Nkitanyiya Jehowa akambela ɛtshɔkɔ efula

ƆSƆ ekɔ dui dimɔtshi diaakamohɔ l’awui wakambutɛka papa laki pami kakakambaka olimu efula ndo kakatoshaka ɛnyɛlɔ ka dimɛna. Nde aki la losembwe, diakɔ diakinde kotshimbatshimba dia mbetawɔ losango la lo Bible etena kakawoosambisha lo 1953. Oma k’etena kɛsɔ, nde akasalaka la wolo dia tetsha kɛnɛ kakandekaka. L’etatelo, mama akengenga dia ntshika ɔtɛmwɛlɔ ande w’aseka Mupɛ. Koko l’edjedja ka wonya, nde lawɔ akayotatɛ ngɛnangɛna akambo wa mɛtɛ wa lo Bible.

Ambutshi aso waki l’okakatanu dia tetsha Bible, nɛ dia mama kɔmbɔtɔ kalasa kambe ndo papa akakambaka olimu lushi l’otondo. Lo tena dimɔtshi, papa akalɛmbaka efula ndo akanyingɔnyingɔka wonya wa wekelo. Koko, welo ande waki l’etombelo w’ɛlɔlɔ. Lam’ele dimi mbaki enondo, laketshaka akosɛmi asato Bible. L’atei w’awui wakamekaka la wɔ, mbaki ndo ɛtɛkɛta wakataka papa mbala efula ɔnɛ ngandji kakokaka Nɔa ase nkumbo kande kakɛnamaka lo woho wakinde l’okitanyiya le Nzambi. Lakalangaka ɔkɔndɔ wa lo Bible ɔsɔ efula. Lo nshi shɔ tshɛ, takatshɔka dia tɔtɔ nsanganya lo Mbalasa ka Diolelo ka la Roseto degli Abruzzi, osomba wa l’omamu wa Adriatique, lo wodja w’Italie.

Lo 1955 laasɔ ko lele l’ɛnɔnyi 11, dimi la mama takande lɔkɛndɔ l’otale lo mboka k’akona dia tɔtɔ lo losanganya la woke mbala ka ntondo la Rɔmɔ. Oma k’etena kɛsɔ, lakatatɛ mbɔsa nsanganya ya weke ya ngasɔ oko etenyi ka dimɛna efula ka lɔsɛnɔ l’Okristo.

Lakabatizama ɔnɔnyi wakayelana ndo kombeta edja lakatatɛ nkamba olimu wa lo tena tshɛ. Etena kakamakotsha ɛnɔnyi 17, lakakome ombatshi mboka wa laande l’osomba wa Latina, lo sidɛ ka Rɔmɔ mangana la ngelo kaso kilɔmɛtrɛ 300. L’osomba w’oyoyo ɔsɔ, onto l’onto akadjaka yimba paka l’akambo ande. Dimi l’osekami ombatshi mboka taki l’ɔngɛnɔngɛnɔ dia mbisha anto ekanda efula walembetshiya Bible, koko oko wakimi osekaseka, lakatshutshumalaka lo tena dimɔtshi l’ɔtɛ wakamakakitɔna l’ase nkumbo kami. Kaanga mbakamayaokaka ngasɔ, lakangɛnangɛnaka ndjela ɛlɔmbwɛlɔ kakawatoshaka.

L’ɔkɔngɔ wa laasɔ, wakayontoma la Milan dia tosha lonya l’ɔlɔngɔswɛlɔ wa Losanganya la wedja efula lakasalema lo 1963 laki l’ɔtɛ a dui ɔnɛ: “Lokumu l’ɔlɔlɔ la pondjo.” Lo losanganya lɔsɔ, lakayakimɔ la lolango dia nkamba kaamɛ l’anangɛso akina, mbidja ndo Paolo Piccioli, ɔnangɛso lakaye oma la Florence. Lushi la hende la losanganya la woke lɔsɔ, nde akasha sawo dia lɔɔka diendana la lonyemba. Lakate mbala kakɔ ɔtɔi nte: ‘Weho akɔ tshɛ ɔnangɛso ɔsɔ ekɔ onyemba.’ L’ɔkɔngɔ wa laasɔ, takatatɛ fundanɛ ndo dui sɔ diakatokimanyiya dia nshihodia ɔnɛ dimi la nde mbɔtɔnɛka l’akambo efula, ɛnyɛlɔ taki l’eyango akɔ waamɛ, takokaka Jehowa ngandji ndo taki la nsaki k’efula ka mbokitanyiya. Dimi la Paolo takayotshukana lo 1965.

TAMBOHOMANA L’EWANDJI W’ƐTƐMWƐLƆ

Lakakambe oko ombatshi mboka wa pondjo l’edja k’ɛnɔnyi dikumi l’osomba wa Florence. Laki l’ɔngɛnɔngɛnɔ efula dia menda woho wakatafulaka tshumanelo ndo lo yoho ya laande woho wakatahamaka ɛlɔngɔlɔngɔ. Dimi la Paolo takangɛnangɛnaka monga kaamɛ la wɔ dia nkɛtshanya la wɔ akambo wa lo nyuma ndo dia nkɔkɔla demba kaamɛ la wɔ nɛ dia Paolo akalangaka nkɛnya ponde. Lo mɛtɛ, lakangɛnangɛnaka monga kaamɛ l’olonganyi ami, koko lakalangaka nto mɛna woho wakakondjaka ɛlɔngɔlɔngɔ ndo nkumbo ya l’etshumanelo wahɔ oma le Paolo l’ɔtɛ wakandayashaka efula le wɔ.

Dimi mongaka nto l’ɔngɛnɔngɛnɔ efula etena kakanyiyami anto efula wakateke la wɔ Bible. Ombeki aso wa Bible welɛwɔ Adriana akasambishaka ase nkumbo kande akina ahende akambo wakandekaka. Lushi lɔmɔtshi, vɔ wakɔshi ekongelo ka tohomana l’ewandji w’ɛtɛmwɛlɔ dia tɔkɛtshanya lo kɛnɛ kendana la wetshelo awɔ ɛmɔtshi, ɛnyɛlɔ wetshelo wa Losato l’osanto ndo wetshelo w’ɔnɛ anima havu. Ewandji w’ɛtɛmwɛlɔ esato mbakatshu dia tɔkɛtshanya la wɔ. Vɔ wakasha elembetshielo waheyama ɔtɛ l’ekolo ndo vɔ tshɛ onto l’onto akasha elembetshielo wotshikitanyi la w’osekande, diakɔ diele ambeki aso wa Bible wakashola aha l’okakatanu dia kɛnɛ kakawataka kaki kashi lo kiɛdika la wetshelo wa lo Bible. Lo mɛtɛ, ɔkɛtshanyelo ɔsɔ wakonge l’etombelo w’ɛlɔlɔ. L’ɔkɔngɔ diko, anto oko 15 wa lo nkumbo y’anto asɔ wakayokoma Ɛmɛnyi wa Jehowa.

Koko ɛlɔ kɛnɛ, toho tokamba la so dia nsambisha tambotshikitana yema la yoho shɔ. L’ɔkɔngɔ wa laasɔ, Paolo akayokoma manyi lo kɛnɛ kendana l’ɔkɛtshanyelo wa l’ewandji w’ɛtɛmwɛlɔ ndo nde akasale dui sɔ mbala efula. Dimi mbohɔka ɔkɛtshanyelo ɔmɔtshi wakandasale l’ewandji w’ɛtɛmwɛlɔ ɛmɔtshi la ntondo k’olui w’anto waki komonga Ɛmɛnyi wa Jehowa. Takayeya l’ɔkɔngɔ dia ewandji w’ɛtɛmwɛlɔ akɔ mbakatshutshuya anto asɔ dia vɔ ndjotoka ambola efula waheyama ɔtɛ l’ekolo dia totsha nsɔnyi. Koko, ngala yakakadimɔ. Onto ɔmɔtshi l’atei awɔ akatombola dia mbeya kana ekɔ dimɛna dia ase ɛtɛmwɛlɔ ndjatambiya l’awui wa pɔlitikɛ, nɛ dia dui sɔ diambosalema l’edja k’ɛnɔnyi efula. Kam’akandoke dimbola sɔ, ewandji w’ɛtɛmwɛlɔ wakatshimbe wɔɔngɔ. Aha la ntshimbatshimba, Ɛmɛnyi wa Jehowa wakasha elembetshielo wokɛma hwe ko ɔkɛtshanyelo wakakomɛ. L’ɔkɔngɔ w’ɛnɔnyi efula, akayɛnamaka dia ɔkɛtshanyelo ɔsɔ wakalɔngɔsɔla ewandji w’ɛtɛmwɛlɔ komonga l’etombelo wakawafɔnyaka.

TAKAKONDJA DIƐSƐ DIKINA DI’OLIMU

L’ɔkɔngɔ wa dimi la Paolo nkotsha ɛnɔnyi dikumi wa diwala, takalɔmbama dia tokamba l’otshimbedi. Paolo aki l’olimu wa dimɛna, diakɔ diele taki l’okakatanu dia sukɛ yɛdikɔ shɔ. Koko, l’ɔkɔngɔ wa sho nsala dɔmbɛlɔ mbala efula, takayetawɔ olimu akɔ. Takangɛnangɛnaka monga kaamɛ la nkumbo yakatolongolaka lawakawɔ. Mbala efula l’akɔlɔ, takasalaka wekelo kaamɛ l’ase nkumbo kakatolongolaka ndo oma laasɔ Paolo akasalɛka anawɔ adevɔara, djekoleko wendana l’akumi. Laadiko dia laasɔ, Paolo akangɛnangɛnaka wadielo efula ndo nde akatɛka anto akina la wangasanu tshɛ tokanyi t’ohomba ndo takeketsha takandatanaka oma lo wadielo ande. Lushi l’ɔtɔi, mbala efula takatshɔka dia tosambisha l’esomba waki komongaka l’Ɛmɛnyi wa Jehowa ndo takelɛka anto akɔ dia ndjohokamɛ sawo diakashamaka la dikɔlɔ.

L’ɔkɔngɔ wa sho nkamba ɛnɔnyi ehende eto l’olimu w’otshimbedi, takelamɛ lo Bɛtɛlɛ ka la Rɔmɔ. Paolo akalongola ɔkɛndɛ wa mendaka awui wendana l’aseka lɛɛta ndo dimi lo Departɛma diendana l’otondjelo wa periodikɛ. Nsala etshikitanu keema dui dia wɔdu, koko takakitanyiya yɛdikɔ shɔ. Taki l’ɔngɛnɔngɛnɔ efula dia mɛna woho wakataahamaka filialɛ kɛsɔ ndo nkumbo k’anangɛso wa l’Italie. L’etena kɛsɔ, ko Ɛmɛnyi wa Jehowa wa l’Italie wambeyama le lɛɛta oko ɔtɛmwɛlɔ. Takangɛnangɛna diɛsɛ di’olimu sɔ mɛtɛ.

Etena kakiso lo Bɛtɛlɛ, anangɛso wa l’Italie wakonge l’okakatanu l’ɔtɛ wa yɛdikɔ yaso y’oma lo Bible yendana la dikila. L’etatelo k’ɛnɔnyi wa 1980 ewandji wa lɛɛta wakadje didjango diakakonya anto efula dia nkotola yambalo lo dikambo sɔ. Atshukanyi amɔtshi w’Ɛmɛnyi wa Jehowa wakafungama ɔnɛ vɔ mbaki lo kiɔkɔ ya nyɔi k’ɔnawɔ ɔmɔtshi la womoto, nɛ dia nde akavu l’ɔtɛ wakandashile dikila, ko tete le nde aki la hemɔ ka lo dikila kasambemɛ katata anto efula wa lo lɛkɛ la ndjale ka Mediteraneya. Anangɛso l’akadiyɛso wa lo nkumbo ka Bɛtɛlɛ wakakimanyiya avɔka wakawɔshi oko onyimpala w’ambutshi w’Akristo. Tobukubuku taso ndo numɛlɔ kɛmɔtshi ka laande ka Réveillez-vous ! mbakakimanyiya anto efula dia vɔ ntshikitanya tokanyi tawɔ ndo nshihodia kɛnɛ kata Ɔtɛkɛta wa Nzambi lo kɛnɛ kendana la dikila. L’edja ka ngɔndɔ shɔ tshɛ, Paolo akakambaka olimu wenya 16 lo lushi aha la momuya. Lakasalaka tshɛ dia mbosukɛ lo welo wakandadjaka.

YOHO KINA YA LƆSƐNƆ

L’ɔkɔngɔ wa sho nkotsha ɛnɔnyi 20 wa diwala, takahomana la dui dimɔtshi diakiso konongamɛka. Laasɔ ko lele l’ɛnɔnyi 41 ndo Paolo ɛnɔnyi 49 etena kakamawotɛ ɔnɛ ekɔ oko laya la diemi. Lakatane lo kayɛ kaki Paolo awui wakandafunde lushi lakɔ ate: “Dɔmbɛlɔ: Jehowa le, naka dui sɔ diekɔ mɛtɛ, otokimanyiya dia sho ntshikala l’olimu wa lo tena tshɛ, diaha sho mbɔla lo nyuma ndo dia sho monga ambutshi washa ɛnyɛlɔ ka dimɛna. Laadiko dia laasɔ, okimanyiya dia dimi nkamba la kɛnɛ kakametshaka anto akina oma lo lɔyɛnga ambeta ɛnɔnyi 30.” Lo menda etombelo wakonge la dui sɔ, Jehowa mɛtɛ akakadimola dɔmbɛlɔ diaso.

Eotwelo ka Ilaria akela etshikitanu efula lo nsɛnɔ yaso. Lo mɛtɛ, takakɔmɔ yema l’etena kɛmɔtshi oko wadita Tukedi 24:10 ɔnɛ: ‘Naka wɛ ayɔkɔmɔ lo lushi la paa, kete wɛ honga la wolo efula dia mbikikɛ.’ Koko, dimi l’omɛmi takasukanɛ ndo takakeketshana.

Ilaria akayota esadi eto woho wakinde l’ɔngɛnɔngɛnɔ dia mbotɔ le ambutshi wele Ɛmɛnyi wa Jehowa ndo waki l’awui efula wa nsala l’olimu wa lo tena tshɛ. Ndooko lushi lakandayaoke oko tambowonyɛ yimba, mbuta ate nde akodiama lo nkumbo ka dimɛna. Dimi lakatshikalaka la nde la yanyi. La dikɔlɔ etena kakakalolaka Paolo la ngelo, mbala efula kaanga nde atashidiya olimu ande, nde akongaka kaamɛ la Ilaria, akakɛnyaka la nde ndo akookimanyiyaka dia nsala adevɔara. Nde akasalaka dui sɔ kaanga mbakandahombaka ndjolala l’eshidi ehende kana esato w’otsho dia nshidiya olimu ande. Mbala efula, Ilaria akataka ate: “Papa mbele ɔngɛnyi ami woleki dimɛna.”

Oko wadieyanyu, dia Ilaria ntshikala l’ɔtɛmwɛlɔ wa mɛtɛ, takahombaka mbeetshaka mbala la mbala ndo l’eshikikelo tshɛ. Dimi mbohɔka etena kɛmɔtshi kakasalɛ Ilaria osekande ɔmɔtshi kɔlɔ lam’akawakɛnyaka. Takoolembetshiya l’ekimanyielo ka Bible ɔnɛ takayahombe mbosalɛ ngasɔ. Oma laasɔ, takatshu la nde dia nde tɔlɔmba osekande akɔ edimanyielo la ntondo kaso.

Ilaria akate esadi eto dia nde ekɔ la lowando l’efula le ambutshi ande lo woho wakawayashaka efula l’olimu w’esambishelo. Etena kɛnɛ kambondotshukama, nde amboleka mɛna ohomba wa monga l’okitanyiya le Jehowa ndo ndjela ɛlɔmbwɛlɔ kande.

TAKAKITANYIYAKA JEHOWA KAANGA LO TENA DIA PAA

Lo 2008, wakatoshola Paolo la hemɔ ka kansɛrɛ. L’etatelo, akɛnamaka dia hemɔ kande kayɔkɔnɔ ndo nde akankeketshaka efula. Laadiko dia nyanga esakelo woleki amɛna wakakoke mbokimanyiya, dimi la Ilaria takatetemala nɔmba Jehowa dia nde tokimanyiya dia sho mbikikɛ dikambo sɔ. Koko, Paolo laki la wolo w’efula ndo pami k’olangala akatashilaka wolo yema yema. Nde akavu lo 2010 ndo dui sɔ diaki oko ndjadi le mi. Koko, lakakondja ekeketshelo lo mbohɔ kɛnɛ kakatasale dimi la nde l’edja k’ɛnɔnyi 45. Takasha Jehowa kɛnɛ kakaleke ɔlɔlɔ mɛtɛ le so. Dimi mbeyaka dia Jehowa hohɛki pondjo olimu wakatakambe lo lokombo lande. Ndo lekɔ lo nongamɛ l’asolo walomɔlomɔ dia mɛna etena kayolɔ Paolo lo ndjela ɛtɛkɛta wa Yeso wele lo Joani 5:28, 29.

Oko wakamangɛnangɛnaka ɔkɔndɔ wa Nɔa nshi yakimi dikɛnda, mbaakamatetemala mbɔngɛnangɛna. Yɛdikɔ yami yatatshikitana. Dimi nangaka ntetemala nkitanyiya Jehowa oyadi la ntondo k’okakatanu akɔna tshɛ. Lekɔ l’eshikikelo dia oyadi wekamu wakoka mpomana la mi, kɛnɛ tshɛ kakokami ndjahombia kana nshisha ekɔ paka towuiwui ta totshitshɛ lo mbɛdika l’ɛtshɔkɔ wa diambo wayotosha Nzambi kaso ka ngandji. Lam’ele lambɛna mɛtɛ ka dikambo diakɔ la washo ami, lamboshikikɛ dia welo wadjaso dia kambɛ Nzambi keema anyanya.