Nehemaia

12 Ko e kau taulaʻeiki eni mo e kau Līvai naʻa nau ʻalu hake mo Seluipēpeli+ ko e foha ʻo Saletilí,+ pea mo Sīsuá:+ Ko Sēlaia, Selemaia, ʻĒsela, 2 ʻAmalaia, Maluki, Hatusi, 3 Sikania, Lēhumi, Milemoti, 4 ʻIto, Kinetoi, ʻĀpaia, 5 Misamini, Mātaia, Pileka, 6 Semaia, Sialipe, Sitaia, 7 Salu, ʻĀmoki, Hilikaia, pea mo Sitaia. Ko e ngaahi ʻulu eni ʻo e kau taulaʻeikí mo honau fanga tokouá ʻi he ngaahi ʻaho ʻo Sīsuá.

8 Ko e kau Līvaí ko Sīsua, Pinui, Katimieli,+ Selepaia, Siuta, mo Matanaia,+ ʻa ia naʻá ne tataki ʻa e ngaahi hiva fakafetaʻí fakataha mo hono fanga tokouá. 9 Pea ko Pakipukaia mo ʻUni ko honau ongo tokouá naʻá na tuʻu ʻo fehāngaaki mo kinautolu ki he ngaahi fatongia leʻó.* 10 Naʻe hoko ʻa Sīsua ko e tamai ia ʻa Sioiakimí, pea naʻe hoko ʻa Sioiakimi ko e tamai ia ʻa ʻEliasipí,+ pea ko ʻEliasipi ko e tamai ia ʻa Sioiatá.+ 11 Pea naʻe hoko ʻa Sioiata ko e tamai ia ʻa Sionatané, pea naʻe hoko ʻa Sionatane ko e tamai ia ʻa Sātuá.

12 ʻI he ngaahi ʻaho ʻo Sioiakimí, ko e kau taulaʻeikí eni, ko e ngaahi ʻulumotuʻa ʻo e ngaahi fale ʻo e ngaahi tamaí: Ko e fakafofonga kia Sēlaiá+ ko Melaia; kia Selemaiá ko Henania; 13 kia ʻĒselá,+ ko Mēsuilame; kia ʻAmalaiá ko Siohanani; 14 kia Maluké, ko Sionatane; kia Sepanaiá, ko Siosefa; 15 kia Halimí,+ ko ʻAtinā; kia Melaiotí, ko Helekai; 16 kia ʻItó, ko Sākalaia; kia Kinitoní, ko Mēsuilame; 17 kia ʻĀpaiá,+ ko Sikeli; kia Miniaminí, . . .  ;* kia Moataiá, ko Pilitai; 18 kia Pileká,+ ko Samua; kia Semaiá, ko Sihonatani; 19 kia Sialipé, ko Matenai; kia Sitaiá,+ ko ʻOsi; 20 kia Salaí, ko Kalai; kia ʻĀmokí, ko ʻEpa; 21 kia Hilikaiá, ko Hasapaia; kia Sitaiá ko Netanili.

22 Naʻe tohi ʻa e ngaahi ʻulumotuʻa ʻo e ngaahi fale ʻo e ngaahi tamai ʻa e kau Līvaí pea pehē ki he kau taulaʻeikí ʻi he ngaahi ʻaho ʻo ʻEliasipi, Sioiata, Siohānani, mo Sātuá,+ ʻo aʻu mai ki he pule fakatuʻi ʻa Talaiasi ko e Pēsiá.

23 Ko e kau Līvai ʻa ia ko e ngaahi ʻulumotuʻa ʻo e ngaahi fale ʻo e ngaahi tamaí naʻe hiki kinautolu ʻi he tohi ʻo e hisitōlia ʻo e ngaahi meʻa ʻi he taimi ko iá, ʻo aʻu ki he ngaahi ʻaho ʻo Siohānani ko e foha ʻo ʻEliasipí. 24 Ko e ngaahi ʻulu ʻo e kau Līvaí ko Hasapaia, Selepaia, pea mo Sīsua+ ko e foha ʻo Katimielí,+ pea ko honau fanga tokouá naʻa nau tuʻu ʻo fehāngaaki mo kinautolu ke ʻohake ʻa e fakahīkihiki mo fai ʻa e fakamālō ʻo fakatatau ki he ngaahi fakahinohino ʻa Tēvita+ ko e tangata ʻa e ʻOtua moʻoní, ʻo tuʻu ʻa e kulupu leʻo ʻo hoko mai ki he kulupu leʻo. 25 Ko Matanaia,+ Pakipukaia, ʻOpataia, Mēsuilame, Talemoni, mo ʻĀkupi+ naʻa nau tuʻu ʻo leʻo ʻi he tuʻunga ko e kau leʻo matapā,+ ʻo leʻohi ʻa e ngaahi loki tukuʻanga koloa ʻi he ngaahi veʻe matapaá. 26 Naʻe ngāue ʻa e faʻahingá ni ʻi he ngaahi ʻaho ʻo Sioiakimi ko e foha ʻo Sīsua+ ko e foha ʻo Siosatakí pea ʻi he ngaahi ʻaho ʻo Nehemaia ko e kōvaná mo ʻĒsela+ ko e taulaʻeiki pea ko e tokotaha hiki-tataú.*

27 ʻI hono fakatapui ʻa e ngaahi ʻā ʻo Selusalemá, naʻa nau kumi ʻa e kau Līvaí pea ʻomi kinautolu ki Selusalema mei he feituʻu kotoa pē naʻa nau nofo aí ke kātoangaʻi ʻa e fakatapui ʻo e ʻaá ʻi he fiefia, mo e ngaahi hiva fakafetaʻi,+ mo e ngaahi simipale, mo e ngaahi meʻalea filo, pea mo e ngaahi haʻape. 28 Pea naʻe fakatahataha mai ʻa e ngaahi foha ʻo e kau hivá* mei he vahefonuá,* mei he takatakai kotoa ʻo Selusalemá, mei he ngaahi nofoʻanga ʻo e kau Netofá,+ 29 mei Pete-kilikali,+ pea mei he ngaahi feituʻu ʻo Kepā+ mo ʻAsimavetí,+ he naʻe langa ʻe he kau hivá ʻa e ngaahi nofoʻanga moʻonautolu ʻi he takatakai kotoa ʻo Selusalemá. 30 Pea ko e kau taulaʻeikí mo e kau Līvaí naʻa nau fakamaʻa kinautolu, pea naʻa nau fakamaʻa ʻa e kakaí,+ mo e ngaahi matapaá,+ pea mo e ʻaá.+

31 Pea naʻá ku ʻohake ʻa e houʻeiki ʻo Siutá ki he funga ʻaá. ʻIkai ko ia pē, naʻá ku fokotuʻutuʻu ʻa e fuʻu kau hiva fakafetaʻi ʻe ua mo e kau laka, pea ko e taha naʻe laka ia ki he toʻomataʻu ʻo e ʻaá ki he Matapā Vevé.+ 32 Ko Hōsaia mo e vaeua ʻo e houʻeiki ʻo Siutá naʻa nau lue ʻi mui ʻiate kinautolu, 33 fakataha mo ʻAsalaia, ʻĒsela, Mēsuilame, 34 Siuta, Penisimani, Semaia, pea mo Selemaia. 35 Naʻe kau mo kinautolu ʻa e niʻihi ʻo e ngaahi foha ʻo e kau taulaʻeikí fakataha mo e ngaahi talupite:+ Ko Sākalaia ko e foha ʻo Sionatane ko e foha ʻo Semaia ko e foha ʻo Matanaia ko e foha ʻo Maikaia ko e foha ʻo Sakuli ko e foha ʻo ʻĒsafé,+ 36 mo hono fanga tokoua ko Semaia, ʻAsalili, Milalai, Kilalai, Maʻai, Netanili, Siuta, pea mo Hēnani, fakataha mo e ngaahi meʻalea ʻa Tēvita+ ko e tangata ʻa e ʻOtua moʻoní; pea ko ʻĒsela+ ko e tokotaha hiki-tataú* naʻá ne ʻalu ʻi muʻa ʻiate kinautolu. 37 ʻI he Matapā Faunitení+ naʻa nau ʻalu hangatonu hake ai ki he Sitepu+ ʻo e Kolo-ʻo-Tēvitá+ ʻi he tahake ʻi he ʻaá ʻi ʻolunga ʻi he Fale ʻo Tēvitá pea ki he Matapā Vaí+ ki he hahaké.

38 Ko e kau hiva fakafetaʻi ʻe tahá naʻa nau lue ʻi he tafaʻaki ʻe tahá,* pea naʻá ku muimui ai mo e vaeua ʻo e kakaí, ʻo ʻalu atu ʻi he ʻaá ʻo fakalaka atu ʻi he Taua ʻo e Ngaahi ʻŌvaní+ pea ki he ʻĀ Laulahí+ 39 pea ʻalu hake ʻi he Matapā ʻo ʻIfalemí+ pea ki he Matapā ʻo e Kolo Motuʻá+ pea ki he Matapā Iká,+ mo e Taua ʻo Henanelí,+ mo e Taua ʻo Meá, pea ki he Matapā Sipí;+ pea naʻa nau ʻalu atu ʻo tuʻu ʻi he Matapā ʻo e Kaʻaté.

40 Naʻe tuʻu fuoloa ʻa e ongo kau hiva fakafetaʻí ʻi muʻa ʻi he fale ʻo e ʻOtua moʻoní; pea pehē kiate au mo e vaeua ʻo e kau tokoni pule naʻe ʻiate aú, 41 pea mo e kau taulaʻeikí, ʻa ʻIlaiakimi, Māseia, Miniamini, Maikaia, ʻElioenai, Sākalaia, mo Henania, ʻa ia naʻa nau toʻo ʻa e ngaahi talupité, 42 pea mo Māseia, Semaia, ʻEliesa, ʻOsi, Siohanani, Malakaia, ʻĪlami, pea mo ʻĒseli. Pea naʻe hiva leʻo-lahi ʻa e kau hivá ʻi he tataki ʻa ʻIsilaiá.

43 ʻI he ʻaho ko iá naʻa nau ʻohake ʻa e ngaahi feilaulau lahi pea nau fiefia,+ he naʻe ʻai ʻe he ʻOtua moʻoní ke nau fiefia ʻi he fiefia lahi. Naʻe fiefia+ foki mo e kau fefiné mo e fānaú, ko ia naʻe lava ke ongona mei he mamaʻó ʻa e fiefia ʻi Selusalemá.+

44 ʻI he ʻaho ko iá naʻe fakanofo ʻa e kau tangata ke nau tokangaʻi ʻa e ngaahi fale tukuʻanga koloa+ ki he ngaahi meʻaʻofá,+ mo e ʻuluaki fuá,+ mo e ngaahi vahe hongofulú.+ Naʻe fiemaʻu ke nau tānaki ki ai ʻa e ngaahi ʻinasi mei he ngaahi ngoue ʻa e ngaahi koló ʻa ia naʻe fiemaʻu ʻe he Laó+ ki he kau taulaʻeikí mo e kau Līvaí,+ he naʻe ʻi ai ʻa e fiefia ʻi Siuta koeʻuhí ko e faifatongia ʻa e kau taulaʻeikí mo e kau Līvaí. 45 Pea naʻa nau kamata tokangaʻi ʻa e ngaahi fatongia ki honau ʻOtuá mo e fatongia fekauʻaki mo e fakamaʻá, pea naʻe fai pehē mo e kau hivá mo e kau leʻo matapaá, ʻo fakatatau ki he ngaahi fakahinohino ʻa Tēvita mo hono foha ko Solomoné. 46 He ʻi he ngaahi ʻaho ʻo Tēvita mo ʻĒsafe ʻi he kuohilí, naʻe ʻi ai ha kau tataki* ki he kau hivá pea mo e ngaahi hiva ʻo e fakahīkihiki mo e fakafetaʻi ki he ʻOtuá.+ 47 Pea ʻi he lolotonga ʻa e ngaahi ʻaho ʻo Seluipēpeli+ pea mo Nehemaiá, naʻe foaki ai ʻe ʻIsileli kotoa ʻa e ngaahi ʻinasi ki he kau hivá+ mo e kau leʻo matapaá,+ ʻo fakatatau ki heʻenau fiemaʻu fakaʻahó. Naʻa nau vaheʻi foki ʻa e ʻinasi ki he kau Līvaí,+ pea naʻe vaheʻi ʻe he kau Līvaí ʻa e ʻinasi ki he hako ʻo ʻĒloné.