ʻUluaki Kalonikali
15 Pea naʻe hokohoko atu ʻene langa ʻa e ngaahi fale maʻana ʻi he Kolo-ʻo-Tēvitá, pea naʻá ne teuteu ha feituʻu maʻá e ʻAʻake ʻa e ʻOtua moʻoní pea fokotuʻu ha tēniti ki ai.+ 2 Ko e taimi ia naʻe pehē ai ʻe Tēvita: “ʻE ʻikai ke fua ʻe ha taha ʻa e ʻAʻake ʻa e ʻOtua moʻoní tuku kehe pē ʻa e kau Līvaí, he kuo fili kinautolu ʻe Sihova ke nau fua ʻa e ʻAʻake ʻa Sihová pea ke nau fakahoko fatongia kiate ia maʻu ai pē.”+ 3 Naʻe fakatahatahaʻi leva ʻe Tēvita ʻa ʻIsileli kotoa ki Selusalema ke ʻohake ʻa e ʻAʻake ʻa Sihová ki he feituʻu naʻá ne teuteu ki aí.+
4 Naʻe fakatahatahaʻi mai ʻe Tēvita ʻa e hako ʻo ʻĒloné+ pea mo e kau Līvaí:+ 5 Mei he haʻa Kōhaté, ko e ʻeiki ko ʻUlielí mo hono fanga tokoua ʻe toko 120; 6 mei he haʻa Mēlalí, ko e ʻeiki ko ʻAsaiá+ mo hono fanga tokoua ʻe toko 220; 7 mei he haʻa Kēsomí, ko e ʻeiki ko Sioelí+ mo hono fanga tokoua ʻe toko 130; 8 mei he hako ʻo ʻElisafaní,+ ko e ʻeiki ko Semaiá mo hono fanga tokoua ʻe toko 200; 9 mei he hako ʻo Hepeloní, ko e ʻeiki ko ʻElielá mo hono fanga tokoua ʻe toko 80; 10 mei he hako ʻo ʻOsielí,+ ko e ʻeiki ko ʻAminatapé mo hono fanga tokoua ʻe toko 112. 11 ʻIkai ko ia pē, naʻe ui mai ʻe Tēvita ʻa e ongo taulaʻeikí ʻa Sātoki+ mo ʻĀpaiata+ pea mo e kau Līvaí ʻa ʻUlieli, ʻAsaia, Sioeli, Semaia, ʻEliela, pea mo ʻAminatape, 12 pea naʻá ne pehē ange kiate kinautolu: “Ko kimoutolu ʻa e ngaahi ʻulumotuʻa ʻo e ngaahi fale ʻo e ngaahi tamai ʻa e kau Līvaí. Fakamāʻoniʻoniʻi kimoutolu, ʻa kimoutolu mo homou fanga tokouá, pea ʻohake ʻa e ʻAʻake ʻa Sihova ko e ʻOtua ʻo ʻIsilelí ki he feituʻu kuó u teuteu ki aí. 13 Koeʻuhi naʻe ʻikai te mou fua ia ʻi he ʻuluaki taimí,+ naʻe hoko mai ai ʻa e houhau ʻa Sihova ko hotau ʻOtuá kiate kitautolu,+ koeʻuhí naʻe ʻikai te tau kumi ki he founga totonú.”+ 14 Ko ia naʻe fakamāʻoniʻoniʻi ai ʻe he kau taulaʻeikí mo e kau Līvaí kinautolu ke nau ʻohake ʻa e ʻAʻake ʻa Sihova ko e ʻOtua ʻo ʻIsilelí.
15 Pea naʻe fua ʻe he kau Līvaí ʻa e ʻAʻake ʻa e ʻOtua moʻoní ʻi honau umá ʻaki ʻa e ongo vaʻakau haʻamó,+ ʻo hangē tofu pē ko e meʻa naʻe tuʻutuʻuni ʻe Mōsese ʻi he folofola ʻa Sihová. 16 Pea naʻe tala ange leva ʻe Tēvita ki he ngaahi ʻeiki ʻo e kau Līvaí ke vaheʻi ʻa honau fanga tokoua ʻa ia ko e kau hivá ke nau hiva fiefia, pea tā mo e ngaahi meʻaleá, ko e ngaahi meʻalea filo, ngaahi haʻape,+ pea mo e ngaahi simipale.+
17 Ko ia naʻe vaheʻi ʻe he kau Līvaí ʻa Hēmani+ ko e foha ʻo Sioelí, pea mei hono fanga tokouá, ko ʻĒsafe+ ko e foha ʻo Pelekaiá, pea mei he haʻa Mēlalí ʻa ia ko honau fanga tokouá, ko ʻĒtani+ ko e foha ʻo Kusaiá. 18 Naʻe kau fakataha mo kinautolu ʻa honau fanga tokoua ʻi he vāhenga hono uá,+ ʻa Sākalaia, Peni, Siasieli, Semilamoti, Siheli, ʻUni, ʻEliapi, Penaia, Māseia, Matitaia, ʻElifelehu, mo Mikineia, pea mo ʻŌpeti-ʻītomi mo Sieli ko e ongo leʻo matapaá. 19 Ko Hēmani,+ ʻĒsafe,+ pea mo ʻĒtani ʻa e kau hiva te nau tā ʻa e ngaahi simipale kopá;+ 20 pea ko Sākalaia, ʻEsieli, Semilamoti, Siheli, ʻUni, ʻEliapi, Māseia, pea mo Penaia naʻa nau tā ʻa e ngaahi meʻalea filo naʻe fakatonutonu ki he kī ʻAlamotí;*+ 21 pea ko Matitaia,+ ʻElifelehu, Mikineia, ʻŌpeti-ʻītomi, Sieli, pea mo ʻAsasia naʻa nau tā ʻa e ngaahi haʻape naʻe fakatonutonu ki he kī Seminití,*+ pea ke nau tataki ʻa e hivá. 22 Ko Kenanaia+ ko e ʻeiki ʻo e kau Līvaí naʻá ne tokangaʻi ʻa hono fua ʻo e ʻAʻaké, he naʻá ne pōtoʻi ai, 23 pea ko Pelekaia mo ʻElikena ʻa e ongo leʻo matapā naʻá na ngāue ʻi he tafaʻaki ʻo e ʻAʻaké. 24 Ko Sepanaia, Siosafate, Netanili, ʻAmasai, Sākalaia, Penaia, pea mo ʻEliese ʻa e kau taulaʻeiki naʻa nau ifiʻi leʻo-lahi ʻa e ngaahi talupité ʻi muʻa ʻi he ʻAʻake ʻa e ʻOtua moʻoní,+ pea ko ʻŌpeti-ʻītomi pea mo Sihia foki ʻa e ongo leʻo matapā naʻá na ngāue ʻi he tafaʻaki ʻo e ʻAʻaké.
25 Pea ko Tēvita mo e kau mātuʻa ʻo ʻIsilelí pea mo e ngaahi ʻeiki ʻo e ngaahi toko afé naʻa nau ʻalu atu ke ʻohake ʻa e ʻaʻake ʻo e fuakava ʻa Sihová mei he fale ʻo ʻŌpeti-ʻītomí+ ʻi he fiefia.+ 26 ʻI hono tokoniʻi ʻe he ʻOtua moʻoní ʻa e kau Līvai naʻa nau fua ʻa e ʻaʻake ʻo e fuakava ʻa Sihová, naʻa nau feilaulauʻi ai ʻa e kiʻi pulu tangata ʻe fitu mo e sipi tangata ʻe fitu.+ 27 Naʻe tui ʻe Tēvita ha kofu taʻenima tupenu lelei, pea pehē ki he kau Līvai kotoa naʻa nau fua ʻa e ʻAʻaké, mo e kau hivá, pea mo Kenanaia naʻá ne tokangaʻi ʻa e kau hiva ʻoku nau fua ʻa e ʻaʻaké; naʻe tui foki ʻe Tēvita ha ʻēfoti līneni.+ 28 Ko e kakai ʻIsilelí kotoa naʻa nau ʻohake ʻa e ʻaʻake ʻo e fuakava ʻa Sihová fakataha mo e kaikaila fiefia,+ pea mo e leʻo ʻo e meʻaifi, mo e ngaahi talupite,+ mo e ngaahi simipale, ʻo nau tā leʻo-lahi ʻa e ngaahi meʻalea filo mo e ngaahi haʻape.+
29 Ka ʻi he taimi naʻe aʻu atu ai ʻa e ʻaʻake ʻo e fuakava ʻa Sihová ki he Kolo-ʻo-Tēvitá,+ naʻe sio hifo ʻa e ʻofefine ʻo Saula ko Maikalé+ ʻi he matapā-teké ʻo ne sio ki he meʻe holo ʻa Tuʻi Tēvita mo kau ʻi he fakafiefiá; pea naʻe kamata ke ne taʻetokaʻi ia ʻi hono lotó.+