Ngande wakatatɛ lɔsɛnɔ?

Dibuku dia ntondo dia lo Bible di’Etatelu totɛka lo tshena pe woho wakatatɛ andja ɔnɛ lo mbuta ɔnɛ: “Ntunduntundu [Nzambi] akatungi ulungu la kete.” (Etatelu 1:1) L’ɔkɔngɔ wa Nzambi ntonga tombatomba ndo waa nyama, nde akatonge anto wa ntondo, Adama la Eva. Vɔ wakatshikitana la waa nyama nɛ dia vɔ waki la waonga amɔtshi wele la Nzambi, mbidja ndo lotshungɔ la nsɔna kɛnɛ kalangawɔ. Diakɔ diele, etombelo tshɛ w’oma l’etsha awɔ wakahombe monga paka l’ahɛka awɔ. Otowokitanyia kɛnɛ kakawatɛ Nzambi, tshike vɔ wotosha lonya l’okotshamelo wa sangwelo diaki Nzambi oko wakiwɔ ambutshi wa ntondo wa nkumbo k’anto ka l’andja w’otondo kotonga la wɔladi, l’alemba wa kokele ndo kotɔsɛna pondjo pondjo la nkɛtɛ.

Koko, ondjelo kana etongami kɛmɔtshi ka lo nyuma akanganyiya anto dia nkotsha eyango ande wa lokaki. Lo nsala ngasɔ, mbakandayakonya Satana, mbuta ate “Ɔndɔshi.” Lo ntɛkɛta lo tshimbo y’oloyi, Satana akakese Eva lo mbotɛ dia nde ayoyala la lɔsɛnɔ loleki dimɛna aha la ndjela ɛlɔmbwɛlɔ ka Nzambi. Adama la Eva wakayele Satana lo ndanya diɔtɔnganelo diaki lam’asawɔ l’Otungi awɔ. L’ɔtɛ w’ɔsɔnwɛlɔ awɔ wa kɔlɔ, ambutshi aso wa ntondo wakahandja lɔsɛnɔ la pondjo ndo wakasambiya anto tshɛ pɛkato, eongelo kele kema kokele ndo nyɔi.

Aha la ntshimbatshimba, Nzambi akɔshi yɛdikɔ ya nkandola okakatanu ɔsɔ l’oyango wa mbisha tokanula ta Adama diaaso dia vɔ ndjokondja lɔsɛnɔ la pondjo. Nzambi akewoya dia “kanula,” mbuta ate onto ɔmɔtshi la laande ayoyolanya Satana ndo ayoyonya asui tshɛ wakaye oma l’ɔtɔmbɔkwɛlɔ waki Satana, Adama ndo Eva. (Etatelu 3:15) Onto akɔna akahombe ndjonga “kanula” shɔ? Tayoweya l’asawo wayela.

L’etena kɛsɔ, Satana akasale la wolo di’aha sangwelo diaki Nzambi kotshama. Anto wa kɔlɔ wakafulanɛ. Diakɔ diakɔshi Nzambi yɛdikɔ ya ndjaka anto wa kɔlɔ tshɛ la Mvula k’elola. Nde akalembetshiya Nɔa laki onto ɔlɔlɔ woho wakandahombe nsɛla waato wa luudu dia ndjashimbɛ nde la nkumbo kande kaamɛ la waa nyama yakahombe monga la nde lo waato.

Ɔnɔnyi ɔtɔi l’ɔkɔngɔ wa Mvula k’elola, Nɔa nde l’ase nkumbo kande wakatombe oma lo waato dia mbidjasɛ lo nkɛtɛ kambɛdiama. Koko, polo ndo laasɔ ko “kanula” atɛnama.

​—Awui ango tanemaka lo Etatelu tshapita 1-11; Judɛ 6, 14, 15; Ɛnyɛlɔ 12:9.