Ua Kalonikali

27 Naʻe taʻu 25 ʻa Siotame+ ʻi heʻene hoko ko e tuʻí, pea naʻá ne pule ʻi he taʻu ʻe 16 ʻi Selusalema. Ko e hingoa ʻo ʻene faʻeé ko Selusa ko e ʻofefine ʻo Sātoki.+ 2 Naʻá ne hanganaki fai ʻa e meʻa naʻe totonu ʻi he vakai mai ʻa Sihová, ʻo hangē tofu pē ko ia naʻe fai ʻe heʻene tamai ko ʻŪsaiá,+ tuku kehe pē naʻe ʻikai te ne hū noaʻia ki he temipale ʻo Sihová.+ Ka naʻe kei fai pē ʻe he kakaí ʻa e tōʻonga fakatupu maumau. 3 Naʻá ne langa ʻa e matapā ʻolunga ʻo e fale ʻo Sihová,+ pea naʻe lahi ʻa e meʻa naʻá ne langa ʻi he ʻā ʻo ʻŌfilí.+ 4 Naʻá ne toe langa ha ngaahi kolo+ ʻi he feituʻu moʻungaʻia ʻo Siutá,+ pea mo ha ngaahi feituʻu fakakolotau+ mo ha ngaahi taua+ ʻi he ngaahi vaotaá. 5 Naʻá ne faitau mo e tuʻi ʻo e kau ʻĀmoní+ pea naʻe faifai atu pē ʻo ne ikunaʻi kinautolu, ko ia naʻe ʻoange ʻe he kau ʻĀmoní kiate ia ʻi he taʻu ko iá ha talēniti* siliva ʻe 100, fua koa* ʻe 10,000 ʻo e uite, mo e fua koa paʻale ʻe 10,000. Naʻe tukuhau ʻaki ʻe he kau ʻĀmoní ʻa e meʻá ni kiate ia ʻi he taʻu hono uá mo hono tolú.+ 6 Ko ia naʻe fakaʻaʻau ai pē ke mālohi ʻa Siotame, he naʻá ne fou ʻi he ʻalunga totonú ʻi he ʻao ʻo Sihova ko hono ʻOtuá.

7 Ko e meʻa ki he toenga ʻo e hisitōlia ʻo Siotamé, mo e kotoa ʻo ʻene ngaahi faitaú mo hono ngaahi ʻalungá, kuo hiki ia ʻi he Tohi ʻo e Ngaahi Tuʻi ʻo ʻIsileli mo Siutá.+ 8 Naʻá ne taʻu 25 ʻi heʻene hoko ko e tuʻí, pea naʻá ne pule ʻi he taʻu ʻe 16 ʻi Selusalema.+ 9 Pea naʻe toka ʻa Siotame ʻo mālōlō fakataha mo ʻene fanga kuí, pea naʻa nau tanu ia ʻi he Kolo-ʻo-Tēvitá.+ Pea naʻe hoko ʻa hono foha ko ʻĀhasí ko e tuʻi ʻo fetongi ia.+