Yeso ekɔ Ɔlɔmbɛdi aso wa Laadiko wokana kɛtshi

1-2. a) Lande na kakatome Jehowa Ɔnande la nkɛtɛ? b) Kakɔna kayotɔsɛdingola lo sawo nɛ? (Hɛbɛru 5:​7-9)

AMBETA ɛnɔnyi oko 2000, Jehowa Nzambi akatome Ɔnande la nɛmɔ efula la nkɛtɛ. Lande na? L’atei w’awui wakandootome, dui dimɔtshi aki dia ndjotshungola anto oma lo lɔhɔmbɔ la pɛkato la nyɔi ndo ndjɔlɔngɔsɔla kɛnɛ kakalanya Satana. (Jni. 3:16; 1 Jni. 3:8) Jehowa akeyaka nto dia lɔsɛnɔ la Yeso la nkɛtɛ oko onto layowɔlɔngɔsɔla dia nde nkoma Ɔlɔmbɛdi aso wa Laadiko wokana kandji ndo kɛtshi. Yeso akatatɛ nkamba olimu ɔsɔ l’ɔkɔngɔ wa batisimu kande lo 29 T.D.a

² Lo sawo nɛ, tayɔsɛdingola woho wele lɔsɛnɔ la Yeso lanɛ la nkɛtɛ lakookimanyiya dia nyomoleka monga l’akoka wa nkamba oko Ɔlɔmbɛdi a Laadiko wokana kɛtshi. Etena katataleke mfudia eokelo kaso lo woho ‘wakakome Yeso kokele’ lo ɔkɛndɛ ande, mbayondoleka monga wɔdu le so dia ndjasukanya la Jehowa kaanga naka tambɔkɔmɔ l’ɔtɛ wa pɛkato kana wɛɔdu aso.—Adia Hɛbɛru 5:​7-9.

ƆNA NZAMBI LA NGANDJI AMBOYA LA NKƐTƐ

3-4. Etshikitanu akɔna wakasale Yeso etena kakandaye lanɛ la nkɛtɛ?

³ Efula ka l’atei aso tambohomanaka l’etshikitanu lo awui amɔtshi wele oko monɔ oma lo dihole dialangaso ndo nkakitɔna l’ase nkumbo ndo l’angɛnyi. Etshikitanu wa ngasɔ koka monga tshondo y’okakatanu. Koko ndooko onto lakahomana l’etshikitanu wele oko wakahomana la Yeso. L’olongo, nde aki ɔnaki Jehowa la lo nyuma lakaleke ohomba. Nde akalangemaka efula oma le Jehowa ndo aki l’ɔngɛnɔngɛnɔ lo woho wakandakambaka lo ‘lonya l’omi’ laki Nzambi. (Os. 16:11; Tok. 8:30) Koko, Filipɛ 2:7 mbutaka dia la lolango tshɛ nde “akayaetɛ oko mfumbe” lo ntshika dihole diande dia nɛmɔ dia l’olongo dia ndjɔsɛna l’anto wele keema kokele la nkɛtɛ.

⁴ Tɔsɛdingole nto awui wakahomana la Yeso lo eotwelo ndo lo ɛnɔnyi ande wa ntondo oko onto. Yeso akotɔ lo nkumbo k’ase wola, oko wɛnya woho wakayahondja ambutshi ande l’ɔkɔngɔ wa eotwelo kande. (Lɛw. 12:8; Luka 2:24) Lam’akeye Hɛrɔdɛ nkumekanga ka kɔlɔ dia Yeso ambotɔ, nde akayange dia mbodiaka. Dia nshimbɛ lɔsɛnɔ la Yeso, nkumbo kɛsɔ wakalawɔ otsha l’Edjibito l’edja k’etena kɛmɔtshi. (Mat. 2:​13, 15) Ande woho wambotshikitana lɔsɛnɔ la Yeso la la nkɛtɛ la lɔnɛ lakandasɛnaka l’olongo lee!

5. Kakɔna kakɛnaka Yeso lanɛ la nkɛtɛ, ndo ngande wakɔɔlɔngɔsɔla kɛnɛ kakahomana la nde dia ndjokotsha ɔkɛndɛ ande wa Ɔlɔmbɛdi a Laadiko? (Enda ndo osato.)

⁵ Lam’aki Yeso la nkɛtɛ, nde akɛnyi woho wakasowaka anto wakoodinge. Nde akashisha aha la taamu wakinde wa ngandji, ondo mbidja ndo Yɔsɛfu laki she ka loodia. Lam’akandakambaka olimu ande, Yeso akahomana la ase sudi, akanga wa totshungu, akanga wa dikuse, ambutshi waki la lɔkɔnyɔ l’ɔtɛ wa nyɔi ka lakiwɔ la ngandji, ndo Yeso akawaoke kɛtshi. (Mat. 9:​2, 6; 15:30; 20:34; Makɔ 1:​40, 41; Luka 7:13) Lo mɛtɛ, nde akɛnaka anto wasowa etena kakinde l’olongo. Koko kakianɛ oko onto, nde okoka nshihodia dimɛna woho wayaoka anto etena kasowawɔ. (Isa. 53:4) Kɛnɛ kakahomana la Yeso lanɛ la nkɛtɛ kakookimanyiya dia nshihodia woho wayaoka anto, ekakatanu awɔ ndo asui wasowawɔ. Ndo nde lawɔ akayaoke woho wayaoka anto ndo aki la nsaki yele oko vɔ mbidja ndo lɔkɔnyɔ, ɔlɛmbɛlɔ ndo ɔkɛyi.

YESO AKAYADJAKA LO DIHOLE DI’ANTO AKINA

6. Kakɔna katetsha bɛnyɛlɔ di’omvutshi Isaya lo kɛnɛ kendana la kɛtshi ndo la kandji kakokaka Yeso anto? (Isaya 42:3)

⁶ L’edja tshɛ k’olimu ande, Yeso akɛnya kɛtshi ka mamba otsha le anto wakawasalɛka akambo waha la losembwe. Lo nsala ngasɔ, nde akakotsha prɔfɛsiya. Lo Afundelo wa lo Hɛbɛru, wanɛ wele la mbetawɔ ka wolo le Jehowa mbɛdikamaka tena dimɔtshi la Jardɛ ya dimɛna yatɛwɔ ashi kana l’esongo wa wolo w’etale. (Os. 92:12; Isa. 61:3; Jɛr. 31:12) Koko ase woola ndo tombolambola mbɛdikamaka la sɔpɔ diakawaminola ndo l’oshinga wa tala watadimala, diangɔ diele bu ohomba efula le anto. (Adia Isaya 42:3; Mat. 12:20) Lo tshimbo ya nyuma k’ekila, omvutshi Isaya akakambe la bɛnyɛlɔ sɔ dia ntɛkɛta dikambo dia ngandji kakahombe Yeso mɛnya anto wakɛnamaka oko vɔ bu la nɛmɔ le anto akina.

7-8. Ngande wakakotsha Yeso prɔfɛsiya k’Isaya?

⁷ Mateo, ofundji w’Evanjiliɔ akakambe l’ɛtɛkɛta w’Isaya ɛsɔ le Yeso, lo mbuta ɔnɛ: “Nde hatohembola sɔpɔ diakawaminola, ndo nde hatodima oshinga wa tala wotadimala.” Ahindo amɔtshi wakasale Yeso waki lo wahɔ wa tombolambola wanɛ wakayaokaka oko sɔpɔ diambowominola kana oko anto wamboshisha elongamelo oko oshinga wa tala watadimala. L’atei w’anto wakandakɔnɔla mbaki ndo pami kaki la sudi. Nde komonga l’elongamelo k’ɔnɛ lushi lɔmɔtshi nde ayɔkɔnɔ ndo ayonga kaamɛ l’ase nkumbo kande ndo l’angɛnyi ande. (Luka 5:​12, 13) Nde akahomana nto la pami kɛmɔtshi kaki ehoke ndo kaki l’okakatanu dia ntɛkɛta. Ohokanyiya woho wakandakoke ndjaoka etena kakandɛnaka anto wasawola asawo wa lɔɔka koko nde kokoka mboka. (Makɔ 7:​32, 33) Koko hakome paka laasɔ ato.

⁸ Lo nshi ya Yeso, ase Juda efula waketawɔka dia wanɛ wakadiɛnɛka l’asui waki lo nongola dilanya l’ɔtɛ wa pɛkato yawɔ kana l’ɔtɛ wa pɛkato y’ambutshi awɔ. (Jni. 9:2) Etombelo waki la dietawɔ dia kɔlɔ sɔ ele, wanɛ wakadiɛnɛka l’asui wakayaokaka oko vɔ bu la nɛmɔ. Koko dia nkotsha prɔfɛsiya k’Isaya, Yeso akawakɔnɔla ndo akawakimanyiya dia vɔ nshikikɛ dia Jehowa ndjakiyanyaka lo dikambo diawɔ. Eshikikelo kakɔna katosha dui sɔ?

9. Ngande wɛnya Hɛbɛru 4:​15, 16 dia Ɔlɔmbɛdi aso wa Laadiko wele l’olongo ekɔ mɛtɛ la kɛtshi otsha le anto wele keema kokele?

⁹ Adia Hɛbɛru 4:​15, 16. Sho koka monga l’eshikikelo ɔnɛ Yeso ayongaka nshi tshɛ la kɛtshi oya le so. Tshɛkɛta ya lo Grɛkɛ yokadimɔmi ɔnɛ “kɛtshi” kana “kandji” nembetshiyaka monga la lonyangu l’efula ndo l’ɔkɛyi wele l’anto akina. Ekɔ dui dia diambo lo mɛna dia Pɔɔlɔ akakambe la tshɛkɛta yakɔ yaamɛ lo Hɛbɛru 10:​34, dia mɛnya dia sho mbokaka wanɛ wele lo lokanu kandji. Ɛkɔndɔ w’ahindo wakasale Yeso mɛnyaka polo lo yɛdikɔ yakɔna yakanandema Yeso lo mɛna woho wakasowaka anto akina. Nde kɔkɔnɔlaka anto paka l’ɔtɛ w’ɔnɛ nde akahombe nsala dui sɔ. Nde mɛtɛ akayakiyanyaka lo dikambo di’anto ndo akalangaka mbakimanyiya. Ɛnyɛlɔ lam’akandakɔnɔla kanga sudi, nde otokoka nsala dihindo sɔ oma l’etale koko lo dihole dia nsala ngasɔ, nde akananda pami kakɔ ndo ondo ɔsɔ mbaki mbala ka ntondo k’onto minanda kanga sudi l’edja k’ɛnɔnyi efula! Ndo etena kakandalange nkɔnɔla pami kaki ehoke, l’ɔlɔlɔ tshɛ nde akatshu la nde lo shɔpɔ. Ndo etena kakɔnyɔla Ofarisɛ womoto ɔmɔtshi lakayatshumoya lakasole ekolo wa Yeso l’asɔyi ande ndo mbokitola la divo diande, la dihonga tshɛ Yeso akaamɛ womoto akɔ. (Mat. 8:3; Makɔ 7:33; Luka 7:44) Yeso kombewɔka wanɛ waki la hemɔ kana wanɛ wakasale pɛkato ya weke. Koko nde akaalongolaka la kɛtshi tshɛ ndo akawaɛnyaka ngandji kakandawaokaka. Sho koka monga l’eshikikelo dia nde ekɔ la kɛtshi oya le so.

TOKOYA ƆLƆMBƐDI ASO WA LAADIKO ƐLƆ KƐNƐ

10. Naa diangɔ dia lo nyuma diakokaso nkamba la diɔ ɛlɔ kɛnɛ dia nkimanyiya akanga a mpoke ndo akanga a totshungu? (Enda ndo esato.)

¹⁰ Oko ambeki wa Yeso wa kɔlamelo, sho salaka la wolo dia mbookoya lo mɛnya anto akina ngandji, lo ndjadja lo dihole diawɔ ndo lo mbaoka kɛtshi. (1 Pe. 2:21; 3:8) Lam’ele hatokoke nkɔnɔla akanga a mpoke kana akanga a totshungu, sho koka mbakimanyiya lo nyuma. Ɛnyɛlɔ, ekanda efula walembetshiya Bible waya kakianɛ l’ɛtɛkɛta w’akanga a mpoke ndekana 100. Ndo dia nkimanyiya wanɛ wahɛnyi dimɛna, ekanda wa l’ɔtɛkɛta w’akanga a totshungu wambotondjama l’ɛtɛkɛta ndekana 60 ndo tovidɛo talembetshiya kɛnɛ kɛnama l’ekra tekɔ lo tondjama l’ɛtɛkɛta ndekana 100. Diangɔ sɔ tshɛ kimanyiyaka akanga a mpoke ndo totshungu dia ndjasukanya suke la Jehowa ndo l’Ɔnande.

11. Ngande wakɛnɛmɔla okongamelo wa Jehowa woho wayasha Yeso le anto woye oma l’ahole tshɛ? (Etsha 2:​5-7, 33) (Enda ndo esato.)

¹¹ Okongamelo wa Jehowa salaka la wolo dia nkimanyiya anto woye oma l’ahole tshɛ. Tohɔ dia l’ɔkɔngɔ wa eolwelo kande, Yeso akatome nyuma k’ekila l’oyango wa wanɛ wakasangana kaamɛ lo Fɛtɛ ka Pɛntɛkɔsta monga l’akoka w’onto l’onto mboka lokumu l’ɔlɔlɔ “l’ɔtɛkɛta ande wa lootɔ.” (Adia Etsha 2:​5-7, 33.) Lo ndjela ɛlɔmbwɛlɔ ka Yeso, okongamelo ambotondja ekanda efula walembetshiya Bible l’ɛtɛkɛta ndekana 1000 ndo ɛmɔtshi l’atei awɔ wekɔ lo tɛkɛtama paka oma le djui ya tshitshɛ tsho y’anto. Ɛnyɛlɔ ɛtɛkɛta ɛmɔtshi watɛkɛtama l’Amɛrikɛ, wekɔ lo tɛkɛtama paka oma le djui y’anto ya tshitshɛ tsho yadjasɛ lo Nɔrdɛ la lo Sidɛ k’Amɛrikɛ. Koko ekanda wambotondjama l’ɛtɛkɛta ɛsɔ ndekana 160 l’oyango wa nkimanyiya anto watɛkɛta ɛtɛkɛta akɔ dia nkondja diɛsɛ dia mboka lokumu l’ɔlɔlɔ. Ndo nto ekanda aso wambotondjama l’ɛtɛkɛta ndekana 20 wa Romani. Miliyɔ y’anto watɛkɛta ɛtɛkɛta ɛsɔ wotatɛ kambɛ Jehowa.

12. Kakɔna nto kasala okongamelo wa Jehowa lo dikambo di’anto ɛlɔ kɛnɛ?

¹² Laadiko dia nɔmbɔla welo wadjama dia dianganya lokumu l’ɔlɔlɔ, okongamelo wa Jehowa mbishaka nto ekimanyielo le wanɛ wadiɛnɛ l’etombelo w’oma lo mpokoso y’oma lo diangɔ diakatongama. Dia nkotsha oyango ɔsɔ, anangɛso l’akadiyɛso efula ndjakimɔka la lolango dia nkimanyiya anangɛwɔ l’akadiyɛwɔ wele lo dihombo. Okongamelo kimanyiyaka nto dia mbika ahole w’ɔtɛmwɛlɔ waha kawotake lɛnɛ akoka anto nsangana kaamɛ dia mbeka akambo wendana la ngandji ka Nzambi le wɔ.

ƆLƆMBƐDI ASO WA LAADIKO KOKA KOKIMANYIYA

13. Toho takɔna tɔmɔtshi tatokimanyiya Yeso?

¹³ Oko wende olami w’ɛkɔkɔ wa dimɛna, Yeso ndjashaka l’ehomba wa lo nyuma wa ɔmɔmɔ la l’atei aso. (Jni. 10:14; Ɛf. 4:7) Tena dimɔtshi, awui wahomana la so lo lɔsɛnɔ koka tokonya dia sho ndjaoka oko oshinga wa tala wotadimala kana oko sɔpɔ diakawaminola. Sho mbeyaka nkɔmɔ lo yɛdikɔ y’efula l’ɔtɛ wa hemɔ kɛmɔtshi ka wolo, l’ɔtɛ wahatatondoyisha dia nsala dui dimɔtshi kana l’ɔtɛ wambolana diɔtɔnganelo diasaso l’osekaso ɔtɛmɔdi. Mbeyaka monga wolo le so dia mbika washo l’elongamelo kaso ka lo nshi yayaye ndo minya yimba l’ɔkɛyi wele la so. Koko, tohɛke dia Yeso mɛnaka ekakatanu wahomana la yɛ ndo nde shihodiaka tokanyi tayɛ t’oma k’ɛse otema. Kɛtshi ka Yeso mbotshutshuyaka dia nsala akambo lo wahɔ ayɛ. Ɛnyɛlɔ, nde koka nkamba la nyuma k’ekila dia kosha wolo etena keyɛ wɔdu. (Jni. 16:7; Tito 3:6) Ndo nto, Yeso koka nkamba la “apami wele oko weshasha” ndo asekaso atɛmɔdi akina dia kokeketsha, kosukɛ ndo kokimanyiya.—Ɛf. 4:8.

14. Kakɔna kakokaso nsala etena kakɔmɔso?

¹⁴ Naka wɛ ambɔkɔmɔ, kete ohɔ dia Yeso ekɔ Ɔlɔmbɛdi aso wa Laadiko ndo kana yimba la kɛnɛ kalembetshiya dui sɔ le yɛ. Ohɔ dia Jehowa akootome lanɛ la nkɛtɛ aha tsho l’ɔtɛ wa ndjokimɔ lɔsɛnɔ lande oko oshinga w’etshungwelo koko ndo dia mbokimanyiya dia nde nshihodia dimɛna ekakatanu wahomana l’anto wele keema kokele. Etena kakɔmɔso l’ɔtɛ wa pɛkato kana wa wɛɔdu aso, Yeso mongaka suke ndo nomɔlomɔka dia tosha ekimanyielo “lo etena kahombama.”—Hɛb. 4:​15, 16.

15. Sha ɛnyɛlɔ kɛnya woho wele kaanga onto lakatombe oma lo lokoto la Jehowa koka nkondja ekimanyielo kende la tɔ ohomba dia nkalola l’etshumanelo.

¹⁵ Yeso nɔmbɔlaka nto anto ande lo welo wadjawɔ dia nyanga ndo nsukɛ wanɛ wakatombe oma lo lokoto la Jehowa. (Mat. 18:​12, 13) Tende kɛnɛ kakakomɛ Stefano.b L’ɔkɔngɔ wa nde minyɛma oma l’etshumanelo l’ɔkɔngɔ w’ɛnɔnyi 12, nde akɔshi yɛdikɔ ya ntshɔ lo losanganya. Nde mbutaka ate: “Komonga ɔtɔmbɔ l’esɔ le mi dia nsala dui sɔ, koko dimi lakalangaka dia nyomonga nto ɔmɔtshi la l’atei wa nkumbo k’Ɛmɛnyi wa Jehowa wokana ngandji. Dikumanyi diakasawola la mi diakakimanyiya dia ndjaoka dimɛna. Lo tena dimɔtshi, lakayaokaka oko onto lele bu la nɛmɔ ndo lakalangaka mpekɔ. Koko dikumanyi diakɔ diakambohola dia Jehowa la Yeso nangaka diaha dimi mpekɔ. Etena kakamakawoyɛma, etshumanelo k’otondo ndo ase nkumbo kami wakanongola la waasaso tshɛ. Kombeta edja, wadɛmi aketawɔ dia ntatɛ mbeka Bible ndo ɛlɔ kɛnɛ tokambɛ Jehowa oko nkumbo.” Ande ɔngɛnɔngɛnɔ wahomba monga l’Ɔlɔmbɛdi aso wa Laadiko lo mɛna anto wamboyatshumoya wakondja ekimanyielo kele la wɔ ohomba dia nkalola l’etshumanelo lee!

16. Lande na keyɛ la lowando lo monga l’Ɔlɔmbɛdi a Laadiko wa ngasɔ wokana kɛtshi?

¹⁶ L’edja ka lɔsɛnɔ lande la la nkɛtɛ, Yeso akashaka anto efula ekimanyielo lo etena kahombama. Ɛlɔ kɛnɛ, sho koka monga l’eshikikelo dia nde ayotokimanyiyaka etena tshɛ kayotongaka l’ohomba w’ekimanyielo kande. Ndo l’andja w’oyoyo waya kemembe, nde ayokimanyiya anto wele l’okitanyiya dia ntshungɔ tshɛ lo tshɛ oma lo etombelo tshɛ wa pɛkato ndo wa eongelo k’anto wele keema kokele. Ande lowando lele la so le Jehowa Nzambi kaso ɔnɛ lakatshutshuyama la ngandji k’efula ndo la kɛtshi dia nsɔna Ɔnande oko Ɔlɔmbɛdi aso wa Laadiko wokana kɛtshi lee!