Rera ka Potlako!
1. Ke kgothatso efe ya ga Paulo e re tlhokang go e ela tlhoko mo motlheng wa rona?
1 “Rera lefoko, dira jalo ka potlako.” (2 Tim. 4:2) Ke ka ntlha yang fa kgothatso ya ga Paulo e le botlhokwa jaana mo motlheng wa rona? Mafoko ano a ka tlhotlheletsa jang matshelo a rona le a batho ba bangwe?
2. Ke ka ntlha yang fa re batla batho ba ba iseng ba utlwe dikgang tse di molemo ka tlhoafalo?
2 Matshelo a a Amega: Batho ba le dimilione go ralala lefatshe ba sa ntse ba tshwanelwa ke go utlwa dikgang tse di molemo tse di ka dirang gore ba bolokiwe. (Bar. 10:13-15; 1 Tim. 4:16) Batho ba le bantsi ba ba dipelo di phepa ba fitlhelwa mo tshimong e e berekiwang kgapetsakgapetsa. Fa re ba etela ka letsatsi le le farologaneng kgotsa ka nako e nngwe ka lone letsatsi leo, re ka nna ra fitlhela motho o sele. Go batla batho ka tlhoafalo jalo go ka dira gore re sale re na le segakolodi se se phepa e bile re se na molato wa madi.—Dit. 20:26.
3. Re ka dirisa jang nako ya rona ka botlhale mo bodireding?
3 Le fa Bakeresete ba lekgolo la ntlha la dingwaga ba ne ba lebane le kganetsano ya dikgoka, ba ne ba ‘tlatsa Jerusalema ka thuto ya bone.’ (Dit. 5:28) A le rona re ikemiseditse go “neela bosupi ka botlalo” jalo? (Dit. 10:42) Fa re le mo bodireding, a re dirisa nako ya rona sentle? Fa re ntse re letile fa ba bangwe ba dira maeto a go boela, a re leka go bua le batho ba ba fetang?
4. Go rera ka potlako go re thusa jang gore re nne re disitse?
4 Go Dira Gore re Nne Podimatseba le go Feta: E re ka tsamaiso eno ya dilo e tla tloga e fela, re tshwanetse go nna re le podimatseba, re nna re disitse. (1 Bathes. 5:1-6) Fa re nna re bua ka metlha ka tsholofelo ya Bogosi, re tila go imelwa ke tsamaiso eno ya dilo. (Luke 21:34-36) Kafa letlhakoreng le lengwe, fa re nna re “akantse thata” ka letsatsi la ga Jehofa, re tlhotlheletsega go oketsa seabe sa rona mo tirong ya go rera e e bolokang botshelo.—2 Pet. 3:11, 12.
5. Go tlotla botshelo go re tllhotlheletsa jang mo bodireding?
5 Fa re rera ka potlako, re bontsha gore re na le boikutlo jono jwa ga Jehofa ka botshelo: “Ga a eletse gore ope a senngwe mme o eletsa gore botlhe ba fitlhe mo boikwatlhaong.” (2 Pet. 3:9; Esek. 33:11) E kete re ka ikemisetsa go fitlhelela batho ba le bantsi ka mo re ka kgonang ka teng mo tshimong ya rona, re dira seno sotlhe go baka Jehofa!—Pes. 109:30.