‘Nyuma la otshukami wekɔ lo ntetemala mbuta ɔnɛ: Yaka!’
‘Nyuma la otshukami wekɔ lo ntetemala mbuta ɔnɛ: Yaka! Ɔnɛ lele la mposa aye! Ɔnɛ lalanga ɔsɛ ashi wa lɔsɛnɔ wɔsɔsa.’—ENY. 22:17.
1, 2. Wahɔ wa Diolelo pombaka mbɔsa dihole diakɔna lo nsɛnɔ yaso, ndo lande na?
WAHƆ wa Diolelo pombaka mbɔsa dihole diakɔna lo nsɛnɔ yaso? Yeso akakeketsha ambeki ande dia vɔ ‘ntetemala nyanga ntondo diolelo,’ lo mbâshikikɛ dia naka vɔ nsala dikambo sɔ, kete Nzambi ayowakotshɛ ehomba awɔ. (Mat. 6:25-33) Nde akɛdika Diolelo diaki Nzambi la didi di’oshinga wolo efula diele lam’akaditane omundji w’okanda, nde ‘akasondja diangɔ diande tshɛ dia disomba.’ (Mat. 13:45, 46) Shi olimu w’esambishelo ka Diolelo ndo wa mbetɛ anto ambeki mbahombaso ndeka mbɔsa la nɛmɔ?
2 Oko wakatadiɛnyi lo asawo ahende wakete, nsambisha la dihonga ndo nkamba la Ɔtɛkɛta wa Nzambi dimɛna l’esambishelo mɛnyaka dia sho nɔmbwamaka la nyuma ka Nzambi. Nyuma kɛsɔ tokimanyiyaka nto dia sho sambishaka Diolelo mbala la mbala. Nyɛsɔ tende woho watokimanyiyatɔ.
Leeta lɔmɔtshi lokɛma hwe
3. Woho akɔna w’ashi welamɛ anto tshɛ dia vɔ ‘ndja’ ndjɔsa?
3 Leeta lɔmɔtshi lokɛma hwe lekɔ lo mbishama le anto lo tshimbo ya nyuma k’ekila. (Adia Enyelo 22:17.) Leeta lakɔ mbelɛka onto lele la mposa dia ‘ndja’ ndjɔsa woho ɔmɔtshi w’ashi wa lânde. Ɔsɔ kema ashi k’ashi. Kânga mbele ashi k’ashi wekɔ ohomba dia nsukɛ lɔsɛnɔ lanɛ la nkɛtɛ, Yeso aki la woho okina w’ashi lo yimba etena kakandatɛka womoto ɔmɔtshi l’ose Samariya l’ɛtɛkɔ kɛmɔtshi k’ashi ate: “Untu tshe layono ashi wayumuwusha, huki pusa pundju. Keli ashi wayumuwusha, wayuyala l’utema andi uku eteko k’ashi, kambumbela utsha lu lumu la pundju.” (Joa. 4:14) Ashi wa lânde asɔ welamɛ anto dia ndjɔsa mbishaka lɔsɛnɔ la pondjo.
4. Ngande wakɛnama ohomba w’ashi wa lɔsɛnɔ, ndo ashi akɔ alembetshiyawɔ?
4 Ohomba w’ashi wa lɔsɛnɔ asɔ wakɛnama etena kakayele Adama, pami ka ntondo lokolo la wadɛnde Eva lo tɔmbɔkwɛ Jehowa Nzambi, Otungi awɔ. (Etat. 2:16, 17; 3:1-6) Atshukanyi wa ntondo asɔ wakatshanyema oma lo ekambɔ kawɔ diaha “[Adama ndj]usimbula lunya dia nkohola ulua w’utamba a lumu, la ndi nde, la ntshikala la lumu pundju.” (Etat. 3:22) Oko wende lɔtshɛtshɛ l’anto, Adama akela nkumbo k’anto k’otondo nyɔi. (Romo 5:12) Ashi wa lɔsɛnɔ nembetshiyaka tɛdikɔ tshɛ takɔshi Nzambi dia ntshungola akanga w’okitanyiya oma lo pɛkato la nyɔi ndo mbasha lɔsɛnɔ la kokele laha l’ekomelo lo Paradiso ka la nkɛtɛ. Tɛdikɔ tɔsɔ takɔsama lo ekimanyielo ka olambo wa tshungo waki Yeso Kristo.—Mat. 20:28; Joa. 3:16; 1 Joa. 4:9, 10.
5. Leeta la ndja dia ‘ndjɔsa ashi wa lɔsɛnɔ wɔsɔsa’ ndja oma le na? Lembetshiya.
5 Onto akɔna elɛ anto dia ndja ‘ndjɔsa ashi wa lɔsɛnɔ wɔsɔsa’? Etena kayokondja anto wahɔ tshɛ lo tshɛ oma lo tɛdikɔ tendana la lɔsɛnɔ lo tshimbo ya Yeso lo Ɛlɔmbwɛlɔ ka Kristo k’ɛnɔnyi kinunu, mbayɔsama tɛdikɔ tɔsɔ oko ‘ɔkɛdi w’ashi wa lɔsɛnɔ wa wɛma fifɔ.’ Ɔkɛdi ɔsɔ wekɔ lo mɛnama oko ‘wakɛla oma lo kiti ka Diolelo ka Nzambi ndo ka Ɔnɔkɔkɔ.’ (Eny. 22:1) Ɔnkɔnɛ, Jehowa lele Ombishi wa lɔsɛnɔ mbele Kiɔkɔ y’ashi washa lɔsɛnɔ. (Osam. 36:9) Nde mbasha anto ashi asɔ lo tshimbo ya “On’a Okoko,” Yeso Kristo. (Joa. 1:29) Ɔkɛdi wa didjidji ɔsɔ wekɔ dihomɔ diayokamba la Jehowa dia minya pâ tshɛ yadiɛnɛ anto la yɔ yakaye oma lo ɔtɔmbɔkwɛlɔ waki Adama. Eelo, Jehowa Nzambi mbele Kiɔkɔ ya leeta l’ɔnɛ: “Yaka.”
6. Etena kakɔna kakatatɛ ‘ɔkɛdi w’ashi wa lɔsɛnɔ’ nkɛla?
6 Kânga mbele ‘ɔkɛdi w’ashi wa lɔsɛnɔ’ wayɔkɛla lo yɛdikɔ yoleki lo Ɛlɔmbwɛlɔ ka Kristo k’ɛnɔnyi kinunu, vɔ wakatatɛ nkɛla lo ‘lushi la Nkumadiɔndjɔ,’ lakatatɛ la wahenyamelo wa “On’a Okoko” l’okudi lo 1914. (Eny. 1:10) Ɔnkɔnɛ, l’ɔkɔngɔ w’etena kɛsɔ mbakatatɛ anto nkondja wahɔ oma lo tɛdikɔ tɔmɔtshi tendana la lɔsɛnɔ. Tɔ mendanaka la Bible, Ɔtɛkɛta wa Nzambi nɛ dia losango la lɔkɔ mbelamɛka ɔnɛ “ashi.” (Ef. 5:26) Leeta la ‘ndjɔsa ashi wa lɔsɛnɔ’ lo mboka ndo mbetawɔ lokumu l’ɔlɔlɔ la Diolelo lekɔ lo mbishama le anto tshɛ. Ko waa na washa anto leeta lɔsɔ lo lushi la Nkumadiɔndjɔ lasɛnaso lɔnɛ?
“Utshukami” ate: “Yaka!”
7. Lo ‘lushi la Nkumadiɔndjɔ,’ waa na wakatatɛ mbisha anto leeta l’ɔnɛ: “Yaka,” ndo waa na wakawalisha?
7 Anto wa l’olui w’otshukami, mbuta ate Akristo w’akitami wa nyuma mbele anto wa ntondo washa anto leeta l’ɔnɛ: “Yaka.” Waa na washawɔ leeta lɔsɔ? Lo mɛtɛ, otshukami hayatɛ ndamɛ ɔnɛ: “Yaka.” Nde ekɔ lo lisha wanɛ wele la elongamelo ka nkondja lɔsɛnɔ la pondjo la nkɛtɛ l’ɔkɔngɔ wa ‘ta dia lushi la woke la Nzambi Kanga-Wolo-Tshɛ’ ndɔma.—Adia Enyelo 16:14, 16.
8. Kakɔna kɛnya dia Akristo w’akitami wekɔ lo mbisha anto leeta laki Jehowa oma ko 1918?
8 Ambeki wa Kristo w’akitami wakatatɛ mbisha anto leeta lɔsɔ oma ko 1918. L’ɔnɔnyi ɔsɔ, sawo dia lo sɛkɛ diaki l’ɔtɛ a dui ɔnɛ: “Miliyɔ y’anto yele la lɔsɛnɔ nshi nyɛ hawovɔkaki pondjo” diakasha elongamelo k’ɔnɛ anto efula wayokondja lɔsɛnɔ lo paradiso ka la nkɛtɛ l’ɔkɔngɔ wa ta dia Aramangɛdɔna. Sawo dimɔtshi diakashama lo losanganya lɔmɔtshi la woke l’Ambeki wa Bible la Cedar Point, Ohio, lo wodja w’États-Unis lo 1922 diakakeketsha ampokami dia vɔ ‘mbewoya akambo wendana la Nkumekanga ndo diolelo diande.’ Dui sɔ diakakimanyiya atshikadi wa l’olui w’otshukami dia vɔ mbisha anto efula leeta lɔsɔ. Lo 1929, Tshoto y’Etangelo ya lo Angɛlɛ ya Ngɔndɔ ka sato 15 yaki la sawo diaki l’ɔtɛ a dui ɔnɛ: “Leeta l’ɔlɔlɔ,” diakɔsama oma lo Enyelo 22:17. Etenyi kɛmɔtshi ka sawo sɔ kakataka ɔnɛ: “Olui w’atshikadi wa kɔlamelo sanganaka kâmɛ la [Nkum’Olongo] lo leeta l’ɔlɔlɔ ndo mbutaka ɔnɛ: ‘Yaka.’ Losango lɔsɔ pombaka sambishama le wanɛ wele la mposa ka losembwe ndo k’akambo wa mɛtɛ. Dui sɔ pombaka salema etena kɛnɛ.” Polo ndo lo nshi yaso nyɛ, olui w’otshukami wekɔ lo ntetemala mbisha anto leeta lɔsɔ.
“One luka ati ati: Yaka!”
9, 10. Kakɔna kakasale wanɛ wakoke leeta l’ɔnɛ: “Yaka!”?
9 Ko kayotota dia wanɛ woka leeta l’ɔnɛ: “Yaka”? Vɔ lawɔ wambɔlɔmbama dia mbuta ɔnɛ: “Yaka.” Ɛnyɛlɔ, Tshoto y’Etangelo ya lo Angɛlɛ ya Ngɔndɔ k’enanɛi 1, 1932, lɛkɛ 232 yakate ɔnɛ: “Akitami nyokeketsha anto tshɛ walanga dia vɔ mbisha lonya l’olimu wa mbewoya lokumu l’ɔlɔlɔ la Diolelo. Aha paka vɔ kongi akitami wa Nkumadiɔndjɔ ko vɔ nsambisha losango la Nkumadiɔndjɔ. Ekɔ ekeketshelo ka woke le Ɛmɛnyi wa Jehowa dia mbeya dia vɔ wambokondja lotshungɔ la mɛmbɛ olui w’anto wakoka panda lo Aramangɛdɔna ndo nkondja lɔsɛnɔ la pondjo la nkɛtɛ ashi wa lɔsɛnɔ.”
10 Dia ntɔtɔmiya ɔkɛndɛ wele la ɔnɛ loka leeta dia mbuta ɔnɛ: “Yaka!,” Tshoto y’Etangelo ya lo Angɛlɛ ya Ngɔndɔ k’enanɛi 15, 1934, lɛkɛ 249, yakate ɔnɛ: “Wanɛ wele l’olui wa Jɔnadaba pombaka ntshɔ kâmɛ la wanɛ wele l’olui wa Jehu, mbuta ate akitami ndo mbewoya losango la Diolelo kânga mbewɔ kema Ɛmɛnyi wa Jehowa w’akitami.” Lo 1935, “ului a wuki” wɔtɛkɛtami lo Enyelo 7:9-17 wakeyama dimɛna. Dui sɔ diakayolekaka ntɔla olimu wa mbisha anto leeta laki Nzambi otsha la ntondo. Ntatɛ oma k’etena kɛsɔ, lofulo latatetemala mfula l’anto wa l’olui a woke w’atɛmɔdi wa mɛtɛ, laya ɛlɔ kɛnɛ ndekana miliyɔ esambele waketawɔ leeta lɔsɔ. L’ɔkɔngɔ wa vɔ mbetawɔ leeta lɔsɔ la lowando tshɛ, vɔ wakayakimɔ le Nzambi, wakabatizama l’ashi ndo wakasangana kâmɛ la olui w’otshukami dia mbelɛ anto akina la waasaso tshɛ dia vɔ ‘ndjɔnɔ ashi wa lɔsɛnɔ ɔnɔnɔ.’
“Nyuma” ate: “Yaka!”
11. Lo ntambe ka ntondo tena diaso nɛ, olimu akɔna wakakambe nyuma k’ekila lo kɛnɛ kendana l’olimu w’esambishelo?
11 Etena kakandasambishaka lo shinangɔnga ka la Nazarɛtɛ, Yeso akafola wɔɔmbɔ w’ɔprɔfɛta Isaya ndo akadia ɔnɛ: “Nyuma ka Khumadiondjo kambumbahema, ne dia ndi akankidia dia dimi nsambisha akanga a weula lukumu l’ololo. Ndi akantumi dia ntutela wane wambundama dikambu dia etshungwelu, ndu akanga a tutshungu dia esenelo, la dia ntshungula wane wambusuyama, la dia mvutela antu dia eleku kaketawo Khumadiondjo.” Oma lâsɔ, Yeso akakambe la ɛtɛkɛta ɛsɔ lo dikambo diande ndamɛ lo mbuta ate: ‘Divɛsa diomanyu la mboka sɔ diambokotshama ɛlɔ.’ (Luka 4:17-21) La ntondo ka nde mbudɛ l’olongo, Yeso akatɛ ambeki ande ate: ‘Nyu nyayolongola wolo lam’ayoya nyuma k’ekila le nyu ndo nyayoyala ɛmɛnyi ami polo ndo lo tokoma ta nkɛtɛ.’ (Etsha 1:8) Lo ntambe ka ntondo, nyuma k’ekila kakakambe olimu wa diambo efula lo kɛnɛ kendana l’olimu w’esambishelo.
12. Olimu akɔna wakamba nyuma kaki Nzambi lo kɛnɛ kendana la leeta lashama ɛlɔ kɛnɛ?
12 Olimu akɔna wakamba nyuma k’ekila kaki Nzambi lo kɛnɛ kendana la leeta lashama ɛlɔ kɛnɛ? Jehowa mbele Kiɔkɔ ya nyuma k’ekila. Nde kambaka la nyuma kande dia ndihola etema ndo timba ta olui w’otshukami dia vɔ nshihodia Bible, Ɔtɛkɛta ande. Nyuma mbâtshutshuyaka dia vɔ mbisha anto leeta ndo nembetshiya wanɛ wele la elongamelo ka ndjɔsɛna pondjo pondjo lo paradiso ka la nkɛtɛ, akambo wa mɛtɛ wa l’Afundelo. Kakɔna kayotota lo dikambo dia wanɛ wetawɔ leeta lɔsɔ, wakoma ambeki wa Yeso Kristo ndo washa anto akina leeta lɔsɔ? Nyuma kɛsɔ mbakimanyiyaka ndo vɔ. Lam’ele vɔ batizamaka ‘lo lokombo la nyuma k’ekila,’ vɔ salaka akambo lo yoho yɔtɔnɛ la ɛlɔmbwɛlɔ ka nyuma k’ekila ndo ndjaɛkɛka lo ekimanyielo katɔ. (Mat. 28:19) Tokanyiya nto dikambo dia losango lambosambisha akitami ndo olui a woke watatetemala la mfula. Lɔ ndja oma lo Bible, dibuku diakafundama oma lo wolo wa nyuma kaki Nzambi. Ɔnkɔnɛ, leeta lɔsɔ mbishamaka lo ekimanyielo ka nyuma k’ekila. Lo mɛtɛ, tekɔ lo nɔmbwama la nyuma kɛsɔ. Shɛngiya yakɔna yahomba monga la dui sɔ lo yɛdikɔ ya wenya wetshaso l’olimu wa mbisha anto akina leeta lɔsɔ?
Vɔ ‘Wekɔ lo ntetemala mbuta ɔnɛ: Yaka!’
13. Kakɔna kalembetshiya etelo k’ɔnɛ “nyuma la otshukami wekɔ lo ntetemala mbuta ɔnɛ: ‘Yaka!’”?
13 ‘Nyuma la otshukami’ hawototɛ tsho ɔnɛ: “Yaka!” Vɛrbɛ ya lo ɔtɛkɛta wakafundama Bible ntondo yokambi la wɔ lanɛ mɛnyaka tshelo yatatetemala. Lo mbidja yimba lo dikambo sɔ, sho mbadiaka lo Traduction du monde nouveau ɔnɛ: “Nyuma la otshukami wekɔ lo ntetemala mbuta ɔnɛ: ‘Yaka!’” Kɛsɔ mɛnyaka dia leeta laki Nzambi pombaka ntetemala mbishama. Kayotota dia wanɛ woka ndo wetawɔ leeta lɔsɔ? Vɔ lawɔ mbutaka ɔnɛ: “Yaka!” Bible mbutaka dia olui a woke w’atɛmɔdi wa mɛtɛ wekɔ lo ‘nkamba olimu w’ekila la yanyi ndo l’otsho lo tɛmpɛlɔ kaki Jehowa.’ (Eny. 7:9, 15) Lo yoho yakɔna yakambawɔ ‘la yanyi ndo l’otsho’? (Adia Luka 2:36, 37; Etsha 20:31; 2 Tesalonika 3:8.) Ɛnyɛlɔ kaki ɔprɔfɛta wa womoto w’osombe Ana ndo kaki ɔpɔstɔlɔ Paulo mɛnyaka dia ‘olimu wakambema la yanyi ndo l’otsho’ mendanaka la etete ndo welo wadjama l’otema ɔtɔi l’olimu ɔsɔ.
14, 15. Ngande wakɛnya Danyɛlɛ ohomba wa tɛmɔlaka Nzambi la etete?
14 Ɔprɔfɛta Danyɛlɛ nde lawɔ akɛnya ohomba w’etete l’ɔtɛmwɛlɔ. (Adia Danyele 6:4-10, 16.) Nde kotshikitanya mbekelo kande ka nɔmbaka Nzambi “tena satu la lushi la lushi, . . . uku akandatshaka ntundu,” kânga ngɔndɔ ɔtɔi, kânga mbele dikambo sɔ diakahombe mbokonya dia nde mbidjama lo difuku dia tambwɛ. Dui sɔ mɛtɛ diakɛnya anto wakawendaka dia ndoko dui diakaleke ohomba le nde oleki tɛmɔlaka Jehowa mbala la mbala!—Mat. 5:16.
15 L’ɔkɔngɔ wa Danyɛlɛ mbetsha otsho w’otondo lo difuku dia tambwɛ, nkumekanga ndamɛ akatshu lɛkɔ ndo akate la dui dia wolo ate: “Danyele li! We ukambi a [Nzambi k]a lumu, undi, [Nzambi k]aye, latuyotemolaka tena tshe, akeyi nkushimbela uma le tambwe?” Danyɛlɛ akakadimola ate: “Khum’ekanga, ulumbaki pundju! [Nzambi k]ami akatumi ondjelo andi, akadihi enyo wa tambwe. Yo hayuntshedi nduku dikambu, ne dia dimi lakatanemi aha la unungu la ntundu kandi, ndu dimi kuntsha nduku dikambu dia kolo la ntundu kaye.” Jehowa akatshɔkɔla Danyɛlɛ l’ɔtɛ w’olimu wakandokambɛka ‘la etete.’—Dan. 6:19-22.
16. Ambola akɔna wahomba ɛnyɛlɔ kaki Danyɛlɛ totshutshuya dia sho ndjaoka lo kɛnɛ kendana la woho wayashaso l’esambishelo?
16 Danyɛlɛ aketawɔ mvɔ lo dihole dia nde ntshika ntɛmɔla Jehowa la etete. Kayotota lo dikambo diaso? Akambo akɔna wayahombiaso kana wetawɔso ndjahombia dia nsambisha lokumu l’ɔlɔlɔ la Diolelo diaki Nzambi la etete? Eelo, hatokoke mbetsha ngɔndɔ k’otondo aha la nsambisha anto akina awui wendana la Jehowa! Shi sho pombaka nsala la wolo dia sambishaka lomingu tshɛ, naka kokaka? Oyadi tekɔ la pâ ka woke lo demba ndo sho kokaka nsambisha paka minitɛ 15 tsho lo ngɔndɔ, sho pombaka nkimɔ alapɔlɔ w’olimu aso. Lande na? Nɛ dia kâmɛ la nyuma ndo la otshukami, sho kombolaka ntetemala mbuta ɔnɛ: “Yaka!” Eelo, sho nangaka nsala kɛnɛ tshɛ kakokaso nsala dia ntshikala apandjudi wa Diolelo wasambisha mbala la mbala.
17. Waaso akɔna wahatahombe mpandja dia mbisha anto leeta laki Jehowa?
17 Sho pombaka nyanga dia mbisha anto leeta laki Jehowa l’oseka diaaso tshɛ, aha paka lo wenya wakatashikikɛ dia sambishaka. Ande diɛsɛ diele la so dia sho mbelɛ anto wele la mposa dia ‘ndja ndo ndjɔsa ashi wa lɔsɛnɔ wɔsɔsa’ lo tena dikina, ɛnyɛlɔ etena katatasombe diangɔ, keso lo lɔkɛndɔ, keso lo vakashi, kakambaso olimu kana katatatshu la kalasa lee! Kânga ewandji wa lɛɛta wamboshimba olimu aso w’esambishelo, sho tetemalaka nsambisha lo woshɛshɛ, ondo lo tambaka mvudu mɔtshi etena kasambishaso lo luudu la luudu kana lo ndeka sambishaka lo tshakitudi.
Totetemale mbuta ɔnɛ: “Yaka!”
18, 19. Ngande wɛnyaso dia sho mbɔsaka diɛsɛ dia monga ekambi kâmɛ la Nzambi la nɛmɔ?
18 Aya ndekana ɛnɔnyi akumi divwa wele nyuma la otshukami wekɔ lo ntetemala mbutɛ onto tshɛ lele la mposa k’ashi wa lɔsɛnɔ ɔnɛ: “Yaka!” Onde wɛ amboka leeta lawɔ lasalanganya otema lɔsɔ? Naka eelo, kete wɛ keketshamaka dia mbisha anto akina leeta lakɔ.
19 Hateye polo ndo lo etena kakɔna kayotetemala mbishama leeta laki Jehowa loludi la ngandji, koko woho walietawɔso ndo watɛso anto ɔnɛ: “Yaka!” tetɛka ekambi kâmɛ la Nzambi. (1 Kor. 3:6, 9) Ɔsɔ mɛtɛ ekɔ diɛsɛ dia woke! Nyɛsɔ tɛnya dia sho mbɔsaka diɛsɛ sɔ la nɛmɔ ndo ‘tolambolake Nzambi olambo wa lotombo nshi tshɛ’ lo sambishaka mbala la mbala. (Heb. 13:15) Kâmɛ la olui w’otshukami, wanɛ tshɛ wele la elongamelo ka nsɛna la nkɛtɛ l’atei aso watetemale mbuta ɔnɛ: “Yaka!” kele anto efula waye ‘wayɔshi ashi wa lɔsɛnɔ wɔsɔsa’!
Kakɔna kamboyeka?
• Leeta l’ɔnɛ: “Yaka!” lekɔ lo mbishama le waa na?
• Lande na kakokaso mbuta dia leeta l’ɔnɛ: “Yaka!” ndja oma le Jehowa?
• Olimu akɔna wakamba nyuma k’ekila lo woshelo wa leeta l’ɔnɛ: “Yaka!”?
• Lande na kahombaso nsala la wolo dia sambishaka mbala la mbala?
[Tablo/Esato wa lo lɛkɛ 16]
(Dia mbeya awui tshɛ enda l’okanda)
Totetemale mbuta ɔnɛ: “Yaka!”
1914
Apandjudi 5 100
1918
Anto efula wayokondja lɔsɛnɔ lo Paradiso ka la nkɛtɛ
1922
“Nyewoya, nyewoya, nyewoya, awui wendana la Nkumekanga ndo la diolelo diande”
1929
Atshikadi wa kɔlamelo mbutaka ɔnɛ: “Yaka!”
1932
Aha akitami ato mbasha anto leeta l’ɔnɛ: “Yaka!”
1934
Olui wa Jɔnadaba wambelamɛ dia nsambisha
1935
“Ului a wuki” wambeyama
2009
Apandjudi 7 313 173