OKOTSHA

Woho wa kandola ekakatanu wendana l’awui wa falanga

Lo 1 Koreto 6:1-8, ɔpɔstɔlɔ Paulo akatɛkɛta dikambo dia dombo dionga lam’asa ambetawudi. Nde akɛnya lonyangu lande etena kakandoke dia Akristo amɔtshi wa la Kɔrɛtɔ ‘wakatshɔka tofunda asekawɔ Akristo lo tuminadi ta anto wa kɔlɔ.’ (Divɛsa 1) Paulo akɛnya ɛkɔkɔ wa shikaa wahahombe Akristo ntshɔ tofundana lo tuminadi ta lɛɛta, koko vɔ pombaka kandola ekakatanu awɔ l’etshumanelo. Nyɛsɔ tɔsɛdingole ɛkɔkɔ ɛmɔtshi wasukɛ dako diakasambiyama sɔ kele toyende akambo amɔtshi wele dako sɔ haleke mendana la wɔ.

Naka tekɔ l’okakatanu l’osekaso ombetawudi l’awui wa falanga, kete ntondotondo sho pombaka nyanga woho wa kandola okakatanu akɔ lo ndjela kanyi yaki Jehowa koko aha kanyi yaso hita. (Tukedi 14:12) Oko wakadite Yeso, ndeka dimɛna sho kandola okakatanu akɔ esadi la ntondo ka vɔ ndjokoma woke. (Mateu 5:23-26) Lonyangu ko, Akristo amɔtshi ndjongaka la kɛlɛ k’efula polo lo vɔ ntshɔ tofunda asekawɔ laka lɛɛta. Paulo akate ate: “Dikambu so dieko kolo l’atei anyu, ne dia nyu nyambosongwanela.” Lande na? Ɔkɔkɔ ɔmɔtshi wa woke ele dikambo sɔ mbeyaka ndanya lokumu l’ɔlɔlɔ l’etshumanelo ndo la Nzambi katɛmɔlaso. Omalɔkɔ, sho pombaka kana yimba dimɛna la dimbola diaki Paulo nɛ: “Undi, taki ololo dia nyu mbetawo mbikike kolo?”​—Divɛsa 7.

Paulo akate nto dia Nzambi akasha etshumanelo yɛdikɔ mɔtshi ya dimɛna efula ya kandolaka ekakatanu. Dikumanyi wekɔ Akristo wambokondja lomba oma lo ewo kele la wɔ ka akambo wa mɛtɛ wa lo Bible ndo Paulo mbutaka dia vɔ wekɔ la akoka wa “nsambula akambu l’atei” w’anangɛwɔ “lu akambu wa lumu lone.” (Divɛsa 3-5) Yeso akɛnya dia ekakatanu wa weke wele oko emamatanya ndo okadi pombaka kandɔma lo ndjela wanya asato: dia ntondo, lo nyanga dia kandola dikambo sɔ lam’asawɔ vɔ ahende ato; dia hende, naka hawodikandodi ko vɔ mbɔsa ɔmɛnyi ɔtɔi kana ɛmɛnyi ehende; ndo dia sato, naka hawodikandodi lo nna dia hende, ko vɔ mbewoya etshumanelo, mbuta ate dikumanyi.​—Mateu 18:15-17.

Lo mɛtɛ, dikumanyi dia Akristo kema ambewi w’ɛlɛmbɛ wa lɛɛta kana tomanyi l’awui w’okanda ndo ɔkɛndɛ awɔ bu wa sala dikambo sɔ. Vɔ hawodje ɛlɛmbɛ wendana la woho wa kandola ekakatanu wa falanga wele lam’asa Akristo. Koko, vɔ salaka la wolo dia kimanyiya asekawɔ Akristo dia vɔ kamba la alako w’oma l’Afundelo ndo kandola okakatanu awɔ lo yoho ya ki. Etena kahomanawɔ l’akambo w’ohokosanu efula, vɔ mbeyaka mimbola omendji w’otshimbedi kana fundɛ Bɛtɛlɛ. Koko, ekɔ awui amɔtshi wahendana la dako diakasha Paulo. Naa awui amɔtshi l’atei awɔ?

Lo tena dimɔtshi, mbeyaka monga ohomba ndo ɛlɛmbɛ wa lɛɛta nɔmbaka dia ntshɔ laka lɛɛta dia kondja lotshungɔ lɔmɔtshi aha l’oyango wa funda osekaso Okristo. Ɛnyɛlɔ, mbeyaka monga ohomba ntshɔ laka lɛɛta dia kondja mukanda w’odiakelo wa diwala, kondja lotshungɔ la tshikala la ana, shikikɛ falanga yahomba onto kimɔka dia wodielo w’ana, dia lɛɛta tofutaka falanga mɔtshi, dia lɛɛta mbisha tɛstama nɛmɔ ndo awui akina. Lo tena dimɔtshi, Okristo ɔmɔtshi mbeyaka mɛna dia ekɔ ohomba tofunda osekande lakôfunde laka lɛɛta dia nde ndjakokɛ.a

Naka enongo ɛsɔ hawofundami l’oyango wa ndɔshana l’onto laka lɛɛta, kete ondo vɔ hawɔlɔshana mɛtɛ la kanyi yele lo dako diakasambiyama diakasha Paulo.b Koko, le Okristo tshɛ, kɛnɛ koleki ele okidiamelo wa lokombo la Jehowa ndo wɔladi la kâmɛ ka l’etshumanelo. Ambeki waki Kristo ndekaka mbeyama oma lo ngandji kele lam’asawɔ ndo “ngandji . . . hayangi paka lulangu landi.”​—1 Koreto 13:4, 5; Joani 13:34, 35.

[Nɔtɛ ya l’ɛse ka dikatshi]