ʻUluaki Kalonikali
18 ʻI ha taimi ki mui ai, naʻe ikunaʻi ʻe Tēvita ʻa e kau Filisitiá ʻo ne fakavaivaiʻi kinautolu pea faʻao ʻa Kati+ mo hono ngaahi kolo takatakaí* mei he nima ʻo e kau Filisitiá.+ 2 Pea naʻá ne ikunaʻi ʻa Mōape,+ pea naʻe hoko ʻa e kau Mōapé ko e kau sevāniti ʻa Tēvita pea nau ʻomi tukuhau.+
3 Naʻe ikunaʻi ʻe Tēvita ʻa Tuʻi Hetatesa+ ʻo Sopá+ ofi ki Hēmati+ ʻi he fononga atu ʻa Hetatesa ke fokotuʻu maʻu hono mafaí ʻi he Vaitafe ʻIufaletesí.+ 4 Naʻe hamu ʻe Tēvita ʻa e saliote ʻe 1,000, kau tangata heka hoosi ʻe toko 7,000, pea mo e kau sōtia ʻalu lalo ʻe toko 20,000 meiate ia.+ Hili iá, naʻe tuʻusi ʻe Tēvita ʻa e uoua ʻo e vaʻe ʻo e fanga hoosi toho salioté kotoa tuku kehe pē ʻa e fanga hoosi toho saliote+ ʻe 100. 5 ʻI he haʻu ʻa e kau Sīlia ʻo Tāmasikusí ke tokoni kia Tuʻi Hetatesa ʻo Sopá, naʻe taaʻi ai ʻe Tēvita ʻa e toko 22,000 ʻo e kau Sīliá.+ 6 Naʻe fokotuʻu leva ʻe Tēvita ha ngaahi nofoʻanga fakakautau ʻi Sīlia ʻo Tāmasikusí, pea naʻe hoko ʻa e kau Sīliá ko e kau sevāniti ʻa Tēvita ʻo nau ʻomi tukuhau. Naʻe foaki ʻe Sihova kia Tēvita ha ikuna* ʻi ha feituʻu pē naʻá ne ʻalu ki ai.+ 7 ʻIkai ngata aí, naʻe toʻo ʻe Tēvita ʻa e ngaahi pā fuopotopoto koulá mei he kau sevāniti ʻa Hetatesá peá ne ʻomi ia ki Selusalema. 8 Naʻe ʻave ʻe Tēvita ha kopa lahi ʻaupito mei Tipati mo Kuna, ʻa e ongo kolo ʻo Hetatesá. Naʻe ngaohiʻaki ia ʻe Solomone ʻa e fuʻu ʻaiʻanga vai kopá,+ ongo fuʻu poú, pea mo e ngaahi naunau kopá.+
9 ʻI he fanongo ʻa Tou ko e tuʻi ʻo Hēmatí kuo ikunaʻi ʻe Tēvita ʻa e kau tau kotoa ʻa Tuʻi Hetatesa+ ʻo Sopá,+ 10 naʻá ne fekauʻi atu leva ʻa hono foha ko Hatolamí kia Tuʻi Tēvita ke ʻeke pe ʻokú ne fēfē pea ke talamonū kiate ia koeʻuhi ko ʻene tauʻi ʻo ikunaʻi ʻa Hetatesá (he naʻe faʻa tauʻi ʻe Hetatesa ʻa Tou), pea naʻá ne ʻalu mo ha ngaahi meʻa kehekehe naʻe ngaohi mei he koula, siliva, pea mo e kopa. 11 Naʻe fakatoputapuʻi ʻe Tuʻi Tēvita ʻa e ngaahi meʻá ni maʻa Sihova,+ fakataha mo e siliva pea mo e koula kuó ne ʻave mei he kotoa ʻo e ngaahi puleʻangá: Mei ʻĪtomi mo Mōape, mei he kau ʻĀmoní,+ ko e kau Filisitiá,+ pea mo e kau ʻAmalekí.+
12 Naʻe taaʻi ʻe ʻApisai+ ko e tama ʻa Seluvaiá+ ʻa e kau ʻĪtomi ʻe toko 18,000 ʻi he Teleʻa Māsimá.+ 13 Naʻá ne fokotuʻu ha ngaahi nofoʻanga fakakautau ʻi ʻĪtomi, pea naʻe hoko ʻa e kau ʻĪtomí kotoa ko e kau sevāniti ʻa Tēvita.+ Naʻe foaki ʻe Sihova kia Tēvita ha ikuna* ʻi ha feituʻu pē naʻá ne ʻalu ki ai.+ 14 Naʻe pule ai pē ʻa Tēvita ki ʻIsileli kotoa,+ pea naʻá ne faifakamaau ʻi he totonu mo e māʻoniʻoni ki hono kakaí kotoa.+ 15 Ko Sioape ko e tama ʻa Seluvaiá naʻe pule ia ki he kau taú,+ pea ko Sihosafate+ ko e foha ʻo ʻAhilutí ʻa e tokotaha hiki fakamatalá, 16 ko Sātoki ko e foha ʻo ʻAhitupí mo ʻAhimeleki ko e foha ʻo ʻĀpaiatá naʻá na taulaʻeikí, pea ko Savisa naʻe sekelitalí. 17 Ko Penaia ko e foha ʻo Sihoiatá naʻe pule ki he kau Kēletí+ mo e kau Pēlití.+ Pea ko e ngaahi foha ʻo Tēvitá naʻa nau fika ʻuluaki ʻi he tuʻunga naʻe hoko hake ki he tuʻí.