Go Baakanyetsa Dipuo Tsa Baithuti Tsa Sekolo

PUO nngwe le nngwe e motho a e newang mo sekolong e mo naya sebaka sa go gola. Iteke ka tlhoafalo, mme ka iketlo botswelelopele jwa gago bo tla bonala, mo go wena le mo go ba bangwe. (1 Tim. 4:15) Sekolo se tla go thusa go godisa bokgoni jwa gago ka botlalo.

A o a tshoga fa o itse gore o tlile go bua mo pele ga phuthego? Ke selo se se tlwaelegileng seo, le fa o ntse o na le nako e telele o ikwadisitse mo sekolong. Le fa go ntse jalo, go na le dilo dingwe tse di ka go thusang gore o se ka wa tshoga thata. Fa o le kwa gae, itlwaetse gore gantsi o balele kwa godimo. Kwa dipokanong tsa phuthego, akgela nako le nako, mme fa o le mmoledi, ya tshimong ka metlha. Seno se tla go naya maitemogelo a go bua mo pele ga batho. Mo godimo ga moo, baakanyetsa dipuo tsa gago tsa baithuti go sa le gale, mme buela kwa godimo fa o ikatisetsa go di neela. Gakologelwa gore o tla bo o bua mo pele ga bareetsi ba ba botsalano. Pele o neela puo epe fela, rapela Jehofa. O itumelela go naya batlhanka ba gagwe moya o o boitshepo fa ba mo kopa.—Luke 11:13; Bafil. 4:6, 7.

O se ka wa lebelela dilo tse di sa kgonegeng. Go tsaya lobaka lo loleele gore o kgone go nna le maitemogelo jaaka sebui le gore o nne morutisi yo o setswerere. (Mik. 6:8) Fa e le gore o sa tswa go ikwadisa mo sekolong, o se ka wa lebelela gore o tla neela puo e e molemolemo lekgetlho la ntlha fela. Go na le moo, nako le nako berekela mo ntlheng e le nngwe fela ya kgakololo ya puo. Ithute karolo ya buka eno e e tlotlang ka ntlha eo. Fa go kgonega, ikatise o dirisa dilo tse di akantshiwang mono. Seno se tla go naya maitemogelo a mo dilong tse di amanang le ntlha eo ya kgakololo pele ga o neela puo ya gago kwa phuthegong. Fa nako e ntse e ile o tla kgona go gatela pele.

Tsela ya go Baakanyetsa Puo ya Mmalo

Go baakanyetsa go bala phatlalatsa ga se kgang fela ya go kgona go bitsa mafoko a a mo karolong e o abetsweng go e bala. Leka go tlhaloganya sentle se mmalo o se kayang. Ka bonako fela fa o sena go amogela kabelo ya gago, e bale yotlhe ka boikaelelo joo mo mogopolong. Leka go tlhaloganya ntlha ya polelo nngwe le nngwe le mogopolo o o tlhalosiwang mo serapeng sengwe le sengwe gore o kgone go tlhalosa dintlha sentle ka maikutlo a a tshwanetseng. O ka nna wa botsa ba ba itseng puo eo sentle go bona tsela e e tshwanetseng ya go bitsa mafoko a a sa tlwaelegang. Dira gore o itse mmalo wa gago sentle. Batsadi ba ka nna ba tlhoka go thusa bana ba bone ba babotlana go dira seno.

A o abetswe go bala karolo nngwe mo Baebeleng kgotsa gongwe dirapa mo setlhogong sa Tora ya Tebelo? Fa e le gore go na le dikhasete tsa mmalo oo ka puo ya lona, go ka go thusa go reetsa mmalo oo mme o ele tlhoko dilo tse di tshwanang le go bitsa mafoko, go bala dipolelo, go gatelela, le go fetofetoga ga lentswe. Go tswa foo, leka go tsenya dikarolo tseno mo mmalong wa gago.

Fa o simolola go baakanyetsa puo ya gago, tlhomamisega gore o ithute ka kelotlhoko thuto e e tlotlang ka ntlha ya puo e o abetsweng go berekela mo go yone. Fa go kgonega, e boeletse gape morago ga gore o ikatisetse go bala mmalo o o o abetsweng o o balela kwa godimo makgetlho a le mmalwa. Leka go dirisa kgakololo e e kwadilweng eo ka botlalo kafa o ka kgonang ka gone.

Thapiso eno e tla go thusa thata mo bodireding. Fa o ntse o nna le seabe mo tirelong ya tshimo, o nna le dibaka di le dintsi tsa go balela ba bangwe. E re ka Lefoko la Modimo le na le maatla a go fetola matshelo a batho, go botlhokwa gore o le bale sentle. (Baheb. 4:12) O se ka wa lebelela gore o tla kgona go dira dikarolo tsotlhe tsa go bala sentle morago ga go neela puo e le nngwe fela kgotsa di le pedi. Fa moaposetoloi Paulo a ne a kwalela mogolwane wa Mokeresete yo o neng a na le maitemogelo a dingwaga di le dintsi, o ne a kwala jaana: “Tswelela o dira ka bojotlhe mo go baleng phatlalatsa.”—1 Tim. 4:13.

Go Bereka ka Setlhogo le Seting

Fa o amogela puo e e batlang gore o bereke ka seting mo sekolong, o tshwanetse go e simolola jang?

O tshwanetse go akanyetsa dilo di le tharo tsa konokono: (1) setlhogo se o se abetsweng, (2) seting ya gago le motho yo o tla bong o bua le ene, le (3) ntlha ya kgakololo e o abetsweng go berekela mo go yone.

O tshwanetse go kgobokanya dintlha tsa setlhogo se o se abetsweng. Mme pele ga o ya kgakala ka seo, akanyetsa seting ya gago ka kelotlhoko o bo o akanyetse le motho yo o tla bong o bua le ene, ka gonne dintlha tseno di tla ama thata mofuta wa dintlha tse o tla tlotlang ka tsone le tsela e o tla di tlotlang ka yone. O tla bo o dirisa seting efe? A o tla bo o bontsha gore o ka bolelela motho yo o mo itseng dikgang tse di molemo jang? Kgotsa a o tla bontsha gore go ka dirwang fa o kopana le motho lekgetlho la ntlha? A motho yono o mogolo mo go wena kgotsa o monnye? A ka tswa a ikutlwa jang ka kgang e o rulaganyetsang go e tlotla le ene? A ka tswa a setse a itse dintlha tsa yone go le kana kang? O lebeletse go fitlhelela boikaelelo bofe ka motlotlo wa gago le ene? Dikarabo tsa dipotso tseno di tla go kaela ka tsela e e molemo gore o dire jang.

O tla bona kae dintlha tsa setlhogo se o se abetsweng? Mo ditsebeng 33 go ya go 38 tsa buka eno, go tlotlwa ka setlhogo se se reng “Tsela ya go Dira Patlisiso.” Se bale, mme go tswa foo o dirise didirisiwa tsa go batlisisa tse o nang le tsone. Gantsi o tla fitlhela o na le dintlha di le dintsi go feta tse o ka di dirisang. Bala mo go lekaneng gore o nne o itse ka dintlha tse di leng teng tse o ka di dirisang. Le fa go ntse jalo, fa o ntse o dira jalo, nna o ntse o akantse ka seting e o tlileng go e dirisa mo puong ya gago le ka motho yo o tla bong o bua le ene. Tshwaya dintlha tse di tla tshwanelang go dirisiwa.

Pele ga o rulaganya puo ya gago le go tlhopha dintlha tse o tla di dirisang, dirisa nakonyana o bala setlhogo sa dintlha tsa kgakololo tse o abetsweng go berekela mo go tsone. Lengwe la mabaka a magolo thata a go bo o neilwe kabelo eo ke gore o dirise dintlha tseo tsa kgakololo.

Fa o tlhalosa dintlha tsa gago mo nakong e o e beetsweng, o tla kgona go di konela sentle, ka gonne o tla bontshiwa fa nako e o e beetsweng e fedile. Le fa go ntse jalo, mo bodireding jwa rona jwa tshimo, ga se ka dinako tsotlhe re tshwenyegileng ka nako. Ka jalo fa o ntse o baakanyetsa, akanyetsa nako e o e neilweng, mme o tlhokomele thata go ruta ka botswerere.

Ntlha ya Botlhokwa ka Diseting. Sekaseka dikakantsho tse di mo tsebeng 82, mme o tlhophe e e tla dirang sentle mo bodireding jwa gago le e e tla go kgontshang go dirisa dintlha tse o di abetsweng ka tsela e e molemo. Fa e le gore o ntse o le mo sekolong ka lobakanyana lo loleele, leba seno e le sebaka se o se newang go tokafatsa le go nna le botswerere jo bo oketsegileng mo bodireding jwa gago.

Fa molebedi wa Sekolo sa Bodiredi a go abela seting, amogela kgwetlho eo. Diseting di le dintsi di akaretsa go neela bosupi. Fa e le gore ga o ise o ke o neele bosupi mo maemong a a tlhalosiwang, leka go bona megopolo e mesha ka go bua le baboledi ba ba kileng ba neela bosupi mo maemong ao. Fa go kgonega, leka go neela puo ya gago o dirisa seting e e tshwanang le e o tla e dirisang mo sekolong. Seno se tla go thusa gore o fitlhelele boikaelelobogolo jwa go thapisiwa ga gago.

Fa Kabelo E le Ka Mokgwa wa go Neela Puo

Fa o le monna, o ka nna wa abelwa go neela phuthego puo e khutshwane. Fa o baakanyetsa dipuo tseno, dintlha tsa konokono tse di tshwanetseng go akanyediwa di tshwana le tse di setseng di tlhalositswe tsa dipuo tsa baithuti tse di neelwang ka tsela ya go dira pontsho. Di farologana fela ka bareetsi le ka tsela e di neelwang ka yone.

Gantsi go nna molemo fa o baakanyetsa dintlha tsa gago ka tsela e e leng gore mongwe le mongwe mo bareetsing o tla solegelwa molemo. Bontsi jwa batho ba ba tla bong ba le teng ba setse ba itse boammaaruri jwa konokono jwa Baebele. Ba ka nna ba bo ba tlwaelane le setlhogo se o abetsweng go bua ka sone. Akanyetsa se ba setseng ba se itse ka setlhogo sa gago. Leka go dira gore puo ya gago e ba solegele molemo ka tsela nngwe. Ipotse jaana: ‘Nka dirisa jang setlhogo sa me go dira gore nna le bareetsi ba me re anaanele Jehofa botoka jaaka motho? Ke ntlha efe mo dintlheng tseno e e tla re thusang go lemoga thato ya Modimo? Dintlha tseno di ka re thusa jang go dira ditshwetso tse di botlhale mo lefatsheng leno le le faraferweng ke dikeletso tsa nama?’ (Baef. 2:3) Gore o bone dikarabo tse di kgotsofatsang tsa dipotso tseno, go tlhokega gore o dire patlisiso. Fa o dirisa Baebele, leka go dira gore o se ka wa felela fela ka go bala ditemana. Leka go tlhalosa ditemana tse o di balang, mme o bontshe gore di re thusa jang mo go direng ditshwetso. (Dit. 17:2, 3) O se ka wa leka go bua dilo di le dintsi thata. Neela dintlha tsa gago ka tsela e bareetsi ba gago ba tla di gakologelwang motlhofo ka yone.

Go baakanyetsa gape go tshwanetse ga akaretsa le go ela tlhoko tsela e o tlileng go neela puo ka yone. O se ka wa tseela ntlha eno kwa tlase. Ikatisetse go neela puo ya gago o buela kwa godimo. Boiteko jo o bo dirang fa o ithuta le go dirisa dintlha tse di farologaneng tsa kgakololo tsa go neela puo bo tla go thusa thata gore o gatele pele. Le fa o ka tswa o le sebui se sesha kgotsa o na le maitemogelo, baakanyetsa sentle gore o kgone go bua ka go tlhatswega pelo le ka maikutlo a a tshwanelang dintlha tse o tla bong o bua ka tsone. Fa o ntse o neela puo nngwe le nngwe mo sekolong, nna o gakologetswe boikaelelobogolo jwa go dirisa mpho ya gago e o e neilweng ke Modimo ya go bua go galaletsa Jehofa.—Pes. 150:6.