuku Quel est le but de la vie ? Comment le découvrir ? nɛ dia yɔ nembetshiyaka woho wakengesola ndo wakafukutanya ase ɛtɛmwɛlɔ wetshelo wa l’Ɔtɛkɛta wa Nzambi. Ombatshi mboka ɔmɔtshi wa la Brésil mbutɛka ampokami ande ɔnɛ: “Shi ekɔ ohomba nyanga dia mbeya akambo efula wele lo Bible? Anto efula salaka dui sɔ la kanyi ya dimɛna, koko aha l’oyanga wa mbɔtɔ l’ɔtɛmwɛlɔ ɔmɔtshi. Nyu koka mambiyama lo kɛnɛ kayonyeka.”
9. Lande na kahatahombe mpekɔ naka onto ɔmɔtshi hetawe kɛnɛ ketsha Bible mbala ka ntondo kosawodiso la nde?
9 Jehowa mɛnaka kɛnɛ kele l’otema w’onto tshɛ. (1 Sam. 16:7; Tuk. 21:2) Nde kotolaka wanɛ wele l’etema w’ɛlɔlɔ oya l’ɔtɛmwɛlɔ wa mɛtɛ. (Jni. 6:44) Efula k’anto asɔ wateekaka ndooko dikambo diendana la Nzambi kana wekɔ paka l’ewo ka tshitshɛ keto k’awui wa lo Bible. Olimu aso w’esambishelo mbashaka diɛsɛ dia vɔ “shimbamɛ ndo nkondja ewo k’oshika k’akambo wa mɛtɛ.” (1 Tim. 2:4) Ɔnkɔnɛ, naka tambosambisha onto mbala ka ntondo ko nde hetawɔ kɛnɛ ketsha Bible, tatohekɔke. Tokambe l’ehomɔ kɛmɔtshi kele l’ɔtɛkɛta aso dia nomialomia nsaki kande. Yema yema, sho mbeyaka ndjotatɛ mbeka l’ompokami aso lo ehomɔ kaleka nkamba la so dia mbeka l’anto Bible: dibuku Bible etshatɔ mɛtɛ?
[Kiombo ya lo lɛkɛ 4]
Naka ompokami ambota ate nde bu la mbetawɔ le Nzambi, hemba nsala nganɛ:
• Dia mbeya lande na, mbolande ɔnɛ: “Onde nshi tshɛ mbɔsayɛ akambo lo yoho shɔ?”
• Naka nde ekɔ ose Buda, wɛ koka nkamba la biukubuku La paix et le bonheur durables : comment les trouver, lɛkɛ 9-12.
• Naka nde ekɔ la mbetawɔ lo wetshelo w’ohilwelo, kete dihomɔ nɛ mbeyaka mbokimanyiya:
Reveillez-vous !, lo asawo wele l’ɔtɛ a dui ɔnɛ: “Hasard ou conception ?”
Vidɛo yele l’ɔtɛ a dui ɔnɛ: Les merveilles de la création révèlent la gloire de Dieu
Tobukubuku Une vie pleinement satisfaisante : comment ? wekelo 4; La vie a-t-elle été créée ?; ndo Cinq questions à se poser sur l’origine de la vie
• Naka nde aya bu la mbetawɔ le Nzambi l’ɔtɛ w’akambo wa wɛngiya ndo asui, kete dihomɔ nɛ mbeyaka mbokimanyiya:
Dibuku Y a-t-il un Créateur qui se soucie de vous ?, tshapita 10
Tobukubuku: Onde na Nzambi tokaneka mete ondo?, ndo Quel est le but de la vie ?, wekelo 6
• Kam’atatɛ ompokami mbuta ɔnɛ ondo Nzambi ekɔ, ko sho ntshɔ la nde mbala kakɔ ɔtɔi lo dibuku Bible etshatɔ. Ayoleka dimɛna sho ntatɛ la nde lo tshapita 2 kana lo sawo dikina diendana la nde.
[Kiombo ya lo lɛkɛ 5]
Hemba nsala nganɛ naka ompokami hetawɔ Bible:
• Nyɔsɛdingole tshapita 17 ndo 18 ya dibuku La vie : comment est-elle apparue ? Évolution ou création ?
• Le ase Hindu, wɛ koka nkamba la biukubuku Pourquoi adorer Dieu en amour et en vérité?
• Le ase Juda, wɛ koka nkamba la biukubuku Connaîtrons-nous un jour un monde sans guerre ?, lɛkɛ 3-11.
• Ɛnyande wahɔ waya oma lo nkitanyiya atɔndɔ wa lo Bible. Ekanda ɛnɛ mbakokayɛ nkamba la wɔ dia mɛnya ompokami ayɛ ohomba wa Bible:
Reveillez-vous !, lo asawo wele l’ɔtɛ a dui ɔnɛ: “De l’aide pour les familles”
Vidɛo yele l’ɔtɛ a dui ɔnɛ La Bible : une force dans votre vie
Tobukubuku: Lokumu l’ɔlɔlɔ l’oma le Nzambi!, wekelo 9 ndo 11; Un livre pour tous, lɛkɛ 22-26; ndo Une vie pleinement satisfaisante : comment ?, etenyi 2
Le ase Buda, wɛ koka nkamba la biukubuku La voie qui mène à la paix et au bonheur, lɛkɛ 3-7.
Le ase Mizilima, wɛ koka nkamba la biukubuku La vraie foi : le chemin qui mène au bonheur, etenyi 3.
Naka wɛ ekɔ lo tasambisha lo ɛtshi ka nkɛtɛ kele anto hawetawɔ Bible, kete honga dimɛna wɛ mbatɛ oma lɛnɛ otumbi awui waasamishayɛ edja ndo lam’ayoyosala wembwelo efula.
• Lembetshiyawɔ woho wakakotshama alaka amɔtshi wa lo Bible. Wɛ koka nkamba la ekanda ɛnɛ:
Vidɛo yele l’ɔtɛ a dui ɔnɛ La Bible. Un récit historique exact, des prophéties dignes de foi
Biukubuku Un livre pour tous, lɛkɛ 27-29
• Kam’atatɛ onto kombola kɛnɛ ketsha Bible l’awui amɔtshi, ko wɛ ntshɔ la nde mbala kakɔ ɔtɔi lo dibuku Bible etshatɔ.
[Kiombo ya lo lɛkɛ 6]
Naka ompokami ambota ate: “Dimi bu la mbetawɔ le Nzambi,” wɛ koka mbotɛ ɔnɛ:
• “Onde dimi koka kolembetshiya lo tshena pe kɛnɛ kakakonya dia dimi monga la mbetawɔ le Otungi?” Oma laasɔ, ko wɛ mbotɛ akambo wele lo dibuku Comment raisonner, lɛkɛ 72-74 kana mbokana la nde dia wɛ ndjowela okanda ɔmɔtshi watoyɔngɛnangɛnaka mbadia.
• “Ko naka Nzambi ekɔ, woho akɔna wotoyokombola dia nde monga?” Ampokami efula kadimolaka ɔnɛ vɔ kombolaka dia nde monga Nzambi ka ngandji, kele la losembwe, kokana kɛtshi ndo kele bu la shɔnɔdi. Ɛnyande oma lo Bible dia Nzambi ekɔ la waonga asɔ. (Wɛ koka nkamba la tshapita 1 ya dibuku Bible etshatɔ, ntatɛ lo odingɔ 6.)
Naka ompokami ambokotɛ ate: “Dimi haletawɔ Bible,” wɛ koka mbotɛ ɔnɛ:
• “Kanyi shɔ mbele l’anto efula. Amɔtshi fɔnyaka dia Bible hatɛkɛta awui wa siansɛ kana ɔnɛ atɔndɔ wa lo Bible bu ohomba. Ohombutɛ, onde wɛ atadiaka Bible ndooko lushi? [Tshikande akadimole. Oma laasɔ ko wɛ mbɛnya mbɔtwɛlɔ kele lo lɛkɛ 3 la biukubuku Un livre pour tous, ndo mbosha yɔ.] Anto efula hawoyɔsa Bible la nɛmɔ nɛ di’ase ɛtɛmwɛlɔ kambaka la kɛnɛ ketshatɔ lo yoho ya kɔlɔ. Mbala kekina, layolanga dia sho ndjɔkɛtshanya awui wele lo ɛnyɛlɔ kele lo lɛkɛ 4 ndo 5.”
• “Anto efula wekɔ la kanyi yayɛ. Onde dimi koka kɛnya dikambo dimɔtshi diakamambiya diendana la Bible? [Adia Jobo 26:7 kana Isaya 40:22, avɛsa wɛnya dia Bible mbutaka mɛtɛ l’awui wa siansɛ.] Bible kekɔ nto la ɛtɛkɛta wa lomba wakoka nkimanyiya nkumbo. Mbala kekina, layoyokɛnya ɛnyɛlɔ kashikikɛ dui sɔ.”
• “Losaka efula dia mbutɛmi ngasɔ. Oko le yɛ naka Nzambi fundɛ anto dibuku dimɔtshi, awui wa ngande wakoka monga lɔkɔ?” Oma laasɔ, wɛ koka mbotɛ dui dimɔtshi di’oma lo Bible diakoka mbɔngɛnyangɛnya.