Ua Kalonikali

11 ʻI he aʻu ʻa Lehopoame ki Selusalemá, naʻá ne fakatahatahaʻi mai leva ʻa e fale ʻo Siuta mo Penisimaní,+ ko e kau tangata tau kuo ʻosi akoʻi* ʻe toko 180,000, ke nau tauʻi ʻa ʻIsileli koeʻuhí ke toe fakafoki mai ʻa e puleʻangá kia Lehopoame.+ 2 Pea naʻe hoko mai ʻa e folofola ʻa Sihová kia Semaia+ ko e tangata ʻa e ʻOtua moʻoní, ʻo pehē: 3 “Lea kia Lehopoame ko e foha ʻo Solomone ko e tuʻi ʻo Siutá pea ki he kotoa ʻo ʻIsileli ʻi Siuta mo Penisimaní, 4 ‘Ko e meʻa eni ʻoku folofolaʻaki ʻe Sihová: “Kuo pau ke ʻoua naʻa mou ʻalu hake ʻo tauʻi homou fanga tokouá. Ke mou taki taha foki ki hono fale, he kuó u fakatupunga ʻa e meʻá ni ke hoko.”’”+ Ko ia naʻa nau talangofua ki he folofola ʻa Sihová ʻo nau foki pea naʻe ʻikai te nau ʻalu ke tauʻi ʻa Selopoame.

5 Naʻe nofo ʻa Lehopoame ʻi Selusalema peá ne langa ha ngaahi kolo fakakolotau ʻi Siuta. 6 Ko ia naʻá ne langa* ʻa Pētelihema,+ ʻEitami, Tēkoa,+ 7 Pete-sua, Soko,+ ʻAtulami,+ 8 Kati,+ Mālesa, Sifia,+ 9 ʻAtolaimi, Lākisi,+ ʻĀseka,+ 10 Sola, ʻAsaloni,+ pea mo Hepeloni,+ ko e ngaahi kolo fakakolotauʻi ia naʻe ʻi Siuta mo Penisimaní. 11 ʻIkai ngata aí, naʻá ne ʻai ke tuʻu kaukaua ʻa e ngaahi feituʻu naʻe fakakolotauʻí pea tuku ki ai ha kau ʻeikitau mo tokonaki ki ai ʻa e meʻakai mo e lolo pea mo e uaine, 12 pea naʻá ne tokonaki ki he ngaahi kolo kehekehé kotoa ha ngaahi fuʻu pā mo e ngaahi tao; naʻá ne ʻai ke mātuʻaki tuʻu kaukaua ʻaupito ia. Pea naʻá ne kei pule ai pē ki Siuta mo Penisimani.

13 Pea ko e kau taulaʻeiki mo e kau Līvai ʻa ia naʻa nau ʻi he kotoa ʻo ʻIsilelí naʻa nau kau mo ia, ʻo nau haʻu mei he kotoa ʻo honau ngaahi feituʻú. 14 Naʻe liʻaki ʻe he kau Līvaí ʻenau ngaahi kaikaiʻangá pea mo honau tofiʻá+ pea nau haʻu ki Siuta mo Selusalema, koeʻuhí he naʻe taʻofi kinautolu ʻe Selopoame mo hono ngaahi fohá mei heʻenau ngāue ko e kau taulaʻeiki kia Sihová.+ 15 Naʻe fakanofo leva ʻe Selopoame ia ʻa ʻene kau taulaʻeiki pē ʻaʻana ki he ngaahi potu māʻolungá+ ke nau ngāue ki he fanga tēmeniō fōtunga hangē ha kosí*+ pea ki he fanga kiʻi pulu naʻá ne ngaohí.+ 16 Pea ko e faʻahinga mei he ngaahi matakali kotoa ʻo ʻIsileli ʻa ia naʻe pau honau lotó ke kumi kia Sihova ko e ʻOtua ʻo ʻIsilelí naʻa nau muimui ʻi he kau taulaʻeikí mo e kau Līvaí ki Selusalema ke faifeilaulau kia Sihova ko e ʻOtua ʻo ʻenau fanga kuí.+ 17 Naʻa nau fakaivimālohiʻi ʻa e tuʻunga-tuʻi ʻo Siutá ʻi he taʻu ʻe tolu pea mo poupou kia Lehopoame ko e foha ʻo Solomoné, he naʻa nau ʻaʻeva ʻi he ʻalunga ʻo Tēvita mo Solomoné ʻi he taʻu ʻe tolu.

18 Pea naʻe ʻave ʻe Lehopoame ke hoko ko hono uaifi ʻa Mahalati ko e ʻofefine ʻo e foha ʻo Tēvita ko Selimotí pea ko e tama ʻa ʻApihaili ko e ʻofefine ʻo e foha ʻo Sese ko ʻEliapí.+ 19 ʻI he faai atu ʻa e taimí naʻá ne fanauʻi kiate ia ha ngaahi foha: Ko Seusi, Semalaia, pea mo Sahami. 20 ʻI he hili ʻa e fefine ko iá, naʻá ne mali mo Maaka ko e mokopuna ʻo ʻApisalomé.+ ʻI he faai atu ʻa e taimí naʻá ne fanauʻi kiate ia ʻa ʻĀpaia,+ ʻĒtai, Sīsā, pea mo Selomiti. 21 Naʻe ʻofa ʻa Lehopoame ʻia Maaka ko e mokopuna ʻo ʻApisalomé ʻo lahi ange ia ʻi he kotoa ʻo hono ngaahi uaifi kehé mo ʻene kau sinifú,+ he naʻá ne maʻu ha uaifi ʻe toko 18 mo e kau sinifu ʻe toko 60, pea naʻá ne hoko ko e tamai ʻa ha ngaahi foha ʻe toko 28 mo e ngaahi ʻofefine ʻe toko 60. 22 Ko ia naʻe fakanofo ʻe Lehopoame ʻa ʻĀpaia ko e tama ʻa Māká ke hoko ko e ʻulu mo e taki ʻi he lotolotonga ʻo hono fanga tokouá, he naʻá ne fakataumuʻa ke fakanofo ia ko e tuʻi. 23 Kae kehe, naʻá ne ngāueʻaki ʻa e mahinó ʻo ne fekauʻi* atu ʻa e niʻihi ʻo hono ngaahi fohá ki he kotoa ʻo e ngaahi feituʻu ʻo Siuta mo Penisimaní, ki he kotoa ʻo e ngaahi kolo naʻe fakakolotauʻí,+ pea ʻoange kiate kinautolu ʻa e ngaahi tokonaki lahi fau mo maʻu mai ha ngaahi uaifi tokolahi moʻonautolu.