Nzambi koka monga la lonyangu​—Woho wakokaso mbɔngɛnyangɛnya

Onde wɛ ambonyangaka lushi lɔmɔtshi lakawakosalɛ dui dia kɔlɔ ko wɛ nkoma polo lo ndela?—a Ondo dui sɔ diambotokomɛka sho tshɛ. Lo tena dimɔtshi, sho koka nyanga l’ɔtɛ w’ɔkɛyi wele la so. Onto ɔmɔtshi koka tomamatanyiya akambo wa kashi. Dui sɔ koka tonyangiya, shi mɛtɛ?— Nzambi nde lawɔ nyangaka etena komamatanyiyawɔ akambo wa kashi. Ɛsɔ tɔsɛdingole dui sɔ kele tende woho wakokaso ngɛnyangɛnya Nzambi lo dihole dia mbonyangiya.

Bible mbutaka ɔnɛ anto amɔtshi wakataka dia vɔ nangaka Nzambi koko ‘wakoonyangiya’ ndo ‘wakoohindja otema.’ Lo mɛtɛ, ndooko onto lakoka mbokadia Jehowa Nzambi waale nɛ dia nde ekɔ Kanga-Wolo-Tshɛ. Ɛsɔ tende lande na kele Jehowa nyangaka naka tambosala kɛnɛ kahandalange.

Anto ahende wa ntondo wakatonge Jehowa la nkɛtɛ wakoonyangiya efula. Nde akawakitsha vɔ akɔ ahende lo Paradiso ka la nkɛtɛ kakelamɛka “ekambɔ k’Ɛdɛna.” Naa anto ahende asɔ?— Vɔ waki Adama la Eva. Ɛsɔ tende kɛnɛ kakawasale kakayonyangiyaka Jehowa.

L’ɔkɔngɔ wa Jehowa mbakitsha l’ekambɔ k’Ɛdɛna, nde akawatɛ dia vɔ kikokɛ, mbota ana, mbidjasɛ kaamɛ lɔkɔ ndo sɛnaka pondjo pondjo. Koko la ntondo ka vɔ mbota ana, dui dimɔtshi dia kɔlɔ efula diakasalema. Onde wɛ mbeyaka dui diakɔ?— Ondjelo ɔmɔtshi akatshutshuya Adama la Eva dia vɔ tɔmbɔkwɛ Jehowa. Ɛsɔ tende woho wakasalema dui sɔ.

Ondjelo ɔsɔ akasale dia oloyi monga l’akoka wa ntɛkɛta. Eva aketawɔ kɛnɛ kakawotɛ oloyi ɔnɛ wɛ ayoyala “oko Nzambi,” ko nde akasale kɛnɛ kakawotɛ oloyi. Onde wɛ mbeyaka kɛnɛ kakandasale kɛsɔ?—

Eva akale olowa w’oma l’otamba wakasekɛ Jehowa Adama. La ntondo ka Nzambi ntonga Eva nde akatɛ Adama ate: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.”

Eva akeyaka ɔlɛmbɛ ɔsɔ. Koko nde akatetemala menda osongo ndo nde akɛnyi dia ‘elowa w’oma l’osongo akɔ waki amɛna ndɛ ndo amɛna lo washo. . . . Nde akakɔhɔla olowa oma lɔkɔ ko akale.’ Ko oma laaso nde akayoshaka omɛnde olowa akɔ ko ‘Adama akale.’ Oko le yɛ, lande na kakasale Adama dui sɔ?— Adama akasale dui sɔ nɛ dia nde akayolangaka Eva oleki Jehowa. Nde akasɔnɛ dia ngɛnyangɛnya Eva lo dihole dia ngɛnyangɛnya Nzambi. Koko nkitanyiya Jehowa ndeka nkitanyiya oseka onto tshɛ.

Onde wɛ aakohɔ ɔnɛ lakasale dia oloyi nsawola la Eva? Oko wakoka onto nsala di’ɔna pɔpi nsala oko tɔ mbatɛkɛta, mbakasale onto ɔmɔtshi dia oloyi nsala oko vɔ mbakatɛkɛta. Onde aki mɛtɛ dui di’oloyi k’oloyi?— Ɔsɔ aki dui dia ‘oloyi w’edjedja welamɛ ɔnɛ Diabolo ndo Satana.’

Onde wɛ mbeyaka woho wakokayɛ ngɛnyangɛnya Jehowa?— Wɛ koka ngɛnyangɛnya Jehowa lo salaka la wolo dia mbokitanyiya. Satana akasɛmɛ dia nde koka nkonya anto tshɛ dia nsala lolango lande. Diakɔ diatɔhɛmɔla Jehowa ɔnɛ: “On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.” Satana mɔnyɔlaka Jehowa lo nsɛma ɔnɛ nde koka nkonya anto tshɛ wakambɛ Jehowa diaha vɔ ntetemala mbokambɛ. Ɔnkɔnɛ, wɛ koka ngɛnyangɛnya Jehowa lo mbokitanyiya ndo lo mbokambɛ. Onde wɛ ayosala la wolo dia nsala dui sɔ?—