TSHAPITA 30
“Nyotetemale nkɛndakɛnda lo ngandji”
1-3. Kakɔna kakondjaso etena kokaso anto akina ngandji oko Jehowa?
“ƆNGƐNƆNGƐNƆ waya lo mbisha ndeka wa nongola.” (Etsha 20:35) Ɛtɛkɛta wa Yeso ɛsɔ shikikɛka dikambo dia mɛtɛ di’ohomba nɛ: Ngandji kahayange wahɔ ekɔ tshondo ya difuto. Mɛtɛ ekɔ ɔngɛnɔngɛnɔ efula dia mbokama ngandji, koko mboka kana mɛnya ngandji otsha le anto akina ndeka mbisha ɔngɛnɔngɛnɔ.
2 Ndooko onto loleki Shɛso lele l’olongo mbeya dikambo sɔ. Oko wambotodiɛna l’etenyi kɛnɛ k’otondo, Jehowa mbele ɛnyɛlɔ koleki tshɛ ka ngandji. Ndooko onto lambɛnya ngandji lo toho efula ta weke ndo ndooko onto lambookana ngandji edja efula oko nde. Diɔ diakɔ diakoka Jehowa mbelamɛ ɔnɛ: “Nzambi k’ɔngɛnɔngɛnɔ.”—1 Timɔte 1:11.
3 Nzambi kaso ka ngandji nangaka dia sho mbookoya djekoleko lo kɛnɛ kendana la mboka ngandji. Ɛfɛsɔ 5:1, 2 totɛka ɔnɛ: “Nyokoyake Nzambi, oko wenyu anande wa ngandji. Nyotetemale nkɛndakɛnda lo ngandji.” Etena kokaso ngandji oko Jehowa, sho mbokaka ɔngɛnɔngɛnɔ w’efula waya oma lo mbisha. Sho mongaka nto l’ɔlɔ wa mbeya dia tekɔ lo ngɛnyangɛnya Jehowa, nɛ dia nde tɔlɔmbaka l’Ɔtɛkɛta ande dia “mbokana ngandji.” (Rɔmɔ 13:8) Koko tekɔ l’ɛkɔkɔ ekina watotshutshuya dia “nkɛndakɛndaka lo ngandji.”
Ɔkɔkɔ wele ngandji ohomba
Ngandji totshutshuyaka dia mbɛkɛ otema le anangɛso
4, 5. Lande na kele ekɔ ohomba sho mɛnya ngandji ka ndjahondja otsha le asekaso ambetawudi?
4 Lande na kele ekɔ ohomba dia sho mboka asekaso ambetawudi ngandji? Lo tshena pe, nɛ dia ngandji ekɔ dui dioleki ohomba lo Lokristo la mɛtɛ. Naka ngandji bu, kete hatokoke monga kaamɛ l’asekaso Akristo ndo kɛnɛ koleki ele tayonga anyanya lo washo wa Jehowa. Tende woho washikikɛ Ɔtɛkɛta wa Nzambi akambo wa mɛtɛ ahende asɔ.
5 L’otsho w’ekomelo wa lɔsɛnɔ la nde la lanɛ la nkɛtɛ, Yeso akatɛ ambeki ande ate: “Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu oko wakamanyoke ngandji. Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Joani 13:34, 35) “Oko wakamanyoki ngandji,” mbuta ate wambotodjangɛ dia kɛnɛmɔla woho wa ngandji kakɛnya Yeso. Tshapita 29 yakɛnya dia Yeso akasha ɛnyɛlɔ koleki tshɛ ka ngandji ka ndjahondja lo mbetsha ehomba ndo eyango w’anto akina la ntondo ka wande. Woho wa ngandji ka ngasɔ mbahombaso sho la wɔ monga la tɔ, ndo sho pombaka kiɛnya lo yoho y’efula yakoka mɛnama kaanga le anto wele bu l’etshumanelo k’Akristo. Lo mɛtɛ, ngandji k’onto l’ɔnango ka ndjahondja mbele djembetelo ya shikaa yeyama ambeki wa Kristo wa mɛtɛ.
6, 7. a) Ngande weyaso di’Ɔtɛkɛta wa Jehowa mbɔsaka tshelo ya mboka ngandji la nɛmɔ di’efula? b) L’ɛtɛkɛta ande wele lo 1 Kɔrɛtɔ 13:4-8, Pɔɔlɔ akake epole ɔsɛkɛ lo yoho yakɔna ya ngandji?
6 Ko kayotota naka hatokana ngandji? Ɔpɔstɔlɔ Pɔɔlɔ akate ate: ‘Naka dimi bu la ngandji, kete lekɔ oko elondja katetshiya kana oko dinyandja diasakanyawɔ nga nga.’ (1 Kɔrɛtɔ 13:1) Dinyandja diasakanyawɔ tondjaka londjo la mamba. Ko kayotota dia londjo l’elondja katetshiya? Ɔsɔ mɛtɛ ekɔ bɛnyɛlɔ di’amɛna efula! Onto lele bu la ngandji ekɔ oko ehomɔ ka mishiki kele londjo latɔ l’efula ndawoyaka anto lo dihole dia mbakotola. Ngande wakoka onto la ngasɔ monga la diɔtɔnganelo dia dimɛna l’anto akina? Pɔɔlɔ akate nto ate: “Ndo dimi kongaka la mbetawɔ tshɛ kakoka nsɛkɔla akona, ko dimi bu la ngandji, kete dimi lekɔ anyanya.” (1 Kɔrɛtɔ 13:2) Ohokanyiya yema! Oyadi akambo tshɛ wakokaso nsala naka sho bu la ngandji, kete tekɔ “anyanya.” Shi mɛnamaka hwe dia Ɔtɛkɛta wa Jehowa mbɔsaka tshelo ya mboka ngandji la nɛmɔ efula?
7 Ko ngande wakokaso kɛnɛmɔla dionga sɔ lo diɔtɔnganelo diasaso l’anto akina? Dia nkadimola lo dimbola sɔ, tɔsɛdingole ɛtɛkɛta wa Pɔɔlɔ wele lo 1 Kɔrɛtɔ 13:4-8. Lo avɛsa anɛ, Pɔɔlɔ hake epole ɔsɛkɛ lo ngandji katoka Nzambi kana kawokaso, koko lo ngandji kahombaso mbokana lam’asaso. Nde akakɔndɔla akambo amɔtshi wɛnya kɛnɛ kele ngandji la kɛnɛ kele ngandji bu.
Kɛnɛ kelɛwɔ ngandji
8. Ngande wakoka solo dia lotusha tokimanyiya dia nsɛna dimɛna l’anto akina?
8 “Ngandji ekɔ la solo dia lotutsha.” Monga la ngandji nembetshiyaka mbikikɛ wandja w’anto akina. (Kɔlɔsayi 3:13) Onde tekɔ l’ohomba wa solo dia lotutsha dia ngasɔ lo diɔtɔnganelo diaso di’Akristo? Sho pombaka mbeya dia oko weso bu kokele sho koka nongamɛ dia nyangiyana tena la tena lam’asaso etena kakambaso kaamɛ. Koko solo dia lotutsha kana memakana tokimanyiyaka dia mbikikɛ towuiwui ta totshitshɛ tɔsɔ aha la futanya wɔladi wa l’etshumanelo.
9. Lo toho takɔna takokaso mɛnya ɔlɔlɔ otsha le anto akina?
9 “Ngandji ekɔ . . . ɔlɔlɔ.” Ɔlɔlɔ mɛnamaka oma l’etsha ndo l’ɛtɛkɛta. Ngandji totshutshuyaka dia nyanga toho ta nsala ɔlɔlɔ, djekoleko le wanɛ wele lo dihombo di’efula. Ɛnyɛlɔ, osekaso Okristo laya osombe ndo layaoka oko etshike mbeyaka monga l’ohomba wa wembwelo w’ekeketshelo. Kadiyɛso kɛmɔtshi kodia ana ndamɛ, kana lele omɛnde bu ombetawudi mbeyaka monga l’ohomba w’ekimanyielo. Ɔnɛ lele la hemɔ kana l’ekakatanu mbeyaka monga l’ohomba wa mboka ɛtɛkɛta w’amɛna w’ɔngɛnyi wa kɔlamelo. (Tokedi 12:25; 17:17) Kashimola onto la totshelo t’ɛlɔlɔ ta ngasɔ mɛnyaka dia ngandji kaso ndja oma k’ɛse otema.—2 Kɔrɛtɔ 8:8.
10. Ngande watotshutshuya ngandji dia nsukɛ ndo mbuta mɛtɛ kaanga l’etena kele bu wɔdu nsala dikambo sɔ?
10 “Ngandji . . . ngɛnangɛnaka lo mɛtɛ.” Ekadimwelo kekina ka Bible mbutaka ɔnɛ: “Ngandji atetaka lo wedi wa mɛtɛ ndo atɔngɛnangɛnaka etena kadjatɔ otshumba.” Ngandji totshutshuyaka dia mamɛ mɛtɛ ndo dia ‘mbutanɛka mɛtɛ lam’asaso.’ (Zɛkariya 8:16) Ɛnyɛlɔ, naka onto ɔmɔtshi lokaso ngandji ambosala pɛkato ka woke, ngandji kokaso Jehowa ndo onto losadi kɔlɔ kayotokimanyiya dia sukɛ atɔndɔ wa Nzambi lo dihole dia nyanga dia mbishɛ pɛkato kakɔ, mona tɛkɛ nɛndɛ kana mbuta kashi. Eelo, mbuta mɛtɛ mbeyaka monga dikambo dia wolo efula. Koko di’ɔlɔlɔ w’onto lokaso ngandji, sho la dia nyanga dia nde nongola ndo mbetawɔ engwelo ka la ngandji k’oma le Nzambi. (Tokedi 3:11, 12) Ngandji k’Okristo totshutshuyaka dia “monga la losembwe lo akambo tshɛ.”—Hɛbɛru 13:18.
11. Lam’ele ngandji “kukumɛka akambo tshɛ,” ahombaso nsala lo kɛnɛ kendana la munga y’asekaso ambetawudi?
11 “Ngandji . . . kukumɛka akambo tshɛ.” Etelo kɛsɔ nembetshiyaka “mbikikɛka akambo cɛɛ.” (Dyookaneelo dy’Oyooyo) 1 Petero 4:8 mbutaka ɔnɛ: “Ngandji kombaka lokema la pɛkato.” Eelo, Okristo walɔmbɔma la ngandji hone dia mbishola oseka kiambokambo tshɛ ya kɔlɔ kana munga yaki anango. Mbala efula munga y’asekaso ambetawudi hayotongaka weke, diakɔ diele ngandji mbeyaka nkomba kɔlɔ yakɔ.—Tokedi 10:12; 17:9.
12. Ngande wakɛnya ɔpɔstɔlɔ Pɔɔlɔ dia nde akalongamɛka dia Filɛmɔna ayosala kɛnɛ koleki dimɛna ndo wetshelo akɔna wakokaso nkondja oma l’ɛnyɛlɔ ka Pɔɔlɔ?
12 “Ngandji . . . mbetawɔka akambo tshɛ.” Lo ndjela ekadimwelo ka Bible kelɛwɔ Parole vivante, “ngandji kɛdikɛdi mbɛkɛ otema le onto okina ndo nongamɛ kɛnɛ koleki dimɛna oma le nde.” Hatohombe kanɛ anangɛso kɔlɔ tshanana kana mvɔ tshɔdia l’oseka kanyi tshɛ yele lawɔ. Ngandji tokimanyiyaka dia ‘mbaɛkɛ otema ndo nongamɛ kɛnɛ koleki dimɛna oma’ le anangɛso.a Tende ɛnyɛlɔ ka Pɔɔlɔ. Lo mukanda wakandafundɛ Filɛmɔna, nde akookeketsha dia nongola Ɔnɛsimo la ngandji tshɛ nɛ dia kaanga mbakinde ose fumbe lakalawɔ, nde akatokoma Okristo ko akakalola. Lo dihole dia tshutshuya Filɛmɔna la wolo, Pɔɔlɔ akɔɔlɔmbɛ oma lo ngandji. Nde aki l’eshikikelo dia Filɛmɔna ayosala dikambo sɔ lo mbuta ate: “Lekɔ l’eshikikelo dia wɛ ayokitanyiya. Ɔnkɔnɛ lekɔ lo kofundɛ leya dia wɛ ayosala oleki ndo kɛnɛ kotshimi.” (Divɛsa 21) Etena katokonya ngandji dia mbɛkɛ otema lo yoho ya ngasɔ l’anangɛso, vɔ tshutshuyamaka dia nsala kɛnɛ koleki dimɛna.
13. Ngande wakokaso mɛnya dia sho nongamɛka kɛnɛ koleki dimɛna le anangɛso?
13 “Ngandji . . . nongamɛka akambo tshɛ.” Ngandji ekɔ la wɛkamu ndo l’elongamelo. Ngandji totshutshuyaka dia nongamɛ kɛnɛ koleki dimɛna oma le anangɛso. Ɛnyɛlɔ, naka ɔnangɛso ɔmɔtshi “ambotatɛ ntakɔ mboka aha la nde mbeya,” sho nongamɛka dia nde ayetawɔ welo wadjama la ngandji dia mbongola. (Ngalatiya 6:1) Sho nongamɛka nto dia wanɛ wambɔla lo nyuma wayɔhɛtahɛta nto. Tekɔ la solo dia lotutsha otsha le anto asɔ ndo sho salaka kɛnɛ kakokaso nsala dia mbaakeketsha. (Rɔmɔ 15:1; 1 Tɛsalɔnika 5:14) Ndo oyadi kaanga onto ɔmɔtshi lokaso ngandji ambotakɔ mboka, sho hatoshisha elongamelo dia lushi lɔmɔtshi nde ayokana yimba, ndo ayoyanga Jehowa nto, oko wakasale ɔna la lotshito la lo wɛɛla wa Yeso.—Luka 15:17, 18.
14. Ngande wakoka ekikelo kaso pembama l’etei k’etshumanelo, ndo ngande wayotokimanyiya ngandji lo tena dia ngasɔ?
14 “Ngandji . . . mbikikɛka akambo tshɛ.” Ekikelo tokimanyiyaka dia ntshikala nge la ntondo k’awui wa lonyangu kana k’ekakatanu. Aha paka oma l’andja w’etshumanelo mbaya awui asɔ. Mbala mɔtshi ohemba mbeyaka ntomba l’etei k’etshumanelo. Anangɛso mbeyaka mbala mɔtshi tonyangiya l’ɔtɛ wewɔ bu kokele. Ɛtɛkɛta wa wotata mbeyaka tonyangiya. (Tokedi 12:18) Ondo dikambo dimɔtshi dia l’etshumanelo hadiosalemi woho wakanyiyaso. Lɔkɛwɔ l’Okristo walɛmiyama mbeyaka tosha nkɛlɛ nɛ dia oko leso Okristo hahombe monga la lɔ. Etena kahomanaso l’akambo wa ngasɔ, onde tayomɔ oma l’etshumanelo ko ntshika dia kambɛ Jehowa? Hatotosala dikambo sɔ naka tekɔ la ngandji! Ngandji toshimbaka diaha munga kana kɔlɔ k’ɔnangɛsɔ ɔmɔtshi todiha washo polo ndo lo hatoyɛna kaanga yema y’ɔlɔlɔ le nde kana l’etshumanelo k’otondo. Ngandji tokimanyiyaka dia ntshikala la kɔlamelo otsha le Nzambi ndo dia mamana l’etshumanelo, oyadi kakɔna kata kana kasala onto okina lele bu kokele.—Osambo 119:165.
Kɛnɛ kele ngandji bu
15. Kandjema ka kɔlɔ kɛdikɛdi na, ndo ngande watokimanyiya ngandji dia mbewɔ nsaki kalanya kɛsɔ?
15 “Ngandji bu la kandjema.” Kandjema ka kɔlɔ mbeyaka tokonya lo nkombola kɛnɛ kele l’anto akina, ɛnyɛlɔ diangɔ diele lawɔ, ɛkɛndɛ kana akoka awɔ. Naka hatokinyisha, kete nsaki ka lokaki ndo ka kɔlɔ kɛsɔ mbeyaka mfukutanya wɔladi wa l’etshumanelo. Kakɔna kayotokimanyiya dia mbewɔ nsaki ka ɔkɔmiya kɛsɔ? (Jakɔba 4:5) Ngandji. Woho wa ngandji kɛsɔ totshutshuyaka dia ngɛnangɛna la wanɛ wɛnama oko wekɔ la wahɔ ɛmɔtshi weso bu la wɔ. (Rɔmɔ 12:15) Ngandji ka ngasɔ tokimanyiyaka nto diaha monga la kandjema etena kaandolawɔ onto ɔmɔtshi l’ɔtɛ wa dikoka dimɔtshi dia laande diele la nde kana wa dikambo dimɔtshi dia woke diambondosala.
16. Naka sho nangaka mɛtɛ anangɛso, lande na kahombaso mbewɔ dia ndjafunaka l’ɔtɛ wa kɛnɛ kasalaso l’olimu wa Jehowa?
16 “Ngandji . . . hayasɛmɛ, hayadiya.” Ngandji toshimbaka diaha mfuna akoka aso kana kɛnɛ kasalaso. Naka sho mɛtɛ nangaka anangɛso, onde tayotetemala la mbafunɛ kɛnɛ kasalaso l’esambishelo kana waɛsɛ wele laso l’etshumanelo? Ofunu wa ngasɔ mbeyaka kɔmɔla anto akina ndo mbakonya lo ndjaoka oko wekɔ l’ɛse. Ngandji toshimbaka diaha sho mfuna l’ɔtɛ wa kɛnɛ katokimanyiya Nzambi dia sho nsala l’olimu ande. (1 Kɔrɛtɔ 3:5-9) Ndo nto, ngandji “hayadiya” kana lo ndjela Dyookaneelo dy’Oyooyo, ngandji “keema la lotamanya.” Ngandji toshimbaka dia ndjaɔsa oko sho mboleki.—Rɔmɔ 12:3.
17. Ngandji totshutshuyaka dia monga la dionga dia ngande otsha le anto akina, ndo dionga dia ngande diahombaso mbewɔ?
17 “Ngandji . . . hasale akambo lo yoho ya fumbɔ nsɔnyi.” Onto lasala akambo wa fumbɔ sɔnyi salaka totshelo tele oko djele kana tanyangiya anto akina. Onto la ngasɔ bu la ngandji nɛ dia nde hadje yimba lo nsaki ndo l’ɔngɛnɔngɛnɔ w’anto akina. Koko ngandji kɛnɛmɔlaka lɔsɛngɔ latshutshuya dia nɛnya anto akina. Ngandji totshutshuyaka dia monga la loshilambo, la lɔkɛwɔ langɛnyangɛnya Nzambi ndo lɛnya dilɛmiɛlɔ otsha le asekaso ambetawudi. Ngandji toshimbaka diaha monga la “lɔkɛwɔ la nsɔnyi,” mbuta ate dionga tshɛ diakoka nyangiya kana momadia asekaso.—Ɛfɛsɔ 5:3, 4.
18. Lande na kele onto lele la ngandji hayange dia paka akambo tshɛ salema woho walangande?
18 “Ngandji . . . hayange wahɔ ande hita.” Ekadimwelo kekina ka Bible mbutaka lanɛ ɔnɛ: “Ngandji hatshininala paka lo kanyi yande.” Onto lele la ngandji hayange dia paka akambo tshɛ salema woho walangande watekana oko tokanyi tande mongaka nshi tshɛ amɛna ato. Nde hakambe l’anto akina lo mayɛlɛ oma lo diewo diande dia mbetawoya dia kɔsha wanɛ wele la tokanyi totshikitanyi la nde. Dionga dia ngasɔ mɛnyaka yema y’otako, ndo Bible tewolaka ɔnɛ: “Otako katetaka la ntondo ka elanyelo.” (Tokedi 16:18) Naka sho mɛtɛ mbokaka anangɛso ngandji, kete tayɔsa tokanyi tawɔ la nɛmɔ, ndo tayonga suke dia mbetawɔ tokanyi tawɔ naka kokaka. Onto lele la mbekelo ka mbetawɔ tokanyi t’anto akina mbɔtɔnɛka l’ɛtɛkɛta waki Pɔɔlɔ wata ɔnɛ: “Onto l’onto atetemale nyanga wahɔ w’onto okina, koko aha wahɔ ande hita.”—1 Kɔrɛtɔ 10:24.
19. Ngande watokimanyiya ngandji dia nsala akambo dimɛna etena katosalɛwɔ kɔlɔ?
19 “Ngandji . . . hoke nkɛlɛ esadi . . . , hadia akambo wa kɔlɔ wosalɛwɔ” Onto lele la ngandji homala esadi eto l’ɔtɛ wa kɛnɛ kata kana kasala anto akina. Mɛtɛ, onto kokaka momala etena kosolawɔ. Koko oyadi kaanga tekɔ l’ɔkɔkɔ w’oshika wa momala, ngandji toshimbaka diaha ntshikala la nkɛlɛ. (Ɛfɛsɔ 4:26, 27) Hatohombe mbadia lofulo l’ɛtɛkɛta kana la etsha wakatonyangiya oko wanɛ wafunda lo dibuku dimɔtshi diaha vɔ mbohɛ. Koko ngandji totshutshuyaka dia mbokoya Nzambi kaso ka ngandji. Oko wakatadiɛnyi lo tshapita 26, Jehowa dimanyiyaka naka kokaka. Etena kadimanyiyande, nde mbohɛka, mbuta ate, nde hatotosha dilanya nto pondjo l’ɔtɛ wa pɛkato yakandatodimanyiya. Onde hatohombe mɛtɛ monga l’ɔngɛnɔngɛnɔ lo woho wele Nzambi kaso ka ngandji mbohɛka kɔlɔ y’osalɛso?
20. Kakɔna kahombaso nsala naka osekaso ombetawudi odiɛnɛ l’ɔtɛ wa pɛkato kakandasale?
20 “Ngandji . . . hangɛnangɛna lo akambo wa kɔlɔ.” Dikadimwelo dikina dia Bible mbutaka ɔnɛ: “Ngandji . . . hangɛnangɛna pɛkato y’anto akina.” Kana ɔnɛ: “Ngandji hoke ɔlɔ pondjo etena kahomɔ anto akina lokolo l’ɛngɛnɔ.” Lam’ele ngandji hangɛnangɛna akambo wa kɔlɔ, sho hatodihe washo l’oseka woho wa dikambo dia mindo tshɛ. Lo wedi okina, naka osekaso ombetawudi ekɔ lo diɛnɛ l’ɔtɛ w’etombelo wa kɔlɔ woma lo pɛkato kakandasale, ngandji ayotoshimba diaha ngɛnangɛna lo mbuta ɔnɛ: ‘Elo, nde ambona kɛnɛ kakandonɛ!’ (Tokedi 17:5) Koko sho ngɛnangɛnaka naka onto lakasale pɛkato ambokalola lo mboka kahombande kɔlɔngana lo nyuma.
“Mboka koleki dimɛna ”
21-23. a) Kakɔna kakalange Pɔɔlɔ mbuta etena kakandate dia “Ngandji hakomɛ pondjo”? b) Kakɔna kayotɔsɛdingola lo tshapita y’ekomelo?
21 “Ngandji hakomɛ pondjo.” Kakɔna kakalange Pɔɔlɔ mbuta lanɛ? Awui akina wele lawɔ mɛnyaka dia nde akatɛkɛtaka dikambo dia weshasha wa lo nyuma wakɛnamaka le Akristo wa ntondo. Weshasha ɛsɔ waki djembetelo yakɛnyaka dia Nzambi aketawɔ etshumanelo k’oyoyo kɛsɔ. Aha Akristo tshɛ mbakakokaka kɔnɔla, mbuta akambo wahataye, kana ntɛkɛta lo ɛtɛkɛta ekina. Dikambo sɔ takidiɔ ohomba nɛ dia weshasha wa nsala ahindo ɛsɔ wakahombe ndjokomɛ. Koko, ekɔ dikambo dimɔtshi diakahombe ntshikala, diakakoke Akristo tshɛ monga la diɔ ndo diɔ diakaleke woshasha tshɛ w’ahindo nɛmɔ ndo lolombe. Pɔɔlɔ akadielɛ “mboka koleki dimɛna.” (1 Kɔrɛtɔ 12:31) Naa “mboka koleki dimɛna” kɛsɔ? Aki ngandji.
22 Ngandji k’Okristo kakatɛkɛta Pɔɔlɔ “hakomɛ pondjo,” mbuta ate hakomɛki. Kaanga ɛlɔ kɛnɛ, ambeki wa Yeso wa mɛtɛ mbeyamaka oma lo ngandji ka Ndjahondja k’onto l’ɔnango kɛsɔ. Onde hatɛnyi ngandji kɛsɔ lo tshumanelo di’atɛmɔdi wa Jehowa dia l’andja w’otondo? Ngandji kɛsɔ kayotshikalaka pondjo, nɛ dia Jehowa ekɔ lo ndaka ekambi ande wa kɔlamelo lɔsɛnɔ la pondjo. (Osambo 37:9-11, 29) Diakɔ diele, tosalake la wolo dia “nkɛndakɛnda lo ngandji.” Etena kasalaso ngasɔ, sho koka mboka ɔngɛnɔngɛnɔ w’efula waya oma lo mbisha, ndo kɛnɛ koleki ele tayotetemala la nsɛna ndo mbokanaka ngandji pondjo pondjo oko Jehowa Nzambi kaso ka ngandji.
Ekambi wa Jehowa mbeyamaka oma lo ngandji kele lam’asawɔ
23 Lo tshapita y’ekomelo yatɛkɛta dikambo dia ngandji nyɛ, tambɛna woho wakokaso mbokana ngandji lam’asaso. Lo menda ɛlɔlɔ tshɛ wakondjaso oma lo ngandji, ndo oma lo wolo, losembwe la lomba laki Jehowa, shi kokaka dia sho nyanga dia mbeya woho wakokaso mɛnya Jehowa dia sho mbolangaka? Dikambo sɔ mbayotɔsɛdingola lo tshapita y’ekomelo.
a Koko, ngandji k’Okristo keema osuyasuya nɛ dia Bible tolakaka dia “menda dimɛna wanɛ wadja diatɔnelo ndo wakitshanɛ etamba wa ntakanya . . . ndo [mb]aewɔ.”—Rɔmɔ 16:17.