Yasukanya la Nzambi

Shushi yatosalaka nshi tshɛ kɛnɛ kele ɔlɔlɔ

Etatelu 18:22-32

SHI sho kotwamaka la waonga anɛ: Losembwe, ɔlɔlɔ ndo dionga diaha la shɔnɔdi? Sho anto takotɔ la nsaki k’anto tosalɛ akambo la losembwe. Lonyangu ko, ɛlɔ kɛnɛ akambo waha la losembwe wambofulanɛ. Koko, ekɔ Shushi mɔtshi yahombaso ndjaɛkɛ le nde, mbuta ate Jehowa Nzambi. Nde salaka nshi tshɛ kɛnɛ kele ɔlɔlɔ. Dikambo sɔ diakɛnama hwe lo sawo dimɔtshi diakasawola Jehowa nde l’Abarahama diofundami lo Etatelu 18:22-32.a

Etena kakatɛ Jehowa Abarahama ɔnɛ nde ekɔ lo tatshu dia tenda akambo waketaka la Sɔdɔma la Ngɔmɔra, Abarahama akayakiyanya lo kɛnɛ kendana la ekokelo k’anto w’ɔlɔlɔ wakadjasɛka lɛkɔ, mbidja ndo Lɔta k’ɔnaki ɔnango. Abarahama akasɛngasɛnga Jehowa ate: “Undi, we ayudiaka antu w’ololo kame la antu wa kolo? Ku naka antu w’ololo akumi atanu weko l’usumba, we ayulanya usumba ako? We hashimbela usumba ne dia antu w’ololo akumi atanu weli loko?” (Divɛsa 23, 24) Nzambi akate dia nde ayoshimbɛ osomba naka anto w’ɔlɔlɔ 50 wekɔ lɔkɔ. Abarahama akasɛngasɛnga Jehowa mbala tshanu lo kitshakitsha lofulo polo l’anto dikumi. Mbala tshɛ, Nzambi akatɛka Abarahama dia nde holanya osomba naka nde tana anto w’ɔlɔlɔ efula lɛkɔ.

Onde Abarahama akame nde la Nzambi? Ndooko! Kɛsɔ kotɛnya ɔnɛ Abarahama ekɔ l’otako w’efula. Wondjo wa dui waki Abarahama akɛnyaka wɔma wɔsɔhanyemi la dilɛmiɛlɔ ndo okitshakitsha waki la nde. Nde akate lo dikambo diande ate: “Dimi ako leli ditshu la utuku.” (Divɛsa 27, 30-32) Ndo nto, ɛtɛkɛta waki Abarahama wakɛnyaka wɛkamu waki la nde lo losembwe laki Jehowa. Abarahama akate dia Nzambi kokoka ‘ndjala kânga yema’ la kanyi ya ndanya anto wa kɔlɔ kâmɛ l’anto w’ɔlɔlɔ. Owandji wa nkumbo wa kɔlamelo ɔsɔ akokiya lo wondjo ande wa dui wɛkamu waki la nde w’ɔnɛ ‘Shushi ya nkɛtɛ tshɛ ayosala paka kɛnɛ kele ɔlɔlɔ.’​—Divɛsa 25.

Onde kɛnɛ kakate Abarahama kaki mɛtɛ? Eelo ndo kema. Nde kombuta mɛtɛ lo fɔnya ɔnɛ anto w’ɔlɔlɔ kânga dikumi wayotanema la Sɔdɔma la Ngɔmɔra. Koko nde akate mɛtɛ lo woho wakandate ɔnɛ Nzambi hakoke pondjo ‘ndjaka anto w’ɔlɔlɔ kâmɛ l’anto wa kɔlɔ.’ Etena kakayolanyaka Nzambi esomba ɛsɔ wa kɔlɔ, paka onto ɔlɔlɔ Lɔta l’anande ahende wa wamato mbakashimbamɛ oma l’ekimanyielo ka waa andjelo.​—2 Petero 2:7-9.

Wetshelo akɔna wakondjaso lo kɛnɛ kendana la Jehowa oma l’ɔkɔndɔ ɔsɔ? Lo mbewoya Abarahama kanyi yaki la nde dia tenda kɛnɛ kaketaka l’esomba ɛsɔ, Jehowa aki lo mbombola kanyi yande. Oma lâsɔ, nde akahokamɛ Abarahama w’ɔngɛnyi ande la solo dia lotutsha etena kakandakɛnɛmɔlaka kɛnɛ kaki l’otema ande. (Isaya 41:8) Kɛsɔ tetshaka dimɛna ɔnɛ Jehowa ekɔ Nzambi kele l’okitshakitsha kasha ekambi ande wa la nkɛtɛ nɛmɔ! Mbokɛmaka hwe dia tekɔ l’ɛkɔkɔ wa shikaa wa sho kitsha wɛkamu aso tshɛ le Jehowa, Shushi yatosalaka nshi tshɛ kɛnɛ kele ɔlɔlɔ.

[Nɔte ka l’ɛse ka dikatshi]

[Osato wa lo lɛkɛ 20]

Abarahama akasɛngasɛnga Jehowa lo dikambo dia Sɔdɔma la Ngɔmɔra