Samuele wa Ntlha

1 Jaanong go ne go na le monna mongwe wa kwa Ramathaima-sofima*+ kwa kgaolong e e dithaba ya Eferaime,+ yo leina la gagwe e neng e le Elekana,+ morwa Jerohame, morwa Elihu, morwa Tohu, morwa Sufe, Moeferaime. 2 O ne a na le basadi ba le babedi; yo mongwe o ne a bidiwa Hana, mme yo mongwe o ne a bidiwa Penina. Penina o ne a na le bana, mme Hana ene o ne a se na bana. 3 Ngwaga le ngwaga, monna yoo o ne a tswa mo motseng wa gagabo a ya go obamela* Jehofa wa masomosomo le go mo ntshetsa setlhabelo kwa Shilo.+ Bomorwa Eli ba babedi, e bong Hofeni le Finease,+ ba ne ba direla e le baperesiti ba ga Jehofa gone koo.+

4 Letsatsi lengwe fa Elekana a ntsha setlhabelo, o ne a se kgaoganyetsa mosadi wa gagwe e bong Penina mmogo le bomorwawe le bomorwadie botlhe,+ 5 mme o ne a naya Hana karolo e e kgethegileng ka gonne o ne a rata Hana; le fa go ntse jalo, Jehofa o ne a sa mo naya bana.* 6 Mo godimo ga moo, mogadikane wa gagwe o ne a mo kgoba a sa kgaotse e le gore a mo utlwise botlhoko ka gonne Jehofa a ne a sa mo naya bana. 7 O ne a tle a dire jalo ngwaga le ngwaga; nako le nako fa Hana a ne a ya kwa ntlong ya ga Jehofa,+ mogadikane wa gagwe o ne a mo kgoba fela thata mo e leng gore o ne a lela e bile a sa je. 8 Le fa go ntse jalo, monna wa gagwe e bong Elekana o ne a mo raya a re: “Hana, o lelela eng, le gone ke ka ntlha yang fa o sa je, mme ke ka ntlha yang fa o hutsafetse thata jaana?* A ga ke botoka mo go wena go na le bana ba basimane ba le lesome?”

9 Go tswa foo, fa ba sena go ja le go nwa kwa Shilo, Hana o ne a ema a bo a tsamaya. Ka nako eo, moperesiti Eli o ne a ntse mo setulong fa kgorong ya tempele*+ ya ga Jehofa. 10 Hana o ne a hutsafetse thata, mme o ne a simolola go rapela Jehofa+ le go lela mo go botlhoko. 11 Mme o ne a dira maikano ano: “Ao tlhe Jehofa wa masomosomo, fa o leba go boga ga motlhanka wa gago o bo o nkgakologelwa e bile o sa lebale motlhanka wa gago o bo o naya motlhanka wa gago ngwana wa mosimane,+ ke tla mo naya Jehofa malatsi otlhe a botshelo jwa gagwe, mme legare ga le kitla le kgoma tlhogo ya gagwe.”+

12 Fa a ntse a rapela Jehofa ka lobaka lo loleele, Eli o ne a lebeletse molomo wa gagwe. 13 Hana o ne a buela mo pelong, molomo wa gagwe ke one fela o o neng o roroma, mme lentswe la gagwe le ne le sa utlwale. Ka jalo, Eli o ne a akanya gore o tagilwe. 14 Eli o ne a mo raya a re: “O dira eng fano o tagilwe? Tlogela botagwa.” 15 Fa a rialo, Hana o ne a mo araba jaana: “Nnyaa morena wa me! Ke mosadi yo o ngomogileng pelo;* ga ke a nwa beine kgotsa sepe se se tagang, mme ke tshololela maikutlo a me mo go Jehofa.+ 16 O se ka wa tsaya gore nna motlhanka wa gago, ke mosadi yo o se nang mosola, ka gonne go tla go fitlha jaanong ke ntse ke bua ka ntlha ya go bo ke utlwile botlhoko thata e bile ke tshwenyegile thata.” 17 Foo Eli o ne a mo araba a re: “Tsamaya ka kagiso, mme e kete Modimo wa Iseraele a ka go naya se o se kopileng mo go ene.”+ 18 Hana ene o ne a re: “E kete o ka mpontsha bopelonomi ka metlha.” Mme mosadi yoo o ne a tsamaya, a fitlha a ja, mme sefatlhego sa gagwe se ne se sa tlhole se tlhontse.

19 Ba ne ba tsoga phakela thata ba bo ba ikoba fa pele ga ga Jehofa, morago ga moo ba ne ba boela kwa ntlong ya bone kwa Rama.+ Elekana o ne a tlhakanela dikobo le mosadi wa gagwe e bong Hana, mme Jehofa o ne a mo gakologelwa.+ 20 Mo lobakeng lwa ngwaga,* Hana o ne a ima mme a tshola ngwana wa mosimane a bo a mo mmitsa+ Samuele,* ka gonne, jaaka a ile a bua, “ke mo kopile mo go Jehofa.”

21 Fa nako e ntse e tsamaya, Elekana o ne a tsamaya le ba lelapa la gagwe botlhe a ya go ntshetsa Jehofa setlhabelo sa ngwaga le ngwaga+ le go isa setlhabelo sa gagwe sa maikano. 22 Le fa go ntse jalo, Hana ga a ka a tsamaya+ ka gonne o ne a raya monna wa gagwe a re: “Fela fa mosimane a sena go kgwisiwa, ke tla mo tlisa; go tswa foo, o tla bonala fa pele ga ga Jehofa a bo a tswelela a nna koo go tloga ka nako eo go ya pele.”+ 23 Foo monna wa gagwe e bong Elekana o ne a mo raya a re: “Dira se o akanyang gore se siame.* Sala mo gae go fitlha o mo kgwisa. E kete Jehofa a ka diragatsa se o se buileng.” Ka jalo, mosadi o ne a sala mo gae mme a anyisa morwawe go fitlha a mo kgwisa.

24 Fela fa a sena go mo kgwisa, o ne a mo isa kwa Shilo, mmogo le poo e e nang le dingwaga tse tharo, bupi jwa selekanyo sa dikilogerama di ka nna 11* le nkgo e kgolo ya beine,+ mme o ne a ya kwa ntlong ya ga Jehofa kwa Shilo,+ a na le mosimane. 25 Go tswa foo, ba ne ba tlhaba poo mme ba tlisa mosimane kwa go Eli. 26 Foo Hana o ne a re: “Intshwarele, morena wa me! Ke ikana fa pele ga gago gore ke nna mosadi yo o neng a eme le wena mo lefelong leno a rapela Jehofa.+ 27 Ke ne ke rapelela mosimane yono, mme Jehofa o ne a nnaya se ke neng ka se kopa mo go ene.+ 28 Mme jaanong le nna ke mo adima Jehofa. O adimilwe Jehofa malatsi otlhe a botshelo jwa gagwe.”

Mme o* ne a ikoba fa pele ga ga Jehofa gone foo.