Wakashola diangɔ dia nɛmɔ diakashɛma

ONDE wɛ atasholaka ɛngɔ kɛmɔtshi ka nɛmɔ lo dihole diakiyɛ kɔfɔnyaka? Lo Ngɔndɔ ka sato 27, 2005, Ivo Laud, Ɔmɛnyi wa Jehowa wa la Estonie akashola ɛngɔ kɛmɔtshi ka nɛmɔ. Nde akakimanyiyaka Alma Vardja, wonyande Ɔmɛnyi wa Jehowa w’osombe dia mbitola tshombotombo yande y’omusu. Etena kakawatolaka ehele ka l’andja, vɔ wakɛnyi ɛtshi ka dibaya kofe lɛkɛ lɔmɔtshi la ekundji. Lam’akawanya dibaya sɔ, vɔ wakɛnyi wosho wofame la ɛtshi ka dibaya kekina. Wosho akɔ waki la woke wa satimɛtɛlɛ 10, otale wa mɛtɛlɛ 1, 2 ndo ɔhɔngɔ wa satimɛtɛlɛ 10. 1) Wakashɛ diangɔ dia nɛmɔ lo dihole sɔ! Diangɔ diakɔna diaki lɔkɔ? Akadishɛ lɛkɔ?

Etshumu efula wakɔmbama dimɛna l’akatshi wa keka mbaki lɛkɔ. 2) Etshumu akɔ waki la ekanda wa Ɛmɛnyi wa Jehowa, djekoleko asawo wa wekelo wa Tshoto y’Etangelo, mbidja ndo amɔtshi w’oma l’ɔnɔnyi wa 1947. 3) Ekanda akɔ wakasangɔma dimɛna dimɛna l’anya l’ɔtɛkɛta w’ase Estonie. Etshumu ɛmɔtshi waki la tolembetelo takɛnyaka onto lakashɛ etshumu akɔ lɛkɔ. Ɔsɔ aki ekanda waki la ambola wakawokaka Villem Vardja, omi aki Alma l’etena kakawolomboshaka. L’atei w’awui wakawatane mbaki ndo ɛnɔnyi wakandetsha lo lokanu. Lande na kakandadjama lo lokanu?

Ɔnangɛso Villem Vardja aki l’ɛkɛndɛ l’etshumanelo ka Tartu ndo l’ɔkɔngɔ diko l’etshumanelo ka Otepää lo wodja wa Estonie waki lo Union des républiques socialistes soviétiques w’edjedja. Mɛnamaka dia nde akeke akambo wa mɛtɛ wa lo Bible yema tshitshɛ la ntondo ka Ta dia hende dia l’andja w’otondo. Ɛnɔnyi engana eto l’ɔkɔngɔ, lo Ngɔndɔ ka dikumi l’ahende 24, 1948, lowandji la waa Kɔministɛ lakande ɔnangɛso Vardja l’ɔtɛ w’awui wendana l’ɔtɛmwɛlɔ. Apulushi wa lo woshɛshɛ wakosandja ndo wakosoya dia nde mbatɛ nkombo ya wanyande ambetawudi. L’ɔkɔngɔ wa vɔ tona mbosha diaaso dia nde ndjatɛkɛtɛ lo tuminadi, wakofundɛ ɛnɔnyi dikumi wa lokanu lo mpango ya nkanu ya la Russie.

Villem Vardja akatshikala la kɔlamelo le Jehowa polo ndo lam’akandavu lo Ngɔndɔ ka sato 6, 1990. Wadɛnde kombeyaka dia nde akashɛ ekanda. Ondo nde akasale dikambo sɔ nɛ dia nde konangaka dia wadɛnde ndjonga l’onongo naka wowolombosha lo tuminadi. Lande na kakandahombe mbishɛ ekanda ɛsɔ? Nɛ dia apulushi wakawelɛka ɔnɛ waa KGB wakɔtɔka lo mvudu y’Ɛmɛnyi wa Jehowa la shashimoya dia nyanga abuku w’ɔtɛmwɛlɔ. Ondo ɔnangɛso Vardja akashɛ ekanda ɛsɔ dia ndjashikikɛ dia asekande ambetawudi wayonga la ekanda k’ɔlɔlɔ ka mbo ya ndɛ ya lo nyuma naka apulushi wa KGB wambɔsa ekanda ekina tshɛ. Wakashola ekanda ekina yema la ntondo ka lâsɔ, lo nshi y’ɔwɔ ya lo 1990. Ekanda ɛmɔtshi wakashɔma lo sidɛ ka Estonie. Villem Vardja mbakashɛ ndo ekanda ɛsɔ.

Lande na kelɛso ekanda ɛsɔ ɔnɛ diangɔ dia nɛmɔ? Nɛ dia efundelo w’amɛna wa l’anya ndo wakashɛma dimɛna ɛsɔ mɛnyaka lowando laki la Ɛmɛnyi wa Jehowa lo mbo ya ndɛ ya lo nyuma yaki la wɔ l’etena kɛsɔ. (Mat. 24:45) Onde wɛ ekɔ la lowando lo mbo ya ndɛ ya lo nyuma yalongolanyu lo ngelo kanyu? L’atei wa mbo ya ndɛ shɔ mbele ndo Tshoto y’Etangelo ya l’ɔtɛkɛta w’ase Estonie ndo l’ɛtɛkɛta ekina ndekana 170.