Biukubuku y’oyoyo yayotosha anto!
1. Ayotosha anto lo Ngɔndɔ ka dikumi l’ɔtɔi ndo naa oyango wele la biukubuku shɔ?
1 Lo Losanganya la distrikɛ la lo 2009 laki l’ɔtɛ a dui ɔnɛ: “Nyotetemale sungukala!,” biukubuku y’oyoyo yele l’ɔtɛ a dui ɔnɛ: Losango lakɔna lele lo Bible? (lo Falase) yakatondjama. Lo Ngɔndɔ ka dikumi l’ɔtɔi, tshumanelo dia l’andja w’otondo diayosha anto biukubuku shɔ mbala ka ntondo. Ngande wakoka anto wa lo ɛtshi kaso ka nkɛtɛ nkondja wahɔ oma lo biukubuku shɔ? Anto efula, djekoleko wanɛ wele lo ɛtɛmwɛlɔ wele bu w’Akristo haweye awui efula lo kɛnɛ kendana la Bible. Ɔnkɔnɛ,lɛkɛ 3 la biukubuku shɔ mɛnyaka dia yɔ yakalɔngɔswama dia mbisha anto “kanyi ya lo tshena pe ya kɛnɛ kele lo Bible.”
2. Ngande wakokaso ndɛkɛ anto biukubuku shɔ?
2 Woho wa ndjilɛkɛ anto: Sho kokaka mbuta ɔnɛ: “Sho nangaka mbeya kanyi yayɛ lo kɛnɛ kata divɛsa nɛ. [Adia 2 Timote 3:16.] Anto efula wasawola la so mbetawɔka ɛtɛkɛta ɛsɔ; akina mbɔsaka dia Bible ekɔ tsho dibuku dimɔtshi dia dimɛna. Ko wɛ ngande wɔsayɛ Bible? [Tshikande akadimole.] Oyadi dietawɔ diakɔna diakoka monga la ɔtɛmwɛlɔ aso, tekɔ la ɛkɔkɔ w’eshika wa nsɛdingola Bible dikambo dia wahɔ aso. [Adia odingɔ wa mbɔtwɛlɔ wele lo lɛkɛ 3.] Lo mbadia woho wɛnyami losango la lo Bible lo tshena pe lo biukubuku nyɛ, wɛ ayamba dia mɛna ɔnɛ: Bible k’otondo kekɔ l’ɔtɛ a dui wâmɛ ndo la losango lâmɛ.”
3. Naa mbɔtwɛlɔ kekina kakokaso nkamba la tɔ, djekoleko lo ɛtshi ka nkɛtɛ kele anto efula wekɔ lo ɛtɛmwɛlɔ wele bu w’Akristo?
3 Yoho kina ya ndɛkɛ anto biukubuku shɔ, djekoleko etena kasambishaso l’ahole wele anto efula wekɔ lo ɛtɛmwɛlɔ wele bu w’Akristo yɔ nyɛ: “Sho nangaka mbeya kanyi yayɛ lo kɛnɛ kotami lo divɛsa nɛ (kana lo dibuku di’ekila nɛ). [Adia Osambu 37:11.] Oko le yɛ, ngande wayoyala nkɛtɛ etena kayokotshama prɔfɛsiya kɛnɛ? [Tshikande akadimole.] Ɔnɛ ekɔ divɛsa dimɔtshi diɛnya elongamelo ndo ekeketshelo kakoka Bible mbisha weho w’anto tshɛ ndo wele la mbetawɔ yotshikitanyi.” Adia odingɔ wa mbɔtwɛlɔ wa lo lɛkɛ 3 ndo shande biukubuku.
4. Ngande wakokaso nkamba la biukubuku nyɛ dia ntatɛ mbeka l’onto Bible?
4 Totate wekelo wa Bible: Etena kakalolaso tenda onto lakasawola la so, sho kokaka mbôhola kɛnɛ kakatasawola la nde ndo nsɛdingola odingɔ ɔtɔi kana ehende wendana la kɛnɛ kakatakɛtshanya lo nkamba la ambola wele l’ekomelo k’etenyi kakatasɔnyi dia nkɛtshanya. Kana naka sho nangaka mbɔtshiya dibuku Bible etshatɔ mbala kakɔ ɔtɔi, sho kokaka mbâdiɛ ɛtɛkɛta wele lo lohoso la l’ɔkɔngɔ la biukubuku, mbosha dibuku Bible etshatɔ, mombola dia nde mbuta ɔtɛ wa tshapita yɔngɛnyangɛnya, oma lâsɔ ko sho nsɛdingola kâmɛ la nde odingɔ ɔtɔi kana ehende wa tshapita yakɔ. Nyɛsɔ toyasha sho tshɛ dia ndɛkɛ anto biukubuku nyɛ lo Ngɔndɔ ka dikumi l’ɔtɔi!