AMBOLA W’OMA LE AMBADI

Waa na wele “ana apami a [Nzambi ka mɛtɛ]” wɔtɛkɛtami lo Etatelu 6:2, 4 wakasɛnaka la ntondo ka Mvula k’elola?

Mɛnamaka dia etelo kɛsɔ mendanaka la ana wa lo nyuma waki Nzambi. Ko kakɔna kashikikɛ dui sɔ?

Divɛsa dia ntondo mbutaka ɔnɛ: “Ana apami a [Nzambi ka mɛtɛ] wakenyi vati: Ana amantu wakuti antu amena mbewo. Okone vo wakatshuki wane wakawasonola uma l’atei awo.”​—Etat. 6:2.

Lo Afundelo w’ase Hɛbɛru ditelo di’ɔnɛ: ‘Ana w’apami wa Nzambi ka mɛtɛ’ ndo “ana apami a [Nzambi]” tanemaka lo Etatelu 6:2, 4; Jobo 1:6; 2:1; 38:7; ndo lo Osambu 89:6. Avɛsa anɛ ɛnyawɔ lo dikambo dia “ana apami a [Nzambi]”?

‘Ana w’apami wa Nzambi ka mɛtɛ’ wɔtɛkɛtami lo Jobo 1:6 wekɔ ditongami dia lo nyuma diakatshu dia tɛnama la ntondo ka Nzambi. L’atei awɔ mbaki ndo Satana laki oma la “ntukindula kete.” (Jobo 1:7; 2:1, 2) Woho akɔ waamɛ mbele, Jobo 38:4-7 mbutaka ɔnɛ: “Ana apami a [Nzambi]” wanɛ ‘wakadaka saka’ etena ‘kakashikikɛka Nzambi atshina’ wa nkɛtɛ. Ana wa Nzambi asɔ wekɔ andjelo nɛ dia l’etena kɛsɔ ko anto watatongama. “Ana apami a [Nzambi]” wɔtɛkɛtami l’​Osambu 89:6 wekɔ ditongami dia lo nyuma diele kaamɛ la Nzambi l’olongo, koko aha anto.

Ko laasɔ, waa na wele ‘ana w’apami wa Nzambi ka mɛtɛ’ wɔtɛkɛtami lo Etatelu 6:2, 4? Lo yoho yɔtɔnɛ l’avɛsa wele la diko ango, sunganaka dia sho mbuta ɔnɛ avɛsa asɔ tɛkɛtaka di’ana wa Nzambi wa lo nyuma wakaye la nkɛtɛ.

Anto amɔtshi mongaka l’okakatanu dia mbetawɔ ɔnɛ andjelo wakayoyakimɔ l’awui wa dieyanelo. Ɛtɛkɛta wa Yeso wele lo Mateo 22:30 mɛnyaka dia wanɛ wele l’olongo hawotshukana ndo hawosale dieyanelo. Koko, l’etena kɛmɔtshi andjelo wakayɔlɔtaka alemba wa l’emunyi, wakayɔlɛ ndo wakayɔnɔ l’anto kaamɛ. (Etat. 18:1-8; 19:1-3) Ɔnkɔnɛ, mbokɛmaka dia lam’ele vɔ wakayɔlɔta alemba wa l’emunyi, vɔ wakayoyasha l’awui wa dieyanelo kaamɛ la wamato.

Tekɔ l’ɛkɔkɔ efula w’oma lo Bible watotshutshuya dia mbetawɔ ɔnɛ andjelo amɔtshi wakayasha l’awui asɔ. Judɛ 6,  7 mbɛdikaka pɛkato kakasale ase Sɔdɔma wakasale akambo wahasungana salema la pɛkato kakasale “andjelo waki kotshikala lo ahole awɔ wakawaakitsha ndo wakayayangɛ dihole dikina dia dimɛna dia mbidjasɛ.” Kɛnɛ kakasale andjelo asɔ fɔnaka la kɛnɛ kakasale ase Sɔdɔma nɛ dia vɔ “wakayasha l’akambo wa mindo lo tshambandeko ndo lo nsaki ya demba lo yoho ya kɔlɔ.” 1 Petero 3:19, 20 mbɛdikaka andjelo waki komonga l’okitanyiya la anto waki lo “nshi ya Nɔa.” (2 Pet. 2:4, 5) Ɔnkɔnɛ, pɛkato kakasale andjelo waki komonga l’okitanyiya lo nshi ya Nɔa kokaka mbɛdikama la pɛkato kakasale ase Sɔdɔma la Gɔmɔra.

Tayoka dui sɔ hwe naka sho nshihodia ɔnɛ ‘ana w’apami wa Nzambi ka mɛtɛ’ wɔtɛkɛtami lo Etatelu 6:2, 4, waki andjelo wakalɔtɛ alemba wa l’emunyi ndo wakayeyanaka la wamato.

Bible mbutaka dia Yeso akatshu dia “tosambisha nyuma yele lo lokanu.” (1 Pet. 3:19) Dui sɔ alembetshiyadiɔ?

Ɔpɔstɔlɔ Petero akɛnya dia ditongami dia lo nyuma sɔ “komonga l’okitanyiya lo nshi ya ntondo, etena kakakongaka Nzambi la solo dia lotutsha tshɛ lo nshi ya Nɔa.” (1 Pet. 3:20) Mbokɛmaka dia Petero akatɛkɛtaka dia andjelo wakete la Satana wedi l’ɔtɔmbɔkwɛlɔ. Judɛ tɛkɛtaka dia andjelo “waki kotshikala lo ahole awɔ wakawaakitsha ndo wakayayangɛ dihole dikina dia dimɛna dia mbidjasɛ, nde [Nzambi] akawadje lo lokanu la pondjo, lo wodjima wa tshududu polo lam’ayowolomboshama lo lushi la woke.”—Judɛ 6.

Lo woho akɔna waki ditongami dia lo nyuma kokitanyiya Nzambi lo nshi ya Nɔa? La ntondo ka Mvula k’ekola, ditongami dia kɔlɔ sɔ wakalɔtaka alemba w’emunyi ndo wakasale dikambo diaki Nzambi kombatonga dia nsala, mbuta ate wakayeyanaka la wamato wakote anto. (Etat. 6:2, 4) Laadiko dia laasɔ, andjelo asɔ wakayeyana la wamato wakasale dikambo diakiwɔ komonga la lotshungɔ la nsala. Nzambi kotonga ditongami dia lo nyuma dia vɔ mbeyanaka la wamato. (Etat. 5:2) Ditongami dia kɔlɔ sɔ kana andjelo waki kokitanyiya Nzambi wayolanyema l’etena kakandalɔngɔsɔla. L’etena kɛnɛ, oko wakadite Judɛ, vɔ wekɔ lo “afuku wa udjima,” mbuta ate lo lokanu la lo nyuma.

Etena kakɔna ndo ngande wakasambisha Yeso “nyuma yele lo lokanu”? Petero akafunde dia dikambo sɔ diakasalema l’ɔkɔngɔ wa Yeso “[ndj]ala la lɔsɛnɔ lo nyuma.” (1 Pet. 3:18, 19) Tolembete nto, dia Petero akate dia Yeso akatshu dia “tosambisha.” Woho wakakambe Petero la etelo kɛsɔ l’okitɔ wakete mɛnyaka dia esambishelo kakatatɛ la ntondo ka nde mfunda mukanda ande wa ntondo. Mɛnamaka dia yema tshitshɛ l’ɔkɔngɔ wa nde mbolɔ, Yeso akasambisha nyuma ya kɔlɔ lo kɛnɛ kendana la dilanya dia wolo diakawahombe nongola. Ɔsɔ kema esambishelo kasha elongamelo. Koko aki esambishelo k’elombwelo. (Jona 1:1, 2) Lam’ele Yeso akatshikala la kɔlamelo ndo la mbetawɔ polo ndo lo nyɔi ndo oma laasɔ nde akolwama oma lo nyɔi, dui sɔ diakɛnya dia Diabolo komonga la wolo le nde. Ndo Yeso aki l’ɛkɔkɔ wa nsala esambishelo ka wanyelo kɛsɔ.​—Jni. 14:30; 16:8-11.

Lo nshi yayaye, Yeso ayodja Satana nde la andjelo asɔ lo afuku waha l’ekomelo. (Luka 8:30, 31; Ɛny. 20:1-3) Polo ndo l’etena kɛnɛ, nyuma yaki kokitanyiya Nzambi shɔ wekɔ lo wodjima wa tshududu wa lo nyuma ndo vɔ mɛtɛ wayolanyema.​—Ɛny. 20:7-10.