Bible tshikitanyaka nsɛnɔ y’anto

KAKƆNA kakatshutshuya pami kɛmɔtshi dia nde ndjokalola nto l’ɔtɛmwɛlɔ wakandetshama oma ko dikɛnda diande? Ngande wakakondja ɔlɔngɔlɔngɔ ɔmɔtshi papa ka didjidji kakandatayangaka lɔsɛnɔ lande l’otondo? Adia kɛnɛ kayangawɔ totɛ.

“Lakɛnyi ohomba wa nkalolɛ Jehowa.”—ELIE KHALIL

ƆNƆNYI WA LÔTƆ: 1976

WODJA WA LÔTƆ: CHYPRE

ƆKƆNDƆ: ƆNA LA LOTSHITO

NSHI YAMI YAKETE: Lakotɔ la Chypre koko lakodiama lo Australie. Ambutshi ami wekɔ Ɛmɛnyi wa Jehowa, ndo wakasale la wolo tshɛ dia monɛ ngandji ka Jehowa ndo ka Ɔtɛkɛta ande Bible l’otema ami. Koko, etena kakimi l’ɛnɔnyi dikumi l’ɛmɔ, lakatatɛ ntɔmbɔkɔ. Lakatombaka l’otsho lo woshɛshɛ oma lo luudu dia tohomana l’asekami l’ɔlɔnga. Takavaka mituka ndo takasalaka akambo akina efula wa kɔlɔ.

L’etatelo, lakasalaka akambo asɔ lo woshɛshɛ la wɔma w’ɔnɛ layonyangiya ambutshi ami. Koko, yema yema wɔma ɔsɔ wakayomɔka. Lakayɔtɔka lɔngɛnyi l’anto wakambolɛ etale efula waki kombokaka Jehowa ngandji ndo vɔ waki la shɛngiya ya kɔlɔ le mi. L’ekomelo, lakayotɛka ambutshi ami dia handjolanga monga nto l’ɔtɛmwɛlɔ awɔ. La lotutsha tshɛ, vɔ wakahembe kimanyiyami koko welo awɔ tshɛ wakɔtɔ l’ashi. Ambutshi ami wakanyange efula.

L’ɔkɔngɔ wa dimi monɔ oma la ngelo, lakatatɛ nnɔ kaandji, lakayionɛka ndo lakayisondjaka. Lakasɛnaka lɔsɛnɔ la kɔlɔ ndo laketshaka wenya efula lo menda tɔkɛnyɔ ta l’otsho lo waa barɛ. Lakakome nto yomala omala. Naka onto ɔmɔ ambombutɛ kana ambosalɛ dui dimɔ diahamalange, lakomalaka efula ndo mbala efula lakawanaka l’onto akɔ ndo lakɔkɔmɔlaka. Lo tshena pe, lakasalaka akambo tshɛ wakameke wahakoke Okristo nsala.

WOHO WAKATSHIKITANYA BIBLE LƆSƐNƆ LAMI: Lakɔtɔ lɔngɛnyi la ma ma l’osekami laki ɔnɔshi wa kaandji, lakavusha papa kande etena kakinde dikɛnda. Mbala efula takasawolaka polo la kati k’otsho. L’otsho ɔmɔ, nde akandjihwɛ otema ndo akambutɛ awui efula wendana la woho wakandavusha papa kande. Lam’ele wakambetsha elongamelo kendana la eolwelo etena kakamayolaka, lakatatɛ mbotɛ akambo wendana la Yeso, mbuta ate nde akolola wanɛ wakavu ndo akalake dia nyomoyosala dui sɔ lo nshi yayaye. (Joani 5:28, 29) Lakawotɛka nte: “Ohokanyiya etena kayoyɛna papa kayɛ nto. Sho tshɛ kokaka nsɛna pondjo pondjo lo Paradiso ka la nkɛtɛ.” Akambo asɔ wakananda otema w’ɔngɛnyi ami.

Lo tena dikina, ɔngɛnyi ami akayaka l’asawo wendana la nshi y’ekomelo kana wetshelo wa Losato l’osanto. Lakakambaka la Bible kande dia mbɛnya avɛsa efula wɛnya akambo wa mɛtɛ wendana la Jehowa Nzambi la Yeso ndo la nshi y’ekomelo. (Joani 14:28; 2 Timote 3:1-5) Lo yɛdikɔ yakamalekaka mbutɛ ɔngɛnyi ami akambo wendana la Jehowa, mbakamalekaka nkanyiya dikambo dia Jehowa.

Yema yema koko l’eshikikelo tshɛ, ntɔngɔ y’akambo wa mɛtɛ ya lo Bible yakalalaka l’otema ami, mbuta ate ntɔngɔ yakasale ambutshi ami la wolo dia ndjionɛ, yakatatɛ ntomba. Ɛnyɛlɔ, mbala kɛmɔtshi etena kakamanɔka dimi l’angɛnyi ami kaandji dihole dimɔtshi, la shashimuya lakatatɛ kanyiya akambo wendana la Jehowa. Angɛnyi ami efula wakasɛmaka ɔnɛ vɔ mbokaka Nzambi ngandji, koko dionga diawɔ diakɛnyaka ɔnɛ vɔ wakawangunaka. Oko wakimi konanga monga oko vɔ, lakeyaka kɛnɛ kakamahombe nsala. Lakɛnyi ohomba wa nkalolɛ Jehowa.

Lo mɛtɛ, ekɔ dui dia wɔdu dia mbeya kɛnɛ kahomba salema, koko ekɔ wolo efula dia kisala. Etshikitanu ɛmɔtshi waki wɔdu nsala; lakatshike nnɔ didjoyadjoya aha l’okakatanu. Lakahembola nto losambi l’angɛnyi ami w’edjedja ndo lakatatɛ mbeka Bible kâmɛ l’ekumanyi kɛmɔtshi k’Okristo.

Koko, aki wolo efula dia nsala etshikitanu ekina. Aki tshondo y’okakatanu dia dimi mbahemɛ nkɛlɛ kami. Tena dimɔtshi, lakâhemɛka kɛlɛ kami lo tshanda mɔtshi ndo l’ɔkɔngɔ diko tɔ kakambahemɛka. Lakanyangaka efula lo mbɔsa dia hatondoyaki pondjo. L’ɔkɔmwɛlɔ tshɛ, lakasawola l’ekumanyi kakekaka la mi Bible. La lotutsha ndo la kɛtshi tshɛ, nde akonge kiɔkɔ y’ekeketshelo ka mɛtɛ le mi. Lushi lɔmɔtshi, nde akambadiya sawo dimɔtshi di’oma lo Tshoto y’Etangelo diɛnya ohomba waha mpekɔ.a Takakɛtshanya wanya wakamahombe ntakola naka lamboka nkɛlɛ. Yema yema, la sawo sɔ lo yimba ndo lo nɔmba Jehowa efula, lakayongaka l’akoka wa mbahemɛ nkɛlɛ kami. L’ekomelo, lakayobatizamaka oko Ɔmɛnyi wa Jehowa lo Ngɔndɔ ka nɛi 2000. Aha la tâmu, ambutshi ami waki l’ɔngɛnɔngɛnɔ w’efula.

WAHƆ WAMBOMOKONDJA: Ɛlɔ kɛnɛ, laya la ki ka lo yimba ndo la nkum’otema ka pudipudi lo mbeya dia handjosanya demba diami la didjoyadjoya ndo l’awui wa mindo. Dui tshɛ diasalami, oyadi l’olimu, lo nsanganya y’Akristo kana etena katatakɔkɔla demba, dimi mongaka l’ɔngɛnɔngɛnɔ w’efula. Lɛnaka akambo wa lo lɔsɛnɔ la sso di’ɔlɔlɔ.

Dimi kaloyaka Jehowa losaka lo woho wakandambisha ambutshi waki kopekɔ dia kimanyiyami. Ndo nto, lakakane yimba l’ɛtɛkɛta waki Yeso wele lo Joani 6:44 wata ɔnɛ: “Nduku untu leya ndja le mi, tshikima Papa lakantumi kûkutudi.” Lakanandema efula lo woho wakimi l’akoka wa nkalolɛ Jehowa nɛ dia nde akakotola oya le nde.

“Lakatayangaka dia monga la papa.”—MARCO ANTONIO ALVAREZ SOTO

ƆNƆNYI WA LÔTƆ: 1977

WODJA WA LÔTƆ: CHILI

ƆKƆNDƆ: OSE OLUI W’AMEMBI WA MISHIKI WA KƆLƆ

NSHI YAMI YAKETE: Lakodiama oma le mama la Punta Arenas, osomba ɔmɔtshi wa lo disɛnga dia Magellan suke la wekeke wa lo Amɛrikɛ wa lo sidɛ. Ambutshi ami wakakakitɔna etena kakimi l’ɛnɔnyi etanu ndo lakayaokaka okalema. Lakatayangaka papa kɛmɔtshi.

Mama akekaka Bible l’Ɛmɛnyi wa Jehowa ndo nde akatshɔka la mi lo nsanganya y’Akristo lo Mbalasa ka Diolelo. Koko, lakatonaka dia ntshɔ lo nsanganya ndo mbala efula lakalawɔka lo mboka etena kakatatatshɔka lɛkɔ. Etena kakimi l’ɛnɔnyi 13, lakatshike mbɔtɔ lo nsanganya y’Akristo.

L’etena kɛsɔ, lakatatɛ nanga mishiki ndo lakashihodia dia laki la diewo dia poma mishiki. Lam’akimi l’ɛnɔnyi 15, lakakɛnyaka mishiki wa kɔlɔ lo waa fɛtɛ, waa barɛ ndo l’ahole akina wa woshɛshɛ. Woho wakamɛkɛsanɛ l’apomi wa tomanamana, akayolomialomiaka nsaki kami ka mbeka mishiki. Lakatatɛ mbeka mishiki lo kalasa ya lo ngelo kaso yakawetshaka awui wa mishiki. Lam’akimi l’ɛnɔnyi 20, lakayonɔka la Santiago kapitalɛ ka lo wodja dia nyomoteka mishiki. Lakatetemala nkɛnya mishiki wa kɔlɔ kâmɛ l’asekami.

Lo tena sɔ tshɛ, lakadiɛnɛka la tokanyi ta ndjaoka okalema. Dia minya tokanyi tɔsɔ, lakanɔka kaandji kâmɛ l’olui w’asekami wakamɔsaka oko nkumbo kami. Laki la dionga di’ɔtɔmbɔki, diakɛnamaka oma l’ɛnamelo kami. Lakalɔtaka ahɔndɔ w’edima, lakadoya lɔlɛdu ndo lakadoya divo diakakome polo l’ɔkɔngɔ.

Mbala la mbala, l’ɔtɛ wa dionga diami lakakakatanaka efula l’apulushi. Mbala kɛmɔtshi, lam’akamadjɔ wanu lakalɔ la olui w’asondji wa kaandji wakatosolaka dimi l’angɛnyi ami. Asondji wa kaandji wakakɔmɔla wolo efula polo ndo ndjɔmbɔkɔla lowanga.

Koko, pâ kɛsɔ kakaye oma le angɛnyi ami asɔ wa ma ma. Lushi lɔmɔtshi, lakayeyaka dia oseka ami ekɔ lo nangana nde l’ɔngɛnyi ami wa ma ma l’edja k’ɛnɔnyi efula ndo angɛnyi ami tshɛ wakeyaka dui sɔ, koko vɔ kombutɛmi. Lakakɔmɔ wolo efula.

Lakakalola la Punta Arenas, lɛnɛ akamatotatɛ ndakanya mishiki ndo nkamba olimu w’opomi wa ngidalɛ. Ndo nto, lakatetemala nkɛnya ndo mbidja mishiki wa kɔlɔ wakatahomaka l’olui l’eshinga. Lakɛnana la Sussan, osekaseka ɔmɔtshi w’olangala waki l’ɛnɔnyi 26 ndo takadjasɛ kâmɛ. L’ɔkɔngɔ wa nshi mɔtshi, Sussan akayɛnaka dia mama kande aketawɔka wetshelo wa Losato l’osanto wakimi kombetawɔka. Nde akamumbola ate: “Ko, lasɔ kakɔna kele mɛtɛ?” Lakokadimola nte dimi mbeyaka dia wetshelo wa Losato l’osanto wekɔ kashi, koko dimi bu l’akoka wa kɛnya dikambo sɔ oma lo Bible. Koko, dimi mbeyaka onto lakoka kɛnyadiɔ. Lakawotɛ dia Ɛmɛnyi wa Jehowa wayokoka mbɛnya kɛnɛ kele mɛtɛ oma lo Bible. Oma lâsɔ, lakasale dui dimɔtshi diakimi kosala l’edja k’ɛnɔnyi efula, mbuta ate lakalɔmbɛ Nzambi dia nde kimanyiyami.

L’ɔkɔngɔ wa nshi ngana, lakɛnyi onto ɔmɔtshi amenda tɛɛ oko onto lambeya ndo lakawombola dia kana nde ekɔ Ɔmɛnyi wa Jehowa. Kânga mbakandanyange efula l’ɔtɛ wɛnamelo kami, la kɛtshi tshɛ nde akakadimola ambola ami wendana la wɔtwɛlɔ wa lo nsanganya lo Mbalasa ka Diolelo. Lakashikikɛ dia woho wakamahomana la nde aki okadimwelo wa dɔmbɛlɔ diami. Lakatshu lo Mbalasa ka Diolelo ndo lakadjasɛ l’okala w’ekomelo diaha onto mbeyami. Koko, anto efula wakatatɛ mbeyami nɛ dia lakatshɔka lo nsanganya etena kakimi dikɛnda. Vɔ wakanongola ndo wakakumbatɛ la ngandji tshɛ woho ɔnɛ wele lakayaoke lo wɔladi w’efula. Aki oko lambokalola l’etshumanelo. Etena kakamɛnyi onto ɔmɔtshi lakambetshaka Bible lam’akimi leke dikɛnda, lakɔlɔmbɛ dia sho nyomeka Bible nto.

WOHO WAKATSHIKITANYA BIBLE LƆSƐNƆ LAMI: Lushi lɔmɔtshi, lakadia Tukedi 27:11, divɛsa diata ɔnɛ: “On’ami, uyali kanga yimba, ongenyangenya utema ami.” Lakâmbe efula dia kanyiya ɔnɛ onto l’anyanya kokaka ngɛnyangɛnya Otungi w’andja w’otondo. Lakashihodia dia Jehowa aki Papa kami ka didjidji kakamatayangaka lɔsɛnɔ lami l’otondo.

Lakalangaka ngɛnyangɛnya Papa kami ka l’olongo ndo nsala lolango lande, koko laki mfumbe ka didjoyadjoya ndo ka wanu l’edja k’ɛnɔnyi efula. Lakashihodia wetshelo waki Yeso wele lo Mateu 6:24, wata ɔnɛ: “Nduku untu leya nkambela ewandji ehendi ulimu.” Oko wakamasalaka la wolo dia nsala etshikitanu, tɔndɔ diele lo 1 Koreto 15:33 diaki la shɛngiya ya wolo le mi, diɔ mbutaka ɔnɛ: ‘Lɔngɛnyi la kɔlɔ ndanyaka mbekelo y’ɛlɔlɔ.’ Lakashihodia ɔnɛ halotshika dionga dia kɔlɔ naka lakatetemala ntshɔ l’angɛnyi ami lɛnɛ atshɔwɔ ndo mbekesanɛ la wɔ. Dako dia lo Bible mbokɛmaka hwe: Lakɔshi yɛdikɔ ya wolo ya minya ɛngɔ tshɛ kakahombe takanyami.—Mateu 5:30.

Ntshika kɛnya mishiki wa kɔlɔ mbaki yɛdikɔ yoleki wolo tshɛ yakamahombe mbɔsa. Koko, l’ekimanyielo k’angɛnyi ami wa l’etshumanelo, lakayotshika dikambo sɔ. Lakatshike nnɔ wanu lo tshambandeko ndo didjoyadjoya. Lakanya nto divo diami, lakakɔlɔnga lɔlɛdu lami ndo lakatshike ndɔta ahɔndɔ w’edima. Etena kakamatɛ Sussan dia lolanga minya divo diami, nde akalange mbeya kɛnɛ katomosalaka lo Mbalasa ka Diolelo. Nde akate ate: “Langa ntshɔ la yɛ dia tenda kɛnɛ tshɛ katonyosalaka lo Mbalasa ka Diolelo!” Nde akangɛnangɛna kɛnɛ kakandatɛnaka lɛkɔ ndo kombeta edja nde akatatɛ mbeka Bible. L’ekomelo, dimi la Sussan takatotshukanaka laka lɛɛta. Lo 2008, takabatizama oko Ɛmɛnyi wa Jehowa. Tekɔ l’ɔngɛnɔngɛnɔ dia nkambɛ Jehowa kâmɛ la mama kami.

WAHƆ WAMBOMOKONDJA: Lambohandɔ oma lo andja wa kɔlɔ ɔnɛ wele l’ɛngɛnɔngɛnɔ wa kashi ndo oma le angɛnyi wa dungi pende. Lakatetemala nanga mishiki, koko lɔsɔnaka mishiki wa mpokamɛ. Dimi kambaka l’akambo wakakomɛ dia nkimanyiya ase nkumbo kami ndo anto akina, djekoleko ɛlɔngɔlɔngɔ l’esekaseka. Dimi kombolaka mbakimanyiya dia vɔ nshihodia ɔnɛ awui efula wakoka andja ɔnɛ tosha mbeyaka mɛnama oko amɛna, koko l’ekomelo vɔ wekɔ paka “uku diango dia mbikadja.”—Filipi 3:8.

Lakayokondjaka angɛnyi wa kɔlamelo l’etshumanelo k’Akristo, lɛnɛ ele ngandji ka mɛtɛ ndo wɔladi. Ndo nto, lo ndjasukanya la Jehowa, nde akayongaka Papa kami.

[Nɔte ka l’ɛse ka dikatshi]

[Efundelo wa l’etei w’odingɔ wa lo lɛkɛ 13]

“Lakakoke nkalolɛ Jehowa nɛ dia nde akakotola oya le nde”