‘Jehowa Nzambi kaso ekɔ ndamɛ Jehowa’

1, 2. a) Lande na kele ɛtɛkɛta wele lo Euhwelu k’Elembe 6:4 mbeyamaka dimɛna? b) Lande na kakatɛkɛta Mɔsɛ ɛtɛkɛta ɛsɔ?

LO EDJA k’ɛnɔnyi nkama, ase Juda wakakambaka l’ɛtɛkɛta wa lo Euhwelu k’Elembe 6:4 oko etenyi kɛmɔtshi ka dɔmbɛlɔ dia laande. Dɔmbɛlɔ sɔ diakelamɛka Shema, diɔ mbele ɛtɛkɛta wa ntondo wa lo divɛsa sɔ lo ɔtɛkɛta wa Hɛbɛru. Ase Juda efula wakalɔmbaka dɔmbɛlɔ nɛ lushi la lushi mbuta ate, la pindju ndo la dikɔlɔ dia mɛnya omamemelo awɔ wa la tshondo le Nzambi.

² Ɛtɛkɛta ɛsɔ wekɔ nto etenyi k’ekomelo ka lo sawo diakasha Mɔsɛ wodja w’Isariyɛlɛ. L’ɔnɔnyi wa 1473 la ntondo ka Kristo, wodja ɔsɔ waki lo nkɛtɛ ya Mɔaba, wele suke dia ntehɔ Ɔkɛdi wa Jɔrdana ndo mbɔsa Nkɛtɛ ya Daka. (Euhwelu k’Elembe 6:1) Mɔsɛ akalɔmbɔla wodja l’edja k’ɛnɔnyi 40 ndo nde akalangaka dia vɔ monga la dihonga la ntondo k’ekakatanu wakahombe mbakomɛ. Vɔ wakahombe ndjaɛkɛ le Jehowa Nzambi kawɔ ndo monga la kɔlamelo le nde. Koko, ɛtɛkɛta wa Mɔsɛ w’ekomelo wakaakeketsha dia vɔ nsala dikambo diakɔ. L’ɔkɔngɔ wa nde ntɛkɛta di’Ɛlɛmbɛ Dikumi ndo di’ɛlɛmbɛ ekina w’oma le Jehowa, Mɔsɛ akohola wodja ɛtɛkɛta wadiɛso lo Euhwelu k’Elembe 6:4, 5. (Adia.)

3. Ambola akɔna wayangaso nsɛdingola lo sawo nɛ?

³ Ase Isariyɛlɛ wakeyaka dia Jehowa Nzambi kawɔ ekɔ ‘ndamɛ Jehowa.’ Ase Isariyɛlɛ waki la kɔlamelo wakatɛmɔlaka Nzambi ɔtɔi, Nzambi ka watshɛwɔ. Ko lande na kakawaohola Mɔsɛ dia Jehowa Nzambi kawɔ ekɔ ‘ndamɛ Jehowa’? Diɔtɔnganelo diakɔna diele lam’asa mɛtɛ kɛsɔ ndo mboka Nzambi kaso ngandji l’otema aso tshɛ, l’anima aso tshɛ ndo la wolo aso tshɛ? Ndo ngande wele ɛtɛkɛta wa lo Euhwelu k’Elembe 6:4, 5 mendanaka la so ɛlɔ kɛnɛ?

NZAMBI KASO EKƆ ‘NDAMƐ JEHOWA’

4, 5. a) Naa kitshimudi mɔtshi yele la etelo k’ɔnɛ ‘ndamɛ Jehowa’? b) Ngande wotshikitanyi Jehowa la tozambizambi t’ase wedja?

⁴ Onto la laande. Etelo k’ɔnɛ ‘ndamɛ Jehowa’ nembetshiyaka dia Jehowa ekɔ ndamɛ, mbuta ate ndooko onto okina lɛdimi la nde kana lele oko nde. Lande na kakakambe Mɔsɛ la etelo kɛsɔ? Ekɔ oko nde konanga mɛnya dia wetshelo wa Losanto l’osanto waki kɔlɔ. Jehowa ekɔ Otungi w’olongo la nkɛtɛ ndo Omboledi w’andja w’otondo. Nde kele Nzambi ɔtɔi ka mɛtɛ, ndo ndooko nzambi kele oko nde. (2 Samuele 7:22) Ɔnkɔnɛ, ɛtɛkɛta wa Mɔsɛ wakahombe mbohola ase Isariyɛlɛ dia vɔ tɛmɔlaka paka Jehowa. Takawahombe mbokoya anto wakaadinge, anto wakatɛmɔlaka tozambizambi efula ta kashi ndo tozambizambi ta kashi ta wamato. Anto asɔ waketawɔka dia tozambizambi tawɔ kokaka nɔmbɔla diangɔ diakatongama.

⁵ Ɛnyɛlɔ, ase Edjibito wakatɛmɔlaka Ra jambizambi ya wonya, Nout jambizambi ya womoto ya l’olongo, Geb jambizambi ya nkɛtɛ, Hâpi jambizambi ya Nilɛ, ndo nyama efula. Jehowa akɛnya dia nde ndeka tozambizambi ta kashi etena kakandatome Asui Dikumi. Jambizambi ya ntondo y’ase Kanana aki Baala, jambizambi ya kashi yaketawɔka ase Kanana dia nde mbakatonge diangɔ tshɛ diele la lɔsɛnɔ. Nde aketawɔmaka nto oko jambizambi y’olongo, mvula ndo ya lɔpɛpɛ la wolo. L’ahole efula, anto wakayaɛkɛka le Baala dia nyanga ekokelo. (Walelu 25:3) Ase Isariyɛlɛ wakohɔka dia Nzambi kawɔ, ekɔ ‘Nzambi ka mɛtɛ,’ ka laande. Nde ekɔ ‘ndamɛ Jehowa.’—Euhwelu k’Elembe 4:35, 39.

6, 7. Naa kitshimudi kina yele la tshɛkɛta ‘ndamɛ,’ ndo ngande wakɛnya Jehowa ɔnɛ nde ekɔ ‘ndamɛ’?

⁶ Hatshikitana ndo ekɔ la kɔlamelo. Tshɛkɛta ‘ndamɛ’ lo etelo k’ɔnɛ ‘ndamɛ Jehowa’ nembetshiyaka nto dia sangwelo diande ndo etsha ande wokongaka nshi tshɛ mɛtɛ. Jehowa Nzambi hatɔna kana tshikitana. Nde okongaka nshi tshɛ la kɔlamelo, hatshikitana ndo mɛtɛ. Ɛnyɛlɔ, nde akalake Abrahama dia tokanula tande wayɔsɛna lo Nkɛtɛ ya Daka. Ndo Jehowa akasale ahindo efula wa diambo dia nkotsha daka sɔ. Ɛnɔnyi nkama nyɛi l’akumi asato l’ɔkɔngɔ wa nde mbisha daka sɔ, sangwelo dia Jehowa kotshikitana.—Etatelu 12:1, 2, 7; Etumbelu 12:40, 41.

⁷ Ɛnɔnyi nkama l’ɔkɔngɔ, Jehowa akelɛ ase Isariyɛlɛ ɔnɛ ɛmɛnyi ande ndo nde akawatɛ ate: ‘Dimi haatshikitana. Ndooko Nzambi kakasalema la ntondo kami, ndo ndooko kɛnɛ kamboyala l’ɔkɔngɔ ami.’ Jehowa akɛnya hwe dia sangwelo diande hatshikitana pondjo etena kakandakotsha ate: ‘Tena tshɛ dimi haatshikitana.’ (Isaya 43:10, 13; 44:6; 48:12) Ande diɛsɛ dia woke diaki l’ase Isariyɛlɛ dia kambɛ Nzambi kahatshikitana ndo kele la kɔlamelo! Tekɔ la diɛsɛ dia woho akɔ waamɛ ɛlɔ kɛnɛ.—Malaki 3:6; Jakɔba 1:17.

8, 9. a) Kakɔna kalɔmba Jehowa atɛmɔdi ande? b) Ngande wakatɔtɔmiya Yeso ohomba wele l’ɛtɛkɛta wa Mɔsɛ?

⁸ Lo mɛtɛ, Mɔsɛ akohola ase Isariyɛlɛ dia ngandji ka Jehowa ndo woho waakokɛnde, hatshikitana pondjo. Lo wedi okina, Jehowa akalongamɛka dia vɔ mbomamema la tshondo tshɛ ndo mbooka ngandji l’otema awɔ tshɛ, la anima awɔ ndo la wolo awɔ. Ambutshi wakahombaka mbetshaka anawɔ akambo wendana la Jehowa oseka diaso tshɛ diakawatanaka, dia anawɔ vɔ lawɔ tɛmɔlaka paka Jehowa.—Euhwelu k’Elembe 6:6-9.

⁹ Jehowa hatshikitanya sangwelo diande pondjo, diakɔ diele nde hotshikitanya pondjo atɔndɔ ande wendana l’atɛmɔdi ande wa mɛtɛ. Naka sho kombolaka ngɛnyangɛnya Jehowa lo woho wɔtɛmɔlaso, kete sho pombaka mbomamema la tshondo ndo mbolanga l’otema aso tshɛ, la yimba yaso ndo la wolo aso tshɛ. Yeso akate dia ɔsɔ mbele ɔlɛmbɛ woleki ohomba. (Adia Makɔ 12:28-31.) Nyɛsɔ tɔsɛdingole woho wakokaso mɛnya l’etsha aso dia tekɔ lo mbetawɔ ɔnɛ ‘Jehowa Nzambi kaso ekɔ ndamɛ Jehowa.’

TOMAMEME JEHOWA LA TSHONDO TSHƐ

10, 11. a) Ngande wele woho watɛmɔlaso Jehowa nɔmbaka dia mbomamema la tshondo tshɛ? b) Ngande wakɛnya ɛlɔngɔlɔngɔ w’ase Hɛbɛru omamemelo awɔ wa la tshondo otsha le Jehowa?

¹⁰ Jehowa ndamɛ oto mbele Nzambi kaso. Sho mbomamemaka la tshondo etena kɔtɛmɔlaso paka ndamɛ. Hatokoke ntɛmɔla tozambizambi tokina kana monga la tokanyi ta kɔlɔ kana etsha wa kɔlɔ lo woho watɛmɔlaso Jehowa. Nde bu tsho nzambi kɛmɔtshi kele laadiko wa tozambizambi tokina kana jambizambi yele la wolo w’efula ndeka tokina. Nde mbele Nzambi ka mɛtɛ. Sho pombaka tɛmɔlaka paka Jehowa oto.—Adia Ɛnyɛlɔ 4:11.

¹¹ Lo dibuku dia Danyɛlɛ, sho mbadiaka awui wendana l’ɛlɔngɔlɔngɔ w’ase Hɛbɛru, Danyɛlɛ, Hananiya, Mishaɛlɛ ndo Azariya. Vɔ wakɛnya omamemelo awɔ wa la tshondo le Jehowa lo ntona ndɛ diangɔ diaki komonga pudipudi le atɛmɔdi wa Jehowa. Danyɛlɛ nde l’angɛnyi ande asato wakatone kusamɛ lohingu lɔmɔtshi mbuta ate, lohingu la paonyi laki Nɛbukadinɛza. Le wɔ Jehowa mbaki lo dihole dia ntondo. Vɔ waki la kɔlamelo tshɛ le nde.—Danyele 2:1–3:30.

12. Dia mamema Jehowa la tshondo, dikambo diakɔna diahombaso mbewɔ?

¹² Jehowa pombaka monga lo dihole dia ntondo lo lɔsɛnɔ laso. Naka sho nangaka mbomamema la tshondo yaso, kete sho pombaka monga la shɛnɔdi diaha diangɔ dikina mbɔsa dihole diande. Diangɔ diakɔna sɔ? Lo Ɛlɛmbɛ Dikumi, Jehowa akate dia wodja ande hawohombe ntɛmɔla tozambizambi tokina. Takawahombe ndjasha lo yoho tshɛ y’ɔtɛmwɛlɔ wa dikishi. (Euhwelu k’Elembe 5:6-10) Ɛlɔ kɛnɛ, ekɔ weho w’ɛtɛmwɛlɔ efula wa dikishi ndo ɛmɔtshi l’atei awɔ koka monga wolo mbashihodia. Koko Jehowa hatshikitanya atɔndɔ ande. Nde ekɔ paka ‘ndamɛ Jehowa.’ Nyɛsɔ tende woho wakokaso mbewɔ ɔtɛmwɛlɔ wa dikishi ɛlɔ kɛnɛ.

13. Awui akɔna wakokaso ndjotatɛ nanga efula oleki Jehowa?

¹³ Lo Kɔlɔsayi 3:5 (adia), tambɛna akambo wakoka ndanya lɔngɛnyi laso la laande lasaso la Jehowa. Tambɛna di’ɔkɔmiya wekɔ la diɔtɔnganelo l’ɔtɛmwɛlɔ wa dikishi. Lo woho akɔna? Etena kongaso la nsaki k’efula k’ɛngɔ kɛmɔtshi, ɛnyɛlɔ nsaki k’efula ka falanga kana lɔsɛnɔ la kawotake, tɔ koka nɔmbɔla lɔsɛnɔ laso, oko jambizambi ya nkudu efula. Pɛkato tshɛ yatanema lo Kɔlɔsayi 3:5 yekɔ la diɔtɔnganelo l’ɔkɔmiya, yɔ yekɔ yoho mɔtshi y’ɔtɛmwɛlɔ wa dikishi. Diakɔ diele, naka taya la nsaki k’efula ka diangɔ sɔ, kete sho koka ndjotatɛ dioka ngandji efula oleki ngandji kokaso Nzambi. L’etena kɛsɔ, kete Jehowa hatonga ‘ndamɛ Jehowa’ le so. Hatohombe nkombola pondjo dia dui dia ngasɔ salema.

14. Ɔhɛmwɛlɔ akɔna wakasha ɔpɔstɔlɔ Joani lo kɛnɛ kendana la ngandji kaso otsha le Nzambi?

¹⁴ Ɔpɔstɔlɔ Joani akake epole ɔsɛkɛ lo dikambo diafɔna la dia ngasɔ. Nde akahɛmɔla dia naka onto nanga diangɔ dia l’andja ɔnɛ, mbuta ate “nsaki ka demba ndo nsaki ka washo ndo ɔsɛmɔ wa kɛnɛ kele l’onto lo lɔsɛnɔ,” kete “ngandji ka Shɛso keema le nde.” (1 Joani 2:15, 16) Diakɔ diele, sho pombaka ndjasɛdingolaka mbala la mbala dia mbeya kana taya la nsaki ka andja ɔnɛ. Sho mbeyaka mɛna dia tambotatɛ kotwama lo tɔkɛnyɔ, anto ndo toho tɔmɔtshi ta ɔlɔtɔ la ɔlɔngɔswɛlɔ wa divo ta l’andja ɔnɛ. Kana sho mbeyaka nkombola nkondja ‘diangɔ dia weke’ lo tɔɔtɔka kalasa ya laadiko. (Jeremiya 45:4, 5) Andja w’oyoyo waya kemembe. Ɔnkɔnɛ, sho pombaka mbohɔka ɛtɛkɛta w’ohomba waki Mɔsɛ. Naka tamboshihodia ndo tambetawɔ mɛtɛ dia ‘Jehowa Nzambi kaso ekɔ ndamɛ Jehowa,’ kete tayowomamema la tshondo tshɛ ndo tayowokambɛ lo yoho yalangande.—Hɛbɛru 12:28, 29.

TOLAME KAAMƐ K’AKRISTO

15. Lande na kakohola Pɔɔlɔ Akristo dia Nzambi ekɔ ‘ndamɛ Jehowa’?

¹⁵ Etelo k’ɔnɛ ‘ndamɛ Jehowa’ tokimanyiyaka dia sho nshihodia ɔnɛ Jehowa nangaka di’ekambi ande monga kaamɛ ndo monga la oyango waamɛ lo lɔsɛnɔ. L’Etshumanelo k’Akristo ka lo ntambe ka ntondo, kaki l’ase Juda, ase Ngirika, ase Rɔmɔ ndo ase wedja ekina. Vɔ wakaye oma l’ahole wotshikitanyi, mbekelo ndo nango yotshikitanyi. L’ɔtɛ w’akambo asɔ, aki dui dia wolo le amɔtshi wa l’atei awɔ dia mbetawɔ yoho y’oyoyo y’ɔtɛmwɛlɔ kana ntshika etsha awɔ ɛmɔtshi w’edjedja. Diakɔ diele, Pɔɔlɔ akahombe mbaohola dia Akristo wekɔ la Nzambi ɔtɔi, mbuta ate Jehowa.—Adia 1 Kɔrɛtɔ 8:5, 6.

16, 17. a) Prɔfɛsiya kakɔna katakotshama nshi yaso nyɛ, ndo etombelo akɔna wambonga la dui sɔ? b) Kakɔna kakoka mfukutanya kaamɛ kaso?

¹⁶ Ko kayotota lo dikambo di’etshumanelo k’Akristo ɛlɔ kɛnɛ? Omvutshi Isaya akate dia ‘lo etena k’ekomelo ka nshi’ anto w’oma lo wedja tshɛ wayoya kaamɛ dia ndjɔtɛmɔla Jehowa. Vɔ wayota vate: ‘Nde ayototetsha mboka yande, ndo sho tayɔkɛndakɛnda lo ɛsɛsɛ ande.’ (Isaya 2:2, 3) Ande ɔngɛnɔngɛnɔ wele laso dia mɛna okotshamelo wa prɔfɛsiya kɛsɔ ɛlɔ kɛnɛ lee! Anangɛso l’akadiyɛso ndjaka oma l’ahole wotshikitanyi, tɛkɛtaka ɛtɛkɛta wotshikitanyi ndo wekɔ la mbekelo yotshikitanyi. Koko tekɔ kaamɛ lo woho watɛmɔlaso Jehowa. Diakɔ diele, l’ɔtɛ w’etshikitanu ɛsɔ, sho mbeyaka monga l’ekakatanu lo ntena dimɔtshi.

¹⁷ Ɛnyɛlɔ, ngande watoyoyaokaka lo kɛnɛ kendana l’anangɛso l’akadiyɛso wele la mbekelo yotshikitanyi? Ɔtɛkɛta awɔ, ɔlɔtɔ, mbekelo ndo diangɔ dia ndɛ mbeyaka tshikitana la diakiyɛ. Onde wɛ ayowaewɔ ndo ayetshaka wenya paka l’anto wɔfɔnyi la yɛ akambo? Ngande wayaokayɛ lo kɛnɛ kendana la dikumanyi diele lo ngelo kanyu dioleyɛ kana wanɛ wele la koho y’alemba ndo mbekelo yotshikitanyi? Naka hatongi la yewo, kete sho mbeyaka ndjotshika awui watotshikitanya asɔ monga la shɛngiya le so ndo mfukutanya kaamɛ kaso.

18, 19. a) Dako diakɔna diatanaso lo Ɛfɛsɔ 4:1-3? b) Kakɔna kakokaso nsala dia nkimanyiya di’etshumanelo mongaka kaamɛ?

¹⁸ Ngande wakokaso mbewɔ ekakatanu ɛsɔ? Pɔɔlɔ akasha Akristo wa l’Ɛfɛsɔ dako di’ohomba efula, osomba w’ɔngɔnyi efula waki l’anto w’oma lo ahole wotshikitanyi. (Adia Ɛfɛsɔ 4:1-3.) Pɔɔlɔ akashile waonga wele oko, okitshakitsha, memakana, solo dia lotutsha ndo ngandji. Waonga asɔ wekɔ oko dikundji dia wolo diakimanyiya dia luudu memala. Koko nɔmbamaka nkamba olimu wa wolo efula dia luudu mongaka kɔmba. Pɔɔlɔ akalangaka di’Akristo wa l’Ɛfɛsɔ “nkokɛ kaamɛ ka lo nyuma.”

¹⁹ Ɔmɔmɔ la l’atei aso pombaka nsala tshɛ dia nkokɛ kaamɛ ka l’etshumanelo. Ngande wakokaso nsala dui sɔ? Ntondotondo, sho pombaka mbidja welo dia monga ndo kɛnɛmɔla waonga wakashile Pɔɔlɔ anɛ: okitshakitsha, memakana, solo dia lotutsha ndo ngandji. Dui dia hende, sho pombaka nsala la wolo dia nkokɛ “dimama dia wɔladi.” Ekakatanu koka mbɛdikama la ɛlɔngɛ wa totshitshɛ lo kaamɛ kaso, diakɔ diele sho pombaka nsala la wolo dia nkandola ekakatanu ɛsɔ dia sho nama wɔladi ndo kaamɛ ka l’atei aso.

20. Ngande wakokaso mɛnya dia sho shihodiaka ɔnɛ ‘Jehowa Nzambi kaso ekɔ ndamɛ Jehowa’?

²⁰ ‘Jehowa Nzambi kaso ekɔ ndamɛ Jehowa.’ Ɔsɔ ekɔ ɛtɛkɛta w’ohomba efula. Diohwelo sɔ diakakimanyiya ase Isariyɛlɛ dia vɔ mbikikɛ ekakatanu etena kakawɔtɔ ndo kakawɔsɛ Nkɛtɛ ya Daka. Ɛtɛkɛta ɛsɔ koka tokeketsha ndo sho la wɔ dia ntenyanya mfɔnu ka woke ndo tosha lonya lo Paradiso kayaye. Nyɛsɔ totetemale mamema Jehowa la tshondo yaso tshɛ. Sho pombaka mbooka ngandji ndo mbookambɛ l’otema aso tshɛ, la yimba yaso tshɛ, ndo la wolo aso tshɛ ndo sho pombaka nsala la wolo dia ntetemala nama wɔladi ndo kaamɛ ka lam’asaso l’anangɛso l’akadiyɛso. Naka sho ntetemala nsala akambo asɔ, kete Yeso ayoyotolombosha oko ɛkɔkɔ ndo tayoyɛna okotshamelo w’ɛtɛkɛta ande wata ɔnɛ: “Nyoye, nyu wanɛ wakatshɔkwama oma le Papa, nyokite Diolelo diakalɔngɔsɔma dikambo dianyu oma ko etatelo k’andja.”—Mateo 25:34.