Nehemaia

6 Pea ʻi hono tala atu pē kia Sanipalate, Tōpaia,+ Kēsemi ko e tangata ʻAlepeá,+ pea mo e toenga ʻo homau ngaahi filí naʻá ku toe langa ʻa e ʻaá+ pea ʻoku ʻikai ke kei toe ʻi ai ha avá (neongo ʻi he aʻu mai ki he taimi ko iá naʻe teʻeki ai ke u fokotuʻu ʻa e ngaahi laumatapā ʻo e ngaahi matapaá),+ 2 naʻe ʻomi ʻi he taimi pē ko iá ʻe Sanipalate mo Kēsemi ʻa e pōpoakí ni kiate au: “Haʻu, pea ke tau fokotuʻu ha taimi ke tau fakataha ai ʻi he ngaahi kolo ʻi he Teleʻa Lautoka ko Onó.”+ Ka naʻa nau faʻufaʻu ke fai ha kovi kiate au. 3 Ko ia naʻá ku fekauʻi atu ai ha kau talafekau kiate kinautolu, ʻo pehē: “ʻOku ou moʻua ʻi ha ngāue lahi, pea ʻe ʻikai lava ke u ʻalu hifo. Ko e hā ke taʻofi ai ʻa e ngāué ʻo liʻaki ia ka u ʻalu atu au kiate kimoutolu?” 4 Naʻe tuʻo fā ʻenau ʻomi kiate au ʻa e pōpoaki tatau, pea naʻá ku ʻoange kiate kinautolu ʻa e tali tatau ʻi he taimi taki taha.

5 Naʻe fekauʻi mai leva ʻe Sanipalate kiate au ʻa ʻene tamaioʻeikí mo e pōpoaki tatau ko hono tuʻo nimá ia, ʻokú ne toʻo ha tohi kuo fakaava. 6 Naʻe tohi ai ʻo pehē: “Kuo fanongoa ʻi he lotolotonga ʻo e ngaahi puleʻangá, pea ʻoku leaʻaki foki ia ʻe Kēsemi,+ ko koe mo e kau Siú ʻoku mou faʻufaʻu ke fai ha angatuʻu.+ Ko e ʻuhinga ia ʻokú ke langa ai ʻa e ʻaá; pea fakatatau ki he ngaahi fakamatala ko ení te ke hoko koe ko honau tuʻi. 7 Pehē foki, kuó ke fakanofo ha kau palōfita ke nau fai ha fanongonongo fekauʻaki mo koe ʻi Selusalema kotoa, ‘ʻOku ʻi ai ha tuʻi ʻi Siuta!’ Pea ko eni ʻe fakahā ʻa e ngaahi meʻá ni ki he tuʻí. Ko ia ai, haʻu, pea ke tau lāulea fakataha ki he meʻá ni.”

8 Kae kehe, naʻá ku ʻoatu kiate ia ʻa e talí ni: “Kuo halaʻatā ke hoko ʻa e ngaahi meʻa ko eni ʻokú ke leaʻakí; ʻokú ke faʻufaʻu ia ʻi hoʻo fakakaukaú pē.”* 9 He naʻa nau feinga kotoa ke fakamanavaheeʻi kimautolu, ʻi he pehē: “ʻE vaivai ʻa honau nimá ʻi he ngāué, pea heʻikai ke lava ia.”+ Ko eni, ʻoku ou lotu ke fakaivimālohiʻi ʻa hoku nimá.+

10 Naʻá ku ʻalu leva ki he fale ʻo Semaia ko e foha ʻo Telaia ko e foha ʻo Mehetapelí lolotonga ʻene nofo maʻu aí. Naʻá ne pehē mai: “Ta fokotuʻu ha taimi ke ta fetaulaki ai ki he fale ʻo e ʻOtua moʻoní, ʻi loto ʻi he temipalé, pea ke ta tātāpuni ʻa e ngaahi matapā ʻo e temipalé, he ʻoku nau haʻu ke tāmateʻi koe. ʻOku nau haʻu poʻuli ke tāmateʻi koe.” 11 Ka naʻá ku pehē ange: “ʻE hola koā ha tangata hangē ko aú? ʻE lava koā ha tangata hangē ko aú ʻo hū ki he temipalé pea moʻui?+ Heʻikai te u hū au ki ai!” 12 Pea naʻá ku ʻiloʻi ai naʻe ʻikai ke fekauʻi mai ia ʻe he ʻOtuá, ka naʻe totongiʻi ia ʻe Tōpaia mo Sanipalate+ ke ne leaʻaki kiate au ʻa e kikité ni. 13 Naʻe totongiʻi ia ke ne fakamanavaheeʻi au pea ke fakatupunga ke u faiangahala, koeʻuhí ke na maʻu ai ha makatuʻunga ke maumauʻi ʻa hoku ongoongó koeʻuhí ke lumaʻi ai au.

14 Ke ke manatuʻi, ʻe hoku ʻOtua, ʻa Tōpaia+ mo Sanipalate pea mo e ngaahi ngāue ko ení, pea pehē foki kia Noataia ko e palōfita fefiné pea mo e toenga ʻo e kau palōfita ko ia naʻa nau toutou feinga ke fakamanavaheeʻi aú.

15 Ko ia naʻe kakato ʻa e ʻaá ʻi he ʻaho hono 25 ʻo ʻĒlulí,* ʻi he ʻaho ʻe 52.

16 ʻI he fanongo pē ai ʻa e kotoa ʻo homau ngaahi filí pea sio ki ai ʻa e kotoa ʻo e ngaahi puleʻanga takatakaí, naʻa nau hoko ai ʻo mā lahi,*+ pea naʻa nau ʻiloʻi ko e tokoni ia ʻa homau ʻOtuá kuo lava ai ʻa e ngāué ni. 17 ʻI he ngaahi ʻaho ko iá naʻe ʻoatu ai ʻe he houʻeiki+ ʻo Siutá ʻa e ngaahi tohi lahi kia Tōpaia, pea naʻe faʻa fai ʻe Tōpaia ʻa e tali ki ai. 18 Naʻe fai ʻe he tokolahi ʻi Siuta ha fakapapau ke mateaki kiate ia, he ko ha foha-ʻi-he-fono ia ʻo Sikania ko e foha ʻo ʻAlaʻá,+ pea ko hono foha ko Siohananí naʻe mali mo e ʻofefine ʻo Mēsuilame+ ko e foha ʻo Pelekaiá. 19 Pehē foki, naʻa nau toutou tala mai kiate au ʻa e ngaahi meʻa lelei fekauʻaki mo ia pea nau fakamatala leva kiate ia ʻa e meʻa naʻá ku leaʻakí. Pea naʻe faʻa ʻomi leva ʻe Tōpaia ha ngaahi tohi ke fakamanavaheeʻi ʻaki au.+