Dipokano Tsa Tirelo ka August

Beke E E Simololang ka August 3

Pina 162

10 mets: Dikitsiso tsa phuthego le Dikitsiso tse di tlhophilweng go tswa go Tirelo ya Rona ya Bogosi. Tlotla ka dintlha tseo di ka buelelwang go tswa mo dimakasineng tsa bosheng. Kgothaletsa botlhe gore ba nne le seabe mo tirong ya tshimo mo mafelobekeng ano, go akaretsa le go tsamaisa dimakasine. August ke kgwedi ya bofelo ya ngwaga wa tirelo. Kgothaletsa baboledi botlhe gore ba nne le seabe mo bodiheding ka beke nngwe le nngwe le gore ba bege tirelo ya bone ka bonako fela fa kgwedi ya August e sena go fela. A rotlhe re ka berekela gore go nne le tlhora e ntšha ya baboledi ka August?

15 mets: “Diketapele tsa go Tsosa Kgatlhego.” Se sekasekiwa ka dipotso le dikarabo. Dira pontsho ya dintlha tseo di bontshiwang mo serapeng 5.

20 mets: “Tsaya Kgato E E Siameng Gore O Tle O Gatele Pele Ka Mo Go Oketsegileng.” Tlotla ka dirapa tsa ntlha tse pedi jaaka fa o neela puo. Tlotla ka dirapa tse di setseng tsa setlhogo seno ka tsela ya dipotso le dikarabo. Otlelela dintlha tseo di ka dirisiwang mo lefelong la lona. Konela ka tshobokanyo e khutshwane.

Pina 155 le thapelo e e konelang.

Beke E E Simololang ka August 10

Pina 133

10 mets: Dikitsiso tsa phuthego ya lona, go akaretsa le pego ya diakhaonto le meneelo eo go itsisitsweng fa e amogetswe. Akgolela phuthego go bo e tshegetsa phuthego ya lona ka madi, mmogo le tiro ya Mokgatlho ya lefatshe ka bophara.

20 mets: Go Tlhagolela Kgatlhego mo Maetong a go Boela. Motlotlo ka molebedi wa tirelo. Ba le bantsi ba go fitlhela e le selo se se ipedisang go buisana le batho le go ba tlogelela dibuka. (omTN dits. 87-8) Boikarabelo joo re nang le jone bo akaretsa go tlhagolela kgatlhego mo dipelong tsa bao re buisanang le bone. Dira pontsho e khutshwane eo e bontshang kafa pampitshana e ka dirisiwang ka gone go tlhagolela kgatlhego mo loetong lwa go boela koo go ileng ga seka ga tsamaisiwa dibuka dipe mo loetong lwa ntlha gone. Buelela ntlha e le nngwe fela kana di le pedi. Dira pontsho e khutshwane eo e bontshang kafa tshedimosetso eo e fitlhelwang go index ya buka ya Go Fetolana le yone e ka dirisiwang ka gone. Otlelela dintlha tse di opang kgomo lonaka le tse di tlhamaletseng tseo di tlhalosiwang mo bukeng eno tseo di ka dirisediwang go tlhagolela kgatlhego mo Bibeleng. Bontsha kafa go ka rulaganyediwang maeto a mangwe go ya pele ka gone.

15 mets: “Babelona O Mogolo.” Motlotlo mo bukeng ya Go Fetolana, ditsebe 27-32. Pontsho: Mmoledi o tlotla le yoo a ithutang nae Bibela malebana le kgatelopele ya gagwe. O otlelela kafa go tlhokafalang ka gone gore re lebiwe ke Jehofa jaaka batho bao ba itshekileng, bao ba tshwanelwang ke thuso le tshegofatso ya Gagwe. (1 Pet. 1:15, 16) Otlelela kafa go leng botlhokwa ka gone gore motho a tshabe mo go Babelona gone jaanong mme a kopanele le phuthego ya ga Jehofa e e itshekileng. Modulasetulo o konela ka go kgothaletsa bakaulengwe gore ba dirise dikgatiso go kaela bao re ithutang nabo kwa phuthegong le gore ba dirise thuso eo ba e neelwang ke bagolwane.

Pina 129 le thapelo e e konelang.

Beke E E Simololang ka August 17

Pina 113

15 mets: Dikitsiso tsa phuthego. Dikgang tsa Bolegodimo. Go tlotliwa ka setlhogo se se reng “Go Tshela ka Mogopolo O O Lekalekaneng le ka Tshiamo.” Kgothaletsa bakaulengwe gore ba dire dithulaganyo tsa esale gale gore ba nne teng kwa thulaganyong ya kopano e e kgethegileng ya letsatsi le le lengwe mo ngwageng wa tirelo wa ka 1993. Itsise letlha la yone le lefelo leo e tlileng go tshwarelwa kwa go lone fa e le gore le a itsiwe. Gape, ba kgothaletse gore ba nne le seabe mo tirong ya tshimo mo mafelobekeng ano.

20 mets: “Kgwetlho ya go Dira Maeto a go Boela.” Dipotso le dikarabo. Fa lo sena go sekaseka serapa sa 5 le 6, nna le dipontsho di le pedi. (1) Bontsha kafa pampitshana e ka dirisiwang ka gone go simolola thuto ya Bibela. (2) Tlhopha setlhogo sengwe go tswa mo bukeng ya Go Fetolana mme o bontshe kafa se ka dirisiwang ka gone go araba potso mo loetong lwa go boela. Bontsha kafa dithulaganyo tsa go itshuga di leng mosola ka gone. Ba kgothaletse go boela kwa go botlhe bao ba bontshitseng kgatlhego.

10 mets: Motlotlo ka setlhogo se se reng “A O A Gakologelwa?” se se go Tora ya Tebelo ya April 15, 1992. Kgothaletsa botlhe gore ba nne le thulaganyo e e molemo ya go bala dimakasine. Ba neele dikakantsho tseo ba ka kgonang go di dirisa.

ina 130 le thapelo e e konelang.

Beke E E Simololang ka August 24

Pina 72

5 mets: Dikitsiso tsa phuthego.

15 mets: “Go Dira ka Ntlo le Ntlo ka Tsela E E Nang le Katlego.” Motlotlo wa dipotso le dikarabo. Kgothaletsa gore go tsenelwe bobulatsela jo bo thusang ka September. Umaka gore gantsi bao ba tsenelang bobulatsela jo bo thusang ba tswelela pele tiro ya bone e le kwa godimo mo dikgweding tse di latelang morago ga eo.

15 mets: Tlotla ka dintlha tsa setlhogo se se reng “Moganetsa-Keresete” se se mo bukeng ya Go Fetolana, ditsebe 294-5. “Moganetsa-Keresete” o tlhalosiwa jang? A go na le a le mongwe fela, kana a ba bantsi? Moganetsa-Keresete o tlhagile leng, mme ke bomang bao ba ka tsewang jaaka ene? Pontsho e khutshwane eo e leng malebana le mmoledi mongwe yoo o etelang motho mongwe yo o tsenang kereke yoo o ileng a tlhagisiwa ka Basupi ba ga Jehofa.

10 mets: “Go Dirisa Buka ya Monna Yo Mogolo go Gaisa Botlhe Fa Re Dira Maeto a go Boela.” Tlotla ka bokhutshwane ka dintlha tseo di leng mo dirapeng tsa ntlha tse pedi. Morago ga moo o bo o dira pontsho ya go dirwa loeto lwa go boela go dirisiwa mokgwa wa go buelela go simolola thuto ya Bibela ka tlhamalalo.

Pina 126 le thapelo e e konelang.

Beke E E Simololang ka August 31

Pina 30

5 mets: Dikitsiso tsa phuthego.

15 mets: A O Dira Kgatelopele Semoyeng? Motlotlo ka mogolwane. A bao ba leng mo phuthegong ba ile ba fitlhelela mekgele mengwe e e rileng mo ngwageng o o fetileng wa tirelo? Fa e le gore ga go a nna jalo, ke ka ntlha yang? Ba akantshe mekgele eo ba ka nnang ba e itlhomela. Kgatelopele e botlhokwa go sireletsa bomoya jwa rona. (Bafil. 3:16) Pontsho e khutshwane ya lelapa, ka nako ya thuto ya lelapa, le tlhatlhoba bodihedi jwa lone ka namana go bona moo le ka dirang kgatelopele semoyeng teng.

10 mets: Mogolwane yo o tshwanelegang o tshwanetse a neela pego malebana le tiro eo e dirilweng kwa tshimong e e sa abiwang. Botsolotsa Baboledi bangwe mme o dire gore ba bolele maitemogelo mangwe ao ba nnileng le one mo kgweding ya ntlha ya letsholo leno. Itsise phuthego ka dithulaganyo tsa ka September mme o kgothaletse botlhe gore ba nne le seabe bobotlana gangwe mo kgweding. Bagolwane ba kgothalediwa gore ba rulaganyetse gore go nne le puo ya phatlalatsa kwa tshimong e e sa abiwang koo go ka kgonegang teng. Leka go tsamaya le sebui sa phatlalatsa seo se ka kgonang go neela bareetsi puo ka puo ya bone ka namana. Go ka nna ga tlotliwa ka dilo tse di tlhokwang ke phuthego ya lona fa e le gore phuthego ga e bereke kwa tshimong e e sa abiwang.

15 mets: Buelelang buka ya Tshelela Ruri ka September. Puo e e nang le pontsho. Tlotla ka dintlha tseo di ka buelelwang mmogo le ditshwantsho tseo di ka buelelwang fa lo tsamaisa buka ya Tshelela Ruri. Dintlha tseo di leng mo bukeng ya Go Fetolana kafa tlase ga setlhogo se se reng “Boikepo” di ka dirisiwa moo di tsenang teng. Gongwe dintlha tseo di leng mo dikgaolong 11 le 19 “Ke Eng Fa Modimo O Dumeletse Boikepo?” le “Morago ga Hara–Magedona, Go Tla Lefatshe la Paradaise” di ne di ka ikuela go mong wa ntlo. Dira gore go nne le mmoledi mongwe a dira pontsho ya mpho, a dirisa Diane 2:21, 22 le ditshwantsho tse di leng mo ditsebeng 156-8, 161, le 162, a gatelela ntlha ya gore boikaelelo jwa Modimo jwa kwa tshimologong ka lefatshe bo tla akofa bo diragadiwa.

Pina 109 le thapelo e e konelang.