Josia O ne A na Le Ditsala Tse di Siameng

A o akanya gore go thata go dira se se siameng?— Batho ba le bantsi ba akanya jalo. Baebele e re bolelela gore go ne go le thata gore mosimane mongwe yo o bidiwang Josia a dire se se siameng. Mme o ne a na le ditsala tse di siameng tse di neng di mo thusa. A re ithute se sengwe gape ka ga Josia le ditsala tsa gagwe.

Rraagwe Josia e ne le Amone, kgosi ya kwa Juda. Amone o ne a le bosula thata e bile a obamela medingwana. Fa rraagwe Josia a swa, Josia o ne a nna kgosi ya Juda. Mme o ne a le dingwaga di le robedi fela! A o akanya gore o ne a le bosula jaaka rraagwe?— Nnyaa, o ne a se bosula!

Tota le ka nako ya fa a ne a sa ntse a le monnye thata, Josia o ne a batla go reetsa Jehofa. Ka jalo, o ne a tlhopha fela batho ba ba neng ba rata Jehofa gore e nne ditsala tsa gagwe. Mme ba ne ba thusa Josia gore a dire se se siameng. Dingwe tsa ditsala tsa ga Josia e ne e le bomang?

Mongwe wa bone e ne e le Sefania. Sefania e ne e le moporofeti yo o neng a bolelela batho ba kwa Juda gore ba tla diragalelwa ke dilo tse di bosula fa ba obamela medingwana. Josia o ne a reetsa Sefania mme a obamela Jehofa e seng medingwana.

Tsala e nngwe ya ga Josia e ne e le Jeremia. O ne a lekana le Josia ka dingwaga mme fa ba gola, magae a bone a ne a le gaufi. E ne e le ditsala tse dikgolo mo e leng gore fa Josia a swa, Jeremia o ne a mo kwalela pina e e kgethegileng, a tlhalosa kafa a tlhologeletsweng Josia ka teng. Jeremia le Josia ba ne ba thusana go dira se se siameng le go reetsa Jehofa.

O ka ithuta eng ka se Josia a neng a se dira?— Le fa Josia a ne a le mosimanyana yo monnye fela, o ne a batla go dira dilo tse di siameng. O ne a itse gore ditsala tsa gagwe e tshwanetse go nna batho ba ba ratang Jehofa. Tlhomamisa gore o tlhopha ditsala tse di ratang Jehofa le tse di ka go thusang go dira se se siameng!