Ɛlɔngɔlɔngɔ l’esekaseka, nyofudia nsaki kele
la nyu ka kambɛ Jehowa
“Uhoki Utungi aye lu nshi yaye y’olongo a pami.”—UND. 12:1.
1. Kakɔna kakawadjangɛ ana w’akɛnda wa lo Isariyɛlɛ?
AMBETA ɛnɔnyi oko 3 500, Mɔsɛ ɔprɔfɛta waki Jehowa akadjangɛ ɛlɔmbɛdi la dihangamende dia l’Isariyɛlɛ ate: “Kanyusanganya antu, apami, amantu, ana wa tshitshe . . . dia vo mbuka la mbeka lama mbuka [Jehowa, Nzambi k]anyu, woma, la dia nama ololo dia ntsha aui tshe w’elembe ene.” (Euh. 31:12) Tolembete dia wakadjangɛ apami, wamato ndo ana w’akɛnda dia vɔ sanganaka dia ntɛmɔla Jehowa. Eelo, ndo ɛlɔngɔlɔngɔ l’esekaseka mbaki l’atei w’anto wakawadjangɛ dia mpokamɛ, mbeka ndo ndjela ɛlɔmbwɛlɔ kaki Jehowa.
2. Ngande wakɛnya Jehowa dia nde ndjakiyanyaka dikambo di’ɛlɔngɔlɔngɔ l’esekaseka wa l’etshumanelo k’Akristo ka lo ntambe ka ntondo?
2 Lo ntambe ka ntondo, Jehowa akatetemala ndjakiyanya dikambo dia ɛlɔngɔlɔngɔ l’esekaseka wawoka wɔma. Ɛnyɛlɔ, nde akasambiya ɔpɔstɔlɔ Paulo dia mfunda alako wakendanaka la ɛlɔngɔlɔngɔ l’esekaseka lo ekanda ɛmɔtshi wakandatomɛ tshumanelo. (Adia Efeso 6:1; Kolosai 3:20.) Ɛlɔngɔlɔngɔ l’esekaseka wakakambe l’alako asɔ wakafudia lowando laki la wɔ otsha le Shɛso lele l’olongo loludi la ngandji ndo nde akâtshɔkɔla.
3. Ngande wɛnya ɛlɔngɔlɔngɔ l’esekaseka wa nshi nyɛ nsaki kele la wɔ ka nkambɛ Nzambi?
3 Onde ndo nyu ɛlɔngɔlɔngɔ l’esekaseka wa lo nshi yaso nyɛ mbalɔmbawɔ dia nsangana kâmɛ dia ntɛmɔla Jehowa? Eelo! Ɔnkɔnɛ, ekɔ dui di’ɔngɛnɔngɛnɔ etena kɛna ekambi waki Nzambi tshɛ woho wakitanyiya ɛlɔngɔlɔngɔ l’esekaseka wa l’andja w’otondo wakambɛ Nzambi dako diaki Paulo nɛ: “Tukananeli untu l’untu dia ntomboshanya lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki. Tuleki ntsha okone, ne dia nyambena nyati: lushi lako laya suki.” (Heb. 10:24, 25) Lâdiko dia lâsɔ, ana w’akɛnda efula sambishaka lokumu l’ɔlɔlɔ la Diolelo dia Nzambi kâmɛ l’ambutshi awɔ. (Mat. 24:14) Ndo dia mɛnya ngandji k’oma k’ɛse otema kokawɔ Jehowa, ɔnɔnyi tshɛ nunu efula di’ɛlɔngɔlɔngɔ l’esekaseka nongolaka batismu ndo tshɔkwamaka l’ɔtɛ wakomawɔ ambeki wa Kristo.—Mat. 16:24; Mako 10:29, 30.
Nyetawɔ leeta lambowonyosha kakianɛ
4. La ɛnɔnyi engana wahomba ɛlɔngɔlɔngɔ l’esekaseka ndjetawɔ leeta la nkambɛ Nzambi?
4 Undaki 12:1 mbutaka ɔnɛ: “Okone uhoki utungi aye lu nshi yaye y’olongo a pami.” Ɛnɔnyi engana wahomba ɛlɔngɔlɔngɔ l’esekaseka nkotsha dia vɔ ndjetawɔ leeta la la wangasanu la ntɛmɔla Jehowa ndo mbokambɛ? Afundelo hawote lofulo l’ɛnɔnyi shikaa. Ɔnkɔnɛ, tanyotshimbatshimbake dia mpokamɛ Jehowa ndo mbokambɛ lo mfɔnya ɔnɛ nyeke akɛnda efula. Oyadi ɛnɔnyi akɔna wele la nyu, tambonyokeketsha dia mbetawɔ leeta lɔsɔ aha la ntshimbatshimba.
5. Ngande wakoka ambutshi nkimanyiya anawɔ dia vɔ mpama lo nyuma?
5 Efula ka l’atei anyu wakakimanyiyama dia mpama lo nyuma oma le ombutshi ɔmɔtshi kana wakɔ ahende. Ngasɔ mbafɔnanyu la Timɔtɛ kaki lo nshi yakafundamaka Bible. Etena kakinde eke dikɛnda, Eyunikɛ wa nyango la Lɔyi ka tshɛnde wakawetsha efundelo w’ekila. (2 Tim. 3:14, 15) Ondo ambutshi anyu wekɔ lo nyolowanya lo yoho ya ngasɔ, lo nyetshaka Bible, lo nɔmbaka kâmɛ la nyu, lo ntshɔka la nyu lo nsanganya ya l’etshumanelo ndo lo nsanganya ya weke yasala ekambi waki Nzambi ndo lo sambishaka kâmɛ la nyu. Lo mɛtɛ, woho wanyetsha ambutshi anyu mboka yaki Nzambi ekɔ ɔkɛndɛ w’ohomba efula wakawalongola oma le Jehowa ndamɛ. Onde nyekɔ la lowando lo ngandji kanyokawɔ ndo lo woho wayakiyanyawɔ dikambo dianyu?—Tuk. 23:22.
6. a) Lo ndjela Osambu 110:3, woho w’ɔtɛmwɛlɔ akɔna wangɛnyangɛnya Jehowa? b) Kakɔna kayangaso nsɛdingola?
6 Koko l’ɛnyɛlɔ ka Timɔtɛ, etena katanyole, Jehowa nangaka dia nyu ‘mbeya ele lolango la Nzambi l’ɔlɔlɔ, letawɔnde ndo la kokele.’ (Romo 12:2) Naka nyu nsala ngasɔ, kete nyayosha lonya l’elimu wa l’etshumanelo, aha l’ɔtɛ walanga ambutshi anyu dia nyu nsala ngasɔ, koko l’ɔtɛ walanganyu nsala lolango laki Nzambi. Naka nyu kambɛ Jehowa la lolango lanyu tshɛ, kete dui sɔ diayowɔngɛnyangɛnya. (Osam. 110:3) Ko ngande wakokanyu mɛnya dia nyu nangaka mfudia nsaki kele la nyu ka mpokamɛ Jehowa ndo ndjela ɛlɔmbwɛlɔ kande? Tayanga nsɛdingola toho tosato t’ohomba takokanyu nsala dui sɔ. Toho takɔ ele wekelo, dɔmbɛlɔ ndo lɔkɛwɔ la dimɛna. Nyɛsɔ tɔsɛdingole awui asɔ lo ɔmɔmɔ.
Nyɔshi Jehowa oko onto la mɛtɛ
7. Ɛnyɛlɔ kakɔna kakatshike Yeso lo kɛnɛ kendana la wekelo wa Afundelo, ndo kakɔna kakôkimanyiya dia nsala ngasɔ?
7 Yoho ya ntondo ya mɛnya dia nyu nangaka mfudia nsaki kele la nyu ka kambɛ Jehowa ele lo salaka wadielo wa Bible wa lushi la lushi. Naka nyu mbadiaka Ɔtɛkɛta wa Nzambi mbala la mbala, kete nyayokotsha ehomba anyu wa lo nyuma ndo nyayokondja ewo k’oshinga wolo k’oma lo Bible. (Mat. 5:3) Yeso akanyotshikɛ ɛnyɛlɔ k’ɔlɔlɔ. Lo diaaso dimɔtshi, etena kakinde l’ɛnɔnyi 12, ambutshi ande wakotane lo tɛmpɛlɔ “udjashi l’atei w’embetsha, uka aui awo la awambula embula.” (Luka 2:44-46) Etena kakinde eke dikɛnda, ko Yeso amboshilaka monga la nsaki ka wolo ka mbadiaka Afundelo ndo mbashihodia. Kakɔna kakôkimanyiya dia nde nsala dui sɔ? Aha la tâmu, Mariya wa nyango ndo Yɔsɛfu ya she ka lôdia wakasale dikambo di’ohomba efula. Vɔ waki ekambi waki Nzambi ndo waketshaka Yeso awui waki Nzambi oma ko dikɛnda diande.—Mat. 1:18-20; Luka 2:41, 51.
8. a) Ɛnɔnyi engana wahomba monga la ana dia ambutshi ntatɛ mbaetsha dia vɔ nanga Ɔtɛkɛta wa Nzambi? b) Kɔndɔla dikambo dimɔtshi diakete diɛnya dia ekɔ ohomba mbetshaka ana oma ko tɔkɛndakɛnda tawɔ.
8 Woho akɔ wâmɛ mbele, ɛlɔ kɛnɛ ambutshi woka Nzambi wɔma mbetawɔka dia ekɔ ohomba mbetsha anawɔ dia vɔ nanga akambo wa mɛtɛ wa lo Bible oma ko tɔkɛndakɛnda tawɔ. (Euh. 6:6-9) Kɛsɔ mbakasale kadiyɛso k’Okristo kelɛwɔ Rubi yema tshitshɛ l’ɔkɔngɔ wa nde mbota Joseph, ɔnande l’enondo. Nde akawadiɛka Buku di’ɛkɔndɔ wa lo Bible lushi tshɛ. Etena kakandayolaka, nyango akôkimanyiya dia nde nkimɛ avɛsa efula. Onde Joseph akakondja wahɔ oma l’olakanyelo ɔsɔ? Yema tshitshɛ l’ɔkɔngɔ wa nde mbeya ntɛkɛta, nde akakɔndwɛka anto ɛkɔndɔ wa lo Bible l’ɛtɛkɛta ande hita. Ndo etena kakandakotsha ɛnɔnyi etanu, nde akasha sawo diande dia ntondo lo Kalasa k’olimu wa teokrasi.
9. Lande na kele ekɔ ohomba mbadiaka Bible ndo kanaka yimba la kɛnɛ kadianyu?
9 Dia ndeka mpama lo nyuma, nyu ɛlɔngɔlɔngɔ l’esekaseka pombaka monga la mbekelo ka mbadiaka Bible lushi la lushi polo etena kayonyokoma epalanga. (Osam. 71:17) Ngande wakoka wadielo wa Bible nyokimanyiya dia nyu mpama? Nyolembete kɛnɛ kakate Yeso lo dɔmbɛlɔ dimɔtshi diakandalɔmbɛ She ate: “Lumu la pundju lone, eli [weke dia] nkêya, weme [Nzambi k]a mete, la Jesu Kristu, lakayatumi.” (Joa. 17:3) Lo mɛtɛ, naka nyu nkondja ewo k’efula kendana la Jehowa, kete nyayoleka mbɔ̂sa oko Onto la mɛtɛ ndo nyayofudia ngandji kawokanyu. (Heb. 11:27) Ɔnkɔnɛ, etena kadianyu Bible, nyokambe la diaaso sɔ dia mbeya akambo efula wendana la Jehowa. Nyoyambole ɔnɛ: ‘Wetshelo akɔna wakondjami oma l’ɔkɔndɔ ɔnɛ lo kɛnɛ kendana la Jehowa? Ngande wɛnya divɛsa dia lo Bible nɛ dia Nzambi mbokakami ngandji ndo ndjakiyanyaka dikambo diami?’ Mbɔsa etena ka kanaka yimba la ambola wa ngasɔ ayonyokimanyiya dia mbeya tokanyi ndo nsaki yele la Jehowa lo kɛnɛ kanyɔlɔmbande. (Adia Tukedi 2:1-5.) L’ɛnyɛlɔ k’ɔlɔngɔlɔngɔ Timɔtɛ, ‘nyayetawoyama’ kɛnɛ kekanyu oma l’Afundelo ndo nyayotshutshuyama dia ntɛmɔla Jehowa l’etema anyu tshɛ.—2 Tim. 3:14.
Woho wanyokimanyiya dɔmbɛlɔ dia mfudia ngandji kokanyu Jehowa
10, 11. Ngande wakoka dɔmbɛlɔ nyokimanyiya dia mfudia nsaki kele la nyu ka nkambɛ Nzambi?
10 Yoho ya hende yakokanyu mfudia nsaki kele la nyu ka kambɛ Jehowa l’etema anyu tshɛ ele lo tshimbo y’alɔmbɛlɔ. Osambu 65:2 totɛka ɔnɛ: ‘Wɛ latokaka dɔmbɛlɔ le, le yɛ mbayoya anto wa weho tshɛ.’ Kânga l’etena kaki sheke yakadje Nzambi l’ase Isariyɛlɛ yeke la nɛmɔ, angɛndangɛnda wakayaka lo tɛmpɛlɔ wakayasukanyaka la Jehowa lo dɔmbɛlɔ. (1 Khum. 8:41, 42) Nzambi bu la shɔnɔdi. Wanɛ wakitanyiya wadjango ande wekɔ l’eshikikelo dia nde ayowahokamɛ. (Tuk. 15:8) Lo mɛtɛ, ndo nyu ɛlɔngɔlɔngɔ l’esekaseka mbele l’atei ‘wa anto wa weho tshɛ’ asɔ.
11 Oko wadieyanyu, lɔngɛnyi la shikaa mpikama lo asawo w’ɛlɔlɔ. Ondo nyu ngɛnangɛnaka mbutɛ angɛnyi anyu amɔtshi wa ma ma tokanyi, ekiyanu ndo nsaki yele la nyu. Woho akɔ wâmɛ mbele, nyu sawolaka la Otungi anyu a Woke etena kasalanyu alɔmbɛlɔ w’oma k’ɛse otema. (Fil. 4:6, 7) Nyosawolake la Jehowa wate kana oko onto ladiholɛ ambutshi wa ngandji kana angɛnyi wa ma ma otema. Lo mɛtɛ, woho walɔmbanyu Jehowa mbɔtɔnɛka efula la woho wawɔsanyu. Nyayɛna dia lo yɛdikɔ yayokeketala lɔngɛnyi lasanyu la Jehowa mbayonyoleka nsala alɔmbɛlɔ w’oma k’ɛse otema.
12. a) Lande na kele alɔmbɛlɔ w’oma k’ɛse otema hawendana tsho l’ɛtɛkɛta? b) Kakɔna kayonyokimanyiya dia nyu nshikikɛ ɔnɛ Jehowa ekɔ la suke la nyu?
12 Koko, tanyohɛke dia dɔmbɛlɔ di’oma k’ɛse otema hendana tsho l’ɛtɛkɛta. Diɔ mendanaka ndo la nsaki yanyu y’oma k’ɛse otema. Etena kalɔmbanyu Jehowa, nyowɛnya la wangasanu tshɛ dia nyu mbolangaka, mbɔlɛmiyaka efula ndo ndjaɛkɛka le nde. Naka nyayoshihodia woho wakadimola Jehowa alɔmbɛlɔ anyu, kete nyayoleka nshikikɛ dia “[Jehowa] eli lasuki la wane tshe watuwetaka.” (Osam. 145:18) Eelo, Jehowa ayoyasukanya la nyu ndo ayonyokeketsha dia nyu ndɔshana la Diabolo ndo nsala ɛsɔnwɛlɔ w’amɛna lo lɔsɛnɔ.—Adia Jakoba 4:7, 8.
13. a) Ɛtshɔkɔ akɔna wakakondja kadiyɛso kɛmɔtshi l’ɔtɛ wakandɔtɔ lɔngɛnyi la Nzambi? b) Ngande wakoka lɔngɛnyi lasanyu la Nzambi nyokimanyiya dia nyu ntondoya tɔsɛngiya t’oma le asekanyu?
13 Nyɛsɔ tɔsɛdingole woho wakakondja Cherie wolo l’ɔtɛ wakinde la diɔtɔnganelo nde la Jehowa. Etena kakandɔtɔka lo kalasa ya sekɔndɛrɛ, wakawandolaka efula nɛ dia nde akakotshaka lo kalasa ndo akakitaka pidi l’awui wa tɔkɛnyɔ. Etena kakandashidiya kalasa ya sekɔndɛrɛ, ewandji wa lɛɛta wakawosha falanga dia nde tɔtɔ kalasa ya lâdiko. Cherie mbutaka ɔnɛ: “Kɔkɔ ate kwɛ tshike lakalongola falanga shɔ, ndo embetsha l’asekami ambeki wakatshutshuya dia dimi ndjilongola.” Koko nde akɛnyi dia mbɔtɔ kalasa ya lâdiko ayowɔlɔmba dia nde mbetshaka wenya efula dia mbekaka ndo dia nɔngɔsɔlaka awui wa tɔkɛnyɔ, ndo nde hatonga nto la wenya efula wa mbetshaka l’olimu wa Jehowa. Kakɔna kakasale Cherie? Nde mbutaka ate: “L’ɔkɔngɔ wa nɔmba Jehowa, lakatone falanga yakawambisha shɔ ndo lakatatɛ nkamba olimu w’ombatshi mboka wa pondjo.” L’etena kɛsɔ, nde akakambe oko ombatshi mboka l’edja k’ɛnɔnyi etanu. Nde mbutaka ate: “Halonyange kânga yema. Lekɔ l’ɔngɛnɔngɛnɔ efula lo woho weyami dia lakɔshi yɛdikɔ yangɛnyangɛnya Jehowa. Lo mɛtɛ, naka nyu mbetsha Diolelo lo dihole dia ntondo, kete wayonyokotshɛ diangɔ dikina tshɛ.”—Mat. 6:33.
Monga la lɔkɛwɔ la dimɛna mɛnyaka dia nyekɔ la “utema a pudipudi”
14. Lande na kele lɔkɛwɔ lanyu la dimɛna lekɔ ohomba efula lo washo wa Jehowa?
14 Yoho ya sato yakokanyu mɛnya dia nyekɔ lo nkambɛ Jehowa l’etema anyu tshɛ ele oma lo lɔkɛwɔ lanyu. Jehowa tshɔkɔlaka ɛlɔngɔlɔngɔ l’esekaseka walama lɔkɛwɔ la pudipudi. (Adia Osambu 24:3-5.) Ɔlɔngɔlɔngɔ Samuɛlɛ akatone dia monga la lɔkɛwɔ la kɔlɔ laki la ana w’apami w’ɔlɔmbɛdi a lâdiko Eli. Anto tshɛ wakɛnyi lɔkɛwɔ la dimɛna laki la Samuɛlɛ. Bible mbutaka ɔnɛ: “Samuele akatakolamelaka mbula. Ndi aki dikenda di’ololo le [Nzambi] ndu le antu.”—1 Sam. 2:26.
15. Naa ɛkɔkɔ ɛmɔtshi walamanyu lɔkɛwɔ la dimɛna?
15 Lo ndjela kɛnɛ kakate Paulo, tekɔ lo nsɛna l’andja woludi l’anto wayalanga, wele akanga w’etako, wahakitanyiya ambutshi awɔ, wahokana losaka, waha la kɔlamelo, w’esehe, wele la ndjadiya ndo wele anangi w’ɛngɛnɔngɛnɔ lo dihole dia monga anangi wa Nzambi. (2 Tim. 3:1-5) Omalɔkɔ, mbeyaka monga tshondo y’okakatanu dia nyu nama lɔkɛwɔ l’ɔlɔlɔ lam’ele nyu dingama l’anto wele la nkɛwɔ ya kɔlɔ ya ngasɔ. Koko, mbala tshɛ kasalanyu kɛnɛ kele dimɛna ndo katonanyu dia monga la lɔkɛwɔ la kɔlɔ, nyu mɛnyaka dia nyekɔ lo wedi wa Jehowa lo dikambo diendana la lowandji la l’andja w’otondo. (Jobo 2:3, 4) Nyu mongaka nto l’ɔngɛnɔngɛnɔ lo mbeya dia nyekɔ lo mbetawɔ leeta laki Jehowa la la wangasanu lata ɔnɛ: “On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.” (Tuk. 27:11) Ndo nto, lo mbeya ɔnɛ nyu mbetawɔmaka le Jehowa nyayofudia nsaki kele la nyu ka mbokambɛ.
16. Ngande wakangɛnyangɛnya kadiyɛso kɛmɔtshi otema wa Jehowa?
16 Etena kakandɔtɔka kalasa, lâsɔ ko nde ele l’ɛnɔnyi dikumi l’ɛmɔtshi, kadiyɛso k’Okristo kelɛwɔ Carol akakitanyiya atɔndɔ wa lo Bible ndo anto wakɛnyi lɔkɛwɔ lande l’ɔlɔlɔ. Kakɔna kakatombe? Carol akasɔkama oma le ambeki w’asekande wa la kalasa l’ɔtɛ wakinde kosalaka fɛtɛ ndo sɛlɛmɔnyi ya wodja nɛ dia nkum’otema kande kakekiyama oma lo Bible kakoshimbaka. Lo waaso asɔ, nde akalembetshiyaka anto akina dietawɔ diande mbala mɔtshi. Ɛnɔnyi efula l’ɔkɔngɔ, osekande ɔmɔtshi lakɔtɔka la nde kalasa akotomɛ mukanda wakandafunde ɔnɛ: “Lakakombolaka nshi tshɛ dia kofundɛ mukanda dia kosha losaka. Anto wakɛnyi lɔkɛwɔ layɛ l’ɔlɔlɔ ndo ɛnyɛlɔ kakayashaka oko osekaseka w’Okristo, mbidja ndo woho wakayatonaka la dihonga tshɛ dia nsala fɛtɛ. Wɛ mbele Ɔmɛnyi wa Jehowa wa ntondo wakamɛnyi.” Ɛnyɛlɔ kaki Carol kakonge la shɛngiya y’efula le osekande ɔsɔ, ko nde akayotatɛ mbeka Bible. Nde akafunde lo mukanda wakandatomɛ Carol ɔnɛ nde akashile batizama oko Ɔmɛnyi wa Jehowa ambeta ɛnɔnyi ndekana 40! L’ɛnyɛlɔ ka Carol, nyu ɛlɔngɔlɔngɔ l’esekaseka wa nshi nyɛ wakitanyiya atɔndɔ wa lo Bible la dihonga tshɛ kokaka ntshutshuya anto w’etema ɛlɔlɔ dia vɔ mbeya Jehowa.
Ɛlɔngɔlɔngɔ l’esekaseka watombola Jehowa
17, 18. a) Ngande wɔsayɛ ɛlɔngɔlɔngɔ l’esekaseka wa l’etshumanelo kanyu? b) Nshi yayaye yakɔna yakongɛ ɛlɔngɔlɔngɔ l’esekaseka woka Nzambi wɔma?
17 Sho wanɛ tshɛ wele l’okongamelo waki Jehowa wa l’andja w’otondo ngɛnangɛnaka dia mɛna nunu di’ɛlɔngɔlɔngɔ l’esekaseka wele l’ohetoheto wayasha l’ɔtɛmwɛlɔ wa mɛtɛ! Ɛlɔngɔlɔngɔ l’esekaseka ɛsɔ fudiaka nsaki kele la wɔ ka ntɛmɔla Jehowa lo mbadiaka Bible lushi la lushi, lo nɔmbaka ndo lo sɛnaka lo yoho yɔtɔnɛ la lolango la Nzambi. Ɛlɔngɔlɔngɔ l’esekaseka wa ngasɔ washa ɛnyɛlɔ k’ɔlɔlɔ ngɛnyangɛnyaka ambutshi awɔ ndo ekambi waki Jehowa tshɛ.—Tuk. 23:24, 25.
18 Lo nshi yayaye, ɛlɔngɔlɔngɔ l’esekaseka wele la kɔlamelo wayonga l’atei w’anto wayɔtɔ l’andja w’oyoyo wakalake Nzambi. (Eny. 7:9, 14) Vɔ wayotɔtshɔkwama efula lɛkɔ naka vɔ ntetemala mfudia lowando lele la wɔ otsha le Jehowa. Ndo naka vɔ nsala ngasɔ, kete wayowotombolaka pondjo pondjo.—Osam. 148:12, 13.
Onde wɛ kokaka nembetshiya?
• Ngande wakoka ɛlɔngɔlɔngɔ l’esekaseka mbisha lonya l’ɔtɛmwɛlɔ wa mɛtɛ ɛlɔ kɛnɛ?
• Lande na kahombanyu kanaka yimba la kɛnɛ kadianyu dia nyu nkondja wahɔ oma lo wadielo wa Bible?
• Ngande wakoka dɔmbɛlɔ nyokimanyiya dia nyu ndjasukanya la Jehowa?
• Etombelo akɔna wonga oma lo lɔkɛwɔ l’ɔlɔlɔ lele l’Akristo?
[Osato wa lo lɛkɛ 5]
Onde wɛ ekɔ la mbekelo ka mbadiaka Bible lushi la lushi?